Tɔm Hʋyaa
3 Ajɛɛ wena Yehowa ha nʋmɔʋ se akazɩ nɛ atakɩ Izrayɛɛlɩ ñɩma mba payɩ wiɖiyi patiyooni Kanaŋ ɛjaɖɛ nɛ pana yɔ,+ ana yɔ 2 (ɛlabɩ mbʋ se Izrayɛɛlɩ mba kpaɖɩŋ weyi ɩkɔŋ pʋwayɩ yɔ, ɩtɩlɩ mbʋ payaɣ se you yɔ, mba pataala you wiɖiyi nɛ pana yɔ): 3 Filistii mba kɩbaɣlaa 5,+ nɛ Kanaŋ mba kpeekpe, Siidɔɔ mba,+ nɛ Hivi ñɩma+ mba pɛwɛ Libaŋ+ Pʋʋ taa yɔ, kpaɣnɩ Baalɩ-Hɛrmɔɔnɩ Pʋʋ nɛ piwolo ɖooo Lebo-Hamatɩ.*+ 4 Ajɛɛ ana aakɛnɩ nʋmɔʋ ŋgʋ kɩ-yɔɔ patɩŋnaa nɛ patakɩ Izrayɛɛlɩ se pana se Izrayɛɛlɩ kaɣ ñam paɣtʋ ndʋ Yehowa tɩŋnɩ Moyizi yɔɔ nɛ ɛɖʋ pa-caanaa yɔ.+ 5 Nɛ Izrayɛɛlɩ mba caɣ Kanaŋ mba, Hɛɛtɩ mba, Amoori mba, Perizi mba, Hivi mba nɛ Yebuusi mba hɛkʋ taa.+ 6 Pakpakaɣ ajɛɛ ana a-taa pɛlaa nɛ papɩsɩɣ-wɛ pa-halaa, nɛ pɛcɛlɩɣ pɛ-pɛlaa ajɛɛ ana a-taa evebiya, nɛ papaɣzɩ a-ɛsɔnaa sɛʋ.+
7 Mbʋ Izrayɛɛlɩ mba labɩ mbʋ pɩfɛyɩ ɖeu yɔ Yehowa ɛsɩndaa, nɛ pɔsɔɔ pɛ-Ɛsɔ Yehowa yɔɔ nɛ pɛsɛɛ Baalɩwaa+ nɛ sizikasɩ kiɖeɖesi.*+ 8 Ðɩnɛ ɛlɛ, Yehowa kɔ pana nɛ Izrayɛɛlɩ siŋŋ nɛ ɛɖʋzɩ-wɛ* Mezoopotamii* wiyaʋ Kuusaanɩ-Risatayim nesi taa. Nɛ Izrayɛɛlɩ mba pɩsɩ Kuusaanɩ-Risatayim yomaa pɩnzɩ lutozo. 9 Izrayɛɛlɩ mba ya Yehowa se ɛsɩnɩ-wɛ lɛ,+ Yehowa kʋsɩ ñʋʋ yaɖʋ nɔɔyʋ se eholi Izrayɛɛlɩ mba,+ ɛnʋ lɛ Kalɛɛbɩ neu Kenaazɩ pɩyalʋ Otɩnɩyɛɛlɩ.+ 10 Yehowa fezuu tii ɛ-yɔɔ,+ nɛ ɛpɩsɩ Izrayɛɛlɩ tɔm hʋyʋ. Ewobi you lɛ, Yehowa ɖʋzɩ Mezoopotamii* wiyaʋ Kuusaanɩ-Risatayim e-nesi taa nɛ ɛwa Kuusaanɩ-Risatayim. 11 Pʋwayɩ lɛ, ɛjaɖɛ hɛzɩ* pɩnzɩ 40. Nɛ pʋwayɩ ɖɔɖɔ lɛ, Kenaazɩ pɩyalʋ Otɩnɩyɛɛlɩ sɩ.
