Ezekɩyɛɛlɩ
8 Nɛ pɩnaɣ 6 ñɩŋga taa, fenaɣ 6 ñɩŋga taa, fenaɣ ŋga ka-kɩyakʋ 5 ñɩŋgʋ wiye, maacaɣ man-ɖɩɣa taa nɛ Yuuda ɛzʋtʋyaa caɣ mɛ-ɛsɩndaa lɛ, manɩɩ Kɩbaɣlʋ Kɩlɩm Yehowa nesi taŋ mɔ-yɔɔ peeɖe. 2 Maawɛɛ nɛ mɔncɔŋna lɛ, mana nabʋyʋ ɛzɩ ɛyʋ wɛtʋ yɔ, pɩnɩɣzɩnɩ miŋ; miŋ kaawɛ kpaɣnɩ ɖenɖe pɩɩwɛ ɛzɩ ɛ-tɩnaɣ taa yɔ nɛ pɩ-tɛɛ,+ nɛ kpaɣnɩ ɛ-tɩnaɣ taa nɛ pɩkpa lɛ, ɛ-wɛtʋ ñɩlɩsaɣ, ɛzɩ ñɩɣyʋʋ ŋgʋ palabɩnɩ sika nɛ liidiye yɔ.*+ 3 Nɛ esezi mbʋ pɩɩwɛ ɛzɩ nesi yɔ nɛ ɛɖɔkɩ ma-ñʋʋ taa ñɔsɩ nɛ ɛkpaɣ-m, nɛ fezuu nakʋyʋ kpaɣ-m tɛtʋ nɛ ɛsɔdaa pɛ-hɛkʋ taa nɛ kɩtɩŋnɩ Ɛsɔ tɛ natʋ yɔɔ nɛ kiwoni-m Yeruzalɛm, pɩ-taa nɔnɔɔ ŋga kaha ɛsa nɛ hayo kiŋ yɔ ka-ɖɩzʋyɛ taa,+ ɖenɖe sʋsɩ sɩʋ kpeliɣa ŋga kɔkɔŋnɩ sʋsɩ yɔ* kaawɛɛ yɔ.+ 4 Nɛ na! Izrayɛɛlɩ tɛ Ɛsɔ samtʋ kaawɛ peeɖe,+ pɩɩwɛ ɛzɩ natʋ ndʋ maana fɛɛʋ taa yɔ.+
5 Nɛ eheyi-m se: «Ɛyʋ pɩyalʋ, mentendi-ŋ, kpazɩ ñɛ-ɛsa nɛ hayo kiŋ hɔɔlʋʋ taa.» Peeɖe mankpazɩ mɛ-ɛsa nɛ hayo kiŋ hɔɔlʋʋ taa, nɛ sʋsɩ sɩʋ kpeliɣa ŋga, kaawɛ altaaru nɔnɔɔ hayo kiŋ ɖɩzʋyɛ taa peeɖe. 6 Nɛ eheyi-m se: «Ɛyʋ pɩyalʋ, ŋnaɣ kʋzɔɔtʋ lakasɩ sɔsɔsɩ nzɩ Izrayɛɛlɩ ɖɩɣa wɛɛ nɛ kalakɩ cɩnɛ yɔ,+ lakasɩ nzɩ siyeki se monposini mon-kooka kiɖeɖeɣa yɔ?+ Ɛlɛ ŋkaɣ naʋ kʋzɔɔtʋ lakasɩ sɔsɔsɩ nzɩ sɩkpaɖɩ mbʋ yɔ.»
