Ɛsɩdrasɩ
10 Ɛsɩdrasɩ kaawɛɛ nɛ ɛtɩmɩɣ+ nɛ ekuluu ɛ-samaɣ kɩwɛɛkɩm yɔɔ, ewiɣ nɛ ɛhɩnɩ Ɛsɔ toovenim tʋ ɖɩɣa ɛsɩndaa mbʋ lɛ, Izrayɛɛlɩ samaɣ sɔsɔɔ nakɛyɛ kpeɣli ɛ-cɔlɔ, abalaa, halaa nɛ piya, mbʋ pʋyɔɔ yɔ samaɣ kaawɛɛ nɛ kewiɣ siŋŋ. 2 Ðɩnɛ ɛlɛ Elam+ pɩyalaa taa Yehiyɛɛlɩ+ pɩyalʋ Sekaniya heyi Ɛsɩdrasɩ se: «Ðɩlabɩ lakasɩ nzɩ sɩfɛyɩ siɣsiɣ yɔ ɖɛ-Ɛsɔ ɛsɩndaa, mbʋ pʋyɔɔ yɔ ɖɩkpaɣ* agbaaɣdaa halaa mba palɩnɩ ajɛɛ taa yɔ.+ Paa mbʋ yɔ, Izrayɛɛlɩ tasɩ wɛnʋʋ lidaʋ nakʋyʋ. 3 Lɛɛlɛɛyɔ iyele nɛ ɖa nɛ ɖɛ-Ɛsɔ ɖɩɖʋ ɛgbɛyɛ+ se ɖɩɖɔɔnʋʋ halaa mba pa-tɩŋa nɛ piya nzɩ palʋlaa yɔ, nɛ pɩla nɔɔ kʋɖʋmaɣ nɛ Yehowa nɛ mba pañaŋ ɖɛ-Ɛsɔ paɣtʋ yɔ* pa-wɩlɩtʋ.+ Ðɩla ɛzɩ Paɣtʋ pɔzʋʋ yɔ. 4 Kʋyɩ, mbʋ pʋyɔɔ yɔ ña-sʋʋtʋ pɩkɛnaa se ŋcɔnɩ tɔm tʋnɛ ti-ɖeɖe, nɛ ɖa lɛ, ɖɩwɛ ñɔ-cɔlɔ. Kpa ɖoŋ nɛ ŋla mbʋ pɩpɔzʋʋ yɔ.»
5 Peeɖe Ɛsɩdrasɩ kʋyaa nɛ eyele nɛ cɔjɔnaa ñʋndɩnaa, Leevi mba nɛ Izrayɛɛlɩ kpeekpe ɖuu ɖuutu se pɔɖɔŋ tɔm ndʋ tɩ-yɔɔ.+ Nɛ poɖuu ɖuutu. 6 Ðɩnɛ ɛlɛ Ɛsɩdrasɩ kʋyɩ Ɛsɔ toovenim tʋ ɖɩɣa ɛsɩndaa nɛ ewolo Eliyasiib pɩyalʋ Yehohanaanɩ kuduyuu tɛɛ.* Ɛlɛ paa eewobi peeɖe yɔ, ɛtɩtɔɔ tɔɔnaɣ nɛ ɛtɩñɔɔ lɩm ɖɔɖɔ kaaʋ, mbʋ pʋyɔɔ yɔ mba palɩnɩ yomiye taa nɛ pɔkɔɔ yɔ pa-lakasɩ nzɩ sɩfɛyɩ siɣsiɣ yɔ sɩ-yɔɔ lɛ, ɛɛwɛ kʋñɔwiye taa.+
7 Nɛ posusi Yuuda nɛ Yeruzalɛm se mba payɩ palɩnɩ yomiye taa nɛ pɔkɔɔ yɔ pekpeɣli Yeruzalɛm; 8 nɛ awumbiya nɛ ɛzʋtʋyaa pakpaɣ lɩmaɣza se ye kɩyakɩŋ 3 ɩɖɛwa nɛ nɔɔyʋ ɛtɩkɔɔ yɔ, pamʋʋ ɛ-ñɩm tɩŋa nɛ pɔɖɔɔnɩ-ɩ mba palɩnɩ yomiye taa nɛ pɔkɔɔ yɔ pa-samaɣ taa.+ 9 Pʋyɔɔ lɛ, kɩyakɩŋ 3 ɖɛɣaɣ lɛ, Yuuda abalaa nɛ Bɛnjamɛɛ abalaa tɩŋa payɩ pekpeɣli Yeruzalɛm; pɩɩkɛ fenaɣ 9 ñɩŋga taa, ka-kɩyakʋ 20 ñɩŋgʋ wiye. Samaɣ tɩŋa kaacaɣ Ɛsɔ toovenim tʋ ɖɩɣa kadaɣ nakɛyɛ taa nɛ ɛyaa kaawɛɛ nɛ peseliɣ tɔm ndʋ tɩ-yɔɔ paya-wɛ yɔ tɩ-yɔɔ nɛ tɛʋ sɔsɔʋ ŋgʋ kɩnɩɣaɣ yɔ kɩ-yɔɔ.
