Ɛsɩdrasɩ
7 Pʋwayɩ lɛ, Pɛrɩsɩ wiyaʋ Artaazɛɛrɩzɛɛsɩ+ kewiyitu tɔɔʋ alɩwaatʋ taa, Ɛsɩdrasɩ*+ pɩsɩ nɛ ɛkɔɔ. Ɛɛkɛ Seraya+ pɩyalʋ, Azariya pɩyalʋ, Hilikiya+ pɩyalʋ, 2 Saalum pɩyalʋ, Sadɔɔkɩ pɩyalʋ, Ahitub pɩyalʋ, 3 Amariya pɩyalʋ, Azariya+ pɩyalʋ, Merayɔɔtɩ pɩyalʋ, 4 Zerayiya pɩyalʋ, Uuzi pɩyalʋ, Bukii pɩyalʋ, 5 Abisuwa pɩyalʋ, Fineyaasɩ+ pɩyalʋ, Eleyaazaarɩ+ pɩyalʋ, cɔjɔ sɔsɔ Aarɔɔnɩ+ pɩyalʋ. 6 Ɛsɩdrasɩ ɛnʋ ɛlɩnɩ Babilɔɔnɩ nɛ ɛkɔɔ. Ɛɛkɛ takayɩsɩ mayʋ* weyi ɛɛsɩm Moyizi Paɣtʋ+ camɩyɛ yɔ,* ndʋ Izrayɛɛlɩ tɛ Ɛsɔ Yehowa kaaɖʋwa yɔ. Wiyaʋ kaacɛlɩ-ɩ mbʋ payɩ ɛpɔzaa yɔ, mbʋ pʋyɔɔ yɔ ɛ-Ɛsɔ Yehowa nesi kaawɛ ɛ-yɔɔ.
7 Izrayɛɛlɩ mba, cɔjɔnaa, Leevi mba,+ hendu teyaa,+ nɔnɔsɩ yɔɔ ɖaŋɩyaa+ nɛ templo taa lɩmɖʋyaa,*+ pa-taa nabɛyɛ kpa Yeruzalɛm, Wiyaʋ Artaazɛɛrɩzɛɛsɩ pɩnaɣ 7 ñɩŋga taa. 8 Nɛ Ɛsɩdrasɩ kɔɔ Yeruzalɛm fenaɣ 5 ñɩŋga taa, wiyaʋ pɩnaɣ 7 ñɩŋga taa. 9 Ɛkʋyɩ Babilɔɔnɩ fenaɣ kajalaɣ ñɩŋga kɩyakʋ kajalaɣ ñɩŋgʋ wiye nɛ ɛpaɣzɩ nʋmɔʋ ɖɔm, nɛ ɛtalɩ Yeruzalɛm fenaɣ 5 ñɩŋga kɩyakʋ kajalaɣ ñɩŋgʋ wiye, mbʋ pʋyɔɔ yɔ ɛ-Ɛsɔ nesi kɩbanzɩ kaawɛ ɛ-yɔɔ.+ 10 Ɛsɩdrasɩ kaañɔɔzɩ ɛ-laŋɩyɛ* se ɛpɩzɩ nɛ ɛtazɩ Yehowa Paɣtʋ taa nɛ ɛɖɔ tɩ-yɔɔ,+ nɛ ɛwɩlɩ tɩ-taa ɖʋtʋ nɛ tɔm hʋʋ paɣtʋ Izrayɛɛlɩ taa.+
11 Takayaɣ ŋga Wiyaʋ Artaazɛɛrɩzɛɛsɩ cɛlɩ Ɛsɩdrasɩ weyi ɛɛkɛ cɔjɔ nɛ takayɩsɩ mayʋ,* nɛ ɛɛwɛ niye Yehowa paɣtʋ nɛ ɛ-kpalɩtʋ ndʋ ɛcɛlɩ Izrayɛɛlɩ yɔ tɩ-kpɛlɩkʋʋ taa yɔ, ka-taa tɔm yɔ:
