Ezekɩyɛɛlɩ
3 Nɛ eheyi-m se: «Ɛyʋ pɩyalʋ, tɔɔ mbʋ pɩwɛ ñɛ-ɛsɩndaa yɔ.* Tɔɔ takayaɣ kikpiyaɣ kanɛ, nɛ ŋwolo nɛ ŋyɔɔdɩnɩ Izrayɛɛlɩ ɖɩɣa.»+
2 Peeɖe maha mɔ-nɔɔ, nɛ ɛla nɛ mɔntɔɔ takayaɣ kikpiyaɣ ŋga. 3 Ewobi pɩ-yɔɔ nɛ eheyi-m se: «Ɛyʋ pɩyalʋ, tɔɔ takayaɣ kikpiyaɣ kanɛ, ŋga menɖiɣni-ŋ cɛlʋʋ yɔ, nɛ ŋyele nɛ kosu ño-lotu taa.» Peeɖe manpaɣzɩ-kɛ tɔɔʋ, nɛ kaawɛ leleŋ ɛzɩ tʋŋ num yɔ mɔ-nɔɔ taa.+
4 Eheyi-m se: «Ɛyʋ pɩyalʋ, wolo nɛ ŋsʋʋ Izrayɛɛlɩ ɖɩɣa taa nɛ ŋheyi-wɛ mɔn-tɔm. 5 Mbʋ pʋyɔɔ yɔ pɩtɩkɛ ɛyaa mba pɔyɔɔdʋʋ kʋnʋŋ ŋgʋ kɩ-nɩʋ wɛ kaɖɛ yaa mba ŋŋnɩɣ pa-kʋnʋŋ yɔ pɔ-cɔlɔ mentiyiɣ-ŋ, ɛlɛ Izrayɛɛlɩ ɖɩɣa cɔlɔ mentiyiɣ-ŋ. 6 Pɩtɩkɛ samasɩ sakɩyɛ nzɩ sɩyɔɔdʋʋ kʋnʋŋ ŋgʋ kɩ-nɩʋ wɛ kaɖɛ yaa nzɩ ŋŋnɩɣ sɩ-kʋnʋŋ yɔ sɩ-cɔlɔ mentiyiɣ-ŋ, nzɩ ŋŋpɩzɩɣ nɛ ŋnɩɩ sɩ-tɔm pee tɔbʋʋ yɔ. Ye sɩ-cɔlɔ maatiyaɣ-ŋ yɔ, siiwelisini-ŋ.+ 7 Ɛlɛ Izrayɛɛlɩ ɖɩɣa kaɣ kizuu se kaawelisiɣni-ŋ, mbʋ pʋyɔɔ yɔ patɩsɔɔlɩ se pewelisini-m.+ Izrayɛɛlɩ ɖɩɣa taa mba tɩŋa kɛ ñʋʋ taa ɖoŋ tɩnaa nɛ pa-laŋa sʋ kpɩzɩŋ.+ 8 Na! Meyeba nɛ ñɛ-ɛsɩndaa kpa ɖoŋ ɖeyi ɖeyi ɛzɩ pɛ-ɛsɩndaa yɔ nɛ ñe-kiɖe taa kpa ɖoŋ ɖeyi ɖeyi ɛzɩ pe-kila taa yɔ.+ 9 Meyeba nɛ ñe-kiɖe taa wɛɛ ɛzɩ diyaamaa yɔ, pɩkpa ɖoŋ nɛ pɩkɩlɩ pɩcalɩmɩyɛ.+ Taase-wɛ sɔɔndʋ yaa pɛ-ɛsɩndaa wɛtʋ ɛtaaɖʋ-ŋ sɔɔndʋ,+ mbʋ pʋyɔɔ yɔ pɛkɛ ɖɩɣa ŋga kaañaŋ yɔ.»
