Kɩgalʋʋ
16 Ðɩnɛ ɛlɛ Kora,+ weyi ɛkɛ Izihaarɩ+ pɩyalʋ, Kehaatɩ+ pɩyalʋ, Leevi+ pɩyalʋ yɔ, ɛ nɛ Eliyaabɩ+ pɩyalaa Dataanɩ nɛ Abiram, nɛ Peelɛɛtɩ pɩyalʋ Oni, mba paalɩnɩ Rubɛɛnɩ+ pɩyalaa taa yɔ pala nɔɔ; 2 pa nɛ Izrayɛɛlɩ abalaa 250 pakʋyɩ Moyizi yɔɔ; abalaa mba, paakɛ ɛyaa mba pɔtɔzɩ-wɛ samaɣ taa yɔ, samaɣ ñʋndɩnaa, abalaa mba pa-hɩla kaasɛwa yɔ. 3 Ðɩnɛ ɛlɛ pekpeɣli ɖama nɛ pakʋyɩ+ Moyizi nɛ Aarɔɔnɩ pɔ-yɔɔ nɛ peheyi-wɛ se: «Mɩ-tɔm lɩ-ɖʋ sɔŋ! Samaɣ kpeekpe kɛ kiɖeɖeɣa,+ samaɣ taa ɛyaa tɩŋa kɛ kiɖeɖema, nɛ Yehowa wɛ pɛ-hɛkʋ taa.+ Ye mbʋ, ɛbɛ yɔɔ ɩkpazɩɣ mɩ-tɩ Yehowa samaɣ yɔɔ mbʋ?»
4 Moyizi tɩɩnɩ tɔm ndʋ lɛ, eluŋ nɛ ɛpa ɛsa nɛ tɛtʋ. 5 Pʋwayɩ lɛ, eheyi Kora nɛ mba payɩ patɩnɩɣ ɛ-yɔɔ yɔ se: «Cee tanaŋ tɛɛ Yehowa kaɣ yebu nɛ patɩlɩ weyi ɛkɛ ɛ-ñɩnʋ yɔ,+ ɛkaɣ yebu nɛ patɩlɩ weyi ɛkɛ kiɖeɖeu yɔ, nɛ weyi pɩmʋnaa se ɛñɔtɩnɩ-ɩ yɔ,+ nɛ weyi ɛkaɣ lɩzʋʋ yɔ,+ ɛnʋ kaɣnɩ-ɩ ñɔtɩnʋʋ. 6 Ɩla ɛzʋnɔ: Ña Kora nɛ mba payɩ patɩnɩɣ ñɔ-yɔɔ yɔ,+ ɩkpaɣ miŋ ñanzɩ,+ 7 nɛ ɩɖʋ miŋ sɩ-taa nɛ ɩɖʋ ŋgee tɩlaaɖɩ pɩ-yɔɔ Yehowa ɛsɩndaa cee, nɛ abalʋ weyi Yehowa kaɣ lɩzʋʋ yɔ,+ ɛnʋ kɛnɩ kiɖeɖeu. Mɩ Leevi pɩyalaa,+ ɩɖɛlɛsɩ niye kpem!»
8 Pʋwayɩ lɛ, Moyizi heyi Kora se: «Mɩ Leevi pɩyalaa, mentendi-mɩ iwelisi. 9 Ɛzɩ Izrayɛɛlɩ tɛ Ɛsɔ lɩzʋʋ-mɩ nɛ hɔɔlʋʋ Izrayɛɛlɩ samaɣ taa+ nɛ ɛha-mɩ nʋmɔʋ se ɩñɔtɩnɩ-ɩ nɛ ɩla Yehowa kɩɖanɖʋʋ tʋmɩyɛ nɛ ɩsɩŋ samaɣ ɛsɩndaa nɛ ɩla ka-tʋmɩyɛ yɔ,+ pɩtɩlɩɩ pʋyʋ mɩ-ɛsɩndaa yaa we? 10 Nɛ eyebu nɛ ŋñɔtɩnɩ-ɩ, ña nɛ ño-koobiya Leevi pɩyalaa kpeekpe yɔ, pɩtɩlɩɩ pʋyʋ ñɛ-ɛsɩndaa? Nɛ ɩñɩnɩɣ se ɩmʋ cɔjɔtʋ ɖɔɖɔ yaa we?+ 11 Pʋyɔɔ lɛ, ña nɛ mba payɩ patɩnɩɣ ñɔ-yɔɔ yɔ, mɩ mba ɩlabɩ nɔɔ yɔ, iɖiɣni Yehowa kaɖɩnʋʋ. Piyele Aarɔɔnɩ ɛlɛ yɔ, ɛnʋ yɔ anɩ nɛ imidiɣni-i?»+
12 Pʋwayɩ lɛ, Moyizi tiyi se payaa Eliyaabɩ pɩyalaa Dataanɩ nɛ Abiram,+ ɛlɛ pocosi se: «Ðɩɩkɔŋ! 13 Ŋlɩzʋʋ-ɖʋ nɛ ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ se ŋkʋ-ɖʋ kañɩmbusuu taa cɩnɛ yɔ, pɩtɩmaɣ-ŋ?+ Lɛɛlɛɛyɔ lɛ ŋñɩnɩɣ ɖɔɖɔ se ŋpɩsɩ ña-tɩ ñʋʋdʋ kɩlɩm ɖɔ-yɔɔ?* 14 Ɛzɩ pɩnaʋ yɔ, ŋtiwoni-ɖʋ ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ,+ nɛ ŋtɩcɛlɩ-ɖʋ tɛtʋ natʋyʋ yaa viiñi hayɩm nabʋyʋ se pɩpɩsɩ ɖa-ñɩm. Ŋcaɣ ŋlɩzɩ abalaa mba pɛ-ɛsa na? Aayɩ, ɖɩɩkɔŋ!»
