Yereemii

38 Nɛ Maataanɩ pɩyalʋ Sefatiya, Pasuuri pɩyalʋ Gedaliya, Selemiya pɩyalʋ Yukaalɩ+ nɛ Malɩkiiya pɩyalʋ Pasuuri+ panɩɩ tɔm ndʋ Yereemii kaawɛɛ nɛ eheyiɣ samaɣ kpeekpe yɔ; eheyaɣ-kɛ se: 2 «Tɔm tʋnɛ Yehowa yɔɔdʋʋ: “Weyi pɩkazɩɣ tɛtʋ tʋnɛ tɩ-taa yɔ laɣɖɛ, ñɔɔsɩ nɛ kɩzɩkʋ* kaɣ-ɩ kʋʋ.+ Ɛlɛ weyi ɛcɛlɩɣ ɛ-tɩ Kalɩdee mba yɔ,* ɛkaɣ wɛʋ wezuu nɛ e-wezuu* kaɣ-ɩ kɛʋ kɩhɛyʋʋ* nɛ ɛwɛɛ wezuu.”+ 3 Tɔm tʋnɛ Yehowa yɔɔdʋʋ: “Pɩtʋʋ fɛyɩ se pakaɣ ɖʋzʋʋ tɛtʋ tʋnɛ Babilɔɔnɩ wiyaʋ sɔɔjanaa nesi tɛɛ, nɛ ɛkaɣ-tʋ mʋʋ.”»+

4 Awumbiya heyi wiyaʋ se: «Ðitendi-ŋ, yele nɛ pakʋ abalʋ ɛnɛ,+ mbʋ pʋyɔɔ yɔ tɔm ndʋ ɛwɛɛ nɛ ɛyɔɔdʋʋ yɔ tɩwɛɛ nɛ tɩhaɣ ɛjandʋ sɔɔjanaa mba pɩkazɩ tɛtʋ tʋnɛ tɩ-taa yɔ,* pɩkpɛndɩnɩ samaɣ kpeekpe. Mbʋ pʋyɔɔ yɔ abalʋ ɛnɛ ɛɛñɩnɩɣ samaɣ kanɛ ka-laŋhɛzɩyɛ, ɛlɛ asɛyʋʋ ɛñɩnɩɣ se kɩkɔɔ kɔ-yɔɔ.» 5 Wiyaʋ Zedekiya cosi se: «Ɩna! Ɛwɛ mi-nesi taa, mbʋ pʋyɔɔ yɔ wiyaʋ ɛɛpɩzɩɣ nɛ ekizini-mɩ natʋyʋ.»

6 Peeɖe pakpaɣ Yereemii nɛ pɛpɛɖɩ-ɩ wiyaʋ pɩyalʋ Malɩkiiya lɔkɔ* taa, ŋgʋ kɩɩwɛ Feŋiyaa Kadaɣ+ taa yɔ kɩ-taa. Nimee petisini Yereemii kɩ-taa. Nɛ lɩm taawɛɛ lɔkɔ ŋgʋ kɩ-taa, ɛlɛ ahɔya ɖeke, nɛ ahɔya paɣzɩ libu Yereemii.

7 Etiyoopii tʋ Ebɛɛdɩ-Melɛɛkɩ,+ weyi ɛkɛ eliŋgiye* wiyaʋ ɖɩɣa taa yɔ, ɛnɩɩ se pɛpɛɖɩ Yereemii lɔkɔ taa. Wiyaʋ kaacaɣ Bɛnjamɛɛ Nɔnɔɔ+ taa, 8 nɛ Ebɛɛdɩ-Melɛɛkɩ lɩɩ wiyaʋ ɖɩɣa taa nɛ ewolo ɛyɔɔdɩnɩ wiyaʋ se: 9 «Oo man-kɩbaɣlʋ wiyaʋ, mbʋ ɛyaa panɛ palabɩ nayʋ Yereemii yɔ pɩfɛyɩ ɖeu! Pɛpɛɖɩ-ɩ lɔkɔ taa, nɛ ñɔɔsɩ yɔɔ lɛ ɛkaɣ sɩbʋ peeɖe, mbʋ pʋyɔɔ yɔ pɩtɩkazɩ tɔɔnaɣ* nakɛyɛ tɛtʋ taa.»+

