Kroniiki takayaɣ naalɛ ñɩŋga

6 Alɩwaatʋ ndʋ lɛ, Salomɔɔ yɔɔdɩ se: «Yehowa yɔɔdaa se ɛkaɣ caɣʋ cɩkpɛndʋʋ sɔsɔʋ taa.+ 2 Lɛɛlɛɛyɔ lɛ, mama-ŋ ɖɩɣa ŋga kakʋyɩ siŋŋ yɔ, lone nɖɩ ɖɩkam camɩyɛ yɔ se ŋcaɣ ɖɩ-taa tam tam.»+

3 Nɛ wiyaʋ kɛzɩ ɛ-tɩ nɛ ɛha ɛsa nɛ Izrayɛɛlɩ samaɣ kpeekpe, nɛ ɛpaɣzɩ-kɛ wazʋʋ; alɩwaatʋ ndʋ tɩ-taa lɛ, Izrayɛɛlɩ samaɣ kpeekpe ñasɩŋaa.+ 4 Ɛyɔɔdaa se: «Pasa Izrayɛɛlɩ tɛ Ɛsɔ Yehowa, weyi ɛyɔɔdɩnɩ ɛ-maɣmaɣ ɛ-nɔɔ nɛ eheyi man-caa Daviid lidaʋ tɔm, nɛ ɛtɩŋnɩ ɛ-maɣmaɣ e-nesi yɔɔ nɛ eyele nɛ tɩla yɔ, ɛtɔm se: 5 “Kpaɣnɩ kɩyakʋ ŋgʋ malɩzɩ man-samaɣ Izrayɛɛlɩ Ejipiti ɛjaɖɛ taa yɔ, mantɩlɩzɩ tɛtʋ natʋyʋ Izrayɛɛlɩ cejewe kpeekpe taa se pama ɖɩɣa nɛ ma-hɩɖɛ wɛɛ peeɖe,+ nɛ mantɩlɩzɩ ɛyʋ nɔɔyʋ se ɛpɩsɩ man-samaɣ Izrayɛɛlɩ ɖiyiyu. 6 Ɛlɛ lɛɛlɛɛyɔ lɛ, malɩzɩ Yeruzalɛm+ se ma-hɩɖɛ ɛwɛɛ peeɖe, nɛ malɩzɩ Daviid se eɖiyi man-samaɣ Izrayɛɛlɩ.”+ 7 Nɛ man-caa Daviid kaasɔɔlɩnɩ ɛ-laŋɩyɛ pilim se ɛma ɖɩɣa ŋga keyeki nɛ Izrayɛɛlɩ tɛ Ɛsɔ Yehowa hɩɖɛ sɛɛ yɔ.*+ 8 Ɛlɛ Yehowa heyi man-caa Daviid se: “Ŋŋsɔɔlɩnɩ ña-laŋɩyɛ pilim se ŋma ɖɩɣa ŋga keyeki nɛ ma-hɩɖɛ sɛɛ yɔ,* nɛ ŋlabɩ camɩyɛ se ŋsɔɔlɩ mbʋ ña-laŋɩyɛ taa. 9 Paa mbʋ yɔ, ŋŋkaɣ maʋ ɖɩɣa ŋga; ɛlɛ ña-maɣmaɣ ña-pɩyalʋ weyi pakaɣ-ŋ lʋlʋʋ yɔ,* ɛnʋ kaɣnɩ maʋ ɖɩɣa ŋga keyeki se ma-hɩɖɛ ɛsɛɛ yɔ.”*+ 10 Yehowa yeba nɛ lidaʋ tɔm ndʋ ɛɛyɔɔdaa yɔ tɩla, mbʋ pʋyɔɔ yɔ mɛlɛɣzɩ man-caa Daviid lone taa nɛ mancaɣ Izrayɛɛlɩ kewiyaɣ kpelaɣ yɔɔ,+ ɛzɩ Yehowa kaayɔɔdʋʋ yɔ.+ Mama ɖɔɖɔ ɖɩɣa ŋga keyeki se Izrayɛɛlɩ tɛ Ɛsɔ Yehowa hɩɖɛ ɛsɛɛ yɔ,* 11 nɛ mansɩ peeɖe Aɖakaɣ ŋga ka-taa nɛ ɛgbɛyɛ+ nɖɩ Yehowa ɖʋnɩ Izrayɛɛlɩ samaɣ yɔ.»*

