Izaayii
32 Ɩna! Wiyaʋ nɔɔyʋ+ kaɣ kewiyitu tɔɔʋ nɛ siɣsiɣ wɛtʋ,+
Nɛ awumbiya kaɣ ɛyaa ɖiyuu nɛ tɔm hʋʋ siɣsiɣ.
2 Nɛ paa weyi ɛkaɣ wɛʋ ɛzɩ ɖɩmɛlɩyɛ lone* helim alɩwaatʋ taa yɔ,
Ðenɖe ɛyʋ cɔzʋʋ* tɛʋ ŋgʋ kɩnɩɣnɩ helim yɔ,
Ɛzɩ lɩm lemisi yɔ ɛjaɖɛ nɖɩ ɖɩ-taa lɩm fɛyɩ yɔ,+
Ɛzɩ kaaʋ sɔsɔʋ kuzotuu yɔ, wɩlɩŋ ɛjaɖɛ taa.
3 Ðɩnɛ ɛlɛ mba panaɣ yɔ, pɛ-ɛsa ɩɩkaɣ tasʋʋ taaɖʋʋ,
Nɛ mba panɩɣ yɔ, pa-nɩŋgbaaŋ kaɣ welisuu camɩyɛ.
4 Mba pekpidisiɣ yɔ pa-laŋɩyɛ kaɣ maɣzʋʋ sɩmtʋ yɔɔ,
Nɛ nzʋlʋmɩyɛ nɖɩ ɖɩmatɩɣ yɔ, ɖɩkaɣ yɔɔdʋʋ nɛ pɩlɩɩ camɩyɛ nɛ pɩtʋ kpayɩ kpayɩ.+
5 Paakaɣ tasʋʋ yaʋ kɩmɛlɛŋ se kʋjɔʋ laɖʋ,
Nɛ weyi ɛ-paa fɛyɩnɩ paɣtʋ natʋyʋ yɔ, paakaɣ-ɩ yaʋ se camɩyɛ lakasɩ tʋ;
6 Mbʋ pʋyɔɔ yɔ kɩmɛlɛŋ kaɣ yɔɔdʋʋ kɩmɛlɛndʋ tɔm,
Nɛ ɛ-laŋɩyɛ kaɣ labʋ ɖʋtʋ se ɖɩla kɩdɛkɛdɩm,+
Se eseɣti tisuu yebu* nɛ ɛyɔɔdɩ tɔm ndʋ tɩtɩtʋʋzɩ yɔ Yehowa yɔɔ,
Se eyele nɛ weyi ñɔɔsɩ wɩɣ-ɩ yɔ* ɛsɩ ñɔɔsɩ
Nɛ ɛɛhaɣ weyi lɔkɔtʋ ɖɛ-ɩ yɔ nabʋyʋ se ɛñɔɔ.
7 Ɛyʋ weyi ɛ-paa fɛyɩnɩ paɣtʋ natʋyʋ yɔ, ɛ-ɖʋtʋ kɛ kɩdɛkɛdɩtʋ;+
Eseɣtiɣ ɛyaa se pala lakasɩ nzɩ sɩwɛ fɛyɛ yɔ,
Se ɛtɩŋnɩ cɛtɩm yɔɔ nɛ ɛɖʋzɩ weyi ɛwɛ kʋñɔŋ taa yɔ,+
Halɩ pɩkpɛndɩnɩ alɩwaatʋ ndʋ kʋñɔndʋ yɔɔdʋʋ tɔm ndʋ tɩtʋʋzaa yɔ.
8 Ɛlɛ kʋjɔʋ laɖʋ wɛnɩ kʋjɔʋ lɩmaɣza,
Nɛ ɛɖɛɣnɩ ɛsɩndaa kʋjɔʋ labʋ tʋma* taa.
9 «Mɩ, halaa mba ɩcaɣ ɖiɣ ɖiɣ nɛ mɩ-paa fɛyɩ yɔ, ɩkʋyɩ nɛ iwelisi mɔ-nɔɔ!