10 Ewobi pɩ-yɔɔ nɛ eheyi-m se: «Ɛyʋ pɩyalʋ, welisi tɔm ndʋ payɩ meheyiɣ-ŋ yɔ nɛ ŋsɩɩ-tʋ ña-laŋɩyɛ taa. 11 Wolo nɛ ŋsʋʋ ña-samaɣ taa ñɩma* mba pɛkɛzɩ-wɛ tɛtʋ yɔ pa-taa+ nɛ ŋyɔɔdɩnɩ-wɛ. Paa pewelisiɣ yaa pekiziɣ se paawelisiɣ yɔ,+ heyi-wɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ.”»
12 Pʋwayɩ lɛ, fezuu nakʋyʋ kpaɣ-m nɛ kɩɖɛna,+ nɛ manɩɩ kɔkɔɖɛ sɔsɔɖɛ naɖɩyɛ taŋ ma-wayɩ se: «Pɛɖɛyɩ Yehowa samtʋ, lone nɖɩ ɖɩ-taa ɛwɛɛ yɔ.» 13 Manɩ Ɛsɔ tiyiyaa* keŋ taŋ alɩwaatʋ ndʋ ɩwɛɛ nɛ ɩsayɩɣnɩ ɖama yɔ,+ nɛ pɔbɔla wena aawɛ Ɛsɔ tiyiyaa cɔlɔ yɔ a-taŋ,+ nɛ kɔkɔɖɛ sɔsɔɖɛ naɖɩyɛ taŋ. 14 Nɛ fezuu kʋsɩ-m nɛ kɩkpaɣ-m nɛ kɩɖɛna, nɛ mɛnɖɛɛnɩ laŋwɛɛkɩyɛ nɛ pana, nɛ manɩɩ Yehowa ɖoŋ wɛɛ nɛ ɩlakɩ tʋmɩyɛ siŋŋ mɔ-yɔɔ. 15 Nɛ mɛnɖɛɛ mowolo mba pɛkɛzɩ-wɛ tɛtʋ yɔ pɔ-cɔlɔ Tɛɛlɩ-Abiib, paacaɣ Kebaarɩ pɔɔ cɔlɔ,+ nɛ mancaɣ peeɖe, ɖenɖe paawɛɛ yɔ; nɛ pɩɩɖɩɣzɩ-m siŋŋ,+ nɛ mancaɣ pɛ-hɛkʋ taa kɩyakɩŋ 7.
16 Kɩyakɩŋ 7 tɛma lɛ, Yehowa tɔm talɩ-m se:
17 «Ɛyʋ pɩyalʋ, malɩzɩ-ŋ se ŋkɛ feŋiyu Izrayɛɛlɩ ɖɩɣa yɔɔ;+ nɛ alɩwaatʋ ndʋ ŋnɩɣ tɔm natʋyʋ mɔ-nɔɔ taa yɔ, pɩwɛɛ se ŋpaɣ-wɛ nɛ mɔ-nɔɔ.+ 18 Alɩwaatʋ ndʋ meheyiɣ kañatʋ tʋ nɔɔyʋ se: “Paa ŋŋlabɩ ɛzɩma ŋkaɣ sɩbʋ,” ɛlɛ ŋtɩpaɣ-ɩ, nɛ ŋtɩyɔɔdɩ se ŋpaɣ kañatʋ tʋ nɛ eyele ɛ-lakasɩ kɩdɛkɛdɩsɩ nɛ ɛcaɣ wezuu yɔ,+ ɛkaɣ sɩbʋ ɛ-kɩwɛɛkɩm yɔɔ, mbʋ pʋyɔɔ yɔ ɛkɛ kañatʋ tʋ,+ ɛlɛ mankaɣ pɔzʋʋ ɛ-calɩm ñe-nesi tɛɛ.*+ 19 Ɛlɛ ye ŋpaɣ kañatʋ tʋ nɔɔyʋ nɛ etiyele ɛ-kañatʋ nɛ ɛ-lakasɩ kɩdɛkɛdɩsɩ yɔ, ɛkaɣ sɩbʋ ɛ-kɩwɛɛkɩm yɔɔ; ɛlɛ ña lɛ, pɩtʋʋ fɛyɩ se ŋkaɣ yabʋ ñe-wezuu* ñʋʋ.