12 Nɛ Izrayɛɛlɩ mba tasɩ paɣzʋʋ labʋ mbʋ pɩfɛyɩ ɖeu yɔ Yehowa ɛsɩndaa.+ Ðɩnɛ ɛlɛ, Yehowa yele nɛ Mowaabʋ wiyaʋ+ Egɩlɔɔnɩ wa Izrayɛɛlɩ, mbʋ pʋyɔɔ yɔ paalabɩ mbʋ pɩfɛyɩ ɖeu yɔ Yehowa ɛsɩndaa. 13 Pɩtasɩ lɛ, ɛkɔnɩ Amooni mba+ nɛ Amalɛɛkɩ mba+ se poyooni-wɛ. Nɛ poyooni Izrayɛɛlɩ nɛ pamʋ paŋ tɛtʋ.+ 14 Nɛ Izrayɛɛlɩ mba pɩsɩ Mowaabʋ wiyaʋ Egɩlɔɔnɩ yomaa pɩnzɩ 18.+ 15 Peeɖe Izrayɛɛlɩ mba ya Yehowa se ɛsɩnɩ-wɛ,+ nɛ Yehowa ha-wɛ ñʋʋ yaɖʋ nɔɔyʋ,+ ɛnʋ lɛ Bɛnjamɛɛ tʋ+ Geera pɩyalʋ Ewuudi,+ weyi ɛɛkɛ nɩmɩyɛ tʋ yɔ.+ Pʋwayɩ lɛ, Izrayɛɛlɩ mba cɛlɩ-ɩ lambuu se ewoni Mowaabʋ wiyaʋ Egɩlɔɔnɩ. 16 Ŋgʋ Ewuudi kaalubi ɛ-tɩ sɩɣa nakɛyɛ, kaawɛ lɔŋ ceemenje, ka-ɖaɣlɩkɩŋ kaamaɣnɩ nuŋgoloŋa kʋɖʋmaɣ,* nɛ ɛkpaɣ-kɛ nɛ ɛta ɛ-nɩwaŋ taɖɩyɛ yɔɔ e-toko tɛɛ. 17 Nɛ ewoni lambuu nɛ ɛcɛlɩ Mowaabʋ wiyaʋ Egɩlɔɔnɩ. Egɩlɔɔnɩ kaakɛ ɛyʋ weyi eeki kpem yɔ.
18 Ewuudi tɛm lambuu cɛlʋʋ lɛ, ɛ nɛ ɛyaa mba paawoni lambuu yɔ pɛɖɛɛ. 19 Ɛlɛ patalɩ sɩʋ kpelisi nzɩ pasaɣaa yɔ sɩ-cɔlɔ* Gilgaalɩ lɛ,+ ɛpɩsɩ nɛ eheyi wiyaʋ se: «Hayɩ wiyaʋ, mɛwɛnɩ mɛsaɣ tɛɛ tɔm natʋyʋ se meheyiɣ-ŋ.» Peeɖe wiyaʋ yɔɔdaa se: «Isu nɛ manɩɩ tɔm!» Ɛyɔɔdɩ mbʋ lɛ, ɛ-lɩmɖʋyaa tɩŋa lɩɩ nɛ peyebi-i. 20 Peeɖe lɛ, Ewuudi ñɔtɩnɩ-ɩ, ɛɛcaɣ e-ɖeke ɛ-ɛsɔdaa kuduyuu ŋgʋ kɩ-tɛɛ niɣdi camɩyɛ yɔ kɩ-tɛɛ. Nɛ Ewuudi heyi-i se: «Mancaɣ meheyi-ŋ tɔm natʋyʋ, Ɛsɔ cɔlɔ tɩlɩnaa.» Ðɩnɛ ɛlɛ, ɛkʋyɩ e-kewiyaɣ kpelaɣ yɔɔ.