Ɛsɩtɛɛrɩ
8 Evemiye nɖɩ ɖi-wiye, Wiyaʋ Asiyeruusi kpaɣ Yuuda ñɩma koyindu+ Hamaanɩ ɖɩɣa+ nɛ ɛcɛlɩ Abiɖe Ɛsɩtɛɛrɩ; nɛ Mɔrɩdekayɩ wolo wiyaʋ ɛsɩndaa, mbʋ pʋyɔɔ yɔ Ɛsɩtɛɛrɩ kuli tɔm yɔɔ nɛ ɛyɔɔdɩ se ɛ nɛ Mɔrɩdekayɩ pɛkɛ hɔʋ kʋɖʋmʋʋ taa ñɩma.+ 2 Nɛ wiyaʋ lɩzɩ e-niye ñɩɣʋ kokooye+ nɖɩ ɛmʋ Hamaanɩ cɔlɔ yɔ nɛ ɛcɛlɩ-ɖɩ Mɔrɩdekayɩ. Nɛ Ɛsɩtɛɛrɩ lɩzɩ Mɔrɩdekayɩ se ɛcɔnɩ Hamaanɩ ɖɩɣa yɔɔ.+
3 Pɩtasɩ lɛ, Ɛsɩtɛɛrɩ ɖaɣnɩ yɔɔdɩnʋʋ wiyaʋ. Eluŋ ɛ-nɩŋgbanzɩ tɛɛ nɛ ewii nɛ etendi-i se ɛhɩzɩ kɩdɛkɛdɩm mbʋ Agaagɩ tʋ Hamaanɩ labɩ Yuuda ñɩma yɔ nɛ tamaɣ kɩdɛkɛdaɣ ŋga ɛlabɩ pɔ-yɔɔ yɔ.+ 4 Wiyaʋ kpazɩ kewiyaɣ sika ɖaʋ nɛ ɛwɩlɩ Ɛsɩtɛɛrɩ,+ nɛ Ɛsɩtɛɛrɩ kʋyɩ nɛ ɛsɩŋ wiyaʋ ɛsɩndaa. 5 Nɛ ɛyɔɔdɩ se: «Ye pɩkɛdɩnɩ wiyaʋ nɛ ye mɔn-tɔm ɛkɛdɩnɩ-ɩ yɔ, nɛ ye pɩwɛ ɖeu wiyaʋ ɛsɩndaa nɛ mɔn-tɔm ɛwɛ ɖeu ɛ-ɛsɩndaa yɔ, yele nɛ paɖʋ paɣtʋ nɛ pama-tʋ nɛ tɩhɩzɩ ɛyʋ kɩdɛkɛdʋ Hamaanɩ, Agaagɩ tʋ+ Amedataa pɩyalʋ takayɩsɩ taa paɣtʋ,+ nzɩ sɩ-taa ɛmawa se paɖɩzɩ Yuuda ñɩma wiyaʋ ageeta kpeekpe taa yɔ. 6 Mbʋ pʋyɔɔ yɔ ɛzɩma manpɩzɩɣ nɛ mɔncɔnɩ asɛyʋʋ ŋgʋ kɩkaɣ kɔm man-samaɣ yɔɔ yɔ, nɛ ɛzɩma manpɩzɩɣ nɛ mɔncɔnɩ ɛzɩma paɖɩzɩɣ mɔ-hɔʋ taa ñɩma yɔ?»
7 Nɛ Wiyaʋ Asiyeruusi heyi Abiɖe Ɛsɩtɛɛrɩ nɛ Yuuda tʋ Mɔrɩdekayɩ se: «Ɩna! Mankpaɣ Hamaanɩ ɖɩɣa nɛ mɛncɛlɩ Ɛsɩtɛɛrɩ+ nɛ meyele nɛ popuzi Hamaanɩ sizika yɔɔ,+ mbʋ pʋyɔɔ yɔ ɛkpɛyaa se ɛlakɩ kɩwɛɛkɩm Yuuda ñɩma.* 8 Lɛɛlɛɛyɔ ɩpɩzɩɣ nɛ ɩma wiyaʋ hɩɖɛ taa tɔm ndʋ payɩ ɩnaɣ se tɩmʋnaa nɛ tɩpɩzɩɣ nɛ tɩkandɩyɩ Yuuda ñɩma yɔɔ yɔ nɛ ɩñɩɣ tɩ-yɔɔ wiyaʋ niye ñɩɣʋ kokooye, mbʋ pʋyɔɔ yɔ paɣtʋ ndʋ pama-tʋ wiyaʋ hɩɖɛ taa nɛ pañɩɣ tɩ-yɔɔ wiyaʋ niye ñɩɣʋ kokooye yɔ nɔɔyʋ ɛɛpɩzɩɣ nɛ ɛlɛɣzɩ-tʋ.»+
9 Nɛ payaa wiyaʋ takayɩsɩ taa mayaa alɩwaatʋ ndʋ tɩ-taa, fenaɣ tozo ñɩŋga, pʋ-tɔbʋʋ se Sivaŋ* fenaɣ taa, kɩyakʋ 23 ñɩŋgʋ wiye, nɛ pama tɔm ndʋ payɩ Mɔrɩdekayɩ pɔzʋʋ Yuuda ñɩma, wiyaʋ kaɖɩsɩ sɔsɔsɩ,+ komina ñʋndɩnaa nɛ ageeta taa awumbiya se pala yɔ,+ kpaɣnɩ Ɛndɩ nɛ piwolo Etiyoopii, ageeta 127, paa egeetiye nɖɩ lɛ ɖɩ-kʋnʋŋ matʋ taa nɛ paa samaɣ ŋga lɛ ka-kʋnʋŋ taa nɛ Yuuda ñɩma pa-maɣmaɣ pa-matʋ nɛ pa-kʋnʋŋ taa.