10 Nɛ wiyaʋ ɖʋ paɣtʋ Etiyoopii tʋ Ebɛɛdɩ-Melɛɛkɩ se: «Kpaɣ ɛyaa 30 cɩnɛ, nɛ ŋhɔ nayʋ Yereemii lɔkɔ taa nɛ ŋlɩzɩ nɛ ɛtaasɩ.» 11 Peeɖe Ebɛɛdɩ-Melɛɛkɩ kpaɣ ɛyaa nɛ ɛɖɛɛ nɛ ewolo wiyaʋ ɖɩɣa taa nɛ ɛsʋʋ kuduyuu ŋgʋ kɩwɛ ñɩm ɖɩzɩyɛ tɛɛ yɔ kɩ-taa,+ nɛ pakpaɣ peeɖe pɩsaacemla naayɛ nɛ tokonaa cɛkɩŋ nɛ patɩŋnɩ nimee yɔɔ nɛ petisi-i Yereemii cɔlɔ lɔkɔ taa. 12 Nɛ Etiyoopii tʋ Ebɛɛdɩ-Melɛɛkɩ heyi Yereemii se: «Mentendi-ŋ, ɖʋ pɩsaacemla nɛ tokonaa cɛkɩŋ ña-hamɩŋ tɛɛ nɛ nimee ɩtaaɖʋ-ŋ heŋ.»* Nɛ Yereemii la mbʋ, 13 nɛ patɩŋnɩ nimee yɔɔ nɛ pɔhɔ Yereemii nɛ palɩzɩ-ɩ lɔkɔ taa. Nɛ Yereemii wɛɛ Feŋiyaa Kadaɣ taa.+

14 Wiyaʋ Zedekiya tiyi se payaa nayʋ Yereemii nɛ ɛkɔɔ ɛ-cɔlɔ nɔnɔɔ 3 ñɩŋga taa, ŋga kɛwɛ Yehowa ɖɩɣa taa yɔ, nɛ wiyaʋ heyi Yereemii se: «Mɛwɛnɩ tɔm natʋyʋ se mɔnpɔzʋʋ-ŋ. Taamɛsɩ-m natʋyʋ.» 15 Nɛ Yereemii heyi Zedekiya se: «Ye meheyi-ŋ yɔ, pɩtʋʋ fɛyɩ se ŋkaɣ-m kʋʋ. Nɛ ye mantasɩ-ŋ lɔŋ yɔ, ŋŋkaɣ-m welisinuu.» 16 Peeɖe wiyaʋ Zedekiya ɖuuni Yereemii mɛsaɣ tɛɛ se: «Yehowa ñɩtʋʋ nɛ ɛwɛɛ wezuu yɔ, ɛnʋ weyi ɛha-ɖʋ wezuu kʋnɛ yɔ,* maakaɣ-ŋ kʋʋ, nɛ maakaɣ-ŋ ɖʋzʋʋ ɛyaa panɛ pe-nesi tɛɛ, mba pɛwɛɛ nɛ pañɩnɩɣ se palɩzɩ ñe-wezuu yɔ.»*

17 Nɛ Yereemii heyi Zedekiya se: «Tɔm tʋnɛ Yehowa, yoyaa tɛ Ɛsɔ, Izrayɛɛlɩ tɛ Ɛsɔ yɔɔdʋʋ: “Ye ŋcɛlɩ ña-tɩ Babilɔɔnɩ wiyaʋ awumbiya yɔ,* pɩkaɣ yabʋ ñe-wezuu ñʋʋ,* nɛ paakaɣ tɛtʋ tʋnɛ ñaɣzʋʋ miŋ, nɛ pɩkaɣ yabʋ ña nɛ ña-ɖɩɣa taa mba mɩ-ñʋʋ.+ 18 Ɛlɛ ye ŋtɩcɛlɩ ña-tɩ Babilɔɔnɩ wiyaʋ awumbiya yɔ,* pakaɣ ɖʋzʋʋ tɛtʋ tʋnɛ Kalɩdee mba nesi tɛɛ, nɛ pakaɣ-tʋ ñaɣzʋʋ miŋ,+ nɛ ŋŋkaɣ lɩʋ pe-nesi tɛɛ.”»+

