Kɔrɛntɩ mba takayaɣ naalɛ ñɩŋga

6 Ða nɛ ɩ ɖɩkpɛndaa nɛ ɖɩlakɩ tʋmɩyɛ,+ pʋyɔɔ lɛ ɖa ɖɔɖɔ ɖitendiɣ-mɩ se ɩtaamʋ Ɛsɔ lootiye nɛ ɩtɩtalɩ ɖɩ-kaɖʋwa.+ 2 Mbʋ pʋyɔɔ yɔ ɛtɔŋ se: «Kʋjɔʋ alɩwaatʋ taa, mewelisini-ŋ; nɛ ñʋʋ yabʋ kɩyakʋ wiye lɛ, mansɩnɩ-ŋ.»+ Na! Lɛɛlɛɛyɔ kpem yɔ kʋjɔʋ alɩwaatʋ. Na! Lɛɛlɛɛyɔ ñʋʋ yabʋ kɩyakʋ.

3 Ðiiyeki se pituuli nɔɔyʋ hɔɔlʋʋ nakʋyʋ taa, se pataana kɩwɛɛkɩtʋ natʋyʋ ɖɛ-Ɛsɔ sɛtʋ tʋmɩyɛ yɔɔ;+ 4 ɛlɛ hɔɔlɩŋ tɩŋa taa lɛ, ɖɩwɩlɩɣ se ɖɩkɛ Ɛsɔ lɩmɖʋyaa,+ laŋɩyɛ ɖɔkʋʋ nazɩm sakɩyɛ taa, kʋñɔmɩŋ taa, kɛdɛɖaɣ alɩwaatʋ taa, tɩlasɩ taa,+ 5 mabʋtʋ taa, salaka taa,+ ñam ñam lakasɩ taa, tʋmɩyɛ ɖoŋ ñɩnɖɛ taa, ɖoo taa ɖom sɔmtʋ taa, alɩwaatʋ ndʋ tɔɔnaɣ fɛyɩ yɔ tɩ-taa;+ 6 kele kele wɛʋ taa, sɩmtʋ taa, suuɖu ɖʋʋ taa,+ camɩyɛ lakasɩ taa,+ fezuu kiɖeɖeu taa, sɔɔlɩm mbʋ pɩ-taa fɛyɩ pɩ-tɛɛ nɛ pɩ-yɔɔ lakasɩ yɔ pɩ-taa,+ 7 toovenim tɔm yɔɔdʋʋ taa, Ɛsɔ ɖoŋ taa;+ pɩtɩŋnɩ siɣsiɣ wɛtʋ you wondu+ ndʋ tɩwɛ nesi kɩbanzɩ taa* nɛ nɩmɩyɛ taa* yɔ tɩ-yɔɔ, 8 pɩtɩŋnɩ samtʋ nɛ fɛyɛ ɖʋʋ yɔɔ, pɩtɩŋnɩ ɖɔ-yɔɔ tɔm kɩdɛkɛdɩtʋ nɛ tɔm kɩbandʋ yɔɔdʋʋ yɔɔ. Pɔcɔŋnɩ-ɖʋ ɛzɩ peɣziyaa yɔ, paa mbʋ yɔ ɖɩwɛ toovenim; 9 pɔcɔŋnɩ-ɖʋ ɛzɩ ɛyaa mba patɩsɩm-wɛ yɔ, paa mbʋ yɔ pasɩm-ɖʋ; pɔcɔŋnɩ-ɖʋ ɛzɩ ɛyaa mba peɖiɣni sɩbʋ yɔ,* paa mbʋ yɔ ɩna, ɖɩwɛ wezuu;+ pɔcɔŋnɩ-ɖʋ ɛzɩ ɛyaa mba pɔhɔm pa-nɩŋgbaaŋ yɔ, paa mbʋ yɔ, patɩɖʋzɩ-ɖʋ sɩm nesi tɛɛ;+ 10 pɔcɔŋnɩ-ɖʋ ɛzɩ ɛyaa mba pɛwɛ kʋñɔŋ taa yɔ, ɛlɛ ɖɩwɛ taa leleŋ taa; pɔcɔŋnɩ-ɖʋ ɛzɩ kʋñɔndɩnaa yɔ, ɛlɛ ɖɩlakɩ nɛ ɛyaa sakɩyɛ pɩsɩɣ ñɩm tɩnaa; pɔcɔŋnɩ-ɖʋ ɛzɩ ɛyaa mba pɛfɛyɩnɩ pʋyʋ yɔ, paa mbʋ yɔ ɖɩwɛnɩ pɩtɩŋa.+

11 Ðikuli ɖɔ-nɔɔ nɛ ɖɩyɔɔdɩnɩ-mɩ,* Kɔrɛntɩ mba; nɛ ɖikuli ɖa-laŋɩyɛ wamm. 12 Sɔɔlɩm mbʋ ɖɩwɛnɩ mɩ-yɔɔ yɔ pɩfɛyɩnɩ tɩnaɣ;+ ɛlɛ mɩ lɛ, sɔɔlɩm mbʋ ɩwɛnɩ ɖɔ-yɔɔ yɔ pɩwɛnɩ tɩnaɣ. 13 Pʋyɔɔ lɛ, ɩlabɩ-ɖʋ ɛzɩ ɖɩlabʋ-mɩ yɔ—Mɔyɔɔdʋʋnɩ-mɩ ɛzɩ men-piya yɔ—ikuli mɩ-laŋa wamm.*+

14 Mɩ nɛ mba pɛfɛyɩnɩ tisuu yɔ ɩtaakpɛndɩ.*+ Mbʋ pʋyɔɔ yɔ taabalɩyɛ nɖɩ wɛ siɣsiɣ wɛtʋ nɛ paɣtʋ yɔɔ maʋ pɛ-hɛkʋ taa?+ Yaa ñalɩmɩyɛ nɛ cɩkpɛndʋʋ paka we?+ 15 Pɩtasɩ lɛ, nɔɔ kʋɖʋmaɣ ŋga wɛ Krɩstʋ nɛ Beliyaalɩ* pɛ-hɛkʋ taa?+ Yaa weyi ɛwɛnɩ tisuu* nɛ weyi ɛfɛyɩnɩ tisuu yɔ, paka we?+ 16 Nɛ ɖama nɩnʋʋ mbʋ wɛ Ɛsɔ tɛ templo nɛ sɩʋ kpelisi pɛ-hɛkʋ taa?+ Mbʋ pʋyɔɔ yɔ ɖɩkɛ Ɛsɔ ɛsadʋ tɛ templo;+ ɛzɩ Ɛsɔ yɔɔdʋʋ yɔ se: «Mankaɣ wɛʋ pɛ-hɛkʋ taa+ nɛ mɔnɖɔ pɛ-hɛkʋ taa, nɛ mankaɣ kɛʋ pɛ-Ɛsɔ, nɛ pakaɣ kɛʋ man-samaɣ.»+ 17 «Pʋyɔɔ lɛ, ɩlɩɩ pɛ-hɛkʋ taa, nɛ ɩkɛzɩ mɩ-tɩ nɛ hɔɔlʋʋ nɛ iyele tukunuu azuluma pʋyʋ,+ nɛ mankaɣ-mɩ mʋʋ;+ Yehowa* yɔɔdʋʋna.» 18 «Nɛ mankaɣ pɩsʋʋ mɩ-caa,+ nɛ ɩkaɣ pɩsʋʋ man-pɩyalaa nɛ mɛn-pɛlaa;+ Yehowa* Ðoŋ Tɩŋa Tʋ yɔɔdʋʋna.»