* 21 Peeɖe Ewuudi kpɛ sɩɣa nɛ ɛ-nɩmɩyɛ nesi ɛ-nɩwaŋ taɖɩyɛ yɔɔ nɛ ɛsʋzɩ-kɛ e-lotu taa mɩɩɩ. 22 Sɩɣa ɖɛɛ nɛ pɩkpɛndɩnɩ ko-toɖe, nɛ num huuzi kɔ-yɔɔ, mbʋ pʋyɔɔ yɔ ɛtaakpɛɛ sɩɣa e-lotu taa, nɛ pɩndʋ mɩzɩ. 23 Ewuudi lɩɩ* nɛ ɛɖɩɣ ɛsɔdaa kuduyuu ŋgʋ kɩ-nɔnɔsɩ nɛ ɛkaɖɩ-sɩ. 24 Ɛɖɛwa lɛ, lɩmɖʋyaa pɩsɩ, nɛ pana se paɖɩɣ ɛsɔdaa kuduyuu nɔnɔsɩ. Peeɖe pɔyɔɔdaa se: «Ɛzʋnɔ, eɖiɣni awayɩ lɩʋ* ɖooo pɩ-taa kuduyuu kiniɣduu tɛɛ.» 25 Paɖaŋɩ-ɩ nɛ pileɖi lɛ, papaɣzɩ nɩɣzʋʋ. Ɛlɛ panawa se ɛɛtʋlʋʋ ɛsɔdaa kuduyuu nɔnɔsɩ kpem lɛ, pakpaɣ ñɩmɩyɛ nɛ patʋlɩ nɔnɔsɩ nɛ pana pa-kɩbaɣlʋ tataa, ɛsɩba.
26 Alɩwaatʋ ndʋ paawɛɛ nɛ pɔcɔʋ pa-ñʋʋ taa kiii lɛ, Ewuudi tɩŋnɩ sɩʋ kpelisi nzɩ pasaɣaa yɔ sɩ-cɔlɔ*+ nɛ ese nɛ ɛtʋlɩ, nɛ ɛkɔɔ ɛtalɩ Seyira cɩŋgɩlɩm. 27 Ɛtalaa lɛ, ɛyaa nɔndɔʋ+ Efrayim pʋŋ egeetiye taa;+ nɛ Izrayɛɛlɩ mba lɩɩnɩ pʋŋ egeetiye taa nɛ petii, ɛnʋ kaaɖɛnɩ-wɛ nɔɔ. 28 Nɛ eheyi-wɛ se: «Ɩtɩŋɩ-m, mbʋ pʋyɔɔ yɔ Yehowa ɖʋzɩ mi-koyindinaa, Mowaabʋ mba mi-nesi taa.» Pʋyɔɔ patɩŋɩ-ɩ nɛ powolo pamʋ Yɔɔrdaŋ pɔɔ ɖɩdɛzɩyɛ se Mowaabʋ mba ɩtaatɛzɩ, nɛ patɩha nʋmɔʋ nɔɔyʋ se ɛtɛzɩ. 29 Pakʋ Mowaabʋ mba 10 000 alɩwaatʋ ndʋ,+ paba kaakɛ pa-tɩŋa abalaa ɖoŋ tɩnaa nɛ you laɖaa sɔsaa; ɛlɛ pa-taa kʋɖʋm maɣmaɣ tɩtʋlɩ.+ 30 Mbʋ poluzi Mowaabʋ puwiye Izrayɛɛlɩ tɛɛ; nɛ ɛjaɖɛ hɛzɩ* pɩnzɩ 80.+
31 Anatɩ pɩyalʋ Samɩgaarɩ+ tɩŋnɩ ɛ-wayɩ, ɛɛkʋ Filistii abalaa 600+ nɛ ninɖiɣyu ɖaʋ;+ ɛlɛ ɖɔɖɔ kaayabɩ Izrayɛɛlɩ ñʋʋ.