Samɩyɛɛlɩ takayaɣ naalɛ ñɩŋga

15 Pɩlabɩ mbʋ payɩ nɛ pɩtɛ lɛ, Absalɔm yele nɛ palabɩ-ɩ kɛɛkɛɛ nɛ ɛwɛɛnɩ ɖɔɖɔ kpaŋnaŋ nɛ ɛyaa 50 se peseɣ ɛ-ɛsɩndaa.+ 2 Absalɔm kʋyaɣ lɔŋ tanaŋ tɛɛ nɛ ɛsɩŋɩɣ habɩyɛ nɖɩ ɖiwokini tɛtʋ nɔnɔɔ taa+ yɔ ɖɩ-kpɛŋa yɔɔ. Alɩwaatʋ ndʋ nɔɔyʋ wɛnɩ tɔm nɛ pɩpɔzʋʋ se ewoni-tʋ wiyaʋ cɔlɔ nɛ pahʋʋ-tʋ lɛ,+ Absalɔm yaɣaɣ ɛyʋ ɛnʋ nɛ ɛpɔzʋʋ-ɩ se: «Tɛtʋ ndʋ taa ŋlɩnaa?» Nɛ ɛlɛ cosaɣ se: «Ña-lɩmɖʋyʋ kɛ Izrayɛɛlɩ cejewe taa cejewiye naɖɩyɛ taa tʋ.» 3 Absalɔm heyaɣ-ɩ se: «Na, ñɔ-tɔm tʋʋzaa nɛ tɩwɛ camɩyɛ, ɛlɛ wiyaʋ tɩsɩɩ nɔɔyʋ se ewelisini-ŋ.» 4 Absalɔm yɔɔdaɣ se: «Ye pɩɩlaba se palɩzɩ-m nɛ mɛnkɛ tɔm hʋyʋ ɛjaɖɛ taa! Pʋbʋ lɛ, ɛyʋ weyi ɛwɛnɩ tɔm natʋyʋ yaa ɛcaɣ se pahʋʋ ɛ-tɔm natʋyʋ yɔ ɛɛpɩzaa nɛ ɛkɔɔ mɔn-cɔlɔ, nɛ meyele nɛ pahʋʋ ɛ-tɔm siɣsiɣ.»

5 Nɛ alɩwaatʋ ndʋ abalʋ nɔɔyʋ ñɔtʋʋnɩ Absalɔm se eluŋ ɛ-tɛɛ lɛ, Absalɔm posaɣ e-nesi nɛ ɛɖɔkʋʋ-ɩ nɛ ekpiikiɣni-i.+ 6 Absalɔm lakaɣ mbʋ Izrayɛɛlɩ ñɩma mba payɩ powokaɣ wiyaʋ cɔlɔ se ɛhʋʋ pɔ-tɔm yɔ; nɛ Absalɔm wɛɛ nɛ ɛmɩlɩɣ Izrayɛɛlɩ mba laŋa.+

7 Pɩnzɩ 4* tɛma lɛ, Absalɔm heyi wiyaʋ se: «Mentendi-ŋ, yebi-m nɛ mowolo Ebrɔŋ+ nɛ mɔnɖɔ ɖuutu ndʋ maaɖuuni Yehowa yɔ tɩ-yɔɔ. 8 Mbʋ pʋyɔɔ yɔ ma ña-lɩmɖʋyʋ monɖuu ŋgee ɖuutu+ tʋnɛ alɩwaatʋ ndʋ maawɛ Gesuur,+ Siirii taa yɔ se: “Ye Yehowa ɛpɩsɩnɩ-m Yeruzalɛm yɔ, mankaɣ laʋ kɩlaʋ* Yehowa.”» 9 Nɛ wiyaʋ heyi-i se: «Wobini laŋhɛzɩyɛ.» Nɛ ɛkʋyɩ nɛ ewolo Ebrɔŋ.

10 Nɛ Absalɔm tiyi cɔŋɩyaa Izrayɛɛlɩ cejewe kpeekpe taa, nɛ eheyi-wɛ se: «Ɩtɩɩnɩɣ nɔndɔʋ taŋ lɛ, isusi se: “Absalɔm pɩsɩ wiyaʋ Ebrɔŋ!”»+ 11 Nɛ ɛyaa 200 kʋyɩnɩ Yeruzalɛm nɛ patɩŋ Absalɔm nɛ powolo peeɖe; paaya-wɛ nɛ powolo ɛlɛ paasɩŋ natʋyʋ, pataatɩlɩ mbʋ pɩɩwɛɛ nɛ pɩlakɩ yɔ. 12 Pɩtasɩ lɛ, Absalɔm la kɩlaŋ lɛ, etiyi Gilo tɛtʋ+ taa se payaa Gilo tʋ Ahitofɛɛlɩ,+ Daviid lɔŋ tasɩyʋ.+ Tɔm kpɛyʋʋ mbʋ pɩwɛɛ nɛ pɩkpaɣ ɖoŋ, nɛ ɛyaa mba paawɛ Absalɔm yɔɔ yɔ pɛwɛɛ nɛ pɔɖɔʋ.+

13 Pʋwayɩ lɛ, nɔɔyʋ wolo Daviid cɔlɔ nɛ eheyi-i se: «Izrayɛɛlɩ mba laŋa kɛ Absalɔm yɔɔ.» 14 Kpaagbaa mbʋ lɛ, Daviid heyi ɛ-lɩmɖʋyaa mba payɩ ɛ nɛ wɛ paawɛ Yeruzalɛm yɔ se: «Ɩkʋyɩ nɛ ɖise,+ pɩtɩkɛ mbʋ yɔ ɖa-taa nɔɔyʋ ɛɛkaɣ lɩʋ Absalɔm nesi tɛɛ! Ɩla lɔŋ, pɩtɩkɛ mbʋ yɔ ɛkɔŋ lɛɛ lɛɛ nɛ ɛmaɣnɩ-ɖʋ nɛ ɛkɔnɩ ɖɔ-yɔɔ asɛyʋʋ nɛ ɛkʋ tɛtʋ taa mba tɩŋa nɛ laɣɖɛ!»+ 15 Wiyaʋ lɩmɖʋyaa cosi wiyaʋ se: «Paa lɩmaɣzɩyɛ nɖɩ ɖa-kɩbaɣlʋ wiyaʋ ɛkpaɣaa yɔ, ña-lɩmɖʋyaa ñɔɔzɩ pa-tɩ se pɔɖɔ ɖɩ-yɔɔ.»+ 16 Nɛ wiyaʋ lɩɩ, nɛ ɛ-ɖɩɣa taa mba kpeekpe tɩŋɩɣ ɛ-wayɩ, ɛlɛ wiyaʋ yele ɖaŋnaa 10+ se pɔcɔnɩ ɖɩɣa* yɔɔ. 17 Nɛ wiyaʋ kpaɣ ɛ-nʋmɔʋ nɛ ɛɖɛɣ nɛ samaɣ kpeekpe tɩŋɩɣ ɛ-wayɩ, nɛ powolo pasɩŋ Bɛtɩ-Merakɩ.

