Awiya takayaɣ kajalaɣ ñɩŋga
11 Ɛlɛ, pɩtasɩnɩ Farawɔɔ pɛlɛ+ lɛ, Wiyaʋ Salomɔɔ kaasɔɔlɩ agbaaɣdaa halaa+ sakɩyɛ: Mowaabʋ+ halaa, Amooni+ halaa, Edom halaa, Siidɔɔ+ halaa, nɛ Hɛɛtɩ+ halaa. 2 Paalɩnɩ ajɛɛ wena a-tɔm Yehowa kaaheyi Izrayɛɛlɩ mba se pakpa pa-tɩ nɛ yɛ yɔ a-taa. Eeheyi-wɛ se: «Pɩtɩpɔzɩ se ɩsʋʋ a-taa,* nɛ pɩtɩpɔzɩ se asʋʋ mɩ-taa, mbʋ pʋyɔɔ yɔ pɩtʋʋ fɛyɩ se akaɣ lɛɣzʋʋ mɩ-laŋa se ɩtɩŋ a-ɛsɔnaa.»+ Ɛlɛ Salomɔɔ ñɔɔnɩ-wɛ nɛ ɛsɔɔlɩ-wɛ. 3 Nɛ ɛɛwɛnɩ halaa 700 mba paakɛ abila yɔ nɛ ɖaŋnaa 300, nɛ pazɩ pazɩ lɛ, ɛ-halaa lɛɣzɩ ɛ-laŋɩyɛ.* 4 Salomɔɔ kpadɩyaa lɛ,+ ɛ-halaa lɛɣzɩ* ɛ-laŋɩyɛ nɛ ɛtɩŋ ɛsɔnaa lalaa,+ nɛ ɛ-laŋɩyɛ taañɔɔnɩ ɛ-Ɛsɔ Yehowa kpam ɛzɩ ɛ-caa Daviid laŋɩyɛ yɔ. 5 Nɛ Salomɔɔ tɩŋ Siidɔɔ mba ɛsɔ halɩñɩnʋ Astoorɛɛtɩ+ wayɩ, nɛ Milikɔm,+ Amooni mba ɛsɔ weyi ɛwɛ kiniŋ yɔ ɛ-wayɩ. 6 Nɛ Salomɔɔ la mbʋ pɩfɛyɩ ɖeu Yehowa ɛsɩndaa yɔ, nɛ ɛtɩtɩŋ Yehowa nɛ ɛtɛ ɛ-taa* ɛzɩ ɛ-caa Daviid kaalabʋ yɔ.+
7 Ðɩnɛ ɛlɛ Salomɔɔ ma lone kʋkʋyɩyɛ+ Kemɔɔsɩ, Mowaabʋ ɛsɔ weyi ɛwɛ kiniŋ yɔ, pʋʋ ŋgʋ kɩwɛ Yeruzalɛm ɛsɩndaa yɔ kɩ-yɔɔ, nɛ ɛla mbʋ ɖɔɖɔ Molɛɛkɩ,+ Amooni mba ɛsɔ weyi ɛwɛ kiniŋ yɔ.+ 8 Mbʋ ɛlabɩ ɛ-agbaaɣdaa halaa tɩŋa mba palaɣaɣ kɩlaŋ nɛ pa-kɩlaŋ ñɔsɩ kpaɣnɩ pɛ-ɛsɔnaa cɔlɔ yɔ.
