Yohanɛɛsɩ takayaɣ kajalaɣ ñɩŋga

1 Mbʋ pɩɩwɛ kiɖe tɛɛ yɔ, mbʋ ɖɩnɩ pɩ-tɔm yɔ, mbʋ ɖɩnanɩ ɖɛ-ɛsa yɔ, mbʋ ɖɩcɔnaa nɛ ɖe-nesi tukuni-pʋ, nɛ pɩlakɩ nɔɔ kʋɖʋmaɣ nɛ wezuu tɔm yɔ,+ 2 (ɛɛɛ, palɩzɩ wezuu nɛ pawɩlɩ, nɛ ɖɩnawa nɛ ɖɩwɛɛ ɖɩlɩzɩɣ aseɣɖe+ nɛ ɖɩkɛdɩɣ-mɩ wezuu maatɛŋ tɔm,+ ŋgʋ kɩɩwɛ Caa cɔlɔ nɛ palɩzɩ-kʋ nɛ pawɩlɩ-ɖʋ yɔ), 3 mbʋ ɖɩnawa nɛ ɖɩnɩɩ pɩ-tɔm yɔ, ɖɩwɛɛ nɛ ɖɩkɛdɩɣ-mɩ pʋ ɖɔɖɔ,+ se pɩsa nɛ mɩ ɖɔɖɔ ɩpɩzɩ ɩɖʋ-ɖʋ nɛ taabalɩyɛ, ɛzɩ ɖa ɖɔɖɔ ɖɩɖʋʋ taabalɩyɛ nɛ Caa nɛ ɛ-Pɩyalʋ Yesu Krɩstʋ yɔ.+ 4 Nɛ ɖɩmaɣ-mɩ tɔm tʋnɛ se ɖa-taa leleŋ ɛwɛɛ pilim.

5 Tɔm ndʋ ɖɩnɩ ɛ-cɔlɔ nɛ ɖisusuu-mɩ yɔ, ndʋ yɔ: Ɛsɔ kɛ ñalɩmɩyɛ,+ nɛ cɩkpɛndʋʋ fɛyɩ ɛ-taa paa ññɩɩ.* 6 Ye ɖɩtɔŋ se: «Taabalɩyɛ wɛ ɖa nɛ ɩ ɖɛ-hɛkʋ taa,» ɛlɛ ɖitiyele ɖɔm cɩkpɛndʋʋ taa yɔ, ɖiɖiɣni cɛtʋʋ nɛ ɖɩɩcakɩ wezuu ŋgʋ kɩlabɩ nɔɔ kʋɖʋmaɣ nɛ toovenim yɔ.+ 7 Ɛlɛ ye ɖɩɖɔŋ ñalɩmɩyɛ taa ɛzɩ ɛ-maɣmaɣ ɛwɛʋ ñalɩmɩyɛ taa yɔ, pʋbʋ lɛ, taabalɩyɛ wɛ ɖɛ-hɛkʋ taa, nɛ ɛ-Pɩyalʋ Yesu calɩm ñalɩɣ kɩwɛɛkɩm tɩŋa ɖɔ-yɔɔ.+

8 Ye ɖɩtɔŋ se: «Ðɩfɛyɩnɩ kɩwɛɛkɩm» yɔ, ɖipeɣziɣ ɖa-tɩ kipeɣzu+ nɛ toovenim fɛyɩ ɖa-taa. 9 Ye ɖikuluu ɖa-kɩwɛɛkɩm yɔɔ yɔ, ɛkɛ siɣsiɣ tʋ nɛ toovenim tʋ se ekpeɣ-ɖʋ ɖa-kɩwɛɛkɩm nɛ ɛñalɩ ɖɔ-yɔɔ mbʋ payɩ pɩfɛyɩ siɣsiɣ yɔ.+ 10 Ye ɖɩtɔŋ se: «Ðɩtɩla kɩwɛɛkɩm» yɔ, ɖɩwɛɛ nɛ ɖɩpɩsɩɣ-ɩ cɛtɩyʋ, nɛ ɛ-tɔm fɛyɩ ɖa-taa.