18 Ɛ-lɩmɖʋyaa mba paatɩŋɩ-ɩ nɛ palɩɩ yɔ* pa-tɩŋa nɛ Kereti mba tɩŋa, Peleti mba+ tɩŋa, nɛ Gaatɩ mba+ ɛyaa 600 mba paatɩŋ ɛ-wayɩ kpaɣnɩ Gaatɩ+ yɔ pa-tɩŋa, paawɛɛ nɛ pɔɖɔŋ wiyaʋ ɛsɩndaa nɛ ɛcɔŋna se ɛna se pa-tɩŋa pɛwɛɛ yaa we.* 19 Wiyaʋ heyi Gaatɩ tʋ Itayii+ se: «Ɛbɛ yɔɔ pɩwɛɛ se ña ɖɔɖɔ ŋtɩŋ-ɖʋ? Pɩsɩ nɛ ŋwɛɛ wiyaʋ kɩfalʋ cɔlɔ, mbʋ pʋyɔɔ yɔ ŋkɛ ɛgɔm, nɛ pɩtasɩ lɛ ŋse ña-ɖɩjaɣyɛ taa nɛ ŋkɔɔ. 20 Ðeɖe ɖeke ŋkɔma, nɛ pɩfɛyɩ ɖeu se sɔnɔ meyele nɛ ɖa nɛ ŋ ɖɩcɔʋ mbʋ, ŋgʋ maasɩŋ ɖenɖe mowoki yɔ. Kpɛndɩnɩ ño-koobiya nɛ ŋpɩsɩ, tɛtɛ nɛ Yehowa wɩlɩ-ŋ sɔɔlɩm siɣsiɣ ñɩmbʋ nɛ siɣsiɣ wɛtʋ!»+ 21 Ɛlɛ Itayii cosi wiyaʋ se: «Yehowa ñɩtʋʋ nɛ ɛwɛɛ wezuu yɔ nɛ ŋñɩtʋʋ nɛ ŋwɛɛ wezuu yɔ, hayɩ man-kɩbaɣlʋ wiyaʋ, ɖenɖe ŋwɛɣ yɔ, peeɖe mankaɣ wɛʋ, paa pɩkɛ sɩm taa yaa wezuu taa yɔ!»+ 22 Peeɖe Daviid heyi Itayii+ se: «Wolo nɛ ŋtɛzɩ.» Nɛ Gaatɩ tʋ Itayii tɛzɩ, ɛ nɛ ɛ-ɛyaa tɩŋa nɛ pɔ-hɔŋ.

23 Paa weyi ɛɛwɛɛ nɛ ewiliɣ ɖoŋ ɛjaɖɛ taa alɩwaatʋ ndʋ samaɣ kanɛ ka-tɩŋa kɛtɛzaɣ yɔ, nɛ wiyaʋ kaasɩŋ Kidrɔɔnɩ Fɛɛʋ+ cɔlɔ; samaɣ tɩŋa tɛzaɣ nɛ kowoki habɩyɛ nɖɩ ɖiwokini kañɩmbusuu taa yɔ ɖɩ-yɔɔ. 24 Sadɔɔkɩ+ kaawɛ ɖɔɖɔ peeɖe nɛ Leevi mba kpeekpe+ kaawɛ ɛ-cɔlɔ nɛ pɔɖɔkɩ Ɛsɔ toovenim tʋ ɛgbɛyɛ ɖʋʋ aɖakaɣ;+ nɛ pasɩɩ Ɛsɔ toovenim tʋ Aɖakaɣ tataa; nɛ Abiyaataarɩ+ kaawɛ peeɖe pɩkɔɔ nɛ pɩsɩɩnɩ alɩwaatʋ ndʋ samaɣ tɩŋa lɩnɩ tɛtʋ taa nɛ kɛtɛzɩ yɔ. 25 Ɛlɛ wiyaʋ heyi Sadɔɔkɩ se: «Kpaɣ Ɛsɔ toovenim tʋ Aɖakaɣ nɛ ŋpɩsɩnɩ tɛtʋ taa.+ Ye mɔn-tɔm ɛkɛdɩnɩ Yehowa yɔ, ɛkaɣ-m pɩsɩnʋʋ nɛ eyele nɛ mana-kɛ nɛ mana ɖɔɖɔ lone nɖɩ ɖɩ-taa kɛwɛɛ yɔ.+ 26 Ɛlɛ ye ɛyɔɔdaa se: “Ñɔ-tɔm tɩkɛdɩnɩ-m” yɔ, pʋbʋ lɛ, ɛlabɩ-m mbʋ payɩ pɩwɛ ɖeu ɛ-ɛsɩndaa yɔ.» 27 Wiyaʋ heyi cɔjɔ Sadɔɔkɩ se: «Ŋtɩkɛ weyi ɛnɩɣ natʋ taa yɔ yaa we?+ Ɩpɩsɩ tɛtʋ taa nɛ laŋhɛzɩyɛ, ɩkpɛndɩnɩ mɩ-pɩyalaa mba pa-naalɛ, ña-maɣmaɣ ña-pɩyalʋ Ahimaazɩ nɛ Abiyaataarɩ pɩyalʋ Yonataanɩ.+ 28 Na, mankaɣ ɖaŋʋʋ kañɩmbusuu taa Yɔɔrdaŋ pɔɔ ɖɩdɛzɩyɛ cɔlɔ pɩkɔɔ nɛ pɩtalɩ alɩwaatʋ ndʋ itiyiɣni tɔm nɛ peheyi-m yɔ.»+ 29 Nɛ Sadɔɔkɩ nɛ Abiyaataarɩ pakpaɣ Ɛsɔ toovenim tʋ Aɖakaɣ nɛ papɩsɩnɩ Yeruzalɛm, nɛ pacaɣ peeɖe.

30 Alɩwaatʋ ndʋ Daviid kpaɣaɣ Oliivi Pʋʋ yɔ,+ ɛɛwɛɛ nɛ ewiɣ nɛ ɛkpaɣ; eehuuzi ɛ-ñʋʋ yɔɔ, nɛ ɛɖɔŋaɣ naataŋ kpɛɖɛ. Ɛyaa mba paawɛ ɛ-cɔlɔ yɔ pa-tɩŋa pohuuzi pa-ñʋŋ yɔɔ ɖɔɖɔ nɛ pɛwɛɛ nɛ pewiɣ nɛ pakpaɣ. 31 Peeɖe peheyi Daviid se: «Ahitofɛɛlɩ wɛ mba pa nɛ Absalɔm+ pɛwɛɛ nɛ pɛkpɛyɩɣ ñɔ-tɔm yɔ pa-taa.»+ Nɛ Daviid yɔɔdɩ se: «Hayɩ Yehowa,+ mentendi-ŋ, yele nɛ Ahitofɛɛlɩ lɔŋ tasʋʋ pɩsɩ kɩmɛlɛndʋ tɔm!»+

32 Daviid talɩ pʋʋ ñʋʋ taa ɖenɖe ɛyaa woki nɛ poluŋuu Ɛsɔ tɛɛ yɔ lɛ, Arki tʋ+ Usaayii+ kaawɛ peeɖe nɛ ɛɖaŋɩ-ɩ, e-toko kɩɖaɣlʋʋ cɩyaa nɛ tɛtʋ wɛ ɛ-ñʋʋ taa. 33 Ɛlɛ Daviid heyi-i se: «Ye ma nɛ ŋ ɖɩtɛzaa yɔ, ŋkaɣ-m kɛʋ sʋʋtʋ. 34 Ɛlɛ ye ŋpɩsɩ tɛtʋ taa nɛ ŋheyi Absalɔm se: “Mɛnkɛ ña-lɩmɖʋyʋ, Oo wiyaʋ. Ðooo lɛ, maakɛ ña-caa lɩmɖʋyʋ, ɛlɛ lɛɛlɛɛyɔ lɛ mɛnkɛ ña-lɩmɖʋyʋ,”+ pʋbʋ lɛ, ŋpɩzɩɣ nɛ ŋsidi Ahitofɛɛlɩ lɔŋ tasʋʋ taa nɛ pɩsɩnɩ-m.+ 35 Halɩ cɔjɔnaa Sadɔɔkɩ nɛ Abiyaataarɩ pɛwɛɣ ñɔ-cɔlɔ peeɖe. Pɩwɛɛ se ŋheyi cɔjɔnaa Sadɔɔkɩ nɛ Abiyaataarɩ tɔm ndʋ payɩ ŋnɩɣ wiyaʋ ɖɩɣa taa yɔ.+ 36 Na! Pa nɛ pa-pɩyalaa mba pa-naalɛ pɛwɛnɩ peeɖe, Sadɔɔkɩ pɩyalʋ Ahimaazɩ+ nɛ Abiyaataarɩ pɩyalʋ Yonataanɩ.+ Tɩŋnɩ pɔ-yɔɔ nɛ ŋtiyini-m tɔm ndʋ payɩ ŋnɩɣ yɔ.» 37 Peeɖe Usaayii, Daviid taabalʋ,*+ pɩsɩ tɛtʋ taa alɩwaatʋ ndʋ Absalɔm sʋwaɣ Yeruzalɛm taa yɔ.