Ejipiti Lɩʋ
16 Izrayɛɛlɩ mba samaɣ kpeekpe kʋyɩ Elim lɛ, kɔkɔɔ nɛ katalɩ Sinɩ kañɩmbusuu+ ŋgʋ kɩwɛ Elim nɛ Sinayii pɛ-hɛkʋ taa yɔ kɩ-taa, pɩlabɩ fenaɣ kʋɖʋmaɣ kpaɣnɩ alɩwaatʋ ndʋ kakʋyɩ Ejipiti ɛjaɖɛ taa yɔ, pʋ-tɔbʋʋ se fenaɣ 2 ñɩŋga tɛ kɩyakʋ 15 ñɩŋgʋ wiye.
2 Nɛ Izrayɛɛlɩ mba samaɣ kpeekpe paɣzɩ midinuu Moyizi nɛ Aarɔɔnɩ kañɩmbusuu taa.+ 3 Nɛ Izrayɛɛlɩ mba wɛɛ nɛ peheyiɣ-wɛ se: «Ye ɖɩɩsɩbɩ Yehowa nesi tɛɛ Ejipiti ɛjaɖɛ taa alɩwaatʋ ndʋ ɖɩcakaɣ nandʋ ɖeɣsi cɔlɔ,+ alɩwaatʋ ndʋ ɖɩtɔkaɣ kpɔnɔ nɛ ɖɩhakɩ yɔ, pɩɩkɩlɩ-ɖʋ ɖeu. Lɛɛlɛɛyɔ ɩlɩzɩ-ɖʋ nɛ ɩkɔnɩ kañɩmbusuu taa se ñɔɔsɩ ɛkʋ samaɣ* kpeekpe nɛ kasɩ.»+
4 Peeɖe Yehowa heyi Moyizi se: «Mankaɣ labʋ nɛ tɔɔnaɣ lɩɣnɩ ɛsɔdaa nɛ kɔtɔlʋʋ ɛzɩ tɛʋ nɩɣʋ yɔ,+ nɛ samaɣ taa paa anɩ kaɣ lɩʋ nɛ ekuu tɔɔnaɣ ŋga ɛpɩzɩɣ tɔɔʋ yɔ paa evemiye nɖɩ,+ nɛ pɩsa nɛ mantakɩ-wɛ nɛ mana se pakaɣ ɖɔm man-paɣtʋ yɔɔ yaa paaɖɔŋ.+ 5 Ɛlɛ kɩyakʋ 6 ñɩŋgʋ wiye,+ alɩwaatʋ ndʋ patɩzɩɣ mbʋ pekpeɣlaa yɔ lɛ, pɩwɛɛ se pɩkɛ mbʋ patiikuu paa evemiye nɖɩ yɔ pɩ-nabʋlɛ.»+
6 Nɛ Moyizi nɛ Aarɔɔnɩ peheyi Izrayɛɛlɩ mba kpeekpe se: «Ðanaɣ yɔɔ lɛ, pɩtʋʋ fɛyɩ se ɩkaɣ naʋ se Yehowa lɩzɩnɩ-mɩ Ejipiti ɛjaɖɛ taa.+ 7 Tanaŋ tɛɛ lɛ, ɩkaɣ naʋ Yehowa ɖoŋ, mbʋ pʋyɔɔ yɔ Yehowa nɩ ɛzɩma ɩwɛɛ nɛ imidiɣni-i yɔ. Ða yɔ, mba ɖɩkɛnaa nɛ pɩwɛɛ se imidini-ɖʋ?» 8 Moyizi wolo pɩ-yɔɔ nɛ eheyi-wɛ se: «Yehowa cɛlɩɣ-mɩ nandʋ se ɩtɔɔ ɖanaɣ yɔɔ, nɛ ɛcɛlɩ-mɩ kpɔnɔ tanaŋ tɛɛ se ɩtɔɔ nɛ ɩhaɣ lɛ, ɩkaɣ naʋ se Yehowa nɩ mɩ-amida wena ɩwɛɛ nɛ imidiɣni-i yɔ. Ɛlɛ ɖa yɔ, mba ɖɩkɛnaa? Pɩtɩkɛ ɖa imidiɣna, ɛlɛ Yehowa imidiɣna.»+
