Roma mba

15 Ɛlɛ, ɖa mba ɖɩwɛ ɖoŋ yɔ, pɩwɛɛ se ɖɩkpaɣ mba pɛfɛyɩ ɖoŋ yɔ pɛ-ɛjandʋ,+ nɛ ɖɩtaalakɩ mbʋ pɩkɛdɩɣnɩ ɖa-maɣmaɣ yɔ.+ 2 Ða-taa paa weyi lɛ, ɛla mbʋ pɩkɛdɩɣnɩ ɛyʋ lɛlʋ yɔ nɛ pɩwazɩ-ɩ, nɛ pɩkpazɩ-ɩ ɖoŋ.+ 3 Mbʋ pʋyɔɔ yɔ, halɩ Krɩstʋ maɣmaɣ tɩla e-liu sɔɔlɩm,+ ɛlɛ ɛzɩ pamaʋ yɔ: «Mba patʋʋ-ŋ yɔ, pa-tʋtʋ pɩsɩ mɔ-yɔɔ.»+ 4 Mbʋ pʋyɔɔ yɔ tɔm ndʋ payɩ paama ɖooo lɔndaa yɔ, pama-tʋ se pawɩlɩnɩ-ɖʋ lɔŋ;+ se pɩtɩŋnɩ ɖa-laŋɩyɛ ɖɔkʋʋ+ nɛ laŋɩyɛ hɛzʋʋ mbʋ pɩlɩnɩ Masɩ taa yɔ pɩ-yɔɔ lɛ, ɖɩpɩzɩ nɛ ɖɩwɛɛnɩ lidaʋ.+ 5 Lɛɛlɛɛyɔ, tɛtɛ nɛ Ɛsɔ weyi ɛhaɣ laŋɩyɛ ɖɔkʋʋ nɛ laŋɩyɛ hɛzʋʋ yɔ, ɛla nɛ mɩ-tɩŋa ɩwɛɛnɩ maɣzɩm kʋɖʋmʋm mbʋ Krɩstʋ Yesu kaawɛna yɔ, 6 se pɩsa nɛ ɩkpɛndɩ nɔɔ+ nɛ ɩsa ɖa-Kɩbaɣlʋ Yesu Krɩstʋ tɛ Ɛsɔ nɛ ɛ-Caa nɔɔ kʋɖʋmaɣ taa.

7 Pʋyɔɔ lɛ, ɩmʋ ɖama camɩyɛ+ ɛzɩ Krɩstʋ ɖɔɖɔ mʋʋ-mɩ yɔ,+ nɛ piyele nɛ pasa Ɛsɔ. 8 Mbʋ pʋyɔɔ yɔ, meheyiɣ-mɩ se Krɩstʋ pɩsɩ mba pɛpɛlɩ-wɛ yɔ pa-lɩmɖʋyʋ,+ se ɛwɩlɩ-wɛ se Ɛsɔ yɔɔdʋʋ toovenim paa ɛzɩmtaa, nɛ ɛwɩlɩ ɖɔɖɔ se tamasɩ nzɩ Ɛsɔ kaalabɩ pɔ-cɔzɔnaa yɔ, sɩkɛ toovenim,+ 9 nɛ ajɛɛ pɩzɩ nɛ asa Ɛsɔ ɛ-pʋtɔdɩyɛ naʋ yɔɔ.+ Ɛzɩ pamaʋ yɔ: «Pʋyɔɔ mankaɣ-ŋ sam kaɣlaa ajɛɛ hɛkʋ taa, nɛ mankaɣ teu ña-hɩɖɛ samtʋ hendu.»+ 10 Nɛ ɛtasɩ yɔɔdʋʋ se: «Mɩ ajɛɛ, mɩ-taa ɛla leleŋ, mɩ nɛ ɛ-samaɣ.»+ 11 Nɛ ɛtasɩ se: «Mɩ ajɛɛ kpeekpe, ɩsa Yehowa,* samasɩ kpeekpe ɩsamɩ-ɩ.»+ 12 Izaayii ɖɔɖɔ yɔɔdaa se: «Yesee liɖe+ kaɣ wɛʋ, weyi ɛkaɣ kʋyʋʋ nɛ eɖiyi ajɛɛ yɔ;+ ajɛɛ kaɣ ɖʋʋ a-lidaʋ ɛ-yɔɔ.»+ 13 Ɛsɔ weyi ɛhaɣ lidaʋ yɔ, ɛla nɛ taa leleŋ nɛ laŋhɛzɩyɛ tɩŋa su mɩ-taa mbʋ pʋyɔɔ yɔ ɩtaɣ-ɩ liu, se pɩsa nɛ fezuu kiɖeɖeu ɖoŋ taa lɛ mi-lidaʋ paɣlɩ.*+

14 Mon-koobiya, men-keem man-taa tɛma se kɩbandʋ labʋ ɖɔɖɔ su mɩ-taa, nɛ sɩmtʋ tɩŋa su mɩ-taa, nɛ man-taa tɛma ɖɔɖɔ se ɩpɩzɩɣ nɛ ɩtasɩ ɖama lɔŋ.* 15 Ɛlɛ mama-mɩ tɔm lɛɛtʋ kpayɩ nɛ pɩkɩlɩ, se mɔntɔzɩ-mɩ tʋ; nɛ malabɩ mbʋ lootiye nɖɩ Ɛsɔ ha-m yɔ ɖɩ-yɔɔ, 16 nɖɩ ɛha-m se mɛnkɛ Krɩstʋ Yesu samaɣ taa lɩmɖʋyʋ ajɛɛ taa yɔ ɖɩ-yɔɔ.+ Mɛwɛɛ nɛ malakɩ Ɛsɔ tɔm kɩbandʋ tɛ tʋmɩyɛ kiɖeɖeye,+ se pɩsa nɛ ajɛɛ ana akɛ haɖɛ nɖɩ ɖɩkɛdɩnɩ Ɛsɔ yɔ, nɖɩ patɩŋnɩ fezuu kiɖeɖeu yɔɔ nɛ papɩsɩ-ɖɩ kele kele yɔ.

17 Pʋyɔɔ lɛ, mɛwɛnɩ toovenim se mɛmɛyɩ wondu ndʋ titukuuni Ɛsɔ yɔ tɩ-yɔɔ* Krɩstʋ Yesu taa. 18 Mbʋ pʋyɔɔ yɔ, maakatɩɣ se mɔyɔɔdɩ tɔm natʋyʋ nɛ pɩtasɩnɩ mbʋ Krɩstʋ tɩŋnɩ mɔ-yɔɔ nɛ ɛla se pɩsa nɛ ajɛɛ wɛɛnɩ ñamtʋ yɔ; ɛtɩŋnɩ mɔ-yɔɔdaɣ nɛ ma-lakasɩ yɔɔ nɛ ɛla mbʋ, 19 ɛtɩŋnɩ ɖɔɖɔ yʋsasɩ nɛ piti lakasɩ+ nɛ Ɛsɔ fezuu ɖoŋ yɔɔ; pʋyɔɔ mɔncɔwa nɛ monsusi Krɩstʋ yɔɔ tɔm kɩbandʋ tete, kpaɣnɩ Yeruzalɛm nɛ pɩtalɩ ɖooo Iliirii.+ 20 Pʋyɔɔ toovenim taa lɛ, manɖʋ man-tɩ kaɖʋwa se maasusuu tɔm kɩbandʋ ɖenɖe pɛtɛm tɩlʋʋ Krɩstʋ hɩɖɛ yɔ, se pɩtaala nɛ mama ɛyʋ lɛlʋ tigiɖe yɔɔ; 21 ɛlɛ ɛzɩ pamaʋ yɔ: «Mba patiheyi-wɛ ɛ-yɔɔ tɔm natʋyʋ yɔ, pakaɣ naʋ; nɛ mba patɩnɩɩ yɔ, pakaɣ pʋ-tɔbʋʋ nɩʋ.»+