10 Mɔrɩdekayɩ ma paɣtʋ ndʋ Wiyaʋ Asiyeruusi hɩɖɛ taa nɛ ɛñɩɣ tɩ-yɔɔ wiyaʋ niye ñɩɣʋ kokooye+ nɛ ɛtɩŋnɩ kpaŋnaŋ yɔɔ caɣyaa mba patɩŋɩɣnɩ pɔ-yɔɔ nɛ petiyiɣni takayɩsɩ yɔ pɔ-yɔɔ nɛ etiyini takayɩsɩ nzɩ pamawa yɔ. Pacaɣ kpaŋnaŋ weyi pacakɩ ɩ-yɔɔ nɛ petiyiɣni takayɩsɩ nɛ iseɣ lɛɛ lɛɛ yɔ ɩ-yɔɔ; pɩkɛ kpaŋnaŋ weyi pɔcɔnɩ ɩ-yɔɔ se ɩlakɩ awiya tʋma yɔ. 11 Takayɩsɩ nzɩ sɩ-taa, wiyaʋ ha nʋmɔʋ Yuuda ñɩma mba pɛwɛ tɛtʋ ndɩ ndɩ taa payɩ yɔ se pekpeɣli nɛ palʋ pe-weziŋ* yɔɔ nɛ pɔtɔyɩtɩ, pakʋ nɛ paɖɩzɩ mba pakʋyʋʋ pɔ-yɔɔ se poyooni-wɛ yɔ, paa patɩɩlɩnɩ samaɣ yaa egeetiye nɖɩ ɖɩ-taa yɔ, pɩkpɛndɩnɩ halaa nɛ piya, nɛ pamʋ pa-ñɩm.+ 12 Pɩwɛɛ se pɩla mbʋ Wiyaʋ Asiyeruusi ageeta kpeekpe taa evemiye kʋɖʋmɖɩyɛ wiye, fenaɣ 12 ñɩŋga, pʋ-tɔbʋʋ se Adaarɩ* fenaɣ tɛ kɩyakʋ 13 ñɩŋgʋ wiye.+ 13 Pɩwɛɛ se tɔm ndʋ pama takayɩsɩ nzɩ sɩ-taa yɔ, tɩpɩsɩ paɣtʋ ageeta kpeekpe taa. Pɩwɛɛ se posusi-tʋ samasɩ kpeekpe taa, se pɩsa nɛ Yuuda ñɩma ñɔɔzɩ pa-tɩ nɛ paɖaŋ kɩyakʋ ŋgʋ ki-wiye nɛ pakpa kɩmɩyɛ po-koyindinaa.+ 14 Takayɩsɩ tiyinuu kpaŋnaŋ weyi palakɩnɩ awiya tʋma yɔ, ɩ-caɣyaa kpaɣ-ɩ nɛ pɛɖɛɛ kpɛdɛyɛ nɛ seya ɛzɩ wiyaʋ ɖʋʋ paɣtʋ yɔ. Posusi paɣtʋ ndʋ ɖɔɖɔ Suuzaŋ,*+ wiyaʋ ɖɩɣa* taa.
15 Nɛ Mɔrɩdekayɩ lɩɩ wiyaʋ ɛsɩndaa nɛ ɛɖɛɛ, esu awiya toko ŋgʋ kɩwɛnɩ tɔlɩm pʋlɔɔ nɛ kʋhʋlʋmʋm yɔ, ɛpam sika ñɩɣlɩm hulaɣ sɔsɔɔ nɛ esuu pɩsaŋ kɩbaŋ toko kɩtɩnʋʋ ŋgʋ palabɩnɩ heŋ hʋndʋ kɩsɛɛmtʋ yuulee yɔ.+ Nɛ Suuzaŋ* tɛtʋ makɩ kubusi nɛ taa leleŋ. 16 Yuuda ñɩma lɛ, pɩɩkɛnɩ-wɛ ñʋʋ yabʋ* nɛ taa leleŋ nɛ amɛya nɛ hɩɖɛ ɖʋʋ. 17 Nɛ ageeta kpeekpe taa nɛ tɛtʋ sɔsɔtʋ kpeekpe taa, ɖenɖe wiyaʋ tɔm nɛ ɛ-paɣtʋ patalaa yɔ, Yuuda ñɩma kaawɛ taa leleŋ nɛ amɛya taa, pɔtɔkɩ nɛ pɔñɔʋ nɛ palakɩ kazandʋ. Ɛjaɖɛ taa ñɩma mba paakɛ samasɩ lɛɛsɩ taa mba yɔ, pa-taa ɛyaa sakɩyɛ yɔɔdaɣ se pɛkɛ Yuuda ñɩma,+ mbʋ pʋyɔɔ yɔ sɔɔndʋ kpaɣaɣ-wɛ nɛ Yuuda ñɩma siŋŋ.