15 Ðɩnɛ ɛlɛ Moyizi kɔ pana kpem nɛ eheyi Yehowa se: «Taakisi nɛ ŋcɔnɩ pɔ-tɔɔnaɣ pee kɩlaʋ. Paa kpaŋaɣ kʋɖʋmaɣ maɣmaɣ mantɩlɛɣ pa-taa nɔɔyʋ nesi tɛɛ, nɛ mantɩla kɩdɛkɛdɩm pa-taa nɔɔyʋ.»+
16 Nɛ Moyizi heyi Kora se: «Ña nɛ mba payɩ patɩnɩɣ ñɔ-yɔɔ yɔ ɩlɩɩ nɛ ɩsɩŋ Yehowa ɛsɩndaa cee, ña nɛ wɛ nɛ Aarɔɔnɩ. 17 Paa weyi lɛ, pɩwɛɛ se ɛɖɔkɩ e-miŋ ñanaɣ nɛ ɛɖʋ ka-taa ŋgee tɩlaaɖɩ, nɛ paa weyi lɛ ewoni e-miŋ ñanaɣ Yehowa ɛsɩndaa, miŋ ñanzɩ 250, ña nɛ Aarɔɔnɩ ɖɔɖɔ, paa weyi lɛ ɛ nɛ e-miŋ ñanaɣ.» 18 Mbʋ pa-taa paa weyi kpaɣ e-miŋ ñanaɣ, nɛ paɖʋ miŋ nɛ ŋgee tɩlaaɖɩ sɩ-taa nɛ powolo nɛ pasɩŋ kediɣzaɣ kizinziku nɔnɔɔ tɛɛ, pa nɛ Moyizi nɛ Aarɔɔnɩ. 19 Kora kpeɣli mba patɩnɩɣ ɛ-yɔɔ yɔ+ nɛ ɛ nɛ wɛ pakʋyɩ pɔ-yɔɔ kediɣzaɣ kizinziku nɔnɔɔ tɛɛ lɛ, Yehowa samtʋ lɩɩ nɛ samaɣ kpeekpe na-tʋ.+
20 Peeɖe lɛ, Yehowa heyi Moyizi nɛ Aarɔɔnɩ se: 21 «Iposi mɩ-tɩ nɛ ɛyaa mba yɔ nɛ manɖɩzɩ-wɛ nɔɔ kʋɖʋmaɣ.»+ 22 Ðɩnɛ ɛlɛ, poluŋ nɛ papa pɛ-ɛsa nɛ tɛtʋ nɛ pɔyɔɔdɩ se: «Hayɩ! Ɛsɔ, ɛyaa kpeekpe fezuu* Ɛsɔ,+ ɛyʋ kʋɖʋm kɩwɛɛkɩm yeki se ña-taa ɛwɩɩnɩ samaɣ kpeekpe yaa we?»+
23 Ðɩnɛ ɛlɛ, Yehowa heyi Moyizi se: 24 «Yɔɔdɩnɩ samaɣ nɛ ŋheyi-kɛ se: “Iposi mɩ-tɩ nɛ Kora, Dataanɩ nɛ Abiram+ pe-kizinzikiŋ!”»
