Apostoloowaa Tʋma Labʋ
26 Agripa+ heyi Pɔɔlɩ se: «Paha-ŋ nʋmɔʋ se ŋyɔɔdɩ nɛ ŋlʋ ña-tɩ yɔɔ.» Nɛ Pɔɔlɩ kpazɩ e-nesi nɛ ɛpaɣzɩ lʋbʋ ɛ-tɩ yɔɔ nɛ ɛtɔŋ se:
2 «Tɔm ndʋ tɩ-yɔɔ payɩ Yuuda mba kʋyʋʋ mɔ-yɔɔ yɔ,+ Wiyaʋ Agripa, man-taa wɛ leleŋ se ñɛ-ɛsɩndaa pɩwɛɛ se malʋ man-tɩ yɔɔ kɩyakʋ kʋnɛ; 3 mbʋ pʋyɔɔ yɔ kɔzɩ kɔzɩ lɛ, ŋsɩm Yuuda mba sɔnzɩ tɩŋa nɛ nɔɔhɔnɖɛ nɖɩ ɖɩwɛ pɛ-hɛkʋ taa yɔ camɩyɛ. Pʋyɔɔ lɛ, mentendi-ŋ se ŋɖʋ suuɖu nɛ ŋwelisini-m.
4 «Toovenim taa lɛ, ɛzɩma mancaɣ wezuu mɛ-ɛyaa samaɣ* taa nɛ Yeruzalɛm pɩkpaɣʋnɩ me-evebitu taa yɔ, Yuuda mba tɩŋa sɩm tɔm ndʋ camɩyɛ,+ 5 Yuuda ñɩma mba paasɩmɩ-m kiɖe tɛɛ yɔ; ye pɔsɔɔlaa yɔ, papɩzɩɣ nɛ palɩzɩ aseɣɖe tɩ-yɔɔ, ndʋ lɛ se maakɛ Farɩsɩ mba kɩjaʋ yɔɔ ɛgbɛyɛ taa tʋ,+ kɩjaʋ yɔɔ ɛgbɛyɛ nɖɩ ɖɩ-tɔm kɩlɩ kaɖɛ ɖɛ-Ɛsɔ sɛtʋ taa yɔ.+ 6 Ɛlɛ lɛɛlɛɛyɔ lɛ, pahʋʋnɩ-m tɔm mbʋ pʋyɔɔ yɔ mɛwɛnɩ lidaʋ tamaɣ ŋga Ɛsɔ kaalabɩ ɖɔ-cɔzɔnaa yɔ kɔ-yɔɔ;+ 7 tamaɣ kʋɖʋmaɣ ŋga ɖe-cejewe 12 ɖaŋaa se ana ɛzɩma kakaɣ labʋ yɔ, pʋyɔɔ awɛɛ nɛ alakɩ-ɩ tʋmɩyɛ kiɖeɖeye siŋŋ ɖoo nɛ wɩsɩ. Hayɩ Wiyaʋ, lidaʋ ŋgʋ kɩ-yɔɔ Yuuda mba kʋyɩ mɔ-yɔɔ.+
8 «Ɛbɛ yɔɔ ɩmaɣzɩɣ se ɛyʋ ɛɛpɩzɩɣ nɛ etisi se Ɛsɔ feziɣ sɩɖaa? 9 Ma lɛ, mamaɣzaɣ kpem se pɩwɛɛ se mantɩŋnɩ nʋmɔŋ tɩŋa yɔɔ nɛ mankaɖɩnɩ Yesu Nazarɛɛtɩ tʋ hɩɖɛ. 10 Mbʋ ɖeyi ɖeyi malabɩ Yeruzalɛm, nɛ manɖʋ ɛyaa kiɖeɖema sakɩyɛ salakanaa taa,+ mbʋ pʋyɔɔ yɔ cɔjɔnaa sɔsaa kaaha-m ɖoŋ;+ nɛ alɩwaatʋ ndʋ pɩɩwɛɛ se pakʋ-wɛ yɔ, mentisaa se palabɩ-wɛ mbʋ. 11 Mɔhɔŋaɣ pa-nɩŋgbaaŋ ɖoŋ ɖoŋ sinaagɔɔgɩwaa tɩŋa taa, se pɩsa nɛ mañɩɣ pɔ-yɔɔ nɛ pekizi pe-tisuu; nɛ man-taa wɩɣaɣnɩ-wɛ pɩdɩɩfɛyɩ, pʋyɔɔ lɛ manazɩ-wɛ nɛ halɩ mantalɩ tɛtʋ lɛɛtʋ taa.
12 «Malakaɣ mbʋ lɛ, cɔjɔnaa sɔsaa ha-m ɖoŋ nɛ paɖʋ-m tʋmɩyɛ nɛ mankʋyɩ nɛ mowoki Damaasɩ; 13 nɛ hayɩ Wiyaʋ, mana habɩyɛ yɔɔ wɩsɩ siɣu alɩwaatʋ taa ñalɩmɩyɛ naɖɩyɛ nɖɩ ɖi-ɖoŋ kɩlɩ wɩsɩ ñalɩmɩyɛ yɔ, ɖɩlɩnɩ ɛsɔdaa nɛ ɖɩñɩlɩsɩ ma nɛ mba ɖɩɖɔŋaɣ nʋmɔʋ yɔ ɖɔ-cɔlɔ kpɛɛɛ.+ 14 Nɛ ɖa-tɩŋa ɖɩtɔlɩ tataa lɛ, manɩɩ nɔɔ nakɛyɛ kɔyɔɔdʋʋnɩ-m Ebree kʋnʋŋ taa se: “Sɔɔlɩ, Sɔɔlɩ, ɛbɛ yɔɔ ŋwɛɛ nɛ ŋnazɩɣ-m? Ye ŋwɛɛ nɛ ŋyakɩ nɩŋgbaŋaɣ ninɖiɣyu ɖaʋ* yɔ, pɩkɔŋnɩ-ŋ kaɖɛ.” 15 Ɛlɛ mɔnpɔzɩ se: “Ña yɔ anɩ, Kɩbaɣlʋ?” Nɛ Kɩbaɣlʋ cosi se: “Ma yɔ Yesu, weyi ŋwɛɛ nɛ ŋnazɩɣ yɔ. 16 Ɛlɛ kʋyɩ nɛ ŋsɩŋ ña-nɩŋgbanzɩ yɔɔ. Pʋnɛ pʋyɔɔ malɩ ñɔ-yɔɔ, se malɩzɩ-ŋ nɛ ŋkɛ mbʋ ŋnawa nɛ mbʋ mankaɣ-ŋ wɩlʋʋ mɔ-yɔɔ yɔ, pɩ-lɩmɖʋyʋ nɛ pɩ-tɛ aseɣɖe tʋ.+ 17 Nɛ mankaɣ-ŋ holuu samaɣ kanɛ nɛ ajɛɛ nesi tɛɛ, ɖenɖe mentiyiɣ-ŋ yɔ+ 18 se ŋkuli pɛ-ɛsa,+ nɛ ŋlɩzɩ-wɛ cɩkpɛndʋʋ tɛɛ+ nɛ powolo ñalɩmɩyɛ taa,+ nɛ ŋlɩzɩ-wɛ Sataŋ ɖoŋ tɛɛ+ nɛ papɩsɩnɩ Ɛsɔ yɔɔ, se pɩsa nɛ pekpeɣu-wɛ pa-kɩwɛɛkɩm+ nɛ pehiɣ ñɩm ɛyaa mba petisi mɔ-yɔɔ nɛ papɩsɩ kiɖeɖema yɔ pɛ-hɛkʋ taa.”
19 «Pʋyɔɔ lɛ, Wiyaʋ Agripa, mantikizi ñam ɛsɔdaa natʋ ndʋ, 20 ɛlɛ kajalaɣ lɛ, mowoni tɔm kɩbandʋ mba paawɛ Damaasɩ yɔ,+ nɛ pʋwayɩ lɛ mba pɛwɛ Yeruzalɛm+ yɔ nɛ Yuudee egeetiye kpeekpe taa nɛ ajɛɛ taa ɖɔɖɔ, se pɩwɛɛ se pekpiɖi pa-kɩwɛɛkɩm yɔɔ nɛ papɩsɩnɩ Ɛsɔ yɔɔ nɛ pala tʋma wena awɩlɩɣ se pekpiɖi pa-kɩwɛɛkɩm yɔɔ yɔ.+ 21 Pʋyɔɔ Yuuda mba kpa-m templo taa nɛ pañɩnɩɣ se pakʋ-m.+ 22 Ɛlɛ, mehiɣ sɩnʋʋ mbʋ pɩlɩnɩ Ɛsɔ cɔlɔ yɔ; pʋyɔɔ mowobi pɩ-yɔɔ nɛ malɩzɩɣ ɛyaa cikpema nɛ sɔsaa aseɣɖe nɛ pɩkɔɔ pɩtalɩ kɩyakʋ kʋnɛ, nɛ maayɔɔdʋʋ natʋyʋ nɛ pɩtasɩnɩ tɔm ndʋ Nayaa nɛ Moyizi paayɔɔdaa se tɩkaɣ labʋ yɔ:+ 23 paayɔɔdaa se pɩwɛɛ se Krɩstʋ ɛtɔɔ kʋñɔŋ+ nɛ ɛzɩma ɛkɛ kajalaɣ tʋ weyi pefeziɣ-i nɛ sɩɖaa taa yɔ,+ ɛkaɣ susuu ñalɩmɩyɛ samaɣ kanɛ nɛ ajɛɛ.»+
24 Nɛ Pɔɔlɩ kaawɛɛ nɛ ɛyɔɔdʋʋ tɔm ndʋ mbʋ se ɛlʋ ɛ-tɩ yɔɔ lɛ, Fɛsɩtuusi yɔɔdɩ ɖoŋ se: «Pɔɔlɩ, ŋwɛɛ nɛ ŋsʋʋ kpaaŋ! Tɩlɩtʋ sɔsɔtʋ sʋzʋʋ-ŋ kpaaŋ!» 25 Ɛlɛ Pɔɔlɩ yɔɔdɩ se: «Ðajaa Fɛsɩtuusi, maasʋʋ kpaaŋ, ɛlɛ toovenim tɔm mɛwɛɛ nɛ mɔyɔɔdʋʋ nɛ ma-maɣzɩm wɛ ɖeyi ɖeyi. 26 Toovenim taa lɛ, wiyaʋ weyi menɖiɣni-i yɔɔdɩnʋʋ faaa yɔ, ɛsɩm tɔm ndʋ camɩyɛ; mentisaa nɛ mɛntɛ man-taa se tɔm ndʋ, tɩ-taa natʋyʋ fɛyɩ se ɛɛsɩŋ-tʋ, mbʋ pʋyɔɔ yɔ tɩ-taa natʋyʋ tɩla mɛsaɣ tɛɛ.+ 27 Wiyaʋ Agripa, ŋtisiɣ Nayaa yɔɔ? Manawa se ŋtisiɣ.» 28 Ɛlɛ Agripa heyi Pɔɔlɩ se: «Pɩkazɩ pazɩ, ŋyekaɣ se manpɩsɩ Krɩstʋ tʋ.» 29 Peeɖe Pɔɔlɩ yɔɔdaa se: «Mantɩmɩɣnɩ Ɛsɔ se paa pɩkazɩ pazɩ yaa alɩwaatʋ sakɩyɛ yɔ, pɩtaasɩɩnɩ ñe-ɖeke; ɛlɛ ña nɛ mba payɩ pewelisiɣni-m sɔnɔ yɔ, ɩpɩsɩ ɖɔɖɔ ɛzɩ ma yɔ; ɛlɛ ɩtaawɛɛ salaka kpasɩ sɩnɛ sɩ-taa.»
30 Ðɩnɛ ɛlɛ wiyaʋ kʋyɩ, nɛ komina ñʋʋdʋ nɛ Bereniisi nɛ mba paacaɣ pɔ-cɔlɔ yɔ, pakʋyɩ ɖɔɖɔ. 31 Ɛlɛ pɛɖɛɣaɣ lɛ, papaɣzɩ ɖama yɔɔdɩnʋʋ nɛ pɔtɔŋ se: «Abalʋ ɛnɛ, ɛtɩla nabʋyʋ nɛ pɩpɔzɩ se ɛsɩ yaa paɖʋ-ɩ salaka kpasɩ.»+ 32 Nɛ Agripa heyi Fɛsɩtuusi se: «Ye abalʋ ɛnɛ ɛtaapɔzɩ se Sezaarɩ ɛɖaɣnɩ ɛ-tɔm hʋʋ yɔ, papɩzaɣ se peyebi-i.»+