9 Nɛ Moyizi heyi Aarɔɔnɩ se: «Heyi Izrayɛɛlɩ mba samaɣ kpeekpe se: “Ɩkɔɔ Yehowa ɛsɩndaa, mbʋ pʋyɔɔ yɔ ɛnɩ mɩ-amida.”»+ 10 Aarɔɔnɩ tɩɩyɔɔdɩnɩ Izrayɛɛlɩ mba samaɣ kpeekpe lɛ, pɛkɛzɩ pa-tɩ nɛ papa pɛ-ɛsa nɛ kañɩmbusuu taa kiŋ nɛ pana Yehowa samtʋ lɩ ɛsɔmɩnʋʋ taa.+
11 Yehowa tasɩ yɔɔdɩnʋʋ Moyizi nɛ eheyi-i se: 12 «Manɩ Izrayɛɛlɩ mba amida.+ Heyi-wɛ se: “Wɩsɩ ɖʋʋ* lɛ, ɩkaɣ tɔɔʋ nandʋ, nɛ tanaŋ tɛɛ lɛ ɩkaɣ tɔɔʋ kpɔnɔ nɛ ɩhaɣ,+ nɛ pɩtʋʋ fɛyɩ se ɩkaɣ ɖiɣzinuu se ma lɛ Yehowa mɩ-Ɛsɔ.”»+
13 Nɛ pɩtɛɣsɩ* kɔɔ nɛ sihu ɖigbeɣliye* taa ɖanaɣ ŋga,+ nɛ tanaŋ tɛɛ lɛ, ɖoluu kaacɔ ɖigbeɣliye nɛ kɩta. 14 Ðoluu kʋyaa lɛ, nabʋyʋ kaawɛ ɖululu kañɩmbusuu taa tataa,+ pɩɩwɛ pee, pɩɩwɛ ɖululu ɛzɩ ɖɔmbɛɛ yɔ tataa. 15 Izrayɛɛlɩ mba na mbʋ lɛ, papaɣzɩ ɖama pɔzʋʋ se: «Ɛzɩ ɛbɛ lɛ mbʋ yɔ?» Mbʋ pʋyɔɔ yɔ pataatɩlɩ mbʋ pɩɩkɛnaa yɔ. Moyizi heyi-wɛ se: «Pɩkɛ kpɔnɔ ŋgʋ Yehowa ha-mɩ se pɩkɛ mɩ-tɔɔnaɣ yɔ.+ 16 Paɣtʋ tʋnɛ Yehowa ɖʋwa: “Pɩwɛɛ se mɩ-taa paa weyi lɛ ekuu ɛzɩma ɛpɩzɩɣ nɛ ɛtɔɔ yɔ. Pɩwɛɛ se ikuu nɛ pɩmaɣnɩ ɛyaa* ɛzɩma mɩ-taa paa weyi ɛwɛnɩ e-kizinziku tɛɛ yɔ, ɛyʋ kʋɖʋm omɛɛrɩ kʋɖʋmʋʋ.”»*+ 17 Izrayɛɛlɩ mba paɣzɩ labʋ ɛzɩ paɖʋʋ-wɛ paɣtʋ yɔ; nabɛyɛ kuwaɣ sakɩyɛ nɛ nabɛyɛ ñokuu pazɩ. 18 Pakpaɣ omɛɛrɩ nɛ pamaɣzɩ mbʋ pokuwa yɔ lɛ, weyi eeku sakɩyɛ yɔ ɛtaakɩlɩ wɛnʋʋ, nɛ weyi ɛlɛ ñaaku pazɩ yɔ ɛtaatɛɖɩɣ tɔɔnaɣ.+ Pa-taa paa weyi kaaku ɛzɩma ɛpɩzaɣ se ɛtɔɔ yɔ.
19 Moyizi heyi-wɛ se: «Nɔɔyʋ ɛtaakazɩ mbʋ ekuwa yɔ nɛ tɛʋ fe.»+ 20 Ɛlɛ patiwelisini Moyizi. Nabɛyɛ kazɩ mbʋ pokuwa yɔ nɛ tɛʋ fe lɛ, pɩɖʋ sonzoowa nɛ pɩlɩɣ sɔŋ luuluu, nɛ Moyizi hɔyɛ taa wɩɩnɩ-wɛ. 21 Pokuwaɣ-kɛ tanamɩŋ tɩŋa tɛɛ, paa weyi lɛ ɛzɩma ɛpɩzaɣ se ɛtɔɔ yɔ. Wɩsɩ saɣ lɛ, koyoluu.