19 Nɛ Wiyaʋ Zedekiya heyi Yereemii se: «Sɔɔndʋ kpaɣ-m nɛ Yuuda ñɩma mba pesewa nɛ powolo Kalɩdee mba cɔlɔ yɔ, mbʋ pʋyɔɔ yɔ ye paɖʋzɩ-m pe-nesi tɛɛ yɔ, papɩzɩɣ nɛ pawɩlɩ-m ñaŋ.» 20 Ɛlɛ Yereemii yɔɔdɩ se: «Paakaɣ-ŋ ɖʋzʋʋ pe-nesi tɛɛ. Mentendi-ŋ, ña Yehowa nɔɔ taa tɔm nɛ ŋɖɔ tɔm ndʋ mɛwɛɛ nɛ meheyiɣ-ŋ yɔ tɩ-yɔɔ, nɛ pɩkaɣ-ŋ ɖɔmnʋʋ camɩyɛ, nɛ ŋkaɣ* wobu pɩ-yɔɔ nɛ ŋwɛɛ wezuu. 21 Ɛlɛ ye ŋkizaa se ŋŋcɛlɩɣ-wɛ ña-tɩ yɔ,* tɔm tʋnɛ Yehowa lɩzaa nɛ ɛwɩlɩ-m: 22 Na! Halaa mba payɩ pɩkazɩ Yuuda wiyaʋ ɖɩɣa taa yɔ, pɛwɛɛ nɛ powokini-wɛ Babilɔɔnɩ wiyaʋ awumbiya cɔlɔ,+ nɛ pɛwɛɛ nɛ pɔyɔɔdʋʋ se:

“Ɛyaa mba ŋta-wɛ liu yɔ,* pepeɣzi-ŋ nɛ pawabɩ-ŋ.+

Peyeba nɛ ña-nɩŋgbaŋaɣ tii ahɔya taa.

Lɛɛlɛɛyɔ lɛ, pɛɖɛwa nɛ peyebi-ŋ.”

23 Nɛ peɖiɣni ña-halaa nɛ ña-pɩyalaa kpeekpe wonuu Kalɩdee mba cɔlɔ, nɛ ŋŋkaɣ lɩʋ pe-nesi tɛɛ; ɛlɛ Babilɔɔnɩ wiyaʋ kaɣ-ŋ kpaʋ,+ nɛ ñɔ-yɔɔ lɛ, pakaɣ tɛtʋ tʋnɛ ñaɣzʋʋ miŋ.»+

24 Nɛ Zedekiya heyi Yereemii se: «Taayele nɛ nɔɔyʋ nɩɩ tɔm tʋnɛ, nɛ ŋtaasɩ. 25 Nɛ ye awumbiya ɩnɩwa se mɔyɔɔdɩnɩ-ŋ nɛ pɔkɔɔ nɛ peheyi-ŋ se: “Ðitendi-ŋ, heyi-ɖʋ tɔm ndʋ ŋheyi wiyaʋ yɔ. Taamɛsɩ-ɖʋ natʋyʋ, nɛ ɖɩɩkaɣ-ŋ kʋʋ.+ Suwe wiyaʋ heyi-ŋ?” yɔ, 26 pɩwɛɛ se ŋcosi-wɛ se: “Maawɛɛ nɛ mɔnpɔzʋʋ wiyaʋ se ɛtaapɩsɩnɩ-m Yehonataanɩ ɖɩɣa taa nɛ mansɩ peeɖe.”»+

27 Pʋwayɩ lɛ, awumbiya kpeekpe sʋʋ Yereemii cɔlɔ nɛ pɔpɔzɩ-ɩ tɔm. Eheyi-wɛ tɔm ndʋ payɩ wiyaʋ kaaɖʋ-ɩ paɣtʋ se ɛyɔɔdɩ yɔ. Nɛ patɩtasɩ-ɩ natʋyʋ pɔzʋʋ, mbʋ pʋyɔɔ yɔ pa-taa nɔɔyʋ taanɩɩ tɔm ndʋ ɛ nɛ wiyaʋ pɔyɔɔdaa yɔ. 28 Nɛ Yereemii wɛɛ Feŋiyaa Kadaɣ taa nɛ pɩkɔɔ pɩtalɩ kɩyakʋ ŋgʋ pamʋ Yeruzalɛm yɔ;+ alɩwaatʋ ndʋ pamʋ Yeruzalɛm yɔ, ɛɛwɛ peeɖe mbʋ.+