Samɩyɛɛlɩ takayaɣ naalɛ ñɩŋga

14 Nɛ Zeruyaa+ pɩyalʋ Yowaabʋ nɩɩ se wiyaʋ liu kaawɛ siŋŋ se ɛna Absalɔm.+ 2 Peeɖe Yowaabʋ tiyi Tekowa+ taa nɛ payaa halʋ nɔɔyʋ peeɖe; halʋ ɛnʋ ɛwɛ lɛɣtʋ pɩdɩɩfɛyɩ, nɛ Yowaabʋ heyi-i se: «Mentendi-ŋ, la ɛzɩ ŋwɛ kʋñɔwiye taa yɔ nɛ ŋsuu kʋñɔwiye wondu, nɛ taataa num.+ La ɛzɩ halʋ weyi ɛcaɣ kʋñɔwiye nɔɔyʋ sɩm yɔɔ alɩwaatʋ sakɩyɛ yɔ. 3 Pʋwayɩ lɛ ŋsʋʋ nɛ ŋyɔɔdɩnɩ wiyaʋ ɛzʋnɔ.» Peeɖe Yowaabʋ ɖʋ tɔm halʋ ɛnʋ ɛ-nɔɔ taa.*

4 Tekowa halʋ ɛnʋ ɛsʋʋ wiyaʋ cɔlɔ nɛ eluŋ nɛ ɛpa ɛ-ɛsa nɛ tɛtʋ nɛ ɛyɔɔdɩ se: «Hayɩ wiyaʋ, sɩnɩ-m!» 5 Wiyaʋ pɔzɩ-ɩ se: «Ɛbɛ laba?» Nɛ ɛlɛ cosi se: «Hayɩ, mɛnkɛ lelu; ma-walʋ sɩba. 6 Nɛ ma ña-lɩmɖʋyʋ mɛwɛnɩ abalɩbiya 2, nɛ pa-naalɛ poyooni ɖama ñɩtʋ taa. Nɔɔyʋ taawɛɛ se eloli-wɛ, nɛ kʋɖʋm ma lɛlʋ nɛ ɛkʋ-ɩ. 7 Lɛɛlɛɛyɔ, hɔʋ kpeekpe kʋyɩ ma ña-lɩmɖʋyʋ mɔ-yɔɔ nɛ pɔtɔŋ se: “Cɛlɩ-ɖʋ weyi ɛkʋ e-koobu yɔ nɛ ɖɩkʋ-ɩ e-koobu weyi ɛkʋ-ɩ yɔ e-wezuu* yɔɔ,+ paa piyeki se ɖɩɖɩzɩ weyi ɛkaɣ mʋʋ caja ñɩm yɔ!” Pakaɣ ɖɩzʋʋ miŋ mamaɖɛ kɛdɛzaɣ ñɩnɖɛ nɖɩ pɩkazɩ-m yɔ,* nɛ ma-walʋ hɩɖɛ kaɣ ɖɩm, nɛ pɩɩkaɣ-ɩ kazʋʋ nɔɔyʋ nɛ ɛ-ɛsa tɛtʋ yɔɔ.»

8 Nɛ wiyaʋ heyi halʋ ɛnʋ se: «Kpe ña-ɖɩɣa, nɛ mankaɣ cɔnʋʋ ñɔ-tɔm ndʋ ti-ɖeɖe.» 9 Peeɖe Tekowa halʋ heyi wiyaʋ se: «Hayɩ man-kɩbaɣlʋ wiyaʋ, kɩwɛɛkɩm mbʋ pɩpɩsɩ ma nɛ man-caa ɖɩɣa ɖɔ-yɔɔ, nɛ wiyaʋ nɛ e-kewiyaɣ kpelaɣ pataaɖɔɔ wɛɛ.» 10 Nɛ wiyaʋ heyi halʋ ɛnʋ se: «Ye nɔɔyʋ ɛtasɩ-ŋ tɔm ndʋ heyuu yɔ, kɔnɩ-ɩ mɔn-cɔlɔ, nɛ wiɖiyi ɛɛkaɣ-ŋ tasʋʋ cɛyʋʋ.» 11 Ɛlɛ halʋ ɛnʋ ɛyɔɔdɩ se: «Wiyaʋ, mentendi-ŋ, tɔzɩ ñɛ-Ɛsɔ Yehowa yɔɔ, se pɩsa nɛ calɩm kɩmɩyɛ kpayʋ+ ɛtaakɔnɩ kaɖɛ naɖɩyɛ nɛ ɛɖɩzɩ man-pɩyalʋ.» Nɛ wiyaʋ heyi-i se: «Yehowa ñɩtʋʋ nɛ ɛwɛɛ wezuu yɔ,+ ña-pɩyalʋ ñɔyaɣ kʋɖʋmaɣ ɛɛkaɣ tɔlʋʋ tataa.» 12 Nɛ halʋ yɔɔdɩ se: «Man-kɩbaɣlʋ wiyaʋ, mentendi-ŋ, yele nɛ meheyi-ŋ tɔm natʋyʋ.» Nɛ wiyaʋ tɔ se: «Yɔɔdɩ!»