22 Mbʋ yebina ɖɔɖɔ nɛ pɩɖɩɣ-m nʋmɔʋ tam sakɩyɛ se mantaakɔɔ mɩ-tɛ. 23 Ɛlɛ lɛɛlɛɛyɔ lɛ, lone naɖɩyɛ tɩtasɩ wɛʋ ageeta ana a-taa se mantiwobiti ɖɩ-taa; nɛ pɩlakɩ pɩnzɩ sakɩyɛ* yɔ me-liu wɛʋ siŋŋ se mɔnkɔɔ mɩ-tɛ yɔ. 24 Pʋyɔɔ lɛ, maawoki Ɛsɩpaañɩ lɛ, mantaɣ liu se mankaɣ-mɩ naʋ nɛ mancaɣ mɩ-hɛkʋ taa alɩwaatʋ pazɩ nɛ manɩɩ leleŋ nɛ pʋwayɩ lɛ ɩsɩ-m pazɩ. 25 Ɛlɛ lɛɛlɛɛyɔ lɛ, mancaɣ wobu Yeruzalɛm se manɖʋ ɛyaa kiɖeɖema lɩm.+ 26 Mbʋ pʋyɔɔ yɔ, mba pɛwɛ Masedonii nɛ Akayii yɔ, paha mbʋ pɛwɛna yɔ nɛ taa leleŋ se pasɩnɩ kʋñɔndɩnaa mba pɛwɛ ɛyaa kiɖeɖema hɛkʋ taa Yeruzalɛm yɔ.+ 27 Toovenim taa lɛ, pɩɩkɛdɩnɩ-wɛ se pala mbʋ; nɛ toovenim taa lɛ, paatɔɔ-wɛ kɩmɩyɛ; mbʋ pʋyɔɔ yɔ ye patayɩnɩ ajɛɛ fezuu taa wondu yɔ, pɩwɛnɩ-yɛ ɖɔɖɔ se akpaɣ a-tomnaɣ yɔɔ wondu nɛ aɖʋnɩ-wɛ lɩm.+ 28 Pʋyɔɔ lɛ, mɛntɛŋ tʋmɩyɛ nɖɩ ɖɩ-labʋ nɛ manɖʋzɩ haɖɛ nɖɩ pe-nesi tɛɛ cɩŋgɩlɩm lɛ, mankaɣ tɩŋnʋʋ mɩ-tɛ nɛ mɛnɖɛɛ Ɛsɩpaañɩ. 29 Pɩtasɩ lɛ, manawa se alɩwaatʋ ndʋ mɔnkɔŋ mɩ-cɔlɔ yɔ, mankaɣ kpɛndɩnʋʋ wazasɩ sakɩyɛ nzɩ sɩlɩnɩ Krɩstʋ cɔlɔ yɔ.

30 Lɛɛlɛɛyɔ lɛ, koobiya, ɖa-Kɩbaɣlʋ Yesu Krɩstʋ yɔɔ nɛ fezuu sɔɔlɩm yɔɔ lɛ, menseɣtiɣ-mɩ se ɩsɩnɩ-m lʋbʋ adɩma taa alɩwaatʋ ndʋ ɩtɩmɩɣnɩ Ɛsɔ mɔ-yɔɔ yɔ,+ 31 se piholi-m+ mba pɛfɛyɩnɩ tisuu nɛ pɛwɛɛ Yuudee yɔ pe-nesi tɛɛ, nɛ ɖɔɖɔ se lɩm ɖʋʋ tʋmɩyɛ nɖɩ malakɩ ɛyaa kiɖeɖema Yeruzalɛm yɔ, pamʋ-ɖɩ camɩyɛ;+ 32 nɛ piyele nɛ Ɛsɔ sɔɔlɩm taa lɛ, mɔnkɔɔ mɩ-cɔlɔ nɛ taa leleŋ nɛ ma nɛ mɩ ɖa-laŋa hɛɛ. 33 Tɛtɛ nɛ Ɛsɔ weyi ɛhaɣ laŋhɛzɩyɛ yɔ, ɛwɛɛ mɩ-tɩŋa mɩ-cɔlɔ.+ Amɛn.