Yozuwee
10 Yeruzalɛm wiyaʋ Adoni-Zedɛkɩ ñɩtaa nɛ ɛnɩɩ se Yozuwee mʋ Ayi tɛtʋ nɛ ɛɖɩzɩ-tʋ, nɛ ɛlabɩ Ayi tɛtʋ nɛ ti-wiyaʋ+ ɛzɩ ɛɛlabʋ Yeriikoo tɛtʋ nɛ ti-wiyaʋ yɔ,+ nɛ ɛnɩɩ ɖɔɖɔ se Gabawɔɔ mba nɛ Izrayɛɛlɩ mba palabɩ laŋhɛzɩyɛ+ nɛ Gabawɔɔ mba caɣ pɛ-hɛkʋ taa lɛ, 2 sɔɔndʋ kpa-ɩ kpem,+ mbʋ pʋyɔɔ yɔ Gabawɔɔ kaakɛ tɛtʋ sɔsɔtʋ, ɛzɩ kewiyaɣ tɛtʋ natʋyʋ yɔ. Tɩɩkɩlɩ Ayi tɛtʋ,+ nɛ tɩ-taa abalaa tɩŋa kaakɛ you laɖaa. 3 Pʋyɔɔ Yeruzalɛm wiyaʋ Adoni-Zedɛkɩ tiyaa se peheyi Ebrɔŋ+ wiyaʋ Hoham, Yarmuti wiyaʋ Piram, Lakisi wiyaʋ Yafiya nɛ Egɩlɔɔnɩ wiyaʋ+ Debir se: 4 «Ɩkɔɔ ɩsɩnɩ-m nɛ ɖiyooni Gabawɔɔ mba, mbʋ pʋyɔɔ yɔ pa nɛ Yozuwee nɛ Izrayɛɛlɩ mba palabɩ laŋhɛzɩyɛ.»+ 5 Peeɖe Amoori mba awiya ana a-kagbanzɩ,+ pʋ-tɔbʋʋ se Yeruzalɛm wiyaʋ, Ebrɔŋ wiyaʋ, Yarmuti wiyaʋ, Lakisi wiyaʋ nɛ Egɩlɔɔnɩ wiyaʋ, pekpeɣli ɖama, pa nɛ pɔ-sɔɔjanaa, nɛ powolo pɔcɔɔ Gabawɔɔ tɛtʋ nɛ pata se poyouni-tʋ.
6 Ðɩnɛ ɛlɛ Gabawɔɔ mba tiyi se peheyi Yozuwee ɖigbeɣliye* taa Gilgaalɩ+ se: «Taalɔ* ño-yomaa.+ Kɔɔ lɔŋ! Ya ɖa-ñʋʋ nɛ ŋsɩnɩ-ɖʋ! Amoori ñɩma mba pɛwɛ pʋŋ egeetiye taa yɔ, pa-awiya tɩŋa kpeɣlaa se ayooni-ɖʋ.» 7 Peeɖe Yozuwee kʋyɩnɩ Gilgaalɩ nɛ ɛkpa, ɛ nɛ you laɖaa nɛ sɔɔjanaa ɖoŋ tɩnaa kpeekpe.+
8 Nɛ Yehowa heyi Yozuwee se: «Taase-wɛ sɔɔndʋ,+ mbʋ pʋyɔɔ yɔ manɖʋzɩ-wɛ ñe-nesi taa.+ Pa-taa nɔɔyʋ ɛɛkaɣ pɩzʋʋ nɛ ɛkaɖɩnɩ-ŋ.»+ 9 Yozuwee kʋyɩ Gilgaalɩ nɛ ɛɖɔ ɖoo tɩŋa nɛ ewolo nɛ etudi-wɛ. 10 Nɛ Yehowa yele nɛ pisidi-wɛ Izrayɛɛlɩ mba ɛsɩndaa,+ nɛ Izrayɛɛlɩ mba kʋ-wɛ tɛtɛ kʋʋ Gabawɔɔ tɛtʋ taa, nɛ paɖʋ pa-wayɩ nʋmɔʋ ŋgʋ kɩkpaɣnɩ Bɛtɩ-Horonɩ yɔ kɩ-taa nɛ pɛwɛɛ-wɛ kʋʋ yɔɔ nɛ powolo patalɩ ɖooo Azeka nɛ Makeda. 11 Alɩwaatʋ ndʋ pɛwɛɛ nɛ peseɣ Izrayɛɛlɩ mba ɛsɩndaa Bɛtɩ-Horonɩ ɖidiɖe lɛ, Yehowa tiyini ɖɔmbɛɛ sɔsɔna nɛ ɛsɔdaa kiŋ pɔ-yɔɔ nɛ piwolo pɩtalɩ ɖooo Azeka, nɛ pasɩ. Toovenim taa lɛ, mba ɖɔmbɛɛ kʋwa yɔ, pɔɖɔwa nɛ pɩkɩlɩ mba Izrayɛɛlɩ mba kʋnɩ laɣɖɛ yɔ.
12 Evemiye nɖɩ Yehowa ɖʋzɩ Amoori mba Izrayɛɛlɩ mba nesi tɛɛ yɔ, puwiye Yozuwee yɔɔdɩnɩ Yehowa Izrayɛɛlɩ ɛsɩndaa se:
13 Peeɖe wɩsɩ sɩŋ ɖiɣ ɖiɣ nɛ fenaɣ ticiɣdi pɩkɔɔ pɩsɩɩnɩ alɩwaatʋ ndʋ samaɣ kpa kɩmɩyɛ ko-koyindinaa yɔ. Ɛzɩ patɩma-tʋ Yasaarɩ takayaɣ taa?+ Wɩsɩ sɩŋ ɖiɣ ɖiɣ ɛsɔdaa hɛkʋ taa ɛzɩ evemiye nɛ ɖɩ-tɛɛ mbʋ yɔ nɛ sitikpedesi se sɩɖʋ. 14 Wiɖiyi evemiye naɖɩyɛ taawɛɛ mbʋ, nɖɩ Yehowa welisi ɛyʋ nɔɔ yɔ,+ naɖɩyɛ taalɛyɩ-ɖɩ nɛ naɖɩyɛ tɩtɩŋ ɖɩ-wayɩ ɖɔɖɔ mbʋ, mbʋ pʋyɔɔ yɔ Yehowa lakaɣnɩ you Izrayɛɛlɩ lone taa.+
15 Pʋwayɩ lɛ, Yozuwee nɛ Izrayɛɛlɩ kpeekpe papɩsɩ ɖigbeɣliye taa Gilgaalɩ.+
16 Ɛlɛ awiya ana a-kagbanzɩ, aasewa nɛ awolo amɛlɩ ɛwaɣ pɔʋ taa Makeda.+ 17 Pʋwayɩ lɛ, tɔm talɩ Yozuwee se: «Pana awiya ana a-kagbanzɩ, amɛlɩ ɛwaɣ pɔʋ taa Makeda.»+ 18 Peeɖe Yozuwee yɔɔdaa se: «Ipilisi pɛɛ sɔsɔna nɛ isulini ɛwaɣ pɔʋ yɔɔ nɛ ɩlɩzɩ abalaa nabɛyɛ nɛ paɖaŋ awiya ana a-yɔɔ. 19 Ɛlɛ mɩ mba pɩkazɩɣ yɔ ɩtaasɩŋ. Ɩɖʋ mi-koyindinaa wayɩ nɛ ɩkʋ-wɛ.+ Itaayebi-wɛ nɛ pasʋʋ pɛ-tɛtʋ taa, mbʋ pʋyɔɔ yɔ mɩ-Ɛsɔ Yehowa ɖʋzɩ-wɛ mi-nesi tɛɛ.»
