Izaayii
13 Tɔm ndʋ pɔyɔɔdɩ Babilɔɔnɩ yɔɔ+ nɛ Amoozɩ pɩyalʋ Izaayii+ na-tʋ natʋ taa yɔ:
2 «Ɩkpazɩ yʋsaɣ*+ pʋʋ ŋgʋ kɩ-yɔɔ nɛ kaaŋ weyi ɩ-yɔɔ fɛyɩ nabʋyʋ yɔ kɩ-yɔɔ.
Ɩyaa-wɛ, ɩhadɩ-wɛ nesi,
Nɛ pɔkɔɔ pasʋʋ mba pa-hɩla sɛwa yɔ pɔ-nɔnɔsɩ taa.
3 Manɖʋ paɣtʋ mba malɩzɩ-wɛ yɔ.*+
Maya mo-you laɖaa se palɩzɩ man-pana nɛ pawɩlɩ,
Mɛ-ɛyaa mba pɛmɛyɩɣnɩ agʋnda* yɔ.
4 Iwelisi! Samaɣ sɔsɔɔ nakɛyɛ wɛ pʋŋ taa;
Kalakɩ kɔkɔɖɛ ɛzɩ ɛyaa sakɩyɛ yɔ!
Iwelisi! Kewiyisi kɔkɔɖɛ,
Ajɛɛ wena akpeɣlaa yɔ a-kɔkɔɖɛ!+
Yoyaa tɛ Yehowa wɛɛ nɛ ekpeɣliɣ sɔɔjanaa se pala you.+
5 Palɩnɩ ɛjaɖɛ poliŋ ñɩnɖɛ naɖɩyɛ taa nɛ pɔkɔŋ,+
Palɩnɩ ɛsɔdaa kamasɩ yɔɔ,
Yehowa nɛ ɛ-pana you wondu peɖiɣni kɔm,
Se pɔkɔnɩ asɛyʋʋ tɛtʋ kpeekpe yɔɔ.+
6 Iwii wɔɔɔ, mbʋ pʋyɔɔ yɔ Yehowa kɩyakʋ ñɔtaa!
Kɩkaɣ kɔm ɛzɩ ɖɩzʋʋ mbʋ pɩlɩnɩ Ðoŋ Tɩŋa Tʋ cɔlɔ yɔ.+
7 Pʋyɔɔ pɩkaɣ camʋʋ nesi kpeekpe,
Nɛ sɔɔndʋ kaɣ yebu nɛ paa ɛyʋ weyi lɛ ɛ-laŋɩyɛ yoli.+
8 Ɛyaa wɛ sɔɔndʋ sɔsɔtʋ taa.+
Pekpekpeɖiɣ nɛ panɩɣ siziŋ,
Ɛzɩ halʋ weyi ɛwɛɛ nɛ ɛnɩɣ lʋlʋʋ wɩzasɩ yɔ.
Pɔcɔŋnɩ ɖama nɛ sɔɔndʋ,
Wɩzasɩ yeba nɛ pɛ-ɛsɩndaa sɛɛ.
9 Ɩna! Yehowa kɩyakʋ ɖiɣni kɔm,
Kɩkɔŋnɩ ɖɩwɩzɩyɛ sɔsɔɖɛ nɛ pana siŋŋ nɛ kɩɩkaɣ naʋ nɔɔyʋ pʋtɔdɩyɛ,
Kɩkɔŋ se kɩla nɛ ɛjaɖɛ pɩsɩ sɔɔndʋ pʋyʋ,+
Nɛ kɩɖɩzɩ ɛjaɖɛ taa kɩwɛɛkɩm laɖaa.
10 Mbʋ pʋyɔɔ yɔ ɛsɔdaa tɩɩnzɩ nɛ si-tindima*+
Paakaɣ haʋ pa-ñalɩmɩyɛ;
Wɩsɩ kaɣ yuu cɩkpɛndʋʋ alɩwaatʋ ndʋ sɩlɩɣ yɔ,
Nɛ fenaɣ ɛɛkaɣ ñandʋʋ.
11 Mankaɣ tɛtʋ pɔzʋʋ akɔnta tɩ-kɩdɛkɛdɩm lakasɩ yɔɔ,+
Nɛ mɔnpɔzɩ akɔnta kañatʋ tɩnaa pa-kɩdɛkɛdɩm yɔɔ.