12 * «Awiya taa wiyaʋ Artaazɛɛrɩzɛɛsɩ+ maɣnɩ tɔm tʋnɛ cɔjɔ Ɛsɩdrasɩ, weyi ɛɖaɣnɩɣ maʋ ɛsɔdaa Ɛsɔ Paɣtʋ yɔ: Wɛɛnɩ laŋhɛzɩyɛ kiya. Lɛɛlɛɛyɔ 13 manɖʋ paɣtʋ se men-kewiyaɣ taa Izrayɛɛlɩ mba tɩŋa payɩ nɛ pɔ-cɔjɔnaa nɛ Leevi ñɩma mba pɔsɔɔlaa se patɩŋɩ-ŋ nɛ powolo Yeruzalɛm yɔ, pɛɖɛɛ.+ 14 Mbʋ pʋyɔɔ yɔ wiyaʋ nɛ ɛ-lɔŋ tasɩyaa 7 petiyiɣ-ŋ se ŋwolo nɛ ŋtazɩ nɛ ŋna se pɛwɛɛ nɛ pɔɖɔŋ ñɛ-Ɛsɔ Paɣtʋ ndʋ tɩwɛ ñɔ-cɔlɔ yɔ* tɩ-yɔɔ Yuuda nɛ Yeruzalɛm yaa we; 15 kpɛndɩnɩ liidiye nɛ sika ŋga wiyaʋ nɛ ɛ-lɔŋ tasɩyaa pahanɩ sɔɔlɩm faaa Izrayɛɛlɩ tɛ Ɛsɔ weyi ɛ-ɖɩjaɣyɛ wɛ Yeruzalɛm yɔ, 16 nɛ pɩkpɛndɩnɩ liidiye nɛ sika ŋga payɩ ŋmʋʋ* Babilɔɔnɩ egeetiye tɩŋa taa yɔ, nɛ pɩtasɩnɩ kʋjɔʋ ŋgʋ samaɣ nɛ cɔjɔnaa pahaɣnɩ sɔɔlɩm faaa pɛ-Ɛsɔ ɖɩɣa ŋga kɛwɛ Yeruzalɛm yɔ.+ 17 Nɛ ŋkpaɣ liidiye nɖɩ nɛ ŋyabɩnɩ naŋ abalɩñɩŋ,+ ɛyaŋ,+ heɣsi,+ nɛ tɔɔnaɣ pee+ wena palaɣnɩ kpɩna ana yɔ nɛ kilizasɩ+ kpɛdɛyɛ, nɛ ŋwoni mɩ-Ɛsɔ ɖɩɣa ŋga kɛwɛ Yeruzalɛm yɔ ka-altaaru yɔɔ nɛ ŋlaa.
18 «Nɛ ña nɛ ño-koobiya ɩpɩzɩɣ nɛ ɩkpaɣ liidiye nɛ sika ŋga kakazɩɣ yɔ nɛ ɩlabɩnɩ mbʋ pɩkɛdɩnɩ-mɩ, nɛ pɩla nɔɔ kʋɖʋmaɣ nɛ mɩ-Ɛsɔ sɔɔlɩm yɔ. 19 Nɛ ñanzɩ nzɩ payɩ pɛcɛlɩ-ŋ se palabɩnɩ ñɛ-Ɛsɔ ɖɩɣa taa tʋmɩyɛ yɔ, pɩwɛɛ se ŋsɩɩ-sɩ Ɛsɔ ɛsɩndaa Yeruzalɛm.+ 20 Nɛ mbʋ pɩkaɣ tasʋʋ pɔzʋʋ se ŋha ñɛ-Ɛsɔ ɖɩɣa taa yɔ, ŋkaɣ-pʋ kpaɣʋ wiyaʋ wondu ɖɩzɩyɛ taa.+
