Nahum
2 Weyi ɛmɩzɩɣ wondu yɔ, ɛkɔm ña-wayɩ.*+
Feŋ ɖoŋ tilima yɔɔ.
Wɛɛ nɛ ŋcɔŋnɩ nʋmɔʋ taa camɩyɛ.
Ɩñɔɔzɩ mɩ-tɩ* nɛ ɩla mbʋ payɩ ɩpɩzɩɣ yɔ nɛ ɩkpa ɖoŋ.
2 Mbʋ pʋyɔɔ yɔ Yehowa kaɣ pɩsɩnʋʋ Yakɔɔb ɛ-samtʋ,
Ɛkaɣ pɩsɩnʋʋ ɖɔɖɔ Izrayɛɛlɩ ɛ-samtʋ,
Mbʋ pʋyɔɔ yɔ yɔkɩyaa yɔkɩ-wɛ;+
Nɛ pɛwɛɛkɩ pe-pilinzi.
3 Pata ɛ-sɔdɩŋ kpayɩŋ tɔlɩm kɩsɛɛmɩm,
E-you laɖaa su wondu kɩsɛɛmtʋ cɩɩɩ.
E-you kɛɛkɛɛnaa ñɩɣtʋ ñɩlɩsɩɣ ɛzɩ miŋ yɔ
Evemiye nɖɩ ɛñɔɔzʋʋ ɛ-tɩ se ɛla you yɔ,
Nɛ pakpazɩ kɩgbɛzɛmɩŋ weyi pakpaɣ tɩŋ nɛ pasaɣna yɔ.
4 You kɛɛkɛɛnaa seɣ tɛtɛ seu habɛɛ yɔɔ.
Peseɣ nɛ pakpaɣ nɛ petiki samaɣ kadasɩ taa.
Peɖeɣ miŋ ɛzɩ koolonzi* yɔ nɛ pañɩlɩsɩɣ ɛzɩ tɛʋ ñɩlɩsʋʋ yɔ.
5 Ɛkaɣ yaʋ ɛ-sɔɔjanaa sɔsaa.
Pɩkaɣ-wɛ tuuluu nʋmɔʋ taa.
Peseɣ lɛɛ lɛɛ nɛ powoki ki-koloŋa cɔlɔ;
Nɛ paɖɩkɩ nʋmɔʋ.
6 Pɔsɩ nɔnɔsɩ kaɣ tʋlʋʋ,
Nɛ kewiyitu kuduyuu kaɣ yɔlʋʋ.*
7 Paɖʋ paɣtʋ:* Palɩzɩ-kʋ ndaakpeɖe,
Pakpaɣ-kʋ nɛ pɛɖɛna, nɛ ki-yomaa halɩñɩma mɔlʋʋ;
Pɔmɔlʋʋ ɛzɩ ahoo yɔ nɛ pamakɩ pa-laŋa taa.
8 Ðooo Niniivi wɛʋ yɔ,+ kɩwɛ ɛzɩ lɩŋgamʋʋ yɔ,
Ɛlɛ lɛɛlɛɛyɔ lɛ, peɖiɣni seu.
«Ɩsɩŋ! Ɩsɩŋ!»
Ɛlɛ nɔɔyʋ eekisiɣni ɛ-wayɩ.+
9 Ɩlazɩ liidiye, ɩlazɩ sika!
Kɩ-ñɩm fɛyɩ kamaɣ.
Ñɩm wondu ndɩ ndɩ suni kɩ-taa.
10 Pɩkazɩ tɛtʋ ndaakpasɩ, tɩpɩsɩ njɛyɛ, tɩwɛɛkaa!+
Sɔɔndʋ yɔɔ lɛ pa-laŋa yolaa, pa-nʋmbɔla seliɣ, pa-tɩnzɩ seliɣ;
Sɔɔndʋ wɛ pa-tɩŋa pɛ-ɛsɩndaa.
11 Mʋʋzɩŋ ɖɩjaɣyɛ wɛ le?+ Ðenɖe mʋʋzɩŋ piya tɔkɩ yɔ,
Ðenɖe mʋʋzʋʋ lɩɣna nɛ kiɖiyiɣ kɩ-pɩɣa,
Nɛ nɔɔyʋ ɛɛɖʋʋ-ɩ sɔɔndʋ yɔ.
12 Mʋʋzʋʋ abalɩñɩŋgʋ cɩyaɣ kpɩna sakɩyɛ nɛ kɩcɛlɩɣ ki-piya,
Nɛ kɩtaŋaɣ kpɩna liŋ tɛɛ nɛ kɩcɛlɩɣ mʋʋzɩŋ halɩñɩŋ.*
Kpɩna wena kɩɩkʋwa yɔ, aasu kɩ-pɔŋ taa,
Kpɩna wena kɩɩcɩyaa yɔ, aasu kɩ-ɖɩjaɣyɛ taa.
13 Yoyaa tɛ Yehowa yɔɔdʋʋ se: «Na! Mankʋyʋʋ ñɔ-yɔɔ,+
Mankaɣ ñaɣzʋʋ miŋ ño-you kɛɛkɛɛnaa,+
Nɛ laɣɖɛ kaɣ kʋʋ ñe-piya.*
Mankaɣ yebu nɛ ŋkʋʋ kpɩna kʋʋ mbʋ yɔ, pɩsɩɩ tɩnaɣ tɛtʋ yɔɔ,
Nɛ paakaɣ tasʋʋ nɩʋ mba ŋtiyi-wɛ yɔ pa-taŋ.»+