9 Yehowa taa wɩɩnɩ Salomɔɔ siŋŋ, mbʋ pʋyɔɔ yɔ ɛ-laŋɩyɛ lɛɣzaa nɛ eposini Izrayɛɛlɩ tɛ Ɛsɔ Yehowa,+ weyi ɛɛlɩ ɛ-yɔɔ tam nabʋlɛ+ 10 nɛ ɛpaɣ-ɩ se pɩtɩpɔzɩ se ɛtɩŋ ɛsɔnaa lalaa wayɩ+ yɔ. Ɛlɛ ɛtɩña paɣtʋ ndʋ Yehowa kaaɖʋwa yɔ. 11 Nɛ Yehowa heyi Salomɔɔ se: «Ŋlabɩ mbʋ nɛ ŋtɩɖɔkɩ mɛ-ɛgbɛyɛ nɛ man-kpalɩtʋ ɛzɩ manɖʋʋ-ŋ paɣtʋ yɔ, pʋyɔɔ lɛ pɩtʋʋ fɛyɩ se mankaɣ lɛɣʋ kewiyaɣ ñɔ-cɔlɔ, nɛ mankaɣ-kɛ cɛlʋʋ ña-lɩmɖʋyaa taa nɔɔyʋ.+ 12 Ɛlɛ ña-caa Daviid yɔɔ lɛ, maakaɣ labʋ mbʋ ñe-wezuu caɣʋ alɩwaatʋ taa. Ña-pɩyalʋ nesi tɛɛ mankaɣ-kɛ lɛɣʋ.+ 13 Ɛlɛ maakaɣ kewiyaɣ tɩŋa lɛɣʋ.+ Ma-lɩmɖʋyʋ Daviid yɔɔ nɛ Yeruzalɛm ŋgʋ malɩzaa yɔ kɩ-yɔɔ lɛ,+ mankaɣ cɛlʋʋ cejewiye kʋɖʋmɖɩyɛ ña-pɩyalʋ.»+
14 Nɛ Yehowa kʋsɩ koyindu nɔɔyʋ se ɛkaɖɩnɩ Salomɔɔ,+ ɛnʋ lɛ Edom tʋ Hadaadɩ, ɛkɛ Edom awiya hɔʋ taa tʋ.+ 15 Daviid kaawabɩ Edom lɛ,+ sɔɔjanaa ñʋʋdʋ Yowaabʋ ɖɛɛ nɛ ɛkpa se epi mba pakʋwa yɔ, nɛ ɛñaɣ pana se ɛkʋ abalaa tɩŋa Edom taa. 16 (Mbʋ pʋyɔɔ yɔ Yowaabʋ nɛ Izrayɛɛlɩ tɩŋa paacaɣ peeɖe fenasɩ 6 pɩkɔɔ pɩsɩɩnɩ alɩwaatʋ ndʋ ɛkʋ* abalaa tɩŋa Edom taa yɔ.) 17 Ɛlɛ Hadaadɩ nɛ ɛ-caa lɩmɖʋyaa taa nabɛyɛ, mba pɛkɛ Edom mba yɔ, pese nɛ powolo Ejipiti. Alɩwaatʋ ndʋ lɛ, Hadaadɩ kaakɛ pɩɣa evelaɣ yem. 18 Nɛ pakʋyɩnɩ Madiyaŋ nɛ powolo Paraanɩ. Pakpaɣ ɛyaa nɛ Paraanɩ+ nɛ pa nɛ wɛ powolo Ejipiti taa, Ejipiti wiyaʋ Farawɔɔ cɔlɔ, nɛ ɛlɛ ha-ɩ ɖɩɣa nakɛyɛ, tɔɔnaɣ, nɛ tɛtʋ. 19 Hadaadɩ tɔm kɛdɩnɩ Farawɔɔ siŋŋ, nɛ ɛlɛ ha-ɩ ɛ-maɣmaɣ ɛ-halʋ weyi payaɣ se abiɖe* Tapenɛɛsɩ yɔ e-neu nɛ ɛpɩsɩ ɛ-halʋ. 20 Pʋwayɩ lɛ, Tapenɛɛsɩ neu lʋlɩ-ɩ abalɩbɩɣa, payaɣ-kɛ se Genubaatɩ, nɛ Tapenɛɛsɩ cɔnɩ kɔ-yɔɔ* Farawɔɔ ɖɩɣa taa, nɛ Genubaatɩ caɣ Farawɔɔ ɖɩɣa taa, ɛ nɛ Farawɔɔ pɩyalaa.
21 Hadaadɩ wɛ Ejipiti lɛ, ɛnɩɩ se Daviid sɩba*+ nɛ ɛnɩɩ ɖɔɖɔ se sɔɔjanaa ñʋʋdʋ Yowaabʋ sɩba.+ Peeɖe Hadaadɩ heyi Farawɔɔ se: «Yebi-m nɛ mɛnɖɛɛ, nɛ mowolo mɛ-ɛjaɖɛ taa.» 22 Ɛlɛ Farawɔɔ pɔzɩ-ɩ se: «Ɛbɛ ŋtɛɖɩɣ mɔn-cɔlɔ cɩnɛ nɛ lɛɛlɛɛyɔ lɛ ŋñɩnɩɣ se ŋpɩsɩ ñɛ-ɛjaɖɛ taa?» Peeɖe ɛlɛ cosi-i se: «Maatɛɖɩɣ nabʋyʋ, ɛlɛ mentendi-ŋ yebi-m nɛ mɛnɖɛɛ.»
