Ɛsɩtɛɛrɩ

9 Fenaɣ 12 ñɩŋga, pʋ-tɔbʋʋ se Adaarɩ* fenaɣ tɛ kɩyakʋ 13 ñɩŋgʋ wiye,+ alɩwaatʋ ndʋ pɩɩwɛɛ se pɔɖɔ wiyaʋ tɔm nɛ ɛ-paɣtʋ pɔ-yɔɔ yɔ,+ kɩyakʋ ŋgʋ ki-wiye Yuuda ñɩma koyindinaa taɣaɣ liu se pawakɩ-wɛ yɔ kɩtalaa lɛ, pɩlɛɣzɩ kpɛlɩ, nɛ Yuuda ñɩma wa mba papaɖaɣ-wɛ yɔ.+ 2 Yuuda ñɩma kpeɣli pɛ-tɛtʋ ndɩ ndɩ taa, Wiyaʋ Asiyeruusi ageeta kpeekpe taa+ se pakpazɩ nesi mba pañɩnaɣ se palabɩ-wɛ kɩdɛkɛdɩm yɔ pɔ-yɔɔ, nɛ nɔɔyʋ taapɩzɩɣ se ɛkaɖɩnɩ-wɛ, mbʋ pʋyɔɔ yɔ ɛyaa samasɩ kpeekpe seɣaɣ-wɛ sɔɔndʋ siŋŋ.+ 3 Nɛ ageeta taa awumbiya, kaɖɩsɩ sɔsɔsɩ,+ komina ñʋndɩnaa, nɛ ɛyaa mba pɔcɔŋnɩ wiyaʋ tʋma yɔɔ yɔ, pa-tɩŋa paɖʋwaɣ nesi Yuuda ñɩma, mbʋ pʋyɔɔ yɔ peseɣaɣ Mɔrɩdekayɩ sɔɔndʋ. 4 Mɔrɩdekayɩ kaapɩsɩ ɖoŋ tʋ+ wiyaʋ ɖɩɣa taa, nɛ ɛ-hɩɖɛ wɛɛ nɛ ɖɩsɛɣ nɛ pɩtalɩ ageeta kpeekpe taa, mbʋ pʋyɔɔ yɔ Mɔrɩdekayɩ kaawɛɛ nɛ ɛtɛzɩɣ kpaʋ ɖoŋ.

5 Yuuda mba wa po-koyindinaa tɩŋa, pakʋ-wɛ nɛ laɣɖɛ nɛ paɖɩzɩ-wɛ; palabɩ mba papaɖaɣ-wɛ yɔ ɛzɩ pɔsɔɔlʋʋ yɔ.+ 6 Yuuda mba kʋ abalaa 500 Suuzaŋ,*+ wiyaʋ ɖɩɣa* taa. 7 Pakʋ ɖɔɖɔ Parɩsaanɩdata, Dalɩfooni, Asɩpata, 8 Porata, Adaliya, Aridata, 9 Parɩmasɩta, Arisaayi, Aridayi, nɛ Vayizata; 10 paakɛ Amedataa pɩyalʋ Hamaanɩ weyi ɛkɛ Yuuda mba koyindu yɔ,+ ɛ-pɩyalaa 10. Ɛlɛ pakʋ-wɛ nɛ pɩtɛ lɛ, patɩkpaɣ pa-ñɩm nabʋyʋ.+

11 Kɩyakʋ ŋgʋ ki-wiye, peheyi wiyaʋ ɛyaa mba pakʋ Suuzaŋ,* wiyaʋ ɖɩɣa* taa yɔ pa-ñʋʋ.

12 Wiyaʋ heyi Abiɖe Ɛsɩtɛɛrɩ se: “Suuzaŋ,* wiyaʋ ɖɩɣa* taa, Yuuda mba kʋ abalaa 500 nɛ Hamaanɩ pɩyalaa 10 nɛ paɖɩzɩ-wɛ. Nɛ ɛbɛ palabɩ wiyaʋ ageeta lɛɛna taa?+ Ɛbɛ ŋñɩnɩɣ pɔzʋʋ lɛɛlɛɛyɔ? Mankaɣ-ŋ pʋ cɛlʋʋ. Nɛ ɛbɛ ŋtasɩ sɔɔlʋʋ? Mankaɣ-ŋ pʋ labʋ.” 13 Ɛsɩtɛɛrɩ cosi se: «Ye pɩkɛdɩnɩ wiyaʋ yɔ,+ ɛha nʋmɔʋ Yuuda ñɩma mba pɛwɛ Suuzaŋ* yɔ se cee ɖɔɖɔ pɔɖɔ sɔnɔ paɣtʋ yɔɔ;+ nɛ eyele nɛ popuzi Hamaanɩ pɩyalaa 10 sizika yɔɔ.»+ 14 Nɛ wiyaʋ ɖʋ paɣtʋ se pala mbʋ. Paɖʋ paɣtʋ nɛ posusi-tʋ Suuzaŋ,* nɛ popuzi Hamaanɩ pɩyalaa 10 sizika yɔɔ.