25 Ðɩnɛ ɛlɛ Moyizi kʋyɩ nɛ ewolo Dataanɩ nɛ Abiram pɔ-cɔlɔ, ɛ nɛ Izrayɛɛlɩ ɛzʋtʋyaa+ paawobina. 26 Eheyi samaɣ se: «Mentendi-mɩ, iposi mɩ-tɩ nɛ abalaa kɩdɛkɛdaa panɛ pe-kizinzikiŋ nɛ itaatukuni po-wonuu nakʋyʋ, nɛ pataaɖɩzɩ-mɩ pa-kɩwɛɛkɩm kpeekpe yɔɔ.» 27 Kpaagbaa mbʋ lɛ, poposi pa-tɩ nɛ Kora, Dataanɩ nɛ Abiram pe-kizinzikiŋ, ɩ-hɔɔlɩŋ tɩŋa yɔɔ, nɛ Dataanɩ nɛ Abiram palɩɩ nɛ pasɩŋ pe-kizinzikiŋ nɔnɔsɩ taa, pa nɛ pa-halaa, pa-pɩyalaa nɛ pe-piya cikpesi.
28 Pʋwayɩ lɛ, Moyizi yɔɔdɩ se: «Pʋnɛ ɩkaɣnɩ naʋ se Yehowa tiyini-m se mala pɩtɩŋa payɩ ɛzʋnɔ, nɛ ɩna se pɩtɩkɛ ma-maɣmaɣ man-tɩ yɔɔ* malakɩ mbʋ: 29 Ye ɛyaa panɛ yɔ, pasɩbɩ ɛzɩ ɛyaa kpeekpe sɩkʋʋ ɖɔɖɔ yɔ, nɛ ye pa-nɩŋgbaŋʋʋ hɔm ɛfɛyɩ ndɩ nɛ ɛyaa kpeekpe ñɩmbʋ yɔ, ɖɩnɛ ɛlɛ Yehowa titiyi-m.+ 30 Ɛlɛ ye Yehowa ɛlabɩ-wɛ nabʋyʋ mbʋ pɩtɩla wiɖiyi nɛ pɩna yɔ nɛ tɛtʋ haa tɩ-nɔɔ nɛ tilibi-wɛ nɛ pɩkpɛndɩnɩ mbʋ payɩ pɛwɛna yɔ, nɛ petii Pɩlaʋ* taa nɛ pɛ-ɛsa yɔ, ɖɩnɛ ɛlɛ ɩkaɣ naʋ se abalaa panɛ patɩña Yehowa.»
31 Ɛtɩɩtɛm tɔm ndʋ yɔɔdʋʋ lɛ, tɛtʋ faɣ pɛ-tɛɛ kpu.+ 32 Nɛ tɛtʋ haa tɩ-nɔɔ nɛ tilibi-wɛ, pa nɛ pa-ɖɩsɩ taa mba nɛ Kora ñɩma+ tɩŋa payɩ nɛ pa-ñɩm tɩŋa. 33 Mbʋ pa-maɣmaɣ nɛ mba payɩ pɛkɛ pa-ñɩma yɔ petibi Pɩlaʋ* taa nɛ pɛ-ɛsa, nɛ tɛtʋ huuzi pɔ-yɔɔ nɛ pɛtɛŋɩlɩ.+ 34 Pamakaɣ kubusi lɛ, Izrayɛɛlɩ ñɩma mba payɩ paacɔ-wɛ nɛ pata yɔ pese, mbʋ pʋyɔɔ yɔ pɔtɔŋaɣ se: «Sɔɔndʋ kpaɣ-ɖʋ se pɩtaakɛdɩ nɛ tɛtʋ libi-ɖʋ ɖɔɖɔ!» 35 Ðɩnɛ ɛlɛ miŋ lɩɩnɩ Yehowa cɔlɔ+ nɛ ɛñaɣ abalaa 250 mba paawɛɛ nɛ pañaɣzɩɣ ŋgee tɩlaaɖɩ yɔ.+
36 Nɛ Yehowa heyi Moyizi se: 37 «Heyi cɔjɔ Aarɔɔnɩ pɩyalʋ Eleyaazaarɩ se ɛlɩzɩ miŋ ñanzɩ+ miŋ taa, mbʋ pʋyɔɔ yɔ sɩkɛ kiɖeɖesi. Heyi-i ɖɔɖɔ se ɛmɩzɩ miŋ poliŋ taa. 38 Pɩwɛɛ se pakpaɣ abalaa mba palabɩ kɩwɛɛkɩm nɛ pelesi pe-weziŋ yɔ* pe-miŋ ñanzɩ nɛ pamabɩ-sɩ nɛ sɩpɩsɩ tatayaa tatayaa nɛ pɔpɔ altaaru yɔɔ,+ mbʋ pʋyɔɔ yɔ pɔkɔnɩ ñanzɩ nzɩ Yehowa ɛsɩndaa, nɛ sɩpɩsɩ kiɖeɖesi. Sɩkaɣ kɛʋ yʋsaɣ Izrayɛɛlɩ mba.»+ 39 Ðɩnɛ ɛlɛ cɔjɔ Eleyaazaarɩ kpaɣ mba miŋ ñaɣ-wɛ yɔ pa-ñanzɩ nzɩ palabɩ-sɩ nɛ ñɩɣyʋʋ kɩsɛɛmʋʋ yɔ, nɛ ɛmabɩ-sɩ nɛ sɩpɩsɩ tatayaa tatayaa nɛ pɔpɔ altaaru yɔɔ, 40 ɛzɩ Yehowa kaatɩŋnʋʋ Moyizi yɔɔ nɛ eheyi-i yɔ. Pɩtɔzaɣ Izrayɛɛlɩ mba se pɩfɛyɩ se ɛyʋ weyi pɩtɩha-ɩ nʋmɔʋ yɔ,* weyi ɛtɩkɛ Aarɔɔnɩ lʋlʋʋ taa tʋ yɔ, ɛñɔtɩ se ɛñaɣzɩɣ ŋgee tɩlaaɖɩ Yehowa ɛsɩndaa+ nɛ pɩfɛyɩ ɖɔɖɔ se nɔɔyʋ ɛla ɛzɩ Kora nɛ mba patɩnaɣ ɛ-yɔɔ yɔ.+
41 Tɛʋ fem kpaagbaa lɛ, Izrayɛɛlɩ samaɣ kpeekpe paɣzɩ midinuu Moyizi nɛ Aarɔɔnɩ+ nɛ kɔtɔŋ se: «Mɩ-naalɛ mɩkʋnɩ Yehowa samaɣ.» 42 Alɩwaatʋ ndʋ samaɣ kpeɣlaa se kakaɖɩnɩ Moyizi nɛ Aarɔɔnɩ lɛ, pɛkɛzɩ pa-tɩ nɛ paha ɛsa nɛ kediɣzaɣ kizinziku, nɛ pana mɩndʋ huuzi kɩ-yɔɔ, nɛ pɩpaɣzɩ naʋ Yehowa samtʋ.+
43 Moyizi nɛ Aarɔɔnɩ powolo kediɣzaɣ kizinziku ɛsɩndaa,+ 44 nɛ Yehowa heyi Moyizi se: 45 «Ɛyaa mɩ, iposi mɩ-tɩ nɛ samaɣ kanɛ nɛ manɖɩzɩ-kɛ nɔɔ kʋɖʋmaɣ.»+ Ðɩnɛ ɛlɛ poluŋ nɛ papa pɛ-ɛsa nɛ tɛtʋ.+ 46 Nɛ Moyizi heyi Aarɔɔnɩ se: «Kpaɣ miŋ ñanaɣ nɛ ŋhaa miŋ altaaru yɔɔ+ nɛ ŋɖʋ ka-taa nɛ ŋɖʋ pɩ-yɔɔ ŋgee tɩlaaɖɩ nɛ ŋwolo lɛɛ lɛɛ samaɣ cɔlɔ nɛ ŋlabɩ-kɛ kɩwɛɛkɩm yɔɔ huuzuu sɔnzɩ,+ mbʋ pʋyɔɔ yɔ Yehowa kɔ pana. Kɩzɩkʋ paɣzaa!» 47 Kpaagbaa mbʋ lɛ, Aarɔɔnɩ kpaɣ miŋ ñanaɣ ɛzɩ Moyizi heyuu-i yɔ nɛ ese ɛsʋʋ samaɣ hɛkʋ taa, nɛ ɩna, kɩzɩkʋ kaatɛm paɣzʋʋ samaɣ taa. Ðɩnɛ ɛlɛ ɛɖʋ ŋgee tɩlaaɖɩ miŋ ñanaɣ taa nɛ ɛpaɣzɩ labʋ samaɣ kɩwɛɛkɩm yɔɔ huuzuu sɔnzɩ. 48 Ewolo nɛ ɛsɩŋ sɩɖaa nɛ ɛsadɩnaa pɛ-hɛkʋ taa, nɛ pɩtɛmna se kɩzɩkʋ sɩ tɩnaɣ. 49 Mba kɩzɩkʋ kʋ-wɛ yɔ paakpɛndɩ 14 700, nɛ pɩtasɩnɩ mba Kora lakasɩ yeba nɛ pasɩ yɔ. 50 Pʋwayɩ Aarɔɔnɩ pɩsaɣ Moyizi cɔlɔ kediɣzaɣ kizinziku nɔnɔɔ tɛɛ lɛ, kɩzɩkʋ kaatɛm sɩŋʋʋ.