13 Halʋ yɔɔdɩ se: «Hayɩ wiyaʋ, ɛbɛ yɔɔ ŋmaɣzaa se ŋlakɩ Ɛsɔ samaɣ mbʋ?+ Alɩwaatʋ ndʋ ŋyɔɔdɩ mbʋ yɔ, piyeba nɛ ña-maɣmaɣ ŋɖɔɔ wɛɛ, mbʋ pʋyɔɔ yɔ ŋtɩpɩsɩnɩ ña-maɣmaɣ ña-pɩyalʋ weyi ŋɖɔɔnɩ-ɩ yɔ.+ 14 Pɩtʋʋ fɛyɩ se ɖɩkaɣ sɩbʋ nɛ ɖɩwɛɛ ɛzɩ lɩm mbʋ papɩyɩ tataa yɔ, mbʋ paapɩzɩɣ nɛ paɖaɣnɩ-pʋ kuu yɔ. Ɛlɛ Ɛsɔ ɛɛlɩzɩɣ wezuu* nakʋyʋ, nɛ ɛmaɣzɩɣ lɩmaɣza wena a-yɔɔ pɩfɛyɩ se weyi pɔɖɔɔnɩ-ɩ yɔ, ɛcaɣ agbaaɣdaa tam yɔ a-yɔɔ. 15 Mɔnkɔm se meheyi tɔm tʋnɛ man-kɩbaɣlʋ wiyaʋ, mbʋ pʋyɔɔ yɔ ɛyaa laba nɛ sɔɔndʋ kpa-m. Pʋyɔɔ ña-lɩmɖʋyʋ yɔɔdaa se: “Pɩwɛɛ se mɔyɔɔdɩnɩ wiyaʋ. Pʋtɔma yɔ wiyaʋ kaɣ labʋ mbʋ e-yom pɔzʋʋ-ɩ yɔ. 16 Pʋtɔma yɔ wiyaʋ welisiɣni ma e-yom nɛ ɛlɩzɩ-m ɛyʋ weyi ɛñɩnɩɣ se ɛɖɩzɩ ma nɛ man-pɩyalʋ kʋɖʋm weyi pɩkazɩ-m yɔ e-nesi tɛɛ, ɛnʋ weyi ɛñɩnɩɣ se ɛlɛɣ ñɩm mbʋ Ɛsɔ ha-ɖʋ yɔ ɖe-nesi tɛɛ yɔ.”+ 17 Nɛ ña-lɩmɖʋyʋ yɔɔdɩ se: “Man-kɩbaɣlʋ wiyaʋ tɔm ɛhɛzɩ man-laŋɩyɛ,” mbʋ pʋyɔɔ yɔ man-kɩbaɣlʋ wiyaʋ wɛ ɛzɩ Ɛsɔ toovenim tʋ tiyiyu yɔ, nɛ ɛɖʋʋ tʋkaɣ mbʋ pɩwɛ ɖeu nɛ mbʋ pɩfɛyɩ ɖeu yɔ pɩ-hɛkʋ taa. Ñɛ-Ɛsɔ Yehowa ɛwɛɛ ñɔ-cɔlɔ.»

18 Nɛ wiyaʋ heyi halʋ se: «Mentendi-ŋ mbʋ payɩ mɔnpɔzʋʋ-ŋ yɔ, taamɛsɩ-m pɩ-taa nabʋyʋ.» Halʋ cosi se: «Mentendi-ŋ, man-kɩbaɣlʋ wiyaʋ ɛyɔɔdɩ.» 19 Wiyaʋ pɔzɩ-ɩ se: «Pɩtɩkɛ Yowaabʋ heyini-ŋ tɔm ndʋ tɩ-tɩŋa payɩ?»+ Halʋ cosi-i se: «Ŋñɩtʋʋ nɛ ŋwɛɛ wezuu yɔ,* Oo man-kɩbaɣlʋ wiyaʋ, mbʋ lɛ ɖeyi ɖeyi ɛzɩ ŋyɔɔdʋʋ yɔ,* mbʋ pʋyɔɔ yɔ ña-lɩmɖʋyʋ Yowaabʋ heyini-m se mala mbʋ nɛ ɛɖʋ tɔm tʋnɛ tɩ-tɩŋa payɩ mɔ-nɔɔ taa. 20 Ña-lɩmɖʋyʋ Yowaabʋ labɩ mbʋ se pɩlɛɣzɩ ña-lɩmaɣza, ɛlɛ man-kɩbaɣlʋ wɛnɩ lɔŋsɩnɖɛ ɛzɩ Ɛsɔ toovenim tʋ tiyiyu ñɩnɖɛ yɔ, nɛ ɛsɩm mbʋ payɩ piɖiɣni labʋ ɛjaɖɛ taa yɔ.»

21 Nɛ wiyaʋ heyi Yowaabʋ se: «Pɩwɛ ɖeu, mankaɣ labʋ mbʋ.+ Wolo nɛ ŋpɩsɩnɩ Absalɔm.»+ 22 Peeɖe Yowaabʋ luŋaa nɛ ɛpa ɛ-ɛsa nɛ tɛtʋ nɛ ɛsa wiyaʋ. Yowaabʋ yɔɔdaa se: «Sɔnɔ ña-lɩmɖʋyʋ nawa se ɛ-tɔm kɛdɩnɩ-ŋ, Oo man-kɩbaɣlʋ wiyaʋ, mbʋ pʋyɔɔ yɔ wiyaʋ labɩ mbʋ ɛ-lɩmɖʋyʋ pɔzɩ-ɩ yɔ.» 23 Nɛ Yowaabʋ kʋyɩ nɛ ewolo Gesuur+ nɛ ɛkpaɣ Absalɔm nɛ ɛkɔnɩ Yeruzalɛm. 24 Ɛlɛ wiyaʋ yɔɔdɩ se: «Ɛpɩsɩ ɛ-maɣmaɣ ɛ-ɖɩɣa taa, ɛlɛ ɛɛpɩzɩɣ nɛ ɛna mɛ-ɛsɩndaa.» Peeɖe Absalɔm pɩsɩ ɛ-maɣmaɣ ɛ-ɖɩɣa taa, nɛ ɛtɩna wiyaʋ ɛsɩndaa.

25 Nɛ Izrayɛɛlɩ kpeekpe taa lɛ, pataasaŋ nɔɔyʋ siŋŋ e-keɖeɣa yɔɔ ɛzɩ Absalɔm yɔ. Kpaɣnɩ ɛ-naataŋ tɛɛ nɛ pɩkpa ɛ-ñʋdaka taa, ɛfɛyɩnɩ ɛjandʋ natʋyʋ. 26 Alɩwaatʋ ndʋ ɛhʋŋ ɛ-ñʋʋ yɔ—ɛhʋŋ ɛ-ñʋʋ paa pɩnaɣ ŋga ka-ɖɩdɛnɖɛ mbʋ pʋyɔɔ yɔ kɩɩwɛ-ɩ yuŋ siŋŋ—ɛ-ñʋʋ taa ñɔsɩ yuŋ kɛ siklinaa 200,* ye pamaɣzɩɣnɩ awiya ɖɩɣa taa yuŋ kɩmaɣzʋʋ yɔ.* 27 Palʋlɩ Absalɔm abalɩbiya 3+ nɛ halɩbɩɣa kʋɖʋmaɣ nɛ payaɣaɣ-kɛ se Tamaarɩ. Kaakɛ halʋ weyi eɖewa pɩdɩɩfɛyɩ yɔ.

28 Nɛ Absalɔm caɣ Yeruzalɛm pɩnzɩ 2 kiya, ɛlɛ ɛtɩna wiyaʋ ɛsɩndaa.+ 29 Nɛ Absalɔm yaa Yowaabʋ se etiyi-i wiyaʋ cɔlɔ, ɛlɛ Yowaabʋ kizi se eewoki Absalɔm tɛ. Nɛ ɛtasɩ tiyuu ɛ-wayɩ nabʋlɛ ɖeɖe, nɛ ɛlɛ ɖaɣnɩ kizuu se eewoki. 30 Ðɩnɛ ɛlɛ Absalɔm heyi ɛ-lɩmɖʋyaa se: «Yowaabʋ kotoŋa wɛ ma-ñɩŋga cɔlɔ, nɛ ɛwɛnɩ orjɩ* peeɖe. Iwolo nɛ ɩñaɣzɩ-kɛ miŋ.» Nɛ Absalɔm lɩmɖʋyaa ñaɣzɩ kotoŋa ŋga miŋ. 31 Peeɖe Yowaabʋ kʋyaa nɛ ewolo Absalɔm ɖɩɣa taa nɛ ɛpɔzɩ-ɩ se: «Ɛbɛ yɔɔ ña-lɩmɖʋyaa ñaɣzɩ mon-kotoŋa miŋ?» 32 Absalɔm cosi Yowaabʋ se: «Na! Mentiyaa se peheyi-ŋ se: “Kɔɔ nɛ mentiyi-ŋ wiyaʋ cɔlɔ nɛ ŋpɔzɩ-ɩ se: ‘Ɛbɛ yɔɔ malɩnɩ Gesuur nɛ mɔnkɔɔ?+ Pɩɩkɩlɩ weewee se mancaɣ peeɖe. Lɛɛlɛɛyɔ lɛ, yele nɛ mana wiyaʋ ɛsɩndaa, nɛ ye mɛwɛnɩ kɩwɛɛkɩm nabʋyʋ yɔ, ɖɩnɛ ɛlɛ pɩwɛɛ se ɛkʋ-m.’”»

33 Nɛ Yowaabʋ wolo wiyaʋ cɔlɔ nɛ eheyi-i tɔm ndʋ. Ðɩnɛ ɛlɛ, ɛyaa Absalɔm nɛ ɛlɛ sʋʋ wiyaʋ cɔlɔ nɛ eluŋ tataa ɛlɛ ɛsɩndaa, nɛ ɛpa ɛ-ɛsa nɛ tɛtʋ wiyaʋ ɛsɩndaa. Nɛ wiyaʋ kpi Absalɔm nɛ ekpiikini-i.+