Roma mba
2 Pʋyɔɔ lɛ, hayɩ ɛyʋ, paa anɩ ŋtɩɩkɛnaa yɔ,+ ye ŋhʋʋnɩ lɛlʋ tɔm yɔ ŋfɛyɩnɩ kawanaɣ; mbʋ pʋyɔɔ yɔ alɩwaatʋ ndʋ ŋhʋʋnɩ lɛlʋ tɔm yɔ, ŋkʋʋ ña-maɣmaɣ ñɔ-tɔm; mbʋ pʋyɔɔ yɔ ña weyi ŋhʋʋnɩ lɛlʋ tɔm yɔ, ŋlakɩ lakasɩ kʋɖʋmsɩ nzɩ.+ 2 Nɛ ɖɩnawa se Ɛsɔ hʋʋnɩ tɔm mba palakɩ lakasɩ nzɩ yɔ nɛ pɩlakɩ nɔɔ kʋɖʋmaɣ nɛ toovenim.
3 Ɛlɛ, hayɩ ɛyʋ, ye ŋhʋʋnɩ tɔm mba palakɩ lakasɩ nzɩ yɔ, ŋgʋ ña-maɣmaɣ ŋlakɩ-sɩ yɔ, ŋmaɣzɩɣ se ŋkaɣ tʋlʋʋ nɛ Ɛsɔ ɛɛhʋʋnɩ-ŋ tɔm na? 4 Yaa ŋniŋ ɛ-camɩyɛ lakasɩ+ sɔsɔsɩ, ɛ-pʋtɔdɩyɛ naʋ*+ sɔsɔm nɛ e-suuɖu+ sɔsɔʋ, mbʋ pʋyɔɔ yɔ ŋŋsɩŋ se Ɛsɔ caɣ se ɛtɩŋnɩ ɛ-camɩyɛ lakasɩ yɔɔ nɛ ɛsɩnɩ-ŋ nɛ ŋkpiɖi ña-kɩwɛɛkɩm yɔɔ?+ 5 Ɛlɛ ŋwɛ ñʋʋ taa ɖoŋ nɛ ŋŋkpiɖiɣ ña-kɩwɛɛkɩm yɔɔ; pʋyɔɔ lɛ, ŋwɛɛ nɛ ŋkpeɣliɣ ña-tɩ pana nɛ ŋkpazɩɣ huuye pana kɩyakʋ wiye, kɩyakʋ ŋgʋ Ɛsɔ kaɣ kuluu ɛ-tɔm hʋʋ siɣsiɣ ñɩmbʋ yɔɔ yɔ.+ 6 Nɛ ɛkaɣ hɛyʋʋ paa weyi lɛ ɛ-lakasɩ yɔɔ:+ 7 ɛhaɣ wezuu maatɛŋ mba pɔɖɔkʋʋ pa-laŋa tʋmɩyɛ nɖɩ ɖɩwɛ ɖeu yɔ ɖɩ-labʋ taa nɛ patɩŋɩɣnɩ pɩ-yɔɔ nɛ pawɩlɩɣ se pañɩnɩɣ samtʋ, hɩɖɛ ɖʋʋ nɛ tomnaɣ ŋga kaaɖazɩɣ yɔ;+ 8 ɛlɛ mba pɛkɛ ñaɖʋʋ tɩnaa nɛ paañaŋ toovenim ɛlɛ pañaŋ mbʋ pɩfɛyɩ siɣsiɣ yɔ, pana nɛ hɔpɩsɩyɛ kaɣnɩ tibu pɔ-yɔɔ.