Ezekɩyɛɛlɩ
47 Pʋwayɩ lɛ, ɛpɩsɩnɩ-m templo nɔnɔɔ taa;+ nɛ peeɖe lɛ, mana lɩm lɩɣaɣnɩ templo nɔnɔɔ tɛɛ nɛ pikpeŋni wɩsɩ ɖɩlɩyɛ taa kiŋ,+ mbʋ pʋyɔɔ yɔ templo kaapam ɛsa nɛ wɩsɩ ɖɩlɩyɛ taa. Lɩm lɩɣaɣnɩ templo hɔɔlʋʋ ŋgʋ kɩwɛnɩ nɩwaŋ yɔɔ yɔ kɩ-tɛɛ nɛ pikpeŋ, altaaru hadɛ kiŋ.
2 Pʋwayɩ lɛ, ɛtɩŋnɩ-m hayo kiŋ nɔnɔɔ+ nɛ ɛlɩnɩ-m awayɩ nɛ ɛcɔnɩ-m awayɩ nɔnɔɔ ŋga kaha ɛsa nɛ wɩsɩ ɖɩlɩyɛ taa yɔ ka-wayɩ nɛ ɛta,+ nɛ mana lɩm lɩɣaɣnɩ nɩwaŋ hɔɔlʋʋ yɔɔ nɛ pikpeŋ pazɩ pazɩ.
3 Abalʋ ɛnʋ ɛɖɔkɩ nimaɣ ŋga pamaɣzɩɣna yɔ e-nesi taa+ nɛ ɛtɩŋnɩ wɩsɩ ɖɩlɩyɛ taa kiŋ nɛ ɛlɩɩ lɛ, ɛmaɣzɩ nuŋgolonzi* 1 000 nɛ ɛtɩŋnɩ-m lɩm taa; lɩm kaasɩnɩ man-nɩŋgbaŋaɣ ɛsɩyɛ.
4 Pʋwayɩ lɛ, ɛmaɣzɩ nuŋgolonzi 1 000 lɛɛsɩ nɛ ɛtɩŋnɩ-m lɩm taa; nɛ lɩm kaakpawa nɛ pɩsɩɩnɩ ma-nʋmbɔla.
Ɛɖaɣnɩ maɣzʋʋ nuŋgolonzi 1 000 lɛɛsɩ nɛ ɛtɩŋnɩ-m pɩ-taa, nɛ lɩm kaakpawa nɛ pɩsɩɩnɩ man-tɩnaɣ.
5 Alɩwaatʋ ndʋ ɛtasɩ maɣzʋʋ nuŋgolonzi 1 000 lɛɛsɩ yɔ, pɩɩpɩsɩ pɔɔ nɛ pɩɩsaŋ se mɔnɖɔ nɛ mɛntɛzɩ, mbʋ pʋyɔɔ yɔ lɩm kaalimaa siŋŋ nɛ pɩɩpɔzaa se ɛyʋ ɛya kɩyaʋ; pɩɩpɩsɩ pɔɔ ŋga ɛyʋ ɛɛpɩzɩɣ nɛ ɛɖɔ nɛ ɛtɛzɩ yɔ.
6 Ɛpɔzɩ-m se: «Ɛyʋ pɩyalʋ, ŋnawa?»
Pʋwayɩ lɛ, ɛpɩsɩnɩ-m pɔɔ kidiiliŋ yɔɔ. 7 Manpɩsaa lɛ, mana se tɩŋ sakɩyɛ kaawɛ pɔɔ kidiiliŋ hɔɔlɩŋ 2 ɛnɩ ɩ-yɔɔ pɩdɩɩfɛyɩ.+ 8 Nɛ eheyi-m se: «Lɩm pʋnɛ, pikpeŋ nɛ piwokini wɩsɩ ɖɩlɩyɛ egeetiye taa kiŋ, nɛ pɩwɛɣ kpem yɔɔ nɛ pɩtalɩ Araba*+ nɛ pitii teŋgu taa. Pitiki teŋgu taa lɛ,+ teŋgu taa lɩm yɔɔ kaɣ cɛbʋ. 9 Wondu* ndʋ tɩwɛ wezuu nɛ tɩɖɔ wiii yɔ, tɩkaɣ pɩzʋʋ nɛ tɩcaɣ wezuu ɖenɖe payɩ lɩm* kpeŋ yɔ. Kpakpasɩ kaɣ tɔyʋʋ, mbʋ pʋyɔɔ yɔ lɩm pʋnɛ pɩkaɣ kpem peeɖe. Teŋgu taa lɩm yɔɔ kaɣ cɛbʋ, nɛ pɩtɩŋa payɩ pɩkaɣ wɛʋ wezuu ɖenɖe payɩ pɔɔ taa lɩm kpeŋ yɔ.
10 «Kpakpasɩ kpayaa kaɣ sɩŋʋʋ kɩ-cɔlɔ kpaɣnɩ Ɛn-Gedii+ nɛ piwolo Ɛn-Eglayim, nɛ kadaɣ nakɛyɛ kaɣ wɛʋ peeɖe nɛ peleŋ piyiŋ ka-taa. Kpakpasɩ tindima ndɩ ndɩ sakɩyɛ kaɣ wɛʋ peeɖe, ɛzɩ Teŋgu Sɔsɔʋ*+ taa kpakpasɩ yɔ.