10 Ðɩnɛ ɛlɛ cɔjɔ Ɛsɩdrasɩ kʋyɩ nɛ ɛsɩŋ nɛ eheyi-wɛ se: «Ɩlabɩ lakasɩ nzɩ sɩfɛyɩ siɣsiɣ yɔ, mbʋ pʋyɔɔ yɔ ɩkpaɣ agbaaɣdaa halaa,+ nɛ mɩ-lakasɩ nzɩ siyeba nɛ ɩsɔzɩ Izrayɛɛlɩ kɩwɛɛkɩm yɔɔ. 11 Lɛɛlɛɛyɔ lɛ ikuli mɩ-kɩwɛɛkɩm yɔɔ mɩ-cɔzɔnaa tɛ Ɛsɔ Yehowa ɛsɩndaa nɛ ɩla ɛ-sɔɔlɩm. Iposi mɩ-tɩ nɛ ɛjaɖɛ taa samaɣ nɛ agbaaɣdaa halaa mba.»+ 12 Peeɖe samaɣ kpeekpe cosini nɔɔ kɩkʋyaɣ se: «Pɩkɛnɩ ɖa-sʋʋtʋ se ɖɩla ɖeyi ɖeyi ɛzɩ ŋyɔɔdʋʋ yɔ. 13 Paa mbʋ yɔ, ɛyaa samaɣ ɖɔwa, nɛ pɩkɛnɩ ɖɔɖɔ tɛʋ alɩwaatʋ. Ðɩɩpɩzɩɣ nɛ ɖɩsɩŋ awayɩ. Tɔm tʋnɛ tɩtɩkɛ evemiye kʋɖʋmɖɩyɛ yaa avema 2 ɖeke tɔm, mbʋ pʋyɔɔ yɔ ɖɩlabɩ ñʋʋ taa ɖoŋ lakasɩ kpem tɔm tʋnɛ tɩ-taa. 14 Pʋyɔɔ lɛ, ɖitendi-ŋ, yele nɛ ɖa-awumbiya caɣ samaɣ kpeekpe lone taa;+ nɛ tɛtʋ ndɩ ndɩ taa ñɩma mba payɩ pakpaɣ agbaaɣdaa halaa yɔ, paa mba lɛ pa nɛ pɛ-tɛtʋ taa ɛzʋtʋyaa nɛ tɔm hʋyaa pɔkɔɔ alɩwaatʋ ndʋ ɩɖʋʋ-wɛ yɔ tɩ-yɔɔ, nɛ pɩkɔɔ pɩsɩɩnɩ alɩwaatʋ ndʋ ɖɩhɛzɩɣ ɖɛ-Ɛsɔ pana wena aɖiɣni miŋ mʋʋ ɖɔ-yɔɔ tɔm tʋnɛ tɩ-yɔɔ yɔ.»