15 Yuuda ñɩma mba pɛwɛ Suuzaŋ* yɔ patasɩ kpeɣluu Adaarɩ fenaɣ tɛ kɩyakʋ 14 ñɩŋgʋ wiye+ nɛ pakʋ abalaa 300 Suuzaŋ* taa, ɛlɛ patɩkpaɣ pa-ñɩm nabʋyʋ.

16 Yuuda ñɩma mba pɛwɛ wiyaʋ ageeta lɛɛna taa yɔ, pekpeɣli ɖɔɖɔ nɛ palʋ pe-weziŋ* yɔɔ.+ Pɛtɛm po-koyindinaa tɔm:+ Pakʋ mba papaɖaɣ-wɛ yɔ pa-taa ɛyaa 75 000; ɛlɛ patɩkpaɣ pa-ñɩm nabʋyʋ. 17 Pɩɩkɛ Adaarɩ fenaɣ tɛ kɩyakʋ 13 ñɩŋgʋ wiye, nɛ pɛhɛzɩ kɩyakʋ 14 ñɩŋgʋ wiye nɛ papɩsɩ-kʋ kazandʋ nɛ taa leleŋ kɩyakʋ.

18 Yuuda ñɩma mba pɛwɛ Suuzaŋ* yɔ, pekpeɣli kɩyakʋ 13 ñɩŋgʋ wiye+ nɛ 14 ñɩŋgʋ wiye,+ nɛ pɛhɛzɩ kɩyakʋ 15 ñɩŋgʋ wiye, nɛ papɩsɩ-kʋ kazandʋ nɛ taa leleŋ kɩyakʋ. 19 Ɛlɛ Yuuda ñɩma mba pɛwɛ tɛtʋ lɛɛtʋ taa yɔ, palɩzɩ Adaarɩ fenaɣ tɛ kɩyakʋ 14 ñɩŋgʋ nɛ kɩkɛ taa leleŋ nɛ kazandʋ kɩyakʋ, amɛya kɩyakʋ,+ nɛ alɩwaatʋ ndʋ petiyiɣni ɖama tɔɔnasɩ yɔ.+

20 Mɔrɩdekayɩ+ ma mbʋ pɩlaba yɔ pɩ-tɔm nɛ etiyini takayɩsɩ Yuuda ñɩma mba payɩ pɛwɛ Wiyaʋ Asiyeruusi ageeta kpeekpe taa yɔ, pɩ-cɔlɔ nɛ poliŋ taa. 21 Eheyi-wɛ se pɩwɛɛ se pɔtɔzʋʋ Adaarɩ fenaɣ tɛ kɩyakʋ 14 ñɩŋgʋ yɔɔ, nɛ kɩyakʋ 15 ñɩŋgʋ yɔɔ paa pɩnaɣ ŋga, 22 mbʋ pʋyɔɔ yɔ kɩyakɩŋ ɛnɩ ɩ-yɔɔ Yuuda mba hɛzɩnɩ po-koyindinaa nɛ fenaɣ ŋga ka-taa pa-laŋwɛɛkɩyɛ pɩsɩ taa leleŋ nɛ pa-kʋñɔwiye+ pɩsɩ kazandʋ kɩyakʋ. Pɩwɛɛ se pɔtɔzʋʋ ɩ-yɔɔ nɛ ɩkɛ-wɛ kazandʋ nɛ taa leleŋ kɩyakɩŋ nɛ alɩwaatʋ ndʋ petiyiɣni ɖama tɔɔnasɩ nɛ palakɩ kʋjɔŋ kʋñɔndɩnaa yɔ.

