Mikee
6 Mentendi-mɩ, iwelisi tɔm ndʋ Yehowa yɔɔdʋʋ yɔ.
Kʋyɩ, yɔɔdɩ mbʋ pʋyɔɔ ŋya tɔm yɔ pʋŋ ɛsɩndaa,
Nɛ tɛtɛ nɛ piyisi nɩɩ ñɔ-nɔɔ.+
2 Oo pʋŋ, iwelisi tɔm ndʋ Yehowa kɔnaa yɔ,
Mɩ, tɛtʋ tigila wena akam camɩyɛ yɔ,+
Mbʋ pʋyɔɔ yɔ Yehowa wɛnɩ tɔm natʋyʋ ɛ-samaɣ yɔɔ;
Ɛ nɛ Izrayɛɛlɩ pɛwɛnɩ tɔm:+
3 «Man-samaɣ, ɛbɛ malabɩ-ŋ?
Ɛzɩma tɩyɛ manɩ-ŋ?+
Lɩzɩ aseɣɖe.
4 Mbʋ pʋyɔɔ yɔ malɩzɩ-ŋ Ejipiti ɛjaɖɛ taa,+
Mayabɩ ña-ñʋʋ nɛ malɩzɩ-ŋ yomiye ɖɩɣa taa;+
Mɛnɖɛzɩ ñɔ-nɔɔ Moyizi, Aarɔɔnɩ, nɛ Miriyam.+
5 Man-samaɣ, mentendi-ŋ, tɔzɩ mbʋ Mowaabʋ wiyaʋ Baalaakɩ kaaɖʋwa se ɛlakɩ yɔ pɩ-yɔɔ,+
Nɛ tɔm ndʋ Beyɔɔrɩ pɩyalʋ Baalam cosi-i yɔ+
—Mbʋ pɩlaba kpaɣnɩ Sitiim+ nɛ piwolo Gilgaalɩ+ yɔ—
Se pɩsa nɛ ŋtɩlɩ Yehowa lakasɩ siɣsiɣ ñɩnzɩ.»
6 Ɛbɛ mankaɣ kpɛndɩnʋʋ nɛ mɔnkɔɔ Yehowa ɛsɩndaa?
Ɛbɛ mankaɣ kpɛndɩnʋʋ nɛ moluŋ Ɛsɔ weyi ɛwɛ ɖooo hayo yɔ ɛ-tɛɛ?
Mankaɣ kpɛndɩnʋʋ kɩlaŋ kɩñaɣzɩŋ nɛ mɔnkɔɔ ɛ-ɛsɩndaa,
Nɛ newee wena awɛnɩ pɩnaɣ kʋɖʋmaɣ yɔ?+
7 Yehowa taa kaɣ labʋ leleŋ nɛ ɛyaŋ kudokiŋ
Nɛ num lemisi kudokiŋ hiŋ yaa we?+
Mankaɣ kpaɣʋ man-pɩyalʋ kajalaɣ ñɩnʋ nɛ mɛncɛlɩ man-kaañamtʋ lakasɩ yɔɔ?
Mankaɣ cɛlʋʋ piye nɖɩ mon-tomnaɣ lʋlaa yɔ man-kɩwɛɛkɩm yɔɔ?*+
8 Oo ɛyʋ, eheyi-ŋ mbʋ pɩwɛ ɖeu yɔ.
Nɛ ɛbɛ Yehowa ñɩnɩɣ* se ŋla?
9 Yehowa nɔɔ makɩ kubuka nɛ kayaɣ ɛyaa mba pɛwɛ tɛtʋ taa yɔ;
Mba pɛwɛnɩ lɔŋsɩnɖɛ nɖɩ ɖɩwazɩɣ yɔ, pakaɣ seu ña-hɩɖɛ sɔɔndʋ.
Iwelisini ɖaʋ nɛ weyi ɛlɩzɩ-kʋ yɔ.+
10 Kañatʋ lakasɩ ñɩm nɛ efa kɩmaɣzʋʋ* ŋgʋ kɩtɩtalɩ nɛ papaɖɩɣ-kʋ yɔ,
Pɩtɩŋa pɩkpɛndɩ pɩwɛ kañatʋ tʋ ɖɩɣa taa?
11 Manpɩzɩɣ nɛ mɛwɛɛ kele kele* ye mɛwɛnɩ kɩmaɣzɩŋ kɩdɛkɛdɩŋ
Nɛ huyuu ŋgʋ kɩ-taa wɛ mulum yuŋ kɩmaɣzɩŋ yɔ?+
12 Mbʋ pʋyɔɔ yɔ puuyaɣ lakasɩ su ɛ-ñɩm tɩnaa taa,
Nɛ ɛ-taa ñɩma yɔɔdʋʋ cɛtɩm tɔm;+
Pa-nzʋlʋmɩyɛ kɛ mbʋ pipeɣziɣ yɔ pɔ-nɔɔ taa.+
13 «Pʋyɔɔ lɛ, mankaɣ-ŋ mabʋ nɛ manɖʋ-ŋ heŋ,+
Meyeki nɛ ŋpɩsɩ njɛyɛ ña-kɩwɛɛkɩm yɔɔ.
14 Ŋkaɣ tɔɔʋ ɛlɛ ŋŋhakɩ;
Nabʋyʋ ɛɛkaɣ wɛʋ ña-taa.+
Mbʋ ŋkʋsʋʋ yɔ, ŋŋkaɣ-pʋ kpaɣʋ nɛ ŋɖɛnɩ pɛɛyɛ taa,
Nɛ mbʋ ŋkpakɩɣ nɛ ŋɖɛna yɔ, mankaɣ-pʋ cɛlʋʋ laɣɖɛ.
15 Ŋkaɣ ɖuu ɖomaɣ, ɛlɛ ŋŋkaɣ kʋm.
Ŋkaɣ fɛyʋʋ oliivi pee, ɛlɛ ŋŋkaɣ labɩnʋʋ tʋmɩyɛ num;
Nɛ ŋkaɣ labʋ vɛɛ kɩfalʋʋ, ɛlɛ ŋŋkaɣ vɛɛ naʋ se ŋñɔɔ.+
16 Mbʋ pʋyɔɔ yɔ ɩlakɩ Omirii sɔnzɩ nɛ Ahaabɩ ɖɩɣa lakasɩ kpeekpe,+
Nɛ ɩɖɔŋ pɔ-lɔŋ tasʋʋ yɔɔ.