12 Pʋwayɩ lɛ, ɛsɩŋ Yehowa altaaru ɛsɩndaa Izrayɛɛlɩ samaɣ kpeekpe ɛsɩndaa nɛ ɛkpazɩ e-nesi.+ 13 (Mbʋ pʋyɔɔ yɔ Salomɔɔ kaalubi ñɩɣyʋʋ kɩsɛɛmʋʋ tendene nɛ ɛsɩɩ-ɖɩ kadaɣ hɛkʋ taa.+ Ðɩ-ɖaɣlɩkɩŋ kaakɛ nuŋgolonzi* 5, ɖɩ-walanzɩ kɛ nuŋgolonzi 5, nɛ ɖɩ-kʋkʋyɩŋ kɛ nuŋgolonzi 3; nɛ ɛsɩŋ ɖɩ-yɔɔ.) Nɛ eluŋ ɛ-nʋmbɔla yɔɔ Izrayɛɛlɩ samaɣ kpeekpe ɛsɩndaa nɛ ɛkpazɩ e-nesi nɛ ɛsɔdaa,+ 14 nɛ ɛyɔɔdɩ se: «Hayɩ Izrayɛɛlɩ tɛ Ɛsɔ Yehowa, Ɛsɔ nɔɔyʋ fɛyɩ ɛzɩ ña yɔ ɛsɔdaa yaa tɛtʋ yɔɔ, nɛ ŋɖɔŋ ɛgbɛyɛ nɖɩ ŋɖʋwa yɔ ɖɩ-yɔɔ nɛ ŋwɩlɩɣ sɔɔlɩm siɣsiɣ ñɩmbʋ ña-lɩmɖʋyaa mba pɔɖɔŋ ñɛ-ɛsɩndaa nɛ pa-laŋɩyɛ pilim yɔ.+ 15 Ŋɖɔm lidaʋ tɔm ndʋ ŋheyi man-caa, ña-lɩmɖʋyʋ Daviid yɔ tɩ-yɔɔ.+ Ŋyɔɔdɩ lidaʋ tɔm ndʋ nɛ ña-maɣmaɣ ñɔ-nɔɔ, nɛ sɔnɔ ŋtɩŋnɩ ña-maɣmaɣ ñe-nesi yɔɔ nɛ ŋyele nɛ tɩla.+ 16 Nɛ lɛɛlɛɛyɔ lɛ, hayɩ Izrayɛɛlɩ tɛ Ɛsɔ Yehowa, ɖɔ lidaʋ tɔm ndʋ ŋheyi man-caa, ña-lɩmɖʋyʋ Daviid yɔ tɩ-yɔɔ, ŋŋyɔɔdaa se: “Ye ña-pɩyalaa ɩñɩtaa nɛ pɔcɔŋnɩ pɔ-ɖɔnɛ yɔɔ camɩyɛ nɛ pɔɖɔŋ man-paɣtʋ yɔɔ,+ ɛzɩ ŋɖɔm mɛ-ɛsɩndaa yɔ, paa pɩɩla ɛzɩma yɔ, ña-lʋlʋʋ taa tʋ nɔɔyʋ kaɣ wɛʋ mɛ-ɛsɩndaa se ɛcaɣ Izrayɛɛlɩ kewiyaɣ kpelaɣ yɔɔ.”+ 17 Nɛ lɛɛlɛɛyɔ, hayɩ Izrayɛɛlɩ tɛ Ɛsɔ Yehowa, yele nɛ lidaʋ tɔm ndʋ ŋheyi ña-lɩmɖʋyʋ Daviid yɔ, tɩla.

18 «Ɛlɛ toovenim taa lɛ, Ɛsɔ pɩzɩɣ nɛ ɛcaɣ ɛyaa cɔlɔ tɛtʋ yɔɔ?+ Na! Ŋŋmakɩ ɛsɔdaa, ɛɛɛ, ɛsɔdaa kpeekpe;+ nɛ pɩcandɩnɩ ɖɩɣa kanɛ, ŋga mama-ŋ yɔ!+ 19 Lɛɛlɛɛyɔ, kʋ nɩŋgbaŋʋʋ nɛ ŋnɩɩ ña-lɩmɖʋyʋ adɩma nɛ tenduu mbʋ etendiɣ-ŋ se ŋna ɛ-pʋtɔdɩyɛ yɔ, hayɩ mɛ-Ɛsɔ Yehowa, nɛ ŋwelisi kubuka ŋga ña-lɩmɖʋyʋ makɩ se ŋsɩnɩ-ɩ, nɛ adɩma wena ɛwɛɛ nɛ ɛlakɩ ñɛ-ɛsɩndaa yɔ. 20 Ñɛ-ɛsa ikuli nɛ acɔŋnɩ ɖɩɣa kanɛ kɔ-hɔɔlʋʋ taa wɩsɩ nɛ ɖoo, acɔŋnɩ lone nɖɩ ŋyɔɔdaa se ŋkaɣ sɩʋ ña-hɩɖɛ ɖɩ-taa yɔ,+ nɛ ŋwelisi adɩma wena ña-lɩmɖʋyʋ haɣ ɛsa nɛ lone ɖɩnɛ nɛ ɛlakɩ yɔ. 21 Nɛ ŋwelisi tenduu mbʋ ña-lɩmɖʋyʋ tendiɣ-ŋ se ŋsɩnɩ-ɩ yɔ nɛ mbʋ ña-samaɣ Izrayɛɛlɩ haɣ ɛsa nɛ lone ɖɩnɛ nɛ katɩmɩɣ nɛ kɔpɔzʋʋ yɔ,+ nɛ ŋwelisini ɖooo ña-ɖɩjaɣyɛ taa, ɖooo ɛsɔdaa;+ ɛɛɛ, welisi nɛ ŋkpeɣ.+

22 «Ye ɛyʋ nɔɔyʋ ɛyʋsɩnɩ ɛyʋ lɛlʋ nɛ pɔpɔzɩ-ɩ se eɖuu* nɛ pʋyɔɔ lɛ ɛwɛɛ ɖuutu* tɛɛ, nɛ ye ɛwɛ ɖuutu* ndʋ tɩ-tɛɛ nɛ ɛkɔɔ ña-altaaru ɛsɩndaa ɖɩɣa kanɛ ka-taa yɔ,+ 23 pʋbʋ lɛ, welisini ɖooo ɛsɔdaa nɛ ŋɖʋ nɔɔ tɔm ndʋ tɩ-taa nɛ ŋhʋʋ ña-lɩmɖʋyaa tɔm nɛ ŋhɛyɩ ɛyʋ kɩdɛkɛdʋ nɛ ŋpɩsɩnɩ ɛ-ñʋʋ taa mbʋ ɛlaba yɔ,+ nɛ ŋɖezi weyi ɛfɛyɩnɩ kɩwɛɛkɩtʋ natʋyʋ yɔ ɛ-tɔm se tiɖewa* nɛ ŋhɛyɩ-ɩ ɛ-maɣmaɣ e-siɣsiɣ wɛtʋ nɔɔ taa.+

24 «Nɛ ye koyindu nɔɔyʋ ɛwabɩ ña-samaɣ Izrayɛɛlɩ mbʋ pʋyɔɔ yɔ pɛwɛɛ nɛ payʋsʋʋnɩ-ŋ,+ nɛ papɩsɩ ñɔ-cɔlɔ nɛ pasa ña-hɩɖɛ+ nɛ patɩmɩ+ ɖɩɣa kanɛ ka-taa nɛ petendi-ŋ se ŋna pa-pʋtɔdɩyɛ yɔ,+ 25 pʋbʋ lɛ, welisini ɖooo ɛsɔdaa+ nɛ ŋkpeɣ ña-samaɣ Izrayɛɛlɩ kɩwɛɛkɩm nɛ ŋpɩsɩnɩ-wɛ ɛjaɖɛ nɖɩ ŋcɛlɩ pa nɛ pɔ-cɔzɔnaa yɔ ɖɩ-taa.+

26 «Ye ɛsɔdaa ɛɖɩɣaa nɛ tɛʋ ɛɛnɩɣ+ mbʋ pʋyɔɔ yɔ pɛwɛɛ nɛ payʋsʋʋnɩ-ŋ,+ nɛ paha pɛ-ɛsa nɛ lone ɖɩnɛ nɛ patɩmɩɣ nɛ pasaŋ ña-hɩɖɛ nɛ peyele pa-kɩwɛɛkɩm labʋ mbʋ pʋyɔɔ yɔ ŋluzi-wɛ* yɔ,+ 27 pʋbʋ lɛ, welisini ɖooo ɛsɔdaa nɛ ŋkpeɣ ña-lɩmɖʋyaa, ña-samaɣ Izrayɛɛlɩ kɩwɛɛkɩm, mbʋ pʋyɔɔ yɔ ŋkaɣ-wɛ wɩlʋʋ nʋmɔʋ kɩbaŋʋ ŋgʋ kɩ-taa pɩwɛɛ se pɔɖɔ yɔ;+ nɛ ŋyele nɛ tɛʋ nɩɩ+ ñɛ-ɛjaɖɛ nɖɩ ŋha ña-samaɣ se ɖɩkɛ ka-ñɩm yɔ ɖɩ-taa.

28 «Ye ñɔɔsɩ ɛlɩ ɛjaɖɛ taa,+ yaa ɛyaa kɩzɩkʋ,+ helim miŋ ñɩmbʋ mbʋ piyeki nɛ tɔɔnasɩ wɩlɩɣ yɔ, tɔɔnasɩ kʋdɔŋ,+ kudoloŋ, yaa kudoloŋ ŋgʋ kɩtɔkɩ pɩdɩɩfɛyɩ yɔ,*+ yaa ye po-koyindinaa iwoba nɛ pɛñɛyɩ-wɛ paa pɛ-ɛjaɖɛ taa tɛtʋ* ndʋ lɛ tɩ-taa,+ yaa ye paa kʋñɔŋ ŋgʋ yaa kʋdɔŋ ŋgʋ kɩlɩwa yɔ,+ 29 paa pɩtɩɩkɛ adɩma,+ paa pɩtɩɩkɛ pʋtɔdɩyɛ naʋ tenduu mbʋ+ ɛyʋ nɔɔyʋ yaa ña-samaɣ Izrayɛɛlɩ kpeekpe tendiɣ (mbʋ pʋyɔɔ yɔ paa weyi ɛsɩm ɛ-maɣmaɣ ɛ-wɩzasɩ nɛ ɛ-maɣmaɣ e-siziŋ)+ alɩwaatʋ ndʋ pakpazɩɣ pe-nesi nɛ ɖɩɣa kanɛ kɔ-yɔɔ kiŋ yɔ,+ 30 pʋbʋ lɛ, welisini ɖooo ɛsɔdaa, ña-ɖɩjaɣyɛ taa,+ nɛ ŋkpeɣ;+ nɛ ŋhɛyɩ paa weyi lɛ ɛzɩ ɛ-lakasɩ kpeekpe pɔzʋʋ yɔ, mbʋ pʋyɔɔ yɔ ŋsɩm ɛ-laŋɩyɛ (ñe-ɖeke koŋ ñasɩmnɩ ɛyʋ laŋɩyɛ camɩyɛ),+ 31 se pɩsa nɛ pese-ŋ sɔɔndʋ nɛ pɔɖɔŋ ña-nʋmɔŋ taa kɩyakɩŋ weyi payɩ pacakɩ ɛjaɖɛ nɖɩ ŋcɛlɩ ɖɔ-cɔzɔnaa yɔ ɖɩ-taa yɔ.

32 «Pɩtasɩ lɛ, ɛgɔm weyi ɛtɩkɛ ña-samaɣ Izrayɛɛlɩ taa tʋ nɛ ɛlɩɩnɩ ɖooo poliŋ ɛjaɖɛ naɖɩyɛ taa nɛ ɛkɔɔ ña-hɩɖɛ sɔsɔɖɛ*+ nɛ ñe-nesi ɖoŋ ñɩnzɩ nɛ ñe-nesi nzɩ ŋsezaa yɔ sɩ-yɔɔ yɔ, ye ɛkɔm nɛ ɛha ɛsa nɛ ɖɩɣa kanɛ nɛ ɛtɩmɩ yɔ,+ 33 pʋbʋ lɛ, welisini ɖooo ɛsɔdaa, ña-ɖɩjaɣyɛ taa, nɛ ŋla mbʋ payɩ ɛgɔm ɛnʋ ɛpɔzʋʋ-ŋ yɔ, nɛ pɩsa nɛ tɛtʋ yɔɔ ɛyaa samasɩ kpeekpe tɩlɩ ña-hɩɖɛ+ nɛ pese-ŋ sɔɔndʋ, ɛzɩ ña-samaɣ Izrayɛɛlɩ lakʋʋ yɔ, nɛ patɩlɩ se paya ña-hɩɖɛ ɖɩɣa kanɛ, ŋga mamawa yɔ kɔ-yɔɔ.