23 Ɛsɔ tasɩ kʋsʋʋ koyindu lɛlʋ se ɛkaɖɩnɩ Salomɔɔ,+ ɛnʋ lɛ Eliyada pɩyalʋ Rezoni, weyi eese ɛ-kɩbaɣlʋ, Zobaa wiyaʋ Hadadezɛɛrɩ+ cɔlɔ yɔ. 24 Rezoni kaakpeɣli ɛyaa ɛ-cɔlɔ nɛ ɛpɩsɩ ɛtɛlɛmwaa nabɛyɛ ñʋʋdʋ alɩwaatʋ ndʋ Daviid wabɩ* Zobaa mba yɔ.+ Peeɖe powobi Damaasɩ+ nɛ pacaɣ peeɖe nɛ papaɣzɩ kewiyitu tɔɔʋ Damaasɩ. 25 Nɛ ɛpɩsɩ Izrayɛɛlɩ koyindu Salomɔɔ alɩwaatʋ kpeekpe taa, pɩtasɩnɩ kañatʋ lakasɩ nzɩ Hadaadɩ laba yɔ, nɛ ɛpaɖɩ Izrayɛɛlɩ alɩwaatʋ ndʋ ɛtɔkaɣ kewiyitu Siirii yɔ.
26 Nɛ lɛlʋ ɖɔɖɔ lɛ Nebatɩ pɩyalʋ Yerobowam;+ ɛɛkɛ Efrayim tʋ nɛ ɛlɩnɩ Zereda. Ɛɛkɛ Salomɔɔ lɩmɖʋyʋ,+ payaɣ e-ɖoo se Zeruwa nɛ ɛlɛ kaakɛ lelu. Ɛnʋ ɖɔɖɔ ɛpaɣzɩ kaɖɩnʋʋ wiyaʋ.*+ 27 Pʋnɛ pʋyɔɔ ɛkaɖɩnɩ wiyaʋ: Salomɔɔ kaama Suyuu*+ nɛ ɛcɛyɩsɩ ɛ-caa Daviid Tɛtʋ.+ 28 Nɛ Yerobowam ɛnʋ ɛɛkɛ abalʋ weyi ɛmʋnaa* yɔ. Salomɔɔ nawa se evebu ɛnʋ ɛɛkɛ tʋmlaɖʋ weyi ɛwɛ kpekpeka yɔ lɛ, ɛlɩzɩ-ɩ se ɛkɛ Yosɛɛfʋ ɖɩɣa taa kɩjɛyʋʋ tʋma kpeekpe yɔɔ cɔnɩyʋ.+ 29 Alɩwaatʋ ndʋ tɩ-taa lɛ Yerobowam lɩɩ Yeruzalɛm taa, nɛ nayʋ Ahiya+ weyi ɛkɛ Siiloo tʋ yɔ ɛna-ɩ habɩyɛ yɔɔ. Ahiya kaasu toko kɩfalʋʋ nakʋyʋ, nɛ pa-naalɛ pe-ɖeke paawɛnɩ peeɖe. 30 Ahiya ɖɔkɩ toko kɩfalʋʋ ŋgʋ esuwa yɔ nɛ ɛcɩyɩ-kʋ hɔɔlasɩ 12. 31 Nɛ eheyi Yerobowam se:
«Kpaɣ ña-tɩ hɔɔlasɩ 10, mbʋ pʋyɔɔ yɔ tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ: “Na, mɛlɛɣʋ kewiyaɣ Salomɔɔ nesi tɛɛ, nɛ mankaɣ-ŋ cɛlʋʋ cejewe 10.+ 32 Ɛlɛ ma-lɩmɖʋyʋ Daviid yɔɔ,+ nɛ Yeruzalɛm tɛtʋ ndʋ malɩzɩ Izrayɛɛlɩ cejewe kpeekpe taa yɔ+ tɩ-yɔɔ lɛ, pɩkaɣ-ɩ kazʋʋ cejewiye kʋɖʋmɖɩyɛ.