23 Nɛ Yuuda mba tisi se powoki pɩ-yɔɔ nɛ pɔtɔkɩ kazandʋ ndʋ paatɛm paɣzʋʋ tɔɔʋ yɔ nɛ pɔɖɔŋ tɔm ndʋ Mɔrɩdekayɩ ma-wɛ yɔ tɩ-yɔɔ. 24 Mbʋ pʋyɔɔ yɔ Agaagɩ tʋ+ Amedataa pɩyalʋ Hamaanɩ,+ weyi ɛkɛ Yuuda mba kpeekpe koyindu yɔ, ɛɛlabɩ tamaɣ kɩdɛkɛdaɣ Yuuda mba yɔɔ se ɛɖɩzɩɣ-wɛ,+ nɛ ɛtɔ Puur,+ pʋ-tɔbʋʋ se ɛtɔ Piye, se eyele nɛ sɔɔndʋ sɔsɔtʋ kpa-wɛ nɛ ɛɖɩzɩ-wɛ. 25 Ɛlɛ alɩwaatʋ ndʋ Ɛsɩtɛɛrɩ kɔm wiyaʋ ɛsɩndaa yɔ, wiyaʋ ɖʋ paɣtʋ nɛ pama tɔm tʋnɛ:+ «Tamaɣ kɩdɛkɛdaɣ ŋga ɛlabɩ Yuuda mba yɔɔ yɔ,+ kapɩsɩ ɛ-maɣmaɣ ɛ-ñʋʋ taa»; nɛ popuzi ɛ nɛ ɛ-pɩyalaa sizika yɔɔ.+ 26 Pʋyɔɔ paya kɩyakɩŋ ɛnɩ se Puurim, palɩzɩ tɔm piye nɖɩ nɛ hɩɖɛ Puur* taa.+ Pʋyɔɔ lɛ, tɔm ndʋ payɩ pama takayaɣ ŋga ka-taa nɛ mbʋ pana tɔm ndʋ tɩ-yɔɔ nɛ mbʋ pɩtalɩ-wɛ yɔ pʋyɔɔ lɛ, 27 Yuuda mba ɖʋ pa-taa se pɩkɛnɩ kɩjɛyʋʋ pa-maɣmaɣ nɛ pa-lʋlʋʋ taa mba nɛ mba payɩ pɔsɔzʋʋ pɔ-yɔɔ yɔ+ se pɔtɔɔ kɩyakɩŋ 2 ɛnɩ ɩ-kazandʋ nɛ pataafɛɛ, nɛ pɔɖɔ tɔm ndʋ pama kɩyakɩŋ ɛnɩ ɩ-yɔɔ yɔ tɩ-yɔɔ alɩwaatʋ ndʋ paɖʋwa yɔ tɩ-yɔɔ paa pɩnaɣ ŋga. 28 Paa hɔʋ ŋgʋ, paa egeetiye nɖɩ, nɛ paa tɛtʋ ndʋ lɛ, pɩwɛɛ se tɩtɔzʋʋ kɩyakɩŋ ɛnɩ ɩ-yɔɔ nɛ tɩtɔkɩ ɩ-kazandʋ paa kpaɖʋʋ ŋgʋ lɛ kɩ-taa; nɛ pɩtɩpɔzɩ se Yuuda mba iyele tɔzʋʋ Puurim kɩyakɩŋ ɛnɩ ɩ-yɔɔ, nɛ ɩ-yɔɔ tɔzʋʋ mbʋ pɩtɩpɔzɩ se pɩsɩɩ tɩnaɣ pa-lʋlʋʋ taa mba hɛkʋ taa.

29 Nɛ Abihayɩlɩ pɛlɛ Abiɖe Ɛsɩtɛɛrɩ nɛ Yuuda tʋ Mɔrɩdekayɩ, palabɩnɩ tʋmɩyɛ ɖoŋ weyi paawɛna yɔ ɩ-tɩŋa nɛ pama takayaɣ 2 ñɩŋga nɛ pañɩɣnɩ niye Puurim tɔm yɔɔ. 30 Etiyini takayɩsɩ Yuuda mba kpeekpe ageeta 127 taa,+ Asiyeruusi+ kewiyaɣ taa, pama sɩ-taa laŋhɛzɩyɛ nɛ toovenim tɔm 31 se pañɩɣ niye Puurim kɩyakɩŋ yɔɔ tɔzʋʋ yɔɔ alɩwaatʋ ndʋ paɖʋwa yɔ tɩ-yɔɔ, ɛzɩ Yuuda tʋ Mɔrɩdekayɩ nɛ Abiɖe Ɛsɩtɛɛrɩ paaɖʋʋ-wɛ paɣtʋ se pala yɔ,+ nɛ ɛzɩ paaɖʋʋ pa-taa se pɩkɛnɩ kɩjɛyʋʋ pa-maɣmaɣ* nɛ pa-lʋlʋʋ taa mba se pala yɔ,+ pɩkpɛndɩnɩ nɔɔ hɔkʋʋ+ nɛ tenduu.+ 32 Nɛ paɣtʋ ndʋ Ɛsɩtɛɛrɩ ɖʋwa yɔ tɩñɩɣ niye Puurim+ tɔm ndʋ tɩ-yɔɔ, nɛ pama-tʋ takayaɣ taa.