22 Kɩyakʋ 6 ñɩŋgʋ wiye lɛ, pokuwaɣ kpɔnɔ tam nabʋlɛ taa,+ paa ɛyʋ weyi lɛ omɛɛrɩwaa 2. Peeɖe samaɣ ñʋndɩnaa tɩŋa kɔma nɛ pɛkɛdɩ tɔm ndʋ Moyizi. 23 Nɛ eheyi-wɛ se: «Tɔm ndʋ Yehowa yɔɔdaa. Cee kaɣ kɛʋ hɛzʋʋ pilim* kɩyakʋ, Yehowa sabaatɩ kiɖeɖeu.+ Ɩhɔ mbʋ pɩpɔzʋʋ se ɩhɔ yɔ, nɛ ɩtɩzɩ mbʋ pɩpɔzʋʋ se ɩtɩzɩ yɔ;+ nɛ ɩñɔɔzɩ mbʋ pɩkazaa yɔ nɛ ɩsɩɩ nɛ tɛʋ kɔɔ nɛ kife.» 24 Nɛ pɔñɔɔzɩ mbʋ pɩkazaa yɔ nɛ pasɩɩ nɛ tɛʋ kɔɔ nɛ kife, ɛzɩ Moyizi kaaɖʋʋ paɣtʋ yɔ, nɛ pɩtɩsɔŋ nɛ pɩtɩɖʋ sonzoowa. 25 Nɛ Moyizi heyi-wɛ se: «Ɩtɔɔ kpɔnɔ ŋgʋ sɔnɔ, mbʋ pʋyɔɔ yɔ sɔnɔ kɛ Yehowa sabaatɩ. Sɔnɔ ɩɩkaɣ-kʋ naʋ tataa. 26 Ɩkaɣ-kʋ kuu kɩyakɩŋ 6, ɛlɛ kɩyakʋ 7 ñɩŋgʋ wiye, pʋ-tɔbʋʋ se Sabaatɩ wiye lɛ,+ ɩɩkaɣ-kʋ naʋ.» 27 Paa mbʋ yɔ, ɛyaa nabɛyɛ lɩwa se pokuu-kʋ kɩyakʋ 7 ñɩŋgʋ wiye, ɛlɛ patɩna nabʋyʋ.
28 Peeɖe Yehowa pɔzɩ Moyizi se: «Ikiziɣ se ɩɩñaŋ tɔm ndʋ meheyiɣ-mɩ yɔ nɛ man-paɣtʋ nɛ pɩkɔɔ pɩsɩɩnɩ ɖooye?+ 29 Ɩtaasɔɔ se Yehowa ha-mɩ Sabaatɩ.+ Pʋyɔɔ ɛcɛlɩɣ-mɩ kɩyakɩŋ 2 tɔɔnaɣ kɩyakʋ 6 ñɩŋgʋ wiye. Pɩwɛɛ se paa weyi lɛ, ɛcaɣ ɖenɖe ɛwɛɛ yɔ; pɩtɩpɔzɩ se nɔɔyʋ ɛkʋyɩ lone nɖɩ ɖɩ-taa ɛwɛɛ yɔ kɩyakʋ 7 ñɩŋgʋ wiye.» 30 Nɛ samaɣ ɖɔ Sabaatɩ paɣtʋ yɔɔ* kɩyakʋ 7 ñɩŋgʋ wiye.+
31 Izrayɛɛlɩ ɖɩɣa yaa tɔɔnaɣ ŋga se «maana.»* Kaahʋlʋmɩ ɛzɩ koriyandɩrɩ piye yɔ, nɛ kaawɛ leleŋ ɛzɩ tʋŋ num kakayɩsɩ nzɩ sɩwɛ tatayaa tatayaa yɔ.+ 32 Nɛ Moyizi yɔɔdɩ se: «Paɣtʋ tʋnɛ Yehowa ɖʋwa: “Ɩkpaɣ maana omɛɛrɩ kʋɖʋmʋʋ nɛ ɩtɔsɩ-kʋ mɩ-kpaɖɩŋ kpeekpe taa,+ se pɩsa nɛ pana tɔɔnaɣ ŋga maha-mɩ se ɩtɔɔ kañɩmbusuu taa alɩwaatʋ ndʋ malɩzaɣ-mɩ Ejipiti ɛjaɖɛ taa yɔ.”» 33 Peeɖe Moyizi heyi Aarɔɔnɩ se: «Kpaɣ peeɣa nɛ ŋsuu ka-taa maana omɛɛrɩ kʋɖʋmʋʋ nɛ ŋsɩɩ-kɛ Yehowa ɛsɩndaa, nɛ pɩkɛ mbʋ pɩwɛɛ se pɔtɔsɩ-pʋ mɩ-kpaɖɩŋ kpeekpe taa yɔ.»+ 34 Ɛzɩ Yehowa ɖʋʋ Moyizi paɣtʋ yɔ, Aarɔɔnɩ sɩɩ-kɛ Aseɣɖe Lɩzʋʋ ɛsɩndaa+ se pɩsa nɛ kɛwɛɛ tam. 35 Izrayɛɛlɩ mba tɔɔ maana pɩnzɩ 40,+ pɩkɔɔ pɩsɩɩnɩ alɩwaatʋ ndʋ patalɩ ɛjaɖɛ nɖɩ ɖɩ-taa ɛyaa wɛɛ yɔ.+ Pɔtɔɔ maana pɩkɔɔ pɩsɩɩnɩ alɩwaatʋ ndʋ patalɩ Kanaŋ ɛjaɖɛ kamaɣ yɔɔ yɔ.+ 36 Omɛɛrɩ kʋɖʋmʋʋ kɛ efa* hɔɔlʋʋ 10 ñɩŋgʋ.