+ 9 Kʋñɔŋ nɛ siziŋ nɩʋ kaɣ tibu ɛyaa mba payɩ palakɩ kɩdɛkɛdɩm yɔ pɔ-yɔɔ,* kajalaɣ lɛ Yuuda tʋ yɔɔ nɛ pʋwayɩ lɛ Grɛɛkɩ tʋ yɔɔ; 10 ɛlɛ mba payɩ palakɩ mbʋ pɩwɛ ɖeu yɔ, pakaɣ hiɣu samtʋ, hɩɖɛ ɖʋʋ nɛ laŋhɛzɩyɛ; kajalaɣ lɛ Yuuda tʋ+ nɛ pʋwayɩ lɛ Grɛɛkɩ tʋ.+ 11 Mbʋ pʋyɔɔ yɔ Ɛsɔ ɛɛtʋkʋʋ ɛyaa taa.+
12 Mbʋ pʋyɔɔ yɔ mba payɩ pɛfɛyɩnɩ paɣtʋ nɛ pala kɩwɛɛkɩm yɔ, pakaɣ sɩbʋ; paa paɣtʋ ɛfɛyɩ se tɩmabɩ-wɛ yɔ.+ Ɛlɛ mba payɩ palabɩ kɩwɛɛkɩm paɣtʋ tɛɛ yɔ, pakaɣ tɩŋnʋʋ paɣtʋ yɔɔ nɛ pahʋʋnɩ-wɛ tɔm.+ 13 Mbʋ pʋyɔɔ yɔ pɩtɩkɛ mba pewelisiɣ paɣtʋ yɔ, mba kɛnɩ siɣsiɣ tɩnaa Ɛsɔ ɛsɩndaa; ɛlɛ mba pɔɖɔŋ paɣtʋ yɔɔ yɔ mba pakaɣ yaʋ se siɣsiɣ tɩnaa.+ 14 Mbʋ pʋyɔɔ yɔ alɩwaatʋ ndʋ ajɛɛ taa ñɩma mba pɛfɛyɩnɩ paɣtʋ yɔ+ pɔɖɔŋ paɣtʋ yɔɔ pa-maɣmaɣ pa-tɩ yɔɔ yɔ, ɛyaa mba, paa pɛfɛyɩnɩ paɣtʋ yɔ, pɛkɛ paɣtʋ pa-maɣmaɣ pa-tɩ. 15 Pa-maɣmaɣ pawɩlɩɣna se pama paɣtʋ taa tɔm pa-laŋa taa, nɛ pɛ-ɛhʋyɛ ɖɔɖɔ lɩzɩɣ aseɣɖe, nɛ pa-maɣmaɣ pa-lɩmaɣza kʋʋ pɔ-tɔm yaa halɩ awɩlɩɣ-wɛ se pɛwɛnɩ toovenim. 16 Pɩkaɣ labʋ mbʋ kɩyakʋ ŋgʋ Ɛsɔ tɩŋɩɣnɩ Krɩstʋ Yesu yɔɔ nɛ ɛhʋʋnɩ ɛyaa tɔm pɛ-mɛsaɣ tɛɛ lakasɩ yɔɔ+ ɛzɩ monsusuu-mɩ tɔm kɩbandʋ yɔ.