+ 20 Ɛlɛ ye ɛyʋ siɣsiɣ tʋ nɔɔyʋ eyebi e-siɣsiɣ wɛtʋ nɛ ɛlakɩ mbʋ pɩfɛyɩ ɖeu yɔ,* mankaɣ ɖʋʋ mbʋ pituuluu yɔ ɛ-ɛsɩndaa nɛ ɛkaɣ sɩbʋ.+ Ye ŋtɩpaɣ-ɩ yɔ, ɛkaɣ sɩbʋ ɛ-kɩwɛɛkɩm yɔɔ nɛ paakaɣ tɔzʋʋ ɛ-lakasɩ siɣsiɣ ñɩnzɩ yɔɔ, ɛlɛ mankaɣ pɔzʋʋ ɛ-calɩm ñe-nesi tɛɛ.*+ 21 Ɛlɛ ye ŋpaɣ ɛyʋ siɣsiɣ tʋ se ɛtaala kɩwɛɛkɩm, nɛ toovenim taa lɛ ɛɛlakɩ kɩwɛɛkɩm yɔ, pɩtʋʋ fɛyɩ se ɛkaɣ wɛʋ wezuu mbʋ pʋyɔɔ yɔ ŋpaɣ-ɩ,+ nɛ ŋkaɣ yabʋ ña-maɣmaɣ ñe-wezuu* ñʋʋ.»
22 Yehowa nesi tii mɔ-yɔɔ peeɖe, nɛ eheyi-m se: «Kʋyɩ nɛ ŋtii fɛɛʋ taa, nɛ mankaɣ-ŋ yɔɔdɩnʋʋ peeɖe.» 23 Peeɖe mankʋyaa nɛ mentii fɛɛʋ taa, nɛ na! Yehowa samtʋ kaawɛ peeɖe,+ nɛ tɩɩwɛ ɛzɩ samtʋ ndʋ maana Kebaarɩ pɔɔ cɔlɔ yɔ,+ nɛ mɔntɔlɩ nɛ manpa mɛ-ɛsa nɛ tɛtʋ. 24 Pʋwayɩ lɛ, fezuu sʋʋ man-taa nɛ kiyele nɛ mankʋyɩ mansɩŋ man-nɩŋgbanzɩ yɔɔ,+ nɛ ɛyɔɔdɩnɩ-m nɛ ɛtɔ se:
«Wolo nɛ ŋsʋʋ ña-ɖɩɣa taa nɛ ŋɖɩɣ ñɔ-yɔɔ. 25 Piyele nɛ ña yɔ, ɛyʋ pɩyalʋ, pakaɣ kpaɣʋ nimee nɛ pɔhɔkɩnɩ-ŋ se ŋtaapɩzɩ nɛ ŋlɩɩ nɛ ŋwolo pɛ-hɛkʋ taa. 26 Nɛ mankaɣ yebu nɛ ña-nzʋlʋmɩyɛ taɣɖɩ ñɔ-nɔɔ taa, nɛ ŋkaɣ pɩsʋʋ kaayɔɔdaɣ, nɛ ŋŋkaɣ pɩzʋʋ nɛ ŋkizini-wɛ tɔm, mbʋ pʋyɔɔ yɔ pɛkɛ ɖɩɣa ŋga kaañaŋ yɔ. 27 Ɛlɛ alɩwaatʋ ndʋ mɔyɔɔdʋʋnɩ-ŋ yɔ, mankaɣ kuluu ñɔ-nɔɔ, nɛ pɩwɛɛ se ŋheyi-wɛ se:+ “Tɔm tʋnɛ Kɩbaɣlʋ Kɩlɩm Yehowa yɔɔdʋʋ.” Weyi ewelisiɣ yɔ, ewelisi;+ nɛ weyi ekiziɣ se eewelisiɣ yɔ, etaawelisi; mbʋ pʋyɔɔ yɔ pɛkɛ ɖɩɣa ŋga kaañaŋ yɔ.+