Izaayii
50 Tɔm tʋnɛ Yehowa yɔɔdʋʋ:
«Mi-ɖoo weyi mɔnɖɔɔnɩ-ɩ yɔ, le e-nesi cɛbʋ takayaɣ+ wɛɛ?
Yaa man-kɩma tɩnaa taa weyi mankpaɣ-mɩ nɛ mɛnpɛdɩna?
2 Ye mbʋ, ɛbɛ yɔɔ nɔɔyʋ taawɛɛ alɩwaatʋ ndʋ mɔnkɔma yɔ?
Ɛbɛ yɔɔ nɔɔyʋ ticosi alɩwaatʋ ndʋ mayawa yɔ?+
Ɛzɩ me-nesi kɩlɩ tobi nɛ maapɩzɩɣ ɛyʋ ñʋʋ yabʋ na?
Yaa mɛnfɛyɩnɩ ɖoŋ se maya ɛyʋ ñʋʋ na?+
Sɩ-taa kpakpasɩ ɖazɩɣ, mbʋ pʋyɔɔ yɔ lɩm fɛyɩ sɩ-taa,
Nɛ lɔkɔtʋ yɔɔ lɛ, sɩsɩkɩ.
4 Kɩbaɣlʋ Kɩlɩm Yehowa ha-m tɔmkpɛlɩkɩyaa nzʋlʋmɩyɛ,*+
Se pɩsa nɛ mantɩlɩ ɛzɩma moncosi* weyi pɩnɩ-ɩ yɔ nɛ tɔm ndʋ tɩmʋnɩ camɩyɛ* yɔ.+
Efeziɣ-m paa tanaŋ ŋgʋ;
Efeziɣ ma-nɩŋgbaŋʋʋ se mewelisi ɛzɩ tɔmkpɛlɩkɩyaa yɔ.+
5 Kɩbaɣlʋ Kɩlɩm Yehowa kuli ma-nɩŋgbaŋʋʋ,
Nɛ mantɩla kaañamtʋ.+
Mantɩkaɖɩnɩ-ɩ nɛ mɛnkɛɛnɩ hɔɔlʋʋ.+
6 Maha men-siɣye mba pamakɩ-m yɔ
Nɛ maha ma-lɩkpaɣzasɩ mba pɛkpɛzɩ sɩ-yɔɔ ñɔsɩ nɛ piyebi-sɩ kpɛɖɛ yɔ.*
Mantɩmɛsɩ mɛ-ɛsɩndaa se pataaɖʋ-m fɛyɛ nɛ mantɩmɛsɩ mɛ-ɛsɩndaa se pataatɔ ndaatʋ.+
7 Ɛlɛ Kɩbaɣlʋ Kɩlɩm Yehowa kaɣ-m sɩnʋʋ.+
Pʋyɔɔ fɛyɛ ɛɛkaɣ-m kpaʋ.
Pʋyɔɔ meyeba nɛ mɛ-ɛsɩndaa kpa ɖoŋ ɛzɩ pɩcalɩmɩyɛ yɔ,+
Nɛ manawa se fɛyɛ ɛɛkaɣ-m kpaʋ.
8 Weyi ɛwɩlɩɣ se mɛnkɛ siɣsiɣ tʋ yɔ ɛñɔtaa.
Ðɩkpɛndɩ nɛ ɖɩkʋyɩ ɖɩsɩŋ.*
A-taa wɛnɩ-m nɛ tɔm natʋyʋ?
Ɛñɔtɩnɩ-m.
9 Ɩna! Kɩbaɣlʋ Kɩlɩm Yehowa kaɣ-m sɩnʋʋ.
Akaɣ mɔn-tɔm kʋʋ se mɔnɖɔ wɛɛ?
Ɩna! Pa-tɩŋa pakaɣ cadʋʋ ɛzɩ toko yɔ.
Ŋgbam kaɣ-wɛ tɔɔʋ caɣ caɣ.
10 Mɩ-taa anɩ seɣ Yehowa sɔɔndʋ
Nɛ ewelisiɣ ɛ-lɩmɖʋyʋ nɔɔ?+
Aɖɔm cɩkpɛndʋʋ sɔsɔʋ taa, ɖenɖe ñalɩmɩyɛ naɖɩyɛ fɛyɩ yɔ?
Ɛtaa Yehowa hɩɖɛ liu nɛ ɛmalɩnɩ* ɛ-Ɛsɔ.
11 «Ɩna! Mɩ mba payɩ ɩɖʋʋ miŋ,
Nɛ ɩlakɩ nɛ mamacɩsɩ kʋyʋʋ yɔ,
Ɩɖɔ mi-miŋ ñalɩmɩyɛ taa,
Mamacɩsɩ nzɩ iyeba nɛ sɩkʋyʋʋ yɔ sɩ-hɛkʋ taa.
Pʋnɛ ɩkaɣ mʋʋ me-nesi tɛɛ:
Siziŋ nɩʋ siŋŋ taa ɩkaɣ hɩnʋʋ.