Awiya takayaɣ kajalaɣ ñɩŋga
22 You tɩkɔɔ Siirii nɛ Izrayɛɛlɩ pɛ-hɛkʋ taa pɩnzɩ naadozo. 2 Pɩnaɣ 3 ñɩŋga taa lɛ, Yuuda wiyaʋ Yozafaatɩ+ wolo se ɛna Izrayɛɛlɩ wiyaʋ.+ 3 Nɛ Izrayɛɛlɩ wiyaʋ heyi ɛ-lɩmɖʋyaa se: «Ɩnawa se ɖatɩnɩ Ramɔɔtɩ-Galaadɩ?+ Ɛlɛ ɖɩwɛɛ nɛ ɖɩlakɩ kaakendu nɛ ɖɩɩmʋʋ-kʋ Siirii wiyaʋ cɔlɔ.» 4 Nɛ ɛpɔzɩ Yozafaatɩ se: «Ŋkaɣ-m tɩŋʋʋ nɛ ɖiwolo ɖiyooni Ramɔɔtɩ-Galaadɩ?» Yozafaatɩ cosi Izrayɛɛlɩ wiyaʋ se: «Ma nɛ ŋ ɖɩkɛ ɛyʋ kʋɖʋm. Man-samaɣ kɛ ña-samaɣ. Man-kpaŋnaŋ kɛ ɖɔɖɔ ña-kpaŋnaŋ.»+
5 Ɛlɛ Yozafaatɩ heyi Izrayɛɛlɩ wiyaʋ se: «Mentendi-ŋ, calɩnɩ pɔzʋʋ+ Yehowa nɛ ŋna.»+ 6 Nɛ Izrayɛɛlɩ wiyaʋ kpeɣli nayaa, pɛkpɛndɩ ɛyaa ɛzɩ 400 mbʋ yɔ, nɛ ɛpɔzɩ-wɛ se: «Pɩwɛɛ se mowolo nɛ moyooni Ramɔɔtɩ-Galaadɩ yaa mantaawolo?» Pocosi-i se: «Wolo, nɛ Yehowa kaɣ-kʋ ɖʋzʋʋ wiyaʋ nesi tɛɛ.»
7 Nɛ Yozafaatɩ yɔɔdɩ se: «Yehowa tɛ nayʋ nɔɔyʋ fɛyɩ cɩnɛ yaa we? Yele nɛ ɖɩpɔzɩ ɛlɛ ɖɔɖɔ nɛ ɖɩna.»+ 8 Peeɖe Izrayɛɛlɩ wiyaʋ heyi Yozafaatɩ se: «Pɩkazɩ nɔɔyʋ ɖɔɖɔ, weyi ɛ-yɔɔ ɖɩpɩzɩɣ ɖɩtɩŋna nɛ ɖɩtɩlɩ Yehowa lɩmaɣza yɔ;+ ɛlɛ manpaɖɩɣ-ɩ,+ mbʋ pʋyɔɔ yɔ ɛɛyɔɔdʋʋ natʋ tɔm kɩbandʋ natʋyʋ mɔ-yɔɔ kaaʋ, ɛlɛ kɩdɛkɛdɩtʋ ɖeke.+ Ɛnʋ lɛ Imila pɩyalʋ Mikayiya.» Ɛlɛ, Yozafaatɩ cosi-i se: «Pɩtɩpɔzɩ se wiyaʋ ɛyɔɔdɩ mbʋ.»
9 Nɛ Izrayɛɛlɩ wiyaʋ yaa ɛ-ɖɩɣa taa kaɖɩka nakɛyɛ nɛ eheyi-kɛ se: «Kɔnɩ-m Imila pɩyalʋ Mikayiya lɛɛ lɛɛ.»+ 10 Izrayɛɛlɩ wiyaʋ nɛ Yuuda wiyaʋ Yozafaatɩ paasu awiya wondu, nɛ paa weyi ɛcaɣ e-kewiyaɣ kpelaɣ yɔɔ, tɔɔnaɣ ɖɩmaɖɛ kadaɣ taa, Samaarii tɛtʋ nɔnɔɔ taa, nɛ nayaa tɩŋa wɛɛ nɛ pɔyɔɔdʋʋ natʋ tɔm pɛ-ɛsɩndaa.+ 11 Nɛ Kenaana pɩyalʋ Zedekiya la ɛ-tɩ ñɩɣyʋʋ hɩŋ nɛ ɛyɔɔdɩ se: «Tɔm tʋnɛ Yehowa yɔɔdʋʋ: “Hɩŋ ɛnɛ ŋkaɣ yɔkɩnʋʋ* Siirii mba, pɩkɔɔ nɛ pɩtalɩ alɩwaatʋ ndʋ ŋɖɩzɩ-wɛ yɔ.”» 12 Nayaa lalaa kpeekpe wɛɛ nɛ pɔyɔɔdʋʋ natʋ tɔm kʋyʋmtʋ ndʋ nɛ pɔtɔŋ se: «Wolo Ramɔɔtɩ-Galaadɩ nɛ ŋkaɣ wabʋ; Yehowa kaɣ-kʋ ɖʋzʋʋ wiyaʋ nesi tɛɛ.»
13 Nɛ weyi petiyaa se ewolo nɛ ɛyaa Mikayiya yɔ eheyi Mikayiya se: «Na! Nayaa tɩŋa yɔɔdʋʋ tɔm kɩbandʋ wiyaʋ yɔɔ, nɛ tɩkɛ kʋɖʋmtʋ. Mentendi-ŋ, yele nɛ ñɔ-tɔm wɛɛ ɛzɩ pa-ñɩndʋ yɔ, nɛ ŋyɔɔdɩ tɔm kɩbandʋ.»+ 14 Ɛlɛ Mikayiya heyi-i se: «Yehowa ñɩtʋʋ nɛ ɛwɛɛ wezuu yɔ, tɔm ndʋ Yehowa heyiɣ-m yɔ ndʋ mankaɣ yɔɔdʋʋ.» 15 Nɛ ewolo wiyaʋ cɔlɔ, nɛ wiyaʋ pɔzɩ-ɩ se: «Mikayiya, pɩwɛɛ se ɖiwolo nɛ ɖiyooni Ramɔɔtɩ-Galaadɩ, yaa ɖitaawolo?» Kpaagbaa mbʋ lɛ ecosi-i se: «Wolo, nɛ ŋkaɣ wabʋ; Yehowa kaɣ-kʋ ɖʋzʋʋ wiyaʋ nesi tɛɛ.» 16 Peeɖe wiyaʋ heyi-i se: «Tam ɛzɩma pɩwɛɛ se mɔnpɔzɩ-ŋ se ŋɖuu se toovenim tɔm ɖeke ŋheyiɣ-m Yehowa hɩɖɛ taa?» 17 Nɛ Mikayiya yɔɔdɩ se: «Manaɣ Izrayɛɛlɩ mba kpeekpe mɩzɩ pʋŋ yɔɔ,+ ɛzɩ heŋ weyi ɩfɛyɩnɩ ninɖiɣyu yɔ. Yehowa yɔɔdaa se: “Pɛfɛyɩnɩ ñʋʋdʋ. Paa weyi lɛ, ɛpɩsɩ ɛ-ɖɩɣa taa nɛ laŋhɛzɩyɛ.”»
18 Peeɖe Izrayɛɛlɩ wiyaʋ heyi Yozafaatɩ se: «Mantaaheyi-ŋ se: “Ɛɛkaɣ yɔɔdʋʋ natʋ tɔm kɩbandʋ natʋyʋ mɔ-yