Kroniiki takayaɣ kajalaɣ ñɩŋga
22 Nɛ Daviid yɔɔdɩ se: «Ɛsɔ toovenim tʋ Yehowa ɖɩɣa yɔ, nɛ Izrayɛɛlɩ tɛ kɩlaʋ kɩñaɣzʋʋ altaaru yɔ.»+
2 Nɛ Daviid yɔɔdɩ se pekpeɣli agɔma+ mba paawɛ Izrayɛɛlɩ ɛjaɖɛ taa yɔ, nɛ ɛɖʋ-wɛ tʋmɩyɛ se pɛkɛ pɛɛ saɣyaa nɛ pasaɣ pɛɛ nɛ pɔñɔɔzɩ-yɛ nɛ paamanɩ Ɛsɔ toovenim tʋ ɖɩɣa.+ 3 Daviid ñɔɔzɩ ɖɔɖɔ ñɩɣtʋ sakɩyɛ se palabɩnɩ nɔnɔsɩ pɔɔyɩŋ ñɩma nɛ mbʋ pakpaɣnɩ wondu yɔ, nɛ ñɩɣyʋʋ kɩsɛɛmʋʋ sakɩyɛ nɛ pataapɩzɩɣ se pamaɣzɩ ki-yuŋ,+ 4 nɛ sɛɛdrɩ tɩʋ kpoŋgbolonaa+ ɖɔɖɔ pɩfɛyɩ kalʋʋ, mbʋ pʋyɔɔ yɔ Siidɔɔ mba+ nɛ Tiirɩ mba+ kɔnɩ Daviid sɛɛdrɩ tɩʋ kpoŋgbolonaa sakɩyɛ. 5 Nɛ Daviid yɔɔdɩ se: «Man-pɩyalʋ Salomɔɔ kɛ evebu nɛ ɛfɛyɩnɩ lɔŋsɩnɖɛ,+ nɛ ɖɩɣa ŋga pɩwɛɛ se pama Yehowa yɔ pɩwɛɛ se kɛwɛɛ ɖeu siŋŋ,+ se pɩsa nɛ patɩlɩ ka-hɩɖɛ sɛʋ nɛ ke-keɖeɣa+ ajɛɛ kpeekpe taa.+ Pʋyɔɔ lɛ, mɔñɔɔzʋʋ wondu nɛ mansɩɩ-ɩ.» Nɛ Daviid ñɔɔzɩ wondu sakɩyɛ pʋcɔ nɛ ɛsɩ.
6 Pɩtasɩ lɛ, ɛya ɛ-pɩyalʋ Salomɔɔ nɛ ɛɖʋ-ɩ paɣtʋ se ɛma Izrayɛɛlɩ tɛ Ɛsɔ Yehowa ɖɩɣa. 7 Daviid heyi ɛ-pɩyalʋ Salomɔɔ se: «Ma lɛ, maasɔɔlɩnɩ ma-laŋɩyɛ pilim se mama ɖɩɣa ŋga keyeki nɛ mɛ-Ɛsɔ Yehowa hɩɖɛ sɛɛ yɔ.*+ 8 Ɛlɛ Yehowa tɔm talɩ-m se: “Ŋkpɛdɩ calɩm sakɩyɛ, nɛ ŋyoo yoŋ sɔsɔŋ. Ŋŋkaɣ maʋ ɖɩɣa ŋga keyeki nɛ ma-hɩɖɛ sɛɛ yɔ,*+ mbʋ pʋyɔɔ yɔ ŋkpɛdɩ calɩm sakɩyɛ tataa mɛ-ɛsɩndaa. 9 Na! Ŋkaɣ wɛnʋʋ pɩyalʋ+ weyi ɛkaɣ kɛʋ laŋhɛzɩyɛ* ɛyʋ yɔ, nɛ mankaɣ-ɩ labʋ nɛ ɛhɛzɩnɩ e-koyindinaa kpeekpe mba pɔcɔ-ɩ nɛ pata yɔ,+ mbʋ pʋyɔɔ yɔ pakaɣ-ɩ yaʋ se Salomɔɔ,*+ nɛ mankaɣ haʋ Izrayɛɛlɩ laŋhɛzɩyɛ nɛ ɖiɣ ɖiɣ caɣʋ ɛ-alɩwaatʋ taa.+ 10 Ɛnʋ kaɣnɩ maʋ ɖɩɣa ŋga keyeki nɛ ma-hɩɖɛ sɛɛ yɔ.*+ Ɛkaɣ pɩsʋʋ man-pɩyalʋ, nɛ mankaɣ kɛʋ ɛ-caa.+ Mankaɣ kam e-kewiyitu kpelaɣ camɩyɛ Izrayɛɛlɩ yɔɔ tam.”+
11 «Lɛɛlɛɛyɔ lɛ, man-pɩyalʋ, Yehowa ɛwɛɛ ñɔ-cɔlɔ, nɛ piɖeni-ŋ nɛ ŋma ñɛ-Ɛsɔ Yehowa ɖɩɣa, ɛzɩ ɛyɔɔdʋʋ ñɔ-yɔɔ yɔ.+ 12 Kɔzɩ kɔzɩ lɛ, Yehowa ɛha-ŋ lɛɣtʋ nɛ tɔm taa nɩʋ lɛɣtʋ+ alɩwaatʋ ndʋ ɛhaɣ-ŋ ɖoŋ Izrayɛɛlɩ yɔɔ yɔ, se pɩsa nɛ ŋɖɔkɩ ñɛ-Ɛsɔ Yehowa paɣtʋ.+ 13 Ye ŋɖɔŋ paɣtʋ nɛ tɔm hʋʋ mbʋ Yehowa ɖʋ paɣtʋ Moyizi se ɛcɛlɩ Izrayɛɛlɩ yɔ+ tɩ-yɔɔ camɩyɛ yɔ,+ ɖɩnɛ ɛlɛ pɩkaɣ-ŋ ɖenuu. Wɛɛ abalɩtʋ nɛ ŋwɛɛ ɖoŋ. Sɔɔndʋ ɛtaakpa-ŋ nɛ taaseli.+ 14 Na, malabɩ kʋñɔŋ siŋŋ nɛ mɔñɔɔzɩ mbʋ pamaɣnɩ Yehowa ɖɩɣa yɔ nɛ mansɩɩ: sika talaŋwaa* 100 000 nɛ liidiye talaŋwaa 1 000 000 nɛ ñɩɣyʋʋ kɩsɛɛmʋʋ nɛ ñɩɣtʋ sakɩyɛ+ ndʋ paapɩzɩɣ nɛ pamaɣzɩ-tʋ yɔ, nɛ mɔñɔɔzɩ kpoŋgbolonaa nɛ pɛɛ,+ ɛlɛ ŋkaɣ sɔzʋʋ pɩ-yɔɔ. 15 Tʋmlaɖaa sakɩyɛ wɛ ñɔ-cɔlɔ—pɛɛ saɣyaa, pɛɛ kuduyuŋ mayaa,+ kafɩndanaa, nɛ tʋmlaɖaa mba pɛwɛ niye tʋma tɩŋa labʋ taa yɔ.+ 16 Sika, liidiye, ñɩɣyʋʋ kɩsɛɛmʋʋ, nɛ ñɩɣtʋ ɖɔwa nɛ pɩɩsaŋ se pamaɣzɩ-tʋ.+ Kʋyɩ nɛ ŋpaɣzɩ tʋmɩyɛ, nɛ Yehowa ɛwɛɛ ñɔ-cɔlɔ.»+
17 Nɛ Daviid ɖʋ Izrayɛɛlɩ awumbiya kpeekpe paɣtʋ se pasɩnɩ ɛ-pɩyalʋ Salomɔɔ: 18 «Ɛzɩ mɩ-Ɛsɔ Yehowa fɛyɩ mɩ-cɔlɔ, nɛ ɛtɩha-mɩ hɛzʋʋ hɔɔlɩŋ kpeekpe taa? Mbʋ pʋyɔɔ yɔ ɛɖʋzɩ me-nesi tɛɛ ɛyaa mba pɛwɛ ɛjaɖɛ taa yɔ, nɛ poluzi ɛjaɖɛ Yehowa tɛɛ nɛ ɛ-samaɣ tɛɛ. 19 Lɛɛlɛɛyɔ lɛ, ɩtɛ mɩ-taa nɛ mɩ-laŋɩyɛ nɛ mɩ-kalɩzaɣ* pilim se ɩñɩnɩɣ mɩ-Ɛsɔ Yehowa,+ nɛ ɩpaɣzɩ maʋ Ɛsɔ toovenim tʋ Yehowa tɛ kooka kiɖeɖeɣa,+ pɩsa nɛ pɔkɔnɩ Yehowa ɛgbɛyɛ ɖʋʋ aɖakaɣ nɛ Ɛsɔ toovenim tʋ wondu kiɖeɖetu+ ɖɩɣa ŋga pamaɣ-kɛ se keyele nɛ Yehowa hɩɖɛ sɛɛ yɔ* ka-taa.»+