Samɩyɛɛlɩ takayaɣ naalɛ ñɩŋga

17 Nɛ Ahitofɛɛlɩ heyi Absalɔm se: «Mentendi-ŋ, yele nɛ malɩzɩ ɛyaa 12 000 nɛ mankʋyɩ nɛ manɖʋ Daviid wayɩ ɖoo anɛ. 2 Mankaɣ lɩʋ ɛ-yɔɔ alɩwaatʋ ndʋ pɩnɩ-ɩ kpem nɛ ɛtɩtasɩ wɛnʋʋ ɖoŋ yɔ,*+ nɛ mankaɣ yebu nɛ sɔɔndʋ kpa-ɩ siŋŋ; nɛ ɛyaa mba payɩ pɛwɛ ɛ-cɔlɔ yɔ pakaɣ seu, nɛ mankaɣ kʋʋ wiyaʋ ɖeke.+ 3 Ðɩnɛ ɛlɛ, mankaɣ-ŋ pɩsɩnʋʋ samaɣ kpeekpe. Pʋcɔ nɛ samaɣ kpeekpe pɩsɩ lɛ, pɩlɩɣnɩ mbʋ pɩkaɣ talʋʋ ɛyʋ weyi ŋwɛɛ nɛ ŋñɩnɩɣ yɔ pɩ-cɔlɔ. Ðɩnɛ ɛlɛ samaɣ kpeekpe kaɣ wɛʋ laŋhɛzɩyɛ taa.» 4 Tɔm ndʋ, tɩɩwɛ ɖeu siŋŋ Absalɔm nɛ Izrayɛɛlɩ ɛzʋtʋyaa tɩŋa ɛsɩndaa.

5 Ɛlɛ Absalɔm yɔɔdɩ se: «Ɩyaa ɖɔɖɔ Arki tʋ Usaayii,+ nɛ ɖɩnɩɩ ndʋ ɛlɛ yɔɔdʋʋ yɔ.» 6 Peeɖe Usaayii sʋ Absalɔm cɔlɔ. Nɛ Absalɔm heyi-i se: «Lɔŋ ɛnɛ Ahitofɛɛlɩ tasaa. Pɩwɛɛ se ɖɩɖɔ ɛ-lɔŋ tasʋʋ yɔɔ? Ye pɩfɛyɩ se ɖɩɖɔ ɩ-yɔɔ yɔ, ñeheyi-ɖʋ mbʋ pɩwɛɛ se ɖɩla yɔ.» 7 Peeɖe Usaayii heyi Absalɔm se: «Lɔŋ weyi Ahitofɛɛlɩ tasɩ lɛɛlɛɛyɔ yɔ, ɩfɛyɩ ɖeu!»+

8 Usaayii wolo pɩ-yɔɔ se: «Ŋsɩm camɩyɛ se ña-caa nɛ ɛ-ɛyaa pɛkɛ ɖoŋ tɩnaa,+ nɛ pɛ-ɛsa ñɩŋaa* ɛzɩ kpemtɔɔyaɣ ŋga kelesi ke-piya ñɩtʋ taa yɔ.+ Pɩtasɩ lɛ, ña-caa kɛ you laɖʋ,+ nɛ ɛɛkaɣ sʋʋ samaɣ cɔlɔ ɖoo taa. 9 Alɩwaatʋ tʋnɛ tɩ-yɔɔ ɖeyi ɖeyi lɛ, ɛmɛlɩ ɛwaɣ* nakɛyɛ tɛɛ yaa lone naɖɩyɛ taa;+ nɛ ye ɛnʋ ɛcalɩnɩ labʋ you yɔ, mba panɩɣ-tʋ yɔ pakaɣ yɔɔdʋʋ se: “Pawabɩ ɛyaa mba pɛwɛɛ nɛ patɩŋɩɣ Absalɔm yɔ!” 10 Halɩ abalʋ weyi ɛwɛ abalɩtʋ, weyi ɛ-laŋɩyɛ wɛ ɛzɩ mʋʋzʋʋ laŋɩyɛ yɔ,+ pɩtʋʋ fɛyɩ se sɔɔndʋ kaɣ-ɩ kpaʋ nɛ ɛpɩsɩ ɛjam, mbʋ pʋyɔɔ yɔ Izrayɛɛlɩ kpeekpe nawa se ña-caa kɛ ɛyʋ ɖoŋ tʋ+ nɛ ɛyaa mba pɛwɛ ɛ-cɔlɔ yɔ pɛwɛ abalɩtʋ. 11 Mantasɩɣ lɔŋ ɛnɛ: Izrayɛɛlɩ kpeekpe ekpeɣli ñɔ-cɔlɔ, kpaɣnɩ Daanɩ nɛ piwolo Beyɛɛrɩ-Seeba,+ nɛ pɔɖɔɔ ɛzɩ teŋgu nɔɔ kañɩŋa yɔ,+ nɛ pɩwɛɛ se ŋɖiyi-wɛ you taa. 12 Ðɩkaɣ wobu ɛ-wayɩ paa le ɛwɛɛ yɔ, nɛ ɖɩkaɣ lɩʋ ɛ-yɔɔ ɛzɩ ɖoluu tɔlʋʋ tataa yɔ; nɛ pɩɩkaɣ kazʋʋ pa-taa paa kʋɖʋm nɛ ɛ-ɛsa, paa pɩtɩɩkɛ ɛ-maɣmaɣ yaa ɛyaa mba pɛwɛ ɛ-cɔlɔ yɔ pa-taa nɔɔyʋ yɔ. 13 Ye esewa nɛ ɛsʋʋ tɛtʋ natʋyʋ taa yɔ, Izrayɛɛlɩ kpeekpe kaɣ wonuu nimee tɛtʋ ndʋ tɩ-taa, nɛ ɖɩkaɣ-tʋ hɔm nɛ ɖitini fɛɛʋ taa pɩkɔɔ nɛ pɩsɩɩnɩ alɩwaatʋ ndʋ pɩɩkazɩɣ paa putooye kʋɖʋmɖɩyɛ yɔ.»

14 Nɛ Absalɔm nɛ Izrayɛɛlɩ ɛyaa kpeekpe pɔyɔɔdɩ se: «Arki tʋ Usaayii lɔŋ tasʋʋ kpaɖɩ ɖeu+ Ahitofɛɛlɩ lɔŋ tasʋʋ!» Mbʋ pʋyɔɔ yɔ Yehowa kaaɖʋ ɛ-taa* se ɛwɛɛkɩɣ Ahitofɛɛlɩ lɔŋ tasʋʋ kɩbam mbʋ,+ se pɩsa nɛ Yehowa kɔnɩ asɛyʋʋ Absalɔm yɔɔ.+

15 Pʋwayɩ lɛ Usaayii heyi cɔjɔnaa Sadɔɔkɩ nɛ Abiyaataarɩ+ se: «Lɔŋ ɛnɛ Ahitofɛɛlɩ tasɩ Absalɔm nɛ Izrayɛɛlɩ ɛzʋtʋyaa, nɛ lɔŋ ɛnɛ ma matasaa. 16 Lɛɛlɛɛyɔ lɛ, itiyini Daviid tɔm lɛɛ lɛɛ nɛ ɩpaɣ-ɩ se: “Taacaɣ kañɩmbusuu taa Yɔɔrdaŋ pɔɔ ɖɩdɛzɩyɛ* taa ɖoo anɛ. Ɛlɛ tɛzɩ lɛɛ lɛɛ, pɩtɩkɛ mbʋ yɔ papɩzɩɣ nɛ paɖɩzɩ* wiyaʋ nɛ ɛyaa mba payɩ pɛwɛ ɛ-cɔlɔ yɔ.”»+

17 Yonataanɩ+ nɛ Ahimaazɩ+ paacaɣ Ɛn-Rogɛɛlɩ;+ nɛ lɩmɖʋyʋ halɩñɩnʋ nɔɔyʋ wolo nɛ eheyi-wɛ, nɛ paba wolo peheyi-tʋ Wiyaʋ Daviid, mbʋ pʋyɔɔ yɔ pataakatɩɣ se pasʋʋ tɛtʋ taa nɛ ɛyaa na-wɛ. 18 Ɛlɛ evebu nɔɔyʋ na-wɛ nɛ eheyi Absalɔm. Peeɖe pa-naalɛ pɛɖɛ lɛɛ lɛɛ nɛ powolo abalʋ nɔɔyʋ ɖɩɣa taa Bahurim,+ ɛlɛ ñaawɛnɩ lɔkɔ ɛ-taɣ yɔɔ. Nɛ petii lɔkɔ ŋgʋ kɩ-taa, 19 nɛ abalʋ ɛnʋ ɛ-halʋ huuzi kuhuuzuu nakʋyʋ lɔkɔ nɔɔ yɔɔ nɛ ɛpɩyɩ kɩ-yɔɔ pee wena pawataa yɔ; nɔɔyʋ tɩtɩlɩ mbʋ pɩlaba yɔ. 20 Absalɔm lɩmɖʋyaa wolo halʋ ɛnʋ ɛ-cɔlɔ ɛ-ɖɩɣa taa nɛ pɔpɔzɩ-ɩ se: «Le Ahimaazɩ nɛ Yonataanɩ pɛwɛɛ?» Halʋ cosi-wɛ se: «Pɔkɔm nɛ pɛɖɛɛnɩ pɔɔ hɔɔlʋʋ yɔɔ kiŋ.»+ Abalaa mba pañɩnɩ-wɛ ɛlɛ patɩna-wɛ, nɛ papɩsɩ Yeruzalɛm.