11 «Kɩkaɣ wɛnʋʋ lona wena a-taa lɩm cakɩ yɔ nɛ lona wena aniɣdaa yɔ, nɛ lona ana a-yɔɔ ɛɛkaɣ cɛbʋ. Ðɔm kaɣnɩ wɛʋ a-taa tam.+
12 «Tɩŋ ndɩ ndɩ weyi payɩ ɩlʋlʋʋ pee* yɔ, ɩkaɣ ñɔʋ pɔɔ kidiilimiŋ 2 ɛnɩ ɩ-yɔɔ. Ɩ-hatʋ ɩɩkaɣ lou nɛ i-pee ɩɩkaɣ tɔʋ. Ɩkaɣ lʋlʋʋ pee kɩfana paa fenaɣ ŋga, mbʋ pʋyɔɔ yɔ lɩm mbʋ pikpeŋ ɩ-tɛɛ yɔ pɩlɩnɩ kooka kiɖeɖeɣa taa.+ I-pee kaɣ kɛʋ tɔɔnaɣ nɛ ɩ-hatʋ kɛ kɔyɛ.»+
13 Tɔm tʋnɛ Kɩbaɣlʋ Kɩlɩm Yehowa yɔɔdʋʋ: «Egeetiye ɖɩnɛ ɩkaɣ tayʋʋ Izrayɛɛlɩ cejewe 12 se pɩkɛ a-ñɩm, nɛ Yosɛɛfʋ kaɣ wɛnʋʋ hɔɔlɩŋ naalɛ.+ 14 Ɩkaɣ-ɖɩ mʋʋ nɛ ɖɩpɩsɩ mɩ-ñɩm nɛ patayɩ-mɩ ɖɩ ɖeyi ɖeyi.* Monɖuwaa se mɛncɛlɩɣ ɛjaɖɛ ɖɩnɛ mɩ-cɔzɔnaa;+ nɛ lɛɛlɛɛyɔ lɛ, pɛcɛlɩ-mɩ ɖɩ nɛ ɖɩpɩsɩ mɩ-ñɩm.
15 «Hayo kiŋ hɔɔlʋʋ taa lɛ, ɛjaɖɛ nɖɩ ɖɩ-kamaɣ yɔ: Kakʋyʋʋnɩ Teŋgu Sɔsɔʋ nɛ katɩŋnɩ nʋmɔʋ ŋgʋ kiwokini Hɛtɩlɔɔnɩ+ nɛ kɩɖɛɣnɩ Zedaadɩ,+ 16 Hamatɩ,+ Berota,+ nɛ Sibɩrayim ŋgʋ kɩwɛ Damaasɩ egeetiye nɛ Hamatɩ egeetiye pɛ-hɛkʋ taa yɔ, nɛ katalɩ Hazɛɛr-Hatikonɩ, ŋgʋ kɩwɛ Hayuraŋ+ kamaɣ cɔlɔ yɔ. 17 Ye mbʋ, kamaɣ kaɣ kʋyɩnʋʋ teŋgu nɛ katalɩ Hazaar-Enɔɔnɩ.+ Kakaɣ tɩŋnʋʋ Damaasɩ hayo kiŋ kamaɣ nɔɔ yɔɔ nɛ Hamatɩ+ kamaɣ nɔɔ yɔɔ. Hayo kiŋ kamaɣ lɛ.
18 «Wɩsɩ ɖɩlɩyɛ hɔɔlʋʋ tɩŋɩɣnɩ Hayuraŋ nɛ Damaasɩ pɛ-hɛkʋ taa nɛ kiwokini Yɔɔrdaŋ, Galaadɩ+ nɛ Izrayɛɛlɩ ɛjaɖɛ pɛ-hɛkʋ taa. Pɩwɛɛ se ɩmaɣzɩ kpaɣnɩ kamaɣ nɛ piwolo wɩsɩ ɖɩlɩyɛ taa teŋgu.* Wɩsɩ ɖɩlɩyɛ taa kamaɣ lɛ.
19 «Hadɛ kiŋ kamaɣ kaɣ wɛʋ kpaɣnɩ Tamaarɩ nɛ piwolo Meribat-Kadɛɛsɩ+ lɩm cɔlɔ, pʋwayɩ lɛ kowolo Lemeɣa* cɔlɔ nɛ kowolo Teŋgu Sɔsɔʋ cɔlɔ.+ Hadɛ kiŋ kamaɣ lɛ.
20 «Teŋgu Sɔsɔʋ wɛ wɩsɩ ɖɩɖʋyɛ hɔɔlʋʋ taa, kpaɣnɩ kamaɣ nɛ pɩkpa lone naɖɩyɛ cɔlɔ, nɖɩ ɖɩha ɛsa nɛ Lebo-Hamatɩ*+ yɔ. Wɩsɩ ɖɩɖʋyɛ taa kamaɣ lɛ.»
21 «Pɩwɛɛ se ɩtayɩ ɖama ɛjaɖɛ ɖɩnɛ, pɩwɛɛ se ɩtayɩ-ɖɩ Izrayɛɛlɩ cejewe 12. 22 Pɩwɛɛ se ɩtayɩ-ɖɩ ɖama nɛ pɩkɛ mɩ-ñɩm, mɩ nɛ agɔma mba pɛwɛ mɩ-hɛkʋ taa nɛ pɛwɛɛnɩ piya kpaɣnɩ alɩwaatʋ ndʋ pɛwɛ mɩ-hɛkʋ taa yɔ; pakaɣ wɛʋ mɩ-ɛsɩndaa ɛzɩ Izrayɛɛlɩ piya ɖɔɖɔ yɔ. Pakaɣ mɩ nɛ wɛ tayʋʋ ñɩm Izrayɛɛlɩ cejewe taa. 23 Pɩwɛɛ se ɩcɛlɩ ɛgɔm ñɩm nabʋyʋ cejewiye nɖɩ ɖɩ-taa ɛcaɣaa yɔ ɖi-egeetiye taa,» Kɩbaɣlʋ Kɩlɩm Yehowa yɔɔdʋʋna.