Tɔm Hʋyaa
13 Izrayɛɛlɩ mba tasɩ labʋ mbʋ pɩfɛyɩ ɖeu yɔ Yehowa ɛsɩndaa,+ nɛ Yehowa ɖʋzɩ-wɛ Filistii mba nesi taa+ pɩnzɩ 40.
2 Alɩwaatʋ ndʋ tɩ-taa lɛ, Daanɩ mba+ hɔʋ taa tʋ nɔɔyʋ kaawɛɛ, ɛɛkɛ Zora tʋ,+ payaɣaɣ-ɩ se Manowaa.+ Ɛ-halʋ kaakɛ kaalʋlaɣ, ɛtaawɛɛnɩ pɩɣa.+ 3 Kɩyakʋ nakʋyʋ lɛ, Yehowa tiyiyu lɩɩ halʋ ɛnʋ ɛ-yɔɔ nɛ eheyi-i se: «Ŋkɛ kaalʋlaɣ nɛ ŋfɛyɩnɩ pɩɣa. Ɛlɛ ŋkaɣ haɣʋ hoɣa nɛ ŋlʋlɩ abalɩbɩɣa.+ 4 Pʋyɔɔ lɛ, kpa ña-tɩ, taañɔɔ vɛɛ yaa sʋlʋm mbʋ pɩkʋʋ ɛyʋ yɔ,+ nɛ taatɔɔ ɖɔɖɔ azuluma pʋyʋ.+ 5 Ŋkaɣ haɣʋ hoɣa nɛ ŋlʋlɩ abalɩbɩɣa, nɛ pɩfɛyɩ se hʋnʋʋ nakʋyʋ etukuni ka-ñʋʋ,+ mbʋ pʋyɔɔ yɔ pɩɣa ŋga kakaɣ kɛʋ Ɛsɔ tɛ Naziireya tʋ* kpaɣnɩ ka-lʋlʋʋ wiye,* nɛ kakaɣ ɖɛʋ nɔɔ nɛ kaya Izrayɛɛlɩ ñʋʋ Filistii mba nesi taa.»+
6 Peeɖe halʋ ɖɛwa nɛ eheyi ɛ-walʋ se: «Ɛsɔ toovenim tʋ ɛyʋ nɔɔyʋ kɔm mɔn-cɔlɔ, ɛ-wɛtʋ wɛ ɛzɩ Ɛsɔ toovenim tʋ tiyiyu nɔɔyʋ yɔ, ɛɛcaɣ sɔɔndʋ kpem. Mantɩpɔzɩ-ɩ se le ɛlɩnaa, nɛ etiheyi-m ɛ-hɩɖɛ ɖɔɖɔ.+ 7 Ɛlɛ eheyi-m se: “Ŋkaɣ haɣʋ hoɣa nɛ ŋlʋlɩ abalɩbɩɣa. Pʋyɔɔ lɛ, taañɔɔ vɛɛ yaa sʋlʋm mbʋ pɩkʋʋ ɛyʋ yɔ, nɛ taatɔɔ ɖɔɖɔ azuluma pʋyʋ, mbʋ pʋyɔɔ yɔ pɩɣa ŋga, kakaɣ kɛʋ Ɛsɔ tɛ Naziireya tʋ,* kpaɣnɩ ka-lʋlʋʋ wiye* nɛ piwolo pɩtalɩ ka-sɩm wiye.”»
8 Nɛ Manowaa tendi Yehowa nɛ ɛyɔɔdɩ se: «Mentendi-ŋ, Yehowa. Mentendi-ŋ, yele nɛ Ɛsɔ toovenim tʋ ɛyʋ weyi ŋtiyini-ɖʋ lɛɛlɛɛyɔ lɛɛlɛɛyɔ yɔ, ɛtasɩ kɔm nɛ ɛwɩlɩ-ɖʋ mbʋ pɩwɛɛ se ɖɩla pɩɣa ŋga ɖɩkaɣ lʋlʋʋ yɔ.» 9 Nɛ Ɛsɔ toovenim tʋ welisini Manowaa, nɛ Ɛsɔ toovenim tʋ tiyiyu pɩsɩ halʋ cɔlɔ alɩwaatʋ ndʋ ɛlɛ kaacaɣ hayɩm taa yɔ; ɛ-walʋ Manowaa taawɛɛ ɛ-cɔlɔ. 10 Nɛ halʋ se lɛɛ lɛɛ nɛ ewolo eheyi ɛ-walʋ se: «Abalʋ weyi ɛlɩ mɔ-yɔɔ kɩyakʋ lɛɛkʋ yɔ, ɛtasɩ kɔm mɔn-cɔlɔ.»+
11 Peeɖe Manowaa kʋyaa nɛ ɛtɩŋ ɛ-halʋ. Ɛtalɩ abalʋ cɔlɔ lɛ, ɛpɔzɩ-ɩ se: «Ña lɛ abalʋ weyi ɛɛyɔɔdɩnɩ ma-halʋ yɔ?» Ɛlɛ cosi se: «Ɛɛɛ.» 12 Nɛ Manowaa yɔɔdɩ se: «Pɩla nɛ ñɔ-tɔm kɛ toovenim! Ɛzɩma pɩɣa ŋga ke-wezuu caɣʋ kaɣ wɛʋ? Nɛ tʋmɩyɛ nɖɩ kakaɣ labʋ?»+ 13 Nɛ Yehowa tiyiyu heyi Manowaa se: «Pɩwɛɛ se ña-halʋ ɛkpa ɛ-tɩ nɛ mbʋ pɩ-tɔm meheyi-i yɔ pɩtɩŋa.+ 14 Pɩfɛyɩ se ɛtɔɔ mbʋ pɩlɩnɩ viiñi taa yɔ pɩ-taa nabʋyʋ, pɩfɛyɩ se ɛñɔɔ vɛɛ yaa sʋlʋm mbʋ pɩkʋʋ ɛyʋ yɔ,+ nɛ pɩfɛyɩ se ɛtɔɔ azuluma pʋyʋ.+ Paɣtʋ ndʋ manɖʋ-ɩ yɔ, ɛɖɔ tɩ-tɩŋa tɩ-yɔɔ.»
15 Nɛ Manowaa heyi Yehowa tiyiyu se: «Mentendi-ŋ caɣ, yele nɛ ɖɩkʋ-ŋ mbeɣa nakɛyɛ.»+ 16 Ɛlɛ Yehowa tiyiyu heyi Manowaa se: «Paa maacaɣaa, maakaɣ ñɔ-tɔɔnaɣ tɔɔʋ; ɛlɛ ye ŋsɔɔlaa se ŋlaa kɩlaʋ kɩñaɣzʋʋ Yehowa yɔ, ŋpɩzɩɣ nɛ ŋlaa-kʋ.» Manowaa taaɖiɣzina se Yehowa tiyiyu abalʋ ɛnʋ ɛɛkɛnaa. 17 Nɛ Manowaa pɔzɩ Yehowa tiyiyu se: «Payaɣ-ŋ suwe?+ Piyeki nɛ ɖɩɖʋ-ŋ hɩɖɛ alɩwaatʋ ndʋ tɔm ndʋ ŋyɔɔdaa yɔ tɩlakɩ yɔ.» 18 Ɛlɛ Yehowa tiyiyu pɔzɩ-ɩ se: «Ɛbɛ yɔɔ ŋpɔzʋʋ ma-hɩɖɛ, ŋgʋ ɖɩkɛ piti hɩɖɛ?»
19 Nɛ Manowaa kpaɣ mbeɣa nɛ tɔɔnaɣ pee kɩlaʋ nɛ ɛlaa Yehowa kaaʋ yɔɔ. Nɛ Manowaa nɛ ɛ-halʋ paawɛɛ nɛ pɔcɔŋna lɛ, Ɛsɔ la piti lakasɩ nasɩyɩ. 20 Miŋ nzʋlʋmɩyɛ kʋyaɣnɩ altaaru yɔɔ nɛ ɖɩkpaɣnɩ ɛsɔdaa kiŋ, nɛ Manowaa nɛ ɛ-halʋ paawɛɛ nɛ pɔcɔŋna lɛ, panaɣ se Yehowa tiyiyu tɩŋnɩ altaaru yɔɔ miŋ nzʋlʋmɩyɛ nɖɩ ɖɩ-taa nɛ ɛkpaɣ ɛsɔdaa. Kpaagbaa mbʋ lɛ, poluŋ nɛ papa pɛ-ɛsa nɛ tɛtʋ. 21 Peeɖe Manowaa ɖiɣzinaa se Yehowa tiyiyu abalʋ ɛnʋ ɛɛkɛnaa.+ Yehowa tiyiyu tɩtasɩ ɛ-tɩ wɩlʋʋ Manowaa nɛ ɛ-halʋ. 22 Ðɩnɛ ɛlɛ, Manowaa heyi ɛ-halʋ se: «Pɩtʋʋ fɛyɩ se ɖɩkaɣ sɩbʋ, mbʋ pʋyɔɔ yɔ Ɛsɔ ɖɩnawa.»+ 23 Ɛlɛ ɛ-halʋ heyi-i se: «Ye Yehowa kaañɩnaɣ se ɛkʋ-ɖʋ yɔ, etaatisi nɛ ɛmʋ ɖe-nesi taa kɩlaʋ kɩñaɣzʋʋ+ nɛ tɔɔnaɣ pee kɩlaʋ, ɛtaawɩlɩ-ɖʋ pɩtɩŋa payɩ mbʋ yɔ, nɛ etaaheyi-ɖʋ tɔm ndʋ yɔ tɩ-taa natʋyʋ.»
24 Pʋwayɩ lɛ, halʋ lʋlɩ abalɩbɩɣa nɛ ɛyaa-kɛ se Samsɔɔ;+ nɛ pɩɣa wɛɛ nɛ kapaɣlɩɣ, nɛ Yehowa wɛɛ nɛ ɛwazɩɣ-kɛ. 25 Pʋwayɩ lɛ, Yehowa fezuu paɣzɩ-kɛ seɣtuu+ Mahane-Daanɩ taa,+ Zora nɛ Ɛstawɔɔlɩ+ pɛ-hɛkʋ taa.