+ 33 Mankaɣ labʋ mbʋ, mbʋ pʋyɔɔ yɔ peyebi-m+ nɛ poluŋuu Siidɔɔ mba ɛsɔ halɩñɩnʋ Astoorɛɛtɩ tɛɛ, Mowaabʋ ɛsɔ Kemɔɔsɩ tɛɛ, nɛ Amooni mba ɛsɔ Milikɔm tɛɛ, nɛ patɩɖɔ ma-nʋmɔŋ taa se pala mbʋ pɩtʋʋzɩ mɛ-ɛsɩndaa nɛ pɔɖɔ man-paɣtʋ nɛ mɔn-tɔm hʋʋ yɔɔ ɛzɩ ɛ-caa Daviid labʋ yɔ. 34 Ɛlɛ maakaɣ mʋʋ kewiyaɣ tɩŋa e-nesi tɛɛ, nɛ mankaɣ yebu nɛ ɛkɛ ñʋʋdʋ mbʋ e-wezuu kɩyakɩŋ kpeekpe, ma-lɩmɖʋyʋ Daviid weyi malɩzaa yɔ ɛ-yɔɔ,+ mbʋ pʋyɔɔ yɔ ɛñam man-paɣtʋ nɛ man-kpalɩtʋ. 35 Ɛlɛ mankaɣ mʋʋ kewiyitu tɔɔʋ ɛ-pɩyalʋ nesi tɛɛ nɛ mɛncɛlɩ-ŋ tʋ, pʋ-tɔbʋʋ se cejewe 10.+ 36 Mankaɣ cɛlʋʋ ɛ-pɩyalʋ cejewiye kʋɖʋmɖɩyɛ, se pɩsa nɛ ma-lɩmɖʋyʋ Daviid wɛɛnɩ kanɖʋ mɛ-ɛsɩndaa tam Yeruzalɛm,+ tɛtʋ ndʋ malɩzaa se tɩkɛ lone nɖɩ ɖɩ-taa ma-hɩɖɛ wɛɣ yɔ. 37 Mankaɣ-ŋ lɩzʋʋ, nɛ ŋkaɣ tɔɔʋ kewiyitu mbʋ payɩ ñe-liu wɛɛ* yɔ pɩ-yɔɔ, nɛ ŋkaɣ pɩsʋʋ wiyaʋ Izrayɛɛlɩ yɔɔ. 38 Nɛ ye ŋñaŋ paɣtʋ ndʋ payɩ manɖʋʋ-ŋ yɔ nɛ ŋɖɔŋ ma-nʋmɔŋ taa nɛ ŋlakɩ mbʋ pɩtʋʋzɩ mɛ-ɛsɩndaa yɔ, pɩtɩŋnɩ ɛzɩma ŋñaŋ man-kpalɩtʋ nɛ man-paɣtʋ ɛzɩ ma-lɩmɖʋyʋ Daviid labʋ yɔ,+ mankaɣ wɛʋ ɖɔɖɔ ñɔ-cɔlɔ. Mankaɣ-ŋ maʋ ɖɩɣa ŋga kakaɣ leɖuu yɔ ɛzɩ mamaʋ ɖɩɣa Daviid yɔ,+ nɛ mankaɣ-ŋ cɛlʋʋ Izrayɛɛlɩ. 39 Nɛ pʋyɔɔ lɛ, mankaɣ luzuu Daviid lʋlʋʋ taa mba,+ ɛlɛ pɩɩkaɣ kɛʋ tam.”»+
40 Nɛ Salomɔɔ ñɩnɩ se ɛkʋ Yerobowam, ɛlɛ Yerobowam se nɛ ewolo Ejipiti, Ejipiti wiyaʋ+ Sisaakɩ+ cɔlɔ, nɛ ɛcaɣ Ejipiti nɛ pɩkɔɔ pɩtalɩ Salomɔɔ sɩm.
41 Piyele nɛ Salomɔɔ yɔɔ tɔm ndʋ pɩkazaa yɔ, mbʋ payɩ ɛlaba yɔ nɛ ɛ-lɔŋsɩnɖɛ, patɩma pɩ-tɔm Salomɔɔ yɔɔ tɔm takayaɣ taa yaa we?+ 42 Pɩnzɩ nzɩ* Salomɔɔ tɔɔ kewiyitu Yeruzalɛm, Izrayɛɛlɩ kpeekpe yɔɔ yɔ sɩkpɛndɩ pɩnzɩ 40. 43 Nɛ Salomɔɔ sɩ* nɛ pepimi-i ɛ-caa Daviid Tɛtʋ taa; nɛ ɛ-pɩyalʋ Robowam+ pɩsɩ wiyaʋ e-lone taa.