17 Lɛɛlɛɛyɔ, ye payaɣ-ŋ se Yuuda tʋ+ nɛ ŋtaɣ paɣtʋ liu nɛ ŋkʋndʋʋnɩ Ɛsɔ, 18 nɛ ŋtɩlɩ ɛ-sɔɔlɩm nɛ ŋtisi mbʋ pɩkɩlɩ ɖeu siŋŋ yɔ pɩ-yɔɔ mbʋ pʋyɔɔ yɔ pɛkpɛlɩkɩ-ŋ Paɣtʋ,+ 19 nɛ ña-taa tɛ se ŋkɛ yʋlʋmaa ɖiyiyu, nɛ mba pɛwɛ cɩkpɛndʋʋ taa yɔ pa-ñalɩmɩyɛ, 20 nɛ weyi ɛñɔɔzʋʋ ɛyaa mba pɛfɛyɩnɩ lɩmaɣza kɩbana yɔ, piya ajamaa tɔm wɩlɩyʋ, nɛ ŋwɛnɩ Paɣtʋ taa sɩmtʋ ndʋ tɩ-tɔm kɩlɩ cɛyʋʋ yɔ nɛ Paɣtʋ taa toovenim mbʋ pɩ-tɔm kɩlɩ cɛyʋʋ yɔ... 21 ye mbʋ ña weyi ŋwɩlɩɣ lɛlʋ tɔm yɔ, ŋŋwɩlɩɣ ña-tɩ?+ Ña weyi ŋsusuu se: «Taamɩlɩ»+ yɔ, ŋmɩlɩɣ? 22 Ña weyi ŋyɔɔdʋʋ se: «Taala acɛyɛ»+ yɔ, ŋlakɩ acɛyɛ na? Ña weyi ŋpaɖɩɣ sɩɩnaa yɔ, ŋmɩlɩɣ templonaa taa? 23 Ña weyi ŋkʋndʋʋnɩ paɣtʋ yɔ, ŋmaɣnɩ Paɣtʋ yɔɔ nɛ ŋɖʋʋ Ɛsɔ fɛyɛ na? 24 Mbʋ pʋyɔɔ yɔ, ɛzɩ pamaʋ yɔ «mɩ-yɔɔ yɔɔ pɛwɛɛ nɛ pɔyɔɔdʋʋ tɔm kɩdɛkɛdɩtʋ Ɛsɔ hɩɖɛ yɔɔ ajɛɛ taa.»+
25 Toovenim taa lɛ, ye ŋɖɔŋ paɣtʋ yɔɔ yɔ+ ɖɩnɛ ɛlɛ pɛlɩtʋ+ wɛɣnɩ wazaɣ; ɛlɛ ye ŋmaɣnɩ paɣtʋ yɔɔ yɔ, ñɛ-pɛlɩtʋ pɩsɩ kɩdɩbɛlɩtʋ. 26 Pʋyɔɔ lɛ, ye ɛyʋ weyi patɩpɛlɩ-ɩ yɔ+ ɛɖɔŋ mbʋ Paɣtʋ wɩlɩɣ se pɩwɛ siɣsiɣ yɔ pɩ-yɔɔ yɔ, paakaɣ kpaɣʋ ɛ-kɩdɩbɛlɩtʋ se tɩkɛ pɛlɩtʋ yaa we?+ 27 Nɛ ɛyʋ weyi patɩpɛlɩ-ɩ tomnaɣ taa yɔ, ye ɛɖɔŋ Paɣtʋ yɔɔ yɔ, ɛkaɣ-ŋ tɔm hʋnʋʋ, ña weyi ŋmaɣnɩ paɣtʋ yɔɔ paa ŋwɛnɩ paɣtʋ ndʋ pamawa yɔ nɛ ŋkɛ weyi pɛpɛlɩ-ɩ yɔ. 28 Mbʋ pʋyɔɔ yɔ pɩtɩkɛ weyi ɛkɛ Yuuda tʋ ɛsɩndaa yem yɔ, ɛnʋ kɛnɩ Yuuda tʋ;+ mbʋ ɖɔɖɔ pɩtɩkɛ mbʋ pɩnaɣ tomnaɣ yɔɔ yem yɔ, mbʋ payaɣ se pɛlɩtʋ.+ 29 Ɛlɛ Yuuda tʋ lɛ weyi ɛkɛ Yuuda tʋ nɛ pɩ-taa kiŋ yɔ,+ nɛ ɛ-pɛlɩtʋ kɛ laŋɩyɛ taa pɛlɩtʋ+ pɩtɩŋnɩ fezuu yɔɔ, pɩtɩtɩŋnɩ paɣtʋ ndʋ pamawa yɔ tɩ-yɔɔ.+ Ɛyʋ ɛnʋ, Ɛsɔ cɔlɔ ɛ-samtʋ lɩɣna, pɩtɩkɛ ɛyaa cɔlɔ.+