Mankaɣ yebu nɛ tɩ kpazɩyaa cajayɛ sɩɩ tɩnaɣ,
Nɛ mankaɣ luzuu ñʋndɩnaa mba pɛkɛ nazɩyaa yɔ pa-tɩ kpazʋʋ.+
12 Mankaɣ yebu nɛ ɛyʋ yem wɛɛ kɛdɛɖaɣ nɛ pɩkɩlɩ sika kele kele ñɩŋga,+
Nɛ ɛyaa wɛɛ kɛdɛɖaɣ nɛ pɩkɩlɩ Ofiiri sika.+
13 Pʋyɔɔ mankaɣ labʋ nɛ ɛsɔdaa seli,
Nɛ pɩkaɣ tɛtʋ ñamsʋʋ nɛ pɩkʋsɩ-tʋ ti-lone taa+
Yoyaa tɛ Yehowa ɖɩwɩzɩyɛ sɔsɔɖɛ taa, ɛ-pana sɔsɔna kɩyakʋ wiye.
14 Ɛzɩ nɛnzɛm weyi pɔɖɔɔnɩ-ɩ yɔ nɛ ɛzɩ ewiɖe nɖɩ nɔɔyʋ fɛyɩ se ekpeɣli-ɖɩ yɔ,
Paa weyi ɛkaɣ pɩsʋʋ ɛ-maɣmaɣ ɛ-samaɣ cɔlɔ;
Paa weyi ɛkaɣ seu nɛ ewolo ɛ-maɣmaɣ ɛ-ɛjaɖɛ taa.+
15 Weyi pehikiɣ-i yɔ pakaɣ-ɩ sɔbʋ nɛ ɛsɩ,
Nɛ weyi pakpaɣ-ɩ yɔ pakaɣ-ɩ kʋʋ nɛ laɣɖɛ.+
16 Pakaɣ pʋʋtʋʋ pe-piya pɛ-ɛsɩndaa,+
Pakaɣ lazʋʋ pa-ɖɩsɩ taa ñɩm,
Nɛ pakaɣ kpaʋ pa-halaa nɛ ɖoŋ nɛ pasʋʋnɩ-wɛ.
17 Na! Menɖiɣni kʋsʋʋ Medii mba se powolo pa-wayɩ,+
Mba paakpakɩɣ liidiye nɛ payaɣ pʋyʋ yɔ
Nɛ mba patɩsɔɔlɩ sika yɔ.
18 Pɔ-tɔŋ kaɣ pʋʋtʋʋ pe-evebiya;+
Nɔkɔyʋʋ taa piya tɔm ɛɛkaɣ-wɛ labʋ pʋtɔdɩyɛ
Nɛ paakaɣ naʋ piya pʋtɔdɩyɛ.
19 Nɛ Babilɔɔnɩ, kewiyaɣ ŋga ka-samtʋ kpaɖɩ kewiyisi lɛɛsɩ yɔ,*+
Kalɩdee mba keɖeɣa nɛ pa-cajayɛ,+
Kaɣ wɛʋ ɛzɩ Sodom nɛ Gomɔɔrɩ alɩwaatʋ ndʋ Ɛsɔ yɔkɩ-wɛ yɔ.+
20 Nɔɔyʋ ɛɛkaɣ tasʋʋ wɛʋ kɩ-taa wiɖiyi,
Nɛ kɩɩkaɣ kɛʋ ɖɔɖɔ lone nɖɩ ɖɩ-taa ɛyʋ cakɩ yɔ kpaɖɩŋ kpeekpe taa.+
Arabii tʋ nɔɔyʋ ɛɛkaɣ siɣu e-kizinziku peeɖe,
Nɛ ninɖiɣyaa nabɛyɛ ɩɩkaɣ wonuu pa-kpɩna se ahɛzɩ peeɖe.
21 Kañɩmbusuu taa kpɩna kaɣ hɩnʋʋ peeɖe;
Kpiziŋ kaɣ suu pa-ɖɩsɩ taa.
22 Kpɩna wena awiɣ yɔ akaɣ mabʋ kubusi ki-tilima taa,
Nɛ tɛyɛ hasɩ kaɣ mabʋ kubusi kɩ-awiya ɖɩsɩ kɩbanzɩ taa.
Kɩ-alɩwaatʋ ñɔtaa, nɛ paakaɣ tuzuu kɩ-kɩyakɩŋ.»+