20 Yozuwee nɛ Izrayɛɛlɩ mba pɛtɛm-wɛ kʋʋ tɛtɛ kʋʋ, pakʋ pa-tɩŋa nɛ pɩtɩkazɩ nɔɔyʋ nɛ pɩtasɩnɩ mba patʋlaa nɛ pehiɣ ñʋʋ yabʋ nɛ pasʋʋ tɛtʋ ɖoŋ ñɩndʋ* taa yɔ lɛ, 21 sɔɔjanaa kpeekpe pɩsɩ Yozuwee cɔlɔ cɩŋgɩlɩm ɖigbeɣliye taa Makeda. Nɛ nɔɔyʋ taakatɩ se ekuli ɛ-nɔɔ nɛ ɛyɔɔdɩ tɔm natʋyʋ* nɛ ɛkaɖɩnɩ Izrayɛɛlɩ mba. 22 Pʋwayɩ lɛ, Yozuwee yɔɔdɩ se: «Ikuli ɛwaɣ pɔʋ yɔɔ nɛ ɩlɩzɩ awiya ana a-kagbanzɩ nɛ ɩkɔnɩ-m yɛ.» 23 Peeɖe palɩzɩ awiya ana a-kagbanzɩ ɛwaɣ pɔʋ taa nɛ pɔkɔnɩ-ɩ: Yeruzalɛm wiyaʋ, Ebrɔŋ wiyaʋ, Yarmuti wiyaʋ, Lakisi wiyaʋ nɛ Egɩlɔɔnɩ wiyaʋ.+ 24 Pɔkɔnɩ awiya ana Yozuwee lɛ, ɛyaa Izrayɛɛlɩ abalaa tɩŋa nɛ eheyi sɔɔjanaa ñʋndɩnaa mba paatɩŋɩ-ɩ yɔ se: «Ɩñɔtɩnɩ-m. Ɩfɛyɩ nɩŋgbanzɩ awiya anɛ a-nimasɩ wayɩ.» Mbʋ pɔñɔtɩnɩ-ɩ nɛ pɛfɛyɩ nɩŋgbanzɩ a-nimasɩ wayɩ.+ 25 Nɛ Yozuwee heyi-wɛ se: «Sɔɔndʋ ɛtaakpa-mɩ nɛ itaaseli.+ Ɩwɛɛ abalɩtʋ nɛ ɩwɛɛ ɖoŋ, mbʋ pʋyɔɔ yɔ mbʋ Yehowa kaɣ labʋ mi-koyindinaa mba ɩwɛɛ nɛ iyouna yɔ pa-tɩŋa.»+
26 Pʋwayɩ lɛ, Yozuwee kʋ-wɛ nɛ epuzi-wɛ ɖaŋ* 5 yɔɔ, nɛ pɛwɛɛ ɖaŋ ɛnɩ ɩ-yɔɔ mbʋ nɛ ɖanaɣ kɔɔ nɛ kaɖanɩ. 27 Wɩsɩ ɖʋwa lɛ, Yozuwee ɖʋ paɣtʋ se petisi-wɛ ɖaŋ yɔɔ+ nɛ pɔlɔ-wɛ ɛwaɣ pɔʋ taa, ɖenɖe paamɛlaa yɔ. Nɛ posuli pɛɛ sɔsɔna ɛwaɣ pɔʋ ŋgʋ kɩ-yɔɔ, nɛ awɛ peeɖe halɩ nɛ sɔnɔ.
28 Yozuwee mʋ Makeda+ tɛtʋ nɛ ɛɖɩzɩ-tʋ nɛ laɣɖɛ evemiye nɖɩ. Ɛɖɩzɩ ti-wiyaʋ nɛ tɩ-taa ɛyaa* tɩŋa, nɔɔyʋ tɩkazɩ.+ Ɛlabɩ Makeda wiyaʋ+ ɛzɩ ɛɛlabʋ Yeriikoo wiyaʋ yɔ.
29 Pʋwayɩ lɛ, Yozuwee nɛ Izrayɛɛlɩ kpeekpe pakʋyɩnɩ Makeda nɛ powolo Libna nɛ poyooni Libna.+ 30 Yehowa ɖʋzɩ ɖɔɖɔ tɛtʋ ndʋ nɛ ti-wiyaʋ+ Izrayɛɛlɩ nesi tɛɛ, nɛ paɖɩzɩ tɩ nɛ tɩ-taa ɛyaa* tɩŋa nɛ laɣɖɛ, nɔɔyʋ tɩkazɩ tɩ-taa. Palabɩ ti-wiyaʋ ɛzɩ paalabʋ Yeriikoo wiyaʋ yɔ.+
31 Pʋwayɩ lɛ, Yozuwee nɛ Izrayɛɛlɩ kpeekpe pakʋyɩnɩ Libna nɛ powolo Lakisi+ nɛ pacaɣ peeɖe nɛ poyooni tɛtʋ ndʋ. 32 Yehowa ɖʋzɩ Lakisi tɛtʋ Izrayɛɛlɩ nesi tɛɛ, nɛ pamʋ-tʋ evemiye 2 ñɩnɖɛ wiye. Paɖɩzɩ tɩ nɛ tɩ-taa ɛyaa* tɩŋa nɛ laɣɖɛ,+ ɛzɩ paalabʋ Libna yɔ.