21 «Ma Wiyaʋ Artaazɛɛrɩzɛɛsɩ, manɖʋ paɣtʋ ñɩm yɔɔ cɔnɩyaa mba pɛwɛ Pɔɔ nɛ Wayɩ* yɔ pa-tɩŋa, se mbʋ payɩ cɔjɔ Ɛsɩdrasɩ,+ weyi ɛɖaɣnɩɣ maʋ ɛsɔdaa Ɛsɔ Paɣtʋ yɔ, ɛpɔzʋʋ-mɩ yɔ, pɩwɛɛ se pɛcɛlɩ-ɩ pʋ kpɛdɛyɛ, 22 pɩpɩzɩɣ nɛ pɩtalɩ liidiye talaŋwaa* 100, blee* kɔɔrwaa* 100, vɛɛ+ batwaa* 100, num+ batwaa 100, nɛ ɖɔm+ paa ɛzɩma. 23 Mbʋ payɩ ɛsɔdaa Ɛsɔ ɖʋ paɣtʋ se pala yɔ, pɩwɛɛ se palabɩ-pʋ nɛ kpekpeka ɛsɔdaa Ɛsɔ ɖɩɣa yɔɔ,+ nɛ pɩsa nɛ pana naayɛ ɛtaakɔɔ wiyaʋ kewiyaɣ nɛ ɛ-pɩyalaa pɔ-yɔɔ.+ 24 Nɛ pɩwɛɛ se ɩtɩlɩ ɖɔɖɔ se pɩtɩha nʋmɔʋ se pamʋ lambuu, tikee,+ yaa habɩyɛ yɔɔ ɖɔm liidiye cɔjɔ nɔɔyʋ, Leevi mba, minziiki maɖaa,+ nɔnɔsɩ yɔɔ ɖaŋɩyaa, templo taa lɩmɖʋyaa,*+ yaa Ɛsɔ ɖɩɣa kanɛ ka-tʋmlaɖaa taa nɔɔyʋ cɔlɔ.
25 «Ña Ɛsɩdrasɩ lɛ, labɩnɩ tʋmɩyɛ lɔŋsɩnɖɛ nɖɩ ñɛ-Ɛsɔ ha-ŋ yɔ nɛ ŋɖʋ* kaɖɩsɩ nɛ tɔm hʋyaa nɛ pahʋʋ tɔm samaɣ ŋga kɛwɛnɩ Pɔɔ nɛ Wayɩ yɔ ka-tɩŋa, mba payɩ pasɩm ñɛ-Ɛsɔ paɣtʋ yɔ; nɛ mba patɩsɩm-tʋ yɔ pɩwɛɛ se ɩwɩlɩ-wɛ tʋ.+ 26 Nɛ weyi ɛɛɖɔŋ ñɛ-Ɛsɔ Paɣtʋ nɛ wiyaʋ paɣtʋ yɔɔ yɔ, pɩwɛɛ se pɔhɔ ɛ-nɩŋgbaŋʋʋ kpɛdɛyɛ, paa pɩtɩɩwɛɛ se pakʋ-ɩ, pɔɖɔɔnɩ-ɩ, pɛpɛlɩ-ɩ kɩmɩyɛ yaa pɔtɔ-ɩ salaka yɔ.»
27 Pasa ɖɔ-cɔzɔnaa tɛ Ɛsɔ Yehowa, weyi ɛɖʋ wiyaʋ laŋɩyɛ taa se ɛcanɩ Yehowa ɖɩɣa Yeruzalɛm yɔ!+ 28 Nɛ ɛwɩlɩ-m sɔɔlɩm siɣsiɣ ñɩmbʋ wiyaʋ ɛsɩndaa+ nɛ ɛ-lɔŋ tasɩyaa+ nɛ wiyaʋ awumbiya ɖoŋ tɩnaa kpeekpe ɛsɩndaa. Nɛ pɩha-m abalɩtʋ,* mbʋ pʋyɔɔ yɔ mɛ-Ɛsɔ Yehowa nesi kaawɛ mɔ-yɔɔ, nɛ menkpeɣli Izrayɛɛlɩ taa abalaa mba pɛɖɛɣ nɔɔ yɔ* se patɩŋɩ-m nɛ ɖɩɖɛɛ.