34 «Ye ŋtiyi ña-samaɣ se koyooni ko-koyindinaa, paa pɩtɩɩkɛ le,+ nɛ paha ɛsa nɛ tɛtʋ ndʋ ŋlɩzaa yɔ nɛ ɖɩɣa ŋga mamawa se keyele nɛ ña-hɩɖɛ sɛɛ yɔ*+ nɛ patɩmnɩ-ŋ yɔ,+ 35 pʋbʋ lɛ, welisini ɖooo ɛsɔdaa nɛ ŋnɩɩ pa-adɩma nɛ tenduu mbʋ petendiɣ-ŋ se ŋna pa-pʋtɔdɩyɛ yɔ nɛ ŋhʋʋ pɔ-tɔm.+

36 «Ye payʋsɩnɩ-ŋ (mbʋ pʋyɔɔ yɔ nɔɔyʋ fɛyɩ se ɛɛlakɩ kɩwɛɛkɩm),+ nɛ ŋkɔ-wɛ nɛ pana nɛ ŋɖʋzɩ-wɛ koyindu nesi tɛɛ, nɛ koyindinaa kpaɣ-wɛ nɛ pɛɖɛnɩ-wɛ yomiye taa ɛjaɖɛ naɖɩyɛ taa, paa pɩkɛ poliŋ taa yaa pɩ-cɔlɔ yɔ;+ 37 nɛ pʋwayɩ pa-lɩmaɣza fe ɛjaɖɛ nɖɩ ɖɩ-taa powoni-wɛ yomiye taa yɔ, nɛ papɩsɩnɩ ñɔ-yɔɔ nɛ petendi-ŋ se ŋna pa-pʋtɔdɩyɛ alɩwaatʋ ndʋ pɛwɛ koyindinaa ɛjaɖɛ taa yɔ, nɛ pɔyɔɔdɩ se: “Ðɩlabɩ kɩwɛɛkɩm nɛ mbʋ pɩfɛyɩ ɖeu yɔ; ɖɩlabɩ kañatʋ lakasɩ,”+ 38 nɛ papɩsɩnɩ ñɔ-yɔɔ nɛ pa-laŋɩyɛ pilim+ nɛ pa-kalɩzaɣ* pilim alɩwaatʋ ndʋ pɛwɛ ɛjaɖɛ nɖɩ ɖɩ-taa pɛɖɛnɩ-wɛ yomiye taa yɔ ɖɩ-taa,+ nɛ paha ɛsa nɛ pɛ-ɛjaɖɛ nɖɩ ŋcɛlɩ pɔ-cɔzɔnaa yɔ nɛ tɛtʋ ndʋ ŋlɩzaa yɔ+ nɛ ɖɩɣa ŋga mamawa se keyele nɛ ña-hɩɖɛ sɛɛ yɔ* nɛ patɩmɩɣnɩ-ŋ yɔ, 39 pʋbʋ lɛ, welisini ɖooo ɛsɔdaa, ña-ɖɩjaɣyɛ taa, nɛ ŋnɩɩ pa-adɩma nɛ tenduu mbʋ petendiɣ-ŋ se ŋna pa-pʋtɔdɩyɛ yɔ, nɛ ŋhʋʋ pɔ-tɔm+ nɛ ŋkpeɣ ña-samaɣ ŋga kayʋsɩnɩ-ŋ yɔ.

40 «Lɛɛlɛɛyɔ lɛ, hayɩ mɛ-Ɛsɔ, mentendi-ŋ, ñɛ-ɛsa ikuli nɛ ŋkʋ ña-nɩŋgbaaŋ nɛ ŋnɩɩ adɩma wena palakɩ lone ɖɩnɛ ɖɩ-taa* yɔ.+ 41 Nɛ lɛɛlɛɛyɔ lɛ, hayɩ Yehowa Ɛsɔ, kpa ña-ɖɩhɛzɩyɛ lone taa,+ ña nɛ ño-ɖoŋ Aɖakaɣ. Hayɩ Yehowa Ɛsɔ, yele nɛ ñɔ-cɔjɔnaa suu ñʋʋ yabʋ, nɛ ŋyele nɛ ñɛ-ɛyaa siɣsiɣ tɩnaa mɛyɩ amɛya ña-kɩbandʋ yɔɔ.+ 42 Hayɩ Yehowa Ɛsɔ, taalɔ ñɛ-tɛ patam num.*+ Tɔzɩ sɔɔlɩm siɣsiɣ ñɩmbʋ mbʋ ŋwɛnɩ ña-lɩmɖʋyʋ Daviid yɔɔ yɔ pɩ-yɔɔ.»+