33 Peeɖe Gezɛɛrɩ+ wiyaʋ Horam kʋyaa nɛ ɛkpa se ɛsɩɣnɩ Lakisi, ɛlɛ Yozuwee kʋ ɛ nɛ ɛ-samaɣ nɛ pɩkɔɔ pɩtalɩ alɩwaatʋ ndʋ pɩtɩkazɩ pa-taa nɔɔyʋ yɔ.
34 Pʋwayɩ lɛ, Yozuwee nɛ Izrayɛɛlɩ kpeekpe pakʋyɩnɩ Lakisi nɛ powolo Egɩlɔɔnɩ+ nɛ pacaɣ peeɖe nɛ poyooni tɛtʋ ndʋ. 35 Pamʋ-tʋ kɩyakʋ ŋgʋ nɛ paɖɩzɩ-tʋ nɛ laɣɖɛ. Paɖɩzɩ tɩ-taa ɛyaa* tɩŋa kɩyakʋ ŋgʋ, ɛzɩ paalabʋ Lakisi yɔ.+
36 Pʋwayɩ lɛ, Yozuwee nɛ Izrayɛɛlɩ kpeekpe pakʋyɩnɩ Egɩlɔɔnɩ nɛ powolo Ebrɔŋ+ nɛ poyooni tɛtʋ ndʋ. 37 Pamʋ tɛtʋ ndʋ nɛ paɖɩzɩ-tʋ, paɖɩzɩ ti-wiyaʋ, pɩ-cɔlɔ tɛtʋ nɛ tɩ-taa ɛyaa* tɩŋa nɛ laɣɖɛ, pɩtɩkazɩ nɔɔyʋ. Ɛzɩ ɛɛlabʋ Egɩlɔɔnɩ yɔ, ɛɖɩzɩ tɩ nɛ tɩ-taa ɛyaa* tɩŋa.
38 Kɛdɛzaɣ ɖeɖe lɛ, Yozuwee nɛ Izrayɛɛlɩ kpeekpe papɩsɩnɩ Debir+ tɛtʋ yɔɔ nɛ poyooni-tʋ. 39 Ɛmʋ tɛtʋ ndʋ, nɛ ɛɖɩzɩ tɩ nɛ ti-wiyaʋ nɛ pɩ-cɔlɔ tɛtʋ tɩŋa nɛ laɣɖɛ, ɛɖɩzɩ ɛyaa* tɩŋa peeɖe,+ pɩtɩkazɩ nɔɔyʋ.+ Ɛlabɩ Debir tɛtʋ nɛ ti-wiyaʋ ɛzɩ ɛɛlabʋ Ebrɔŋ nɛ Libna tɛtʋ nɛ ti-wiyaʋ yɔ.
40 Yozuwee mʋ tɛtʋ tɩŋa: Pʋŋ egeetiye, Negɛɛbʋ, Seefela+ nɛ kajalanzɩ, nɛ tɩ-awiya tɩŋa, nɛ pɩtɩkazɩ nɔɔyʋ; ɛɖɩzɩ mbʋ payɩ pifeziɣ yɔ,+ ɛzɩ Izrayɛɛlɩ tɛ Ɛsɔ Yehowa kaaɖʋʋ paɣtʋ yɔ.+ 41 Yozuwee mʋ-tʋ kpaɣnɩ Kadɛɛsɩ-Barneya+ nɛ pɩtalɩ Gaazaa+ nɛ Gosɛɛnɩ+ ɛjaɖɛ tɩŋa nɛ piwolo pɩtalɩ Gabawɔɔ.+ 42 Yozuwee wabɩ awiya ana a-tɩŋa nɛ ɛmʋ a-tɛtʋ alɩwaatʋ kʋɖʋmtʋ taa, mbʋ pʋyɔɔ yɔ Izrayɛɛlɩ tɛ Ɛsɔ Yehowa lakaɣnɩ you Izrayɛɛlɩ lone taa.+ 43 Pʋwayɩ lɛ, Yozuwee nɛ Izrayɛɛlɩ kpeekpe papɩsɩ ɖigbeɣliye taa Gilgaalɩ.+