Kroniiki takayaɣ naalɛ ñɩŋga
14 Pʋwayɩ lɛ, Abiya sɩ,* nɛ pepimi-i Daviid Tɛtʋ taa;+ nɛ ɛ-pɩyalʋ Aazaa pɩsɩ wiyaʋ e-lone taa. Ɛ-alɩwaatʋ taa lɛ, ɛjaɖɛ hɛzɩ pɩnzɩ 10.
2 Aazaa labɩ mbʋ pɩwɛ ɖeu nɛ pɩtʋʋzɩ ɛ-Ɛsɔ Yehowa ɛsɩndaa yɔ. 3 Ɛyɔkɩ agbaaɣdaa altaarunaa+ nɛ lona kʋkʋya, ɛyɔkɩ tilima kiɖeɖena,+ nɛ ɛsɛtɩ sizikasɩ kiɖeɖesi.*+ 4 Pɩtasɩ lɛ, eheyi Yuuda mba se pañɩnɩ pɔ-cɔzɔnaa tɛ Ɛsɔ Yehowa nɛ pɔɖɔ Paɣtʋ nɛ mbʋ payɩ eheyi-wɛ se pala yɔ pɩ-yɔɔ. 5 Nɛ ɛɖɩzɩ Yuuda tɛtʋ ndɩ ndɩ tɩŋa taa lona kʋkʋya nɛ mbʋ pɩ-yɔɔ pasɩɣ ŋgee tɩlaaɖɩ yɔ,+ nɛ e-kewiyitu tɔɔʋ alɩwaatʋ taa lɛ, kewiyaɣ kaawɛ pɛɛyɛ taa. 6 Ɛma tɛtʋ ɖoŋ ñɩndʋ ndɩ ndɩ Yuuda,+ mbʋ pʋyɔɔ yɔ nabʋyʋ taacɛyɩɣ ɛjaɖɛ nɛ nabɛyɛ taayouni-i pɩnzɩ nzɩ sɩ-taa, mbʋ pʋyɔɔ yɔ Yehowa kaaha-ɩ hɛzɩyɛ.+ 7 Eheyi Yuuda se: «Iyele nɛ ɖɩma tɛtʋ ndɩ ndɩ tʋnɛ nɛ ɖɩcɔzɩ-tʋ kolonzi nɛ tilima,+ nɔnɔsɩ* nɛ ñɩɣtʋ ndʋ paɖɩkɩnɩ-sɩ yɔ. Mbʋ pʋyɔɔ yɔ ɛjaɖɛ kpɛndɩ ɖɩwɛ ɖe-nesi tɛɛ, mbʋ pʋyɔɔ yɔ ɖɩñɩnɩ ɖɛ-Ɛsɔ Yehowa. Ðɩñɩnɩ-ɩ nɛ ɛha-ɖʋ hɛzɩyɛ nɛ pɩcɔɔ pɩta.» Mbʋ papɩzaa nɛ pama tɛtʋ ndʋ nɛ pɛtɛ.+
8 Aazaa kaawɛnɩ sɔɔjanaa 300 000 mba palɩnɩ Yuuda yɔ, paawɛnɩ kpayɩŋ sɔsɔŋ nɛ kɩgbɛzɛmɩŋ. Nɛ sɔdɩŋ ɖoŋ tɩnaa mba palɩnɩ Bɛnjamɛɛ yɔ paakpɛndɩ 280 000, pɔɖɔkaɣ kpayɩŋ cikpeŋ* nɛ papaɣ tɔŋ.*+
9 Pʋwayɩ lɛ, Etiyoopii tʋ Zeraa kpaɣ sɔɔjanaa 1 000 000 nɛ kɛɛkɛɛnaa 300+ nɛ ɛkɔɔ se eyooni-wɛ. Ɛtalɩ Maresaa lɛ,+ 10 Aazaa lɩɩ se eyooni-i, nɛ pɔñɔɔzɩ pa-tɩ Zefata Fɛɛʋ taa Maresaa se pala you. 11 Peeɖe Aazaa ya ɛ-Ɛsɔ Yehowa+ nɛ ɛyɔɔdɩ se: «Hayɩ Yehowa, mba ŋsɩɣna yɔ paa pɛwɛ ɖoŋ* yaa pɛfɛyɩ ɖoŋ yɔ,+ pɩ-tɔm tɩcɛyɩ ñɛ-ɛsɩndaa. Sɩnɩ-ɖʋ, hayɩ ɖɛ-Ɛsɔ Yehowa, mbʋ pʋyɔɔ yɔ ña ɖɩtaɣ liu,+ nɛ ña-hɩɖɛ taa ɖɩkɔm samaɣ kanɛ ka-wayɩ.+ Hayɩ Yehowa, ŋkɛ ɖɛ-Ɛsɔ. Taayele nɛ ɛyʋ yem wabɩ-ŋ.»+
12 Nɛ Yehowa wa Etiyoopii mba Aazaa ɛsɩndaa nɛ Yuuda ɛsɩndaa, nɛ Etiyoopii mba se.+ 13 Aazaa nɛ samaɣ ŋga kaawɛ ɛ-cɔlɔ yɔ pɔɖɔɔnɩ-wɛ nɛ pɔkɔɔ patalɩ ɖooo Geraarɩ,+ nɛ pɛwɛɛ Etiyoopii mba kʋʋ yɔɔ nɛ pɩtɩkazɩ pa-taa nɔɔyʋ nɛ ɛ-ɛsa, mbʋ pʋyɔɔ yɔ Yehowa nɛ ɛ-sɔɔjanaa panaŋ-wɛ. Pʋwayɩ lɛ, pokuu wondu sakɩyɛ nɛ pɛɖɛna. 14 Pɩtasɩ lɛ, pɔyɔkɩ tɛtʋ ndɩ ndɩ ndʋ tɩcɔ Geraarɩ nɛ tɩta yɔ, mbʋ pʋyɔɔ yɔ Yehowa kaayeba nɛ sɔɔndʋ sɔsɔtʋ kpa-wɛ; nɛ palazɩ wondu tɛtʋ ndɩ ndɩ tɩŋa taa, mbʋ pʋyɔɔ yɔ wondu sakɩyɛ kaawɛ tɩ-taa se palazɩ. 15 Powobi ɖɔɖɔ mba paawɛnɩ kpɩna yɔ pe-kizinzikiŋ wayɩ, nɛ pokuu heŋ nɛ aɖaaɖaanaa sakɩyɛ, pʋwayɩ lɛ papɩsɩ Yeruzalɛm.