21 Abalaa mba pɛtɛm ɖɛʋ lɛ, Ahimaazɩ nɛ Yonataanɩ palɩɩnɩ lɔkɔ taa nɛ powolo nɛ peheyi Wiyaʋ Daviid. Peheyi-i se: «Ɩkʋyɩ nɛ ɩtɛzɩ pɔɔ lɛɛ lɛɛ, mbʋ pʋyɔɔ yɔ lɔŋ ɛnɛ Ahitofɛɛlɩ tasaa pɩlɩɩnɩ mɩ-yɔɔ.»+ 22 Kpaagbaa mbʋ lɛ, Daviid nɛ ɛyaa mba payɩ paawɛ ɛ-cɔlɔ yɔ pakʋyɩ nɛ pɛtɛzɩ Yɔɔrdaŋ. Tɛʋ feŋaɣ lɛ, pɩtɩkazɩ nɔɔyʋ se ɛtɩtɛzɩ Yɔɔrdaŋ.

23 Ahitofɛɛlɩ nawa se patɩɖɔ ɛ-lɔŋ tasʋʋ yɔɔ lɛ, ɛñɔɔzɩ kpaŋaɣ nɛ ɛcaɣ kɔ-yɔɔ nɛ ewolo ɛ-ɖɩɣa taa, ɛ-tɛtʋ taa.+ Ɛtɛm heyuu ɛ-ɖɩɣa taa mba mbʋ pɩwɛɛ se pala lɛ,+ ɛɖɩ ɛ-tɩ nimiye.+ Nɛ ɛsɩ nɛ pepimi-i ɛ-cɔzɔnaa pɩlaʋ taa.

24 Alɩwaatʋ ndʋ tɩ-taa lɛ, Daviid ɖɛɛ nɛ ewolo Mahanayim,+ nɛ Absalɔm ñɛtɛzɩ Yɔɔrdaŋ, ɛ nɛ Izrayɛɛlɩ ɛyaa tɩŋa. 25 Absalɔm kpaɣ Amazaa+ nɛ ɛsɩɩ-ɩ sɔɔjanaa ñʋʋdʋ Yowaabʋ lone taa;+ Amazaa kaakɛ abalʋ weyi payaɣ se Izrayɛɛlɩ tʋ Itira, weyi ɛɛsʋnɩ Nahaasɩ pɛlɛ Abigayɛɛlɩ+ yɔ ɛ-pɩyalʋ. Abigayɛɛlɩ kaakɛ Zeruyaa neu halɩñɩnʋ, Zeruyaa kaakɛ Yowaabʋ ɖoo. 26 Izrayɛɛlɩ nɛ Absalɔm pekpeɣli Galaadɩ egeetiye taa.+

27 Daviid tɩɩtalɩ Mahanayim lɛ, Raba+ tʋ Nahaasɩ pɩyalʋ Soobi weyi ɛ-tɛ wɛ Amooni mba tɛ yɔ, Amiyɛɛlɩ weyi ɛ-tɛ wɛ Lo-Debar yɔ ɛ-pɩyalʋ Makiir,+ nɛ Galaadɩ tʋ Barizilayii+ weyi ɛ-tɛ wɛ Rogelim yɔ 28 powoni-i kaɖʋnaa, ñanzɩ sɔsɔsɩ, cʋʋ peeɣsi, blee, orjɩ,* mʋlʋm, pee kuɖoŋa, sona, lantiiyinaa,* nɛ pee kɩwɩlɛɛ, 29 tʋŋ num, naanum, heŋ nɛ waagaasɩ.* Pɔkɔnɩ pɩtɩŋa mbʋ yɔ se pɛcɛlɩ Daviid nɛ ɛyaa mba paawɛ ɛ-cɔlɔ yɔ se pɔtɔɔ,+ mbʋ pʋyɔɔ yɔ pɔyɔɔdaa se: «Ñɔɔsɩ wɩɣ ɛyaa nɛ pɩnɩ-wɛ nɛ lɔkɔtʋ ɖɛ-wɛ kañɩmbusuu taa.»+