7 Pʋwayɩ lɛ, ewoni-m kadaɣ nɔnɔɔ taa, nɛ mɔncɔnaa lɛ, mana pɔʋ nakʋyʋ koloŋa taa. 8 Eheyi-m se: «Ɛyʋ pɩyalʋ, mentendi-ŋ, hʋyɩ koloŋa pɔʋ.» Peeɖe mahʋyɩ koloŋa pɔʋ nɛ mana nɔnɔɔ nakɛyɛ. 9 Eheyi-m se: «Sʋʋ nɛ ŋna lakasɩ kɩdɛkɛdɩsɩ nɛ kʋzɔɔtʋ lakasɩ nzɩ peɖiɣni labʋ cɩnɛ yɔ.» 10 Peeɖe mansʋwa nɛ mɔncɔna, nɛ mana kpɩna wena atuu tataa yɔ nɛ kpɩna wena awɛ kiniŋ yɔ a-kɩlɛmɩŋ ndɩ ndɩ+ nɛ Izrayɛɛlɩ ɖɩɣa sɩʋ kpelisi nzɩ sɩwɛ kiniŋ yɔ* sɩ-tɩŋa;+ palɩzɩ-ɩ* koloŋa yɔɔ nɛ pɩcɔɔ nɛ pɩta. 11 Nɛ Izrayɛɛlɩ ɖɩɣa taa ɛzʋtʋyaa 70 kaasɩŋ ɩ-ɛsɩndaa, nɛ Safaanɩ+ pɩyalʋ Yaazaniya kaasɩŋ ɛzʋtʋyaa mba pɛ-hɛkʋ taa. Paa weyi ɛɛɖɔkɩ e-nesi tɛɛ wonuu ŋgʋ kɩ-taa pañaɣzɩɣ ŋgee tɩlaaɖɩ yɔ, nɛ ŋgee tɩlaaɖɩ sɔzɩŋ ñɔsɩ kaawɛɛ nɛ sɩkpaɣ.+ 12 Eheyi-m se: «Ɛyʋ pɩyalʋ, ŋnaɣ mbʋ Izrayɛɛlɩ ɖɩɣa taa ɛzʋtʋyaa wɛɛ nɛ palakɩ cɩkpɛndʋʋ taa yɔ, paa weyi lɛ, ɖooo pɩ-taa kuduyuŋ taa ɖenɖe ɛ-sɩʋ kpelisi wɛɛ yɔ?* Mbʋ pʋyɔɔ yɔ pɛwɛɛ nɛ pɔyɔɔdʋʋ se: “Yehowa ɛɛnaɣ-ɖʋ. Yehowa yebi ɖɛ-ɛjaɖɛ nɛ ɛɖɛɛ.”»+
13 Nɛ ewolo pɩ-yɔɔ nɛ eheyi-m se: «Ŋkaɣ naʋ kʋzɔɔtʋ lakasɩ sɔsɔsɩ nzɩ peɖiɣni labʋ yɔ, nzɩ sɩkpaɖɩ mbʋ yɔ.» 14 Peeɖe ɛkpaɣ-m nɛ ewoni Yehowa ɖɩɣa hayo kiŋ nɔnɔɔ taa, nɛ mana halaa caɣ peeɖe nɛ pewiɣ ɛsɔ Taamuuzi yɔɔ.
15 Nɛ ɛtasɩ-m heyuu se: «Oo ɛyʋ pɩyalʋ, ŋnawa? Ŋkaɣ naʋ kʋzɔɔtʋ lakasɩ sɔsɔsɩ nzɩ sɩkpaɖɩ sɩnɛ yɔ.»+ 16 Peeɖe ɛkpaɣ-m nɛ ewoni-m Yehowa ɖɩɣa tɛ pɩ-taa kadaɣ taa.+ Abalaa ɛzɩ 25 mbʋ yɔ kaawɛ Yehowa templo nɔnɔɔ taa, kʋjɔŋ nɛ altaaru pɛ-hɛkʋ taa, paaha Yehowa templo siɣye, nɛ paaha pɛ-ɛsa nɛ wɩsɩ ɖɩlɩyɛ taa kiŋ; paawɛɛ nɛ poluŋuu nɛ pɛsɛɣ wɩsɩ, wɩsɩ ɖɩlɩyɛ taa kiŋ.+
17 Nɛ eheyi-m se: «Ɛyʋ pɩyalʋ, ŋnawa? Ɛzɩ pɩkɛ aleɣya tɔm se Yuuda ɖɩɣa ɛlakɩ kʋzɔɔtʋ lakasɩ sɩnɛ, se keyele nɛ puuyaɣ lakasɩ su ɛjaɖɛ taa+ nɛ kɛwɛɛ nɛ kaɖʋʋ-m ɖɩwɩzɩyɛ na? Na, pɛwɛɛ nɛ pɔkɔŋnɩ piliŋa* mɔ-mɔɔʋ yɔɔ kiŋ. 18 Pʋyɔɔ lɛ, mankaɣ kʋyʋʋ pɔ-yɔɔ nɛ pana. Pɩɩkaɣ-m labʋ pʋtɔdɩyɛ;* nɛ maakaɣ pe-siziŋ nɩʋ ɖɔɖɔ.+ Paa pamakɩ kubusi ɖoŋ ma-nɩŋgbaaŋ taa yɔ, maakaɣ-wɛ welisinuu.»+