Mɩ, pɛlaa mba mɩ-paa fɛyɩnɩ natʋyʋ yɔ,+ ikemsi tɔm ndʋ mɔyɔɔdʋʋ yɔ!
10 Pɩnaɣ kʋɖʋmaɣ ɖɛɣ nɛ pɩla pazɩ lɛ, mɩ mba mɩ-paa fɛyɩnɩ natʋyʋ yɔ, ɩkaɣ seluu,
Mbʋ pʋyɔɔ yɔ paakaɣ kpeɣluu viiñi pee naayɛ alɩwaatʋ ndʋ viiñi pee koyuu tɛŋ yɔ.+
11 Iseli, mɩ, halaa mba ɩcaɣ ɖiɣ ɖiɣ nɛ mɩ-paa fɛyɩ yɔ!
Iseli, mɩ mba mɩ-paa fɛyɩnɩ natʋyʋ yɔ!
Ɩhɔzɩ mi-wondu nɛ ɩcaɣ ndaakpeɖe,
Nɛ ɩtɔɔlɩ fɔlɔtɔnaa mɩ-tɩnzɩ taa.+
12 Ɩma mɩ-laŋa taa nɛ ipeendi
Hayɩm kɩbam nɛ viiñi ŋgʋ kɩlʋlʋʋ camɩyɛ yɔ kɩ-yɔɔ.
13 Mbʋ pʋyɔɔ yɔ sɔɔ nɛ sɔɔ ñɩtʋ kaɣ suu man-samaɣ tɛtʋ yɔɔ;
Pakaɣ huuzuu taa leleŋ ɖɩsɩ tɩŋa yɔɔ,
Ɛɛɛ, amɛya tɛtʋ yɔɔ.+
14 Mbʋ pʋyɔɔ yɔ peyebi ɖoŋ tilimiye;
Peyebi kɔkɔɖɛ tɛtʋ.+
Ofɛɛlɩ+ nɛ feŋuu tilimiye* papɩsɩ tɛtʋ ndʋ peyebi-tʋ kpaagbaa yebu yɔ,
Papɩsɩ mbʋ pɩhaɣ tɛyɛ kpaŋasɩ taa leleŋ yɔ,
Papɩsɩ kpɩna ndɩ ndɩ ñɩtʋ ɖɩdɔɔyɛ,+
15 Pɩkɔɔ pɩtalɩ alɩwaatʋ ndʋ papɩyɩ fezuu ɖɔ-yɔɔ nɛ ɛsɔdaa kiŋ yɔ,+
Nɛ kañɩmbusuu pɩsɩ tɩŋ pee hayɩm,
Nɛ pakpaɣ tɩŋ pee hayɩm ɛzɩ laʋ yɔ.+
16 Ðɩnɛ ɛlɛ tɔm hʋʋ siɣsiɣ kaɣ wɛʋ kañɩmbusuu taa,
Nɛ siɣsiɣ wɛtʋ kaɣ caɣʋ tɩŋ pee hayɩm taa.+
17 Toovenim siɣsiɣ wɛtʋ kaɣ lʋlʋʋ laŋhɛzɩyɛ,+
Nɛ toovenim siɣsiɣ wɛtʋ piye kaɣ kɛʋ tamtam ɖiɣ ɖiɣ caɣʋ nɛ pɛɛyɛ.+
18 Man-samaɣ kaɣ caɣʋ ɖenɖe laŋhɛzɩyɛ wɛɛ yɔ,
Ðɩsɩ nzɩ sɩwɛ pɛɛyɛ taa nɛ ɖɩhɛzɩyɛ lona wena a-taa wɛ ɖiɣ ɖiɣ yɔ a-taa.+
19 Ɛlɛ ɖɔmbɛɛ kaɣ yebu nɛ laʋ hɩnɩ,
Nɛ tɛtʋ kaɣ yɔlʋʋ caɣ caɣ nɛ tɩwɛɛ layɩɩ.