Keɣa

37 Ña-taa ɛtaawɩɩ* ɛyaa kɩdɛkɛdaa yɔɔ

Nɛ taaɖʋ ɛsɩyɛ kɩdɛkɛdɩm laɖaa yɔɔ.+

 2 Pakaɣ lou lɛɛ lɛɛ ɛzɩ ñɩyʋʋ yɔ+

Nɛ pawɩlɩ ɛzɩ ñɩyʋʋ lɛŋ ñɩŋgʋ yɔ.

 3 Taa Yehowa liu nɛ ŋla mbʋ pɩwɛ ɖeu yɔ;+

Caɣ tɛtʋ* yɔɔ, nɛ ŋla mbʋ pɩwɛ siɣsiɣ yɔ.+

 4 Yehowa yɔɔ lɛ, nɩɩ leleŋ sɔsɔŋ,*

Nɛ ɛkaɣ-ŋ haʋ mbʋ ña-laŋɩyɛ sɔɔlaa yɔ.

 5 Ðʋzɩ ña-nʋmɔʋ Yehowa nesi tɛɛ;*+

Taa-ɩ liu, nɛ ɛkaɣ labʋ mbʋ pɩwazɩɣ-ŋ yɔ.+

 6 Ɛkaɣ labʋ nɛ ñe-siɣsiɣ wɛtʋ ñandɩ ɛzɩ tanaŋ tɛɛ ñalɩmɩyɛ yɔ,

Nɛ ɛla nɛ ñe-siɣsiɣ tɔm ñandɩ ɛzɩ wɩsɩ kaalaŋa yɔ.

 7 Su tamɩyɛ Yehowa ɛsɩndaa+

Nɛ ŋɖaŋɩ-ɩ kpam.

 8 Yele pana nɛ ŋlɔ hɔpɩsɩyɛ;+

Ña-taa ɛtaawɩɩ nɛ piyele nɛ ŋla kɩdɛkɛdɩm.*

 9 Mbʋ pʋyɔɔ yɔ pakaɣ ɖɩzʋʋ ɛyaa kɩdɛkɛdaa,+

Ɛlɛ mba pataɣ Yehowa liu yɔ, tɛtʋ kaɣ pɩsʋʋ pa-ñɩm.+

10 Pɩkazɩ alɩwaatʋ pazɩ yem, kañatʋ tɩnaa ɩɩkaɣ tasʋʋ wɛʋ;+

Ŋkaɣ cɔnʋʋ ɖenɖe paawɛɛ yɔ,

11 Ɛlɛ tɛtʋ kaɣ pɩsʋʋ hɛɛɛ tɩnaa ñɩm,+

Nɛ pa-taa kaɣ labʋ leleŋ siŋŋ, mbʋ pʋyɔɔ yɔ laŋhɛzɩyɛ tɔyʋʋ.+

12 Kañatʋ tʋ taŋ tamasɩ kɩdɛkɛdɩsɩ ɛyʋ siɣsiɣ tʋ yɔɔ;+

Ɛ-yɔɔ lɛ, ɛsalɩɣ e-kela.

13 Ɛlɛ Yehowa kaɣ-ɩ woŋuu,

Mbʋ pʋyɔɔ yɔ ɛnawa se kañatʋ tʋ kɩyakʋ kaɣ talʋʋ.+

14 Kañatʋ tɩnaa kpɛɣ pa-laɣla nɛ pokotuu pɔ-tɔŋ*

Se pala nɛ weyi ɛfɛyɩnɩ ɖoŋ nɩɩyɩ yɔ nɛ kʋñɔndʋ pɔtɔlɩ,

Se pakʋ mba pa-nʋmɔʋ tʋʋzaa yɔ.

15 Ɛlɛ pa-laɣla kaɣ tʋlʋʋ pa-maɣmaɣ pa-laŋa;+

Pɔ-tɔŋ kaɣ pɛlʋʋ.

16 Mbʋ siɣsiɣ tʋ wɛnɩ pazɩ yɔ,

Pɩwɛ ɖeu nɛ pɩkpaɖɩ wondu sakɩyɛ ndʋ kañatʋ tɩnaa sakɩyɛ wɛna yɔ.+

17 Mbʋ pʋyɔɔ yɔ kañatʋ tɩnaa nesi kaɣ pɛlʋʋ,

Ɛlɛ Yehowa kaɣ sɩnʋʋ siɣsiɣ tɩnaa.

18 Yehowa sɩm kaɖɛ nɖɩ ɛyaa mba pɛfɛyɩnɩ kɩwɛɛkɩtʋ natʋyʋ yɔ pakatɩɣ yɔ,*

Nɛ pa-ñɩm kaɣ wɛʋ tam.+

19 Fɛyɛ ɛɛkaɣ-wɛ kpaʋ asɛyʋʋ alɩwaatʋ taa;

Pakaɣ wɛnʋʋ tɔɔnaɣ sakɩyɛ ñɔɔsɩ alɩwaatʋ taa.

20 Ɛlɛ kañatʋ tɩnaa kaɣ tɛŋɩlʋʋ;+

Yehowa koyindinaa kaɣ mʋʋʋ ɛzɩ kpɩna ñɩtʋ ɖɩdɔɔyɛ lona wena anɛɣdɩ camɩyɛ yɔ;

Pakaɣ mʋʋʋ ɛzɩ ñɔsɩ yɔ.

21 Kañatʋ tʋ kɩndɩɣ nɛ ɛɛpɩsɩɣna,

Ɛlɛ ɛyʋ siɣsiɣ tʋ wɛ kʋjɔʋ* nɛ ɛhaɣ.+

22 Mba Ɛsɔ wazɩɣ-wɛ yɔ, tɛtʋ kaɣ pɩsʋʋ pa-ñɩm,

Ɛlɛ mba pɔ-yɔɔ ɛlɔʋ nɔɔ kɩdɛkɛdaɣ yɔ, pakaɣ-wɛ ɖɩzʋʋ.+

23 Yehowa ɖiyiɣ ɛyʋ nɩŋgbanzɩ*+

Alɩwaatʋ ndʋ ɛlɛ nʋmɔʋ kɛdɩnɩ-ɩ yɔ.+

24 Paa pituuli-i yɔ, ɛɛkaɣ tɔlʋʋ kpʋʋʋ,+

Mbʋ pʋyɔɔ yɔ Yehowa ɖɔkʋʋ e-nesi.*+

25 Maakɛ evebu nɛ lɛɛlɛɛyɔ mankpadɩyaa,

Ɛlɛ wiɖiyi mantɩna pɔlɔ ɛyʋ siɣsiɣ tʋ nɔɔyʋ,+

Nɛ mantɩna ɖɔɖɔ e-piya ñɩnɩɣ tɔɔnaɣ.*+

26 Paa ɛzɩmtaa lɛ, ɛkɩndɩɣ ɛyaa faaa,+

Nɛ wazaɣ ɖaŋ e-piya.

27 Ha siɣye kɩdɛkɛdɩm nɛ ŋla mbʋ pɩwɛ ɖeu yɔ,+

Nɛ ŋkaɣ wɛʋ tam.

28 Mbʋ pʋyɔɔ yɔ Yehowa sɔɔlɩ siɣsiɣ wɛtʋ,

Nɛ ɛɛkaɣ lɔʋ mba pɛwɛ siɣsiɣ ɛ-ɛsɩndaa yɔ.+

Ɛkaɣ pɔ-yɔɔ kandɩyʋʋ paa ɛzɩmtaa;+

Ɛlɛ ɛkaɣ ɖɩzʋʋ kañatʋ tɩnaa lʋlʋʋ taa mba.+

29 Tɛtʋ kaɣ pɩsʋʋ ɛyaa siɣsiɣ tɩnaa ñɩm,+

Nɛ pakaɣ caɣʋ tɩ-yɔɔ tam.+

30 Ɛyʋ siɣsiɣ tʋ nɔɔ haɣ lɔŋsɩnɖɛ,*

Nɛ ɛ-nzʋlʋmɩyɛ yɔɔdʋʋ siɣsiɣ wɛtʋ tɔm.+

31 Ɛ-Ɛsɔ paɣtʋ wɛ ɛ-laŋɩyɛ taa;+

Pɩɩkaɣ ɛ-nɩŋgbanzɩ tuu.+

32 Kañatʋ tʋ cɔŋʋʋ ɛyʋ siɣsiɣ tʋ

Nɛ ɛñɩnɩɣ se ɛkʋ-ɩ.

33 Ɛlɛ Yehowa ɛɛkaɣ-ɩ yebu ɛlɛ nesi tɛɛ+

Nɛ ɛɛkaɣ kʋʋ ɛ-tɔm alɩwaatʋ ndʋ ɛhʋʋ ɛ-tɔm yɔ.+

34 Taa Yehowa liu nɛ ŋtɩŋ ɛ-nʋmɔʋ,

Nɛ ɛkaɣ-ŋ kpazʋʋ se tɛtʋ ɛpɩsɩ ña-ñɩm.

35 Mana kañaɣ, ɛyʋ kɩdɛkɛdʋ,

Ɛyɛzaɣ ɛzɩ tɩʋ ŋgʋ kɩwɛ hatʋ camɩyɛ kɩ-tɛtʋ yɔɔ yɔ.+

36 Ɛlɛ ɛmʋʋ tuda yem nɛ ɛtɩtasɩ wɛʋ;+

Maawɛ-ɩ ñɩnʋʋ yɔɔ, ɛlɛ mantɩna-ɩ.+

37 Cɔnɩ ɛyʋ weyi ɛfɛyɩnɩ kɩwɛɛkɩtʋ natʋyʋ yɔ,*

Ñɛ-ɛsɩyɛ ɛwɛɛ ɛyʋ siɣsiɣ tʋ+ yɔɔ,

Mbʋ pʋyɔɔ yɔ ɛyʋ ɛnʋ ɛkaɣ wɛʋ laŋhɛzɩyɛ taa cee wayɩ.+

38 Ɛlɛ pakaɣ ɖɩzʋʋ kɩwɛɛkɩm laɖaa tɩŋa;

Ðɩzʋʋ pɩtɛŋnɩ kañatʋ tɩnaa cee wayɩ.+

39 Yehowa cɔlɔ ɛyaa siɣsiɣ tɩnaa ñʋʋ yabʋ lɩɣna;+

Ɛnʋ kɛnɩ pa-ɖɩjɔzɩyɛ* kʋñɔŋ alɩwaatʋ taa.+

Ɛkaɣ-wɛ holuu kañatʋ tɩnaa nesi tɛɛ nɛ ɛya pa-ñʋʋ,

Mbʋ pʋyɔɔ yɔ paɖʋ-ɩ kʋyʋʋ.+