15 Ɛlɛ Asayɛlɩ pɩyalʋ Yonataanɩ nɛ Tikɩva pɩyalʋ Yaziya pataatisi tɔm ndʋ tɩ-yɔɔ, nɛ Leevi mba Mesulam nɛ Sabɩtaayɩ+ patɩnɩ pɔ-yɔɔ. 16 Paa mbʋ yɔ, mba palɩnɩ yomiye taa nɛ pɔkɔɔ yɔ, pɔɖɔm ndʋ paayɔɔdaa yɔ tɩ-yɔɔ; nɛ cɔjɔ Ɛsɩdrasɩ nɛ pa-caanaa ɖɩsɩ ñʋndɩnaa mba payɩ paaya pa-hɩla yɔ, pekpeɣli fenaɣ 10 ñɩŋga kɩyakʋ kajalaɣ ñɩŋgʋ wiye se patazɩ tɔm ndʋ tɩ-taa pa-taa pe-ɖeke; 17 nɛ pɩtalaɣ fenaɣ kajalaɣ ñɩŋga kɩyakʋ kajalaɣ ñɩŋgʋ wiye lɛ, pɛtɛm abalaa mba payɩ paakpaɣ agbaaɣdaa halaa yɔ pɔ-tɔm ɖeɖe cɔnʋʋ. 18 Nɛ peɖiɣzina se cɔjɔnaa pɩyalaa nabɛyɛ kaakpaɣ agbaaɣdaa halaa:+ Yehozadaakɩ pɩyalʋ Yesuwa+ pɩyalaa nɛ e-koobiya taa lɛ, Maaseyiya, Eliyeezɛɛrɩ, Yarib nɛ Gedaliya. 19 Ɛlɛ pakpaɣ lɩmaɣza* se pɔɖɔɔnʋʋ pa-halaa, pɩtasɩ lɛ ɛzɩma pɔ-tɔm sɩba yɔ pʋyɔɔ lɛ, pakaɣ laʋ ɛyaʋ pa-kɩwɛɛkɩm yɔɔ.+
20 Mba paakpaɣ agbaaɣdaa halaa Imɛɛrɩ+ pɩyalaa taa yɔ mba yɔ Ananii nɛ Zebaadiya; 21 Harim+ pɩyalaa taa lɛ, Maaseyiya, Eliya, Semayaa, Yehiyɛɛlɩ nɛ Uziya; 22 Pasuuri+ pɩyalaa taa lɛ Eliyowenayɩ, Maaseyiya, Isimayɛɛlɩ, Netanɛɛlɩ, Yozabaadɩ nɛ Eleyaasa. 23 Nɛ Leevi mba taa lɛ Yozabaadɩ, Simeyii, Kelayiya (pʋ-tɔbʋʋ se Kelita), Petahiya, Yuuda nɛ Eliyeezɛɛrɩ; 24 hendu teyaa taa lɛ Eliyasiib; nɛ nɔnɔsɩ yɔɔ ɖaŋɩyaa taa lɛ Saalum, Telɛɛm nɛ Uri.
25 Nɛ Izrayɛɛlɩ taa, Parɔɔsɩ+ pɩyalaa taa lɛ Ramiya, Iziya, Malɩkiiya, Miyamiinɩ, Eleyaazaarɩ, Malɩkiiya nɛ Benayaa; 26 Elam+ pɩyalaa taa lɛ Mataaniya, Zakarii, Yehiyɛɛlɩ,+ Abɩdii, Yeremɔɔtɩ nɛ Eliya; 27 Zatuu+ pɩyalaa taa lɛ Eliyowenayɩ, Eliyasiib, Mataaniya, Yeremɔɔtɩ, Zabaadɩ nɛ Aziza; 28 Bebayii+ pɩyalaa taa lɛ Yehohanaanɩ, Anaanɩya, Zabaayɩ nɛ Atɩlaayɩ; 29 Bani pɩyalaa taa lɛ Mesulam, Maluuki, Adayaa, Yasuub, Seyaalɩ nɛ Yeremɔɔtɩ; 30 Pahaatɩ-Mowaabʋ+ pɩyalaa taa lɛ Adɩna, Kelaalɩ, Benayaa, Maaseyiya, Mataaniya, Bezaalɛɛlɩ, Binuwii nɛ Manaasee; 31 Harim+ pɩyalaa taa lɛ Eliyeezɛɛrɩ, Isiya, Malɩkiiya,+ Semayaa, Simeyɔɔnɩ, 32 Bɛnjamɛɛ, Maluuki nɛ Semariya; 33 Asuum+ pɩyalaa taa lɛ Matenaayɩ, Mataata, Zabaadɩ, Elifelɛɛtɩ, Yeremaayɩ, Manaasee nɛ Simeyii; 34 Bani pɩyalaa taa lɛ Maadaayɩ, Amɩram, Uwɛɛlɩ, 35 Benayaa, Beediya, Keluuwii, 36 Vaniya, Meremɔɔtɩ, Eliyasiib, 37 Mataaniya, Matenaayɩ nɛ Yaasu; 38 Binuwii pɩyalaa taa lɛ Simeyii, 39 Selemiya, Naataanɩ, Adayaa, 40 Makɩnadebayɩ, Sasaayɩ, Sarayɩ, 41 Azarɛɛlɩ, Selemiya, Semariya, 42 Saalum, Amariya nɛ Yosɛɛfʋ; 43 Nebo pɩyalaa taa lɛ Yeyiyɛɛlɩ, Matitiya, Zabaadɩ, Zebina, Yadaayii, Yowɛɛlɩ nɛ Benayaa. 44 Pa-tɩŋa payɩ mbʋ yɔ, paakpaɣ agbaaɣdaa halaa,+ nɛ pɔɖɔɔnɩ pa-halaa nɛ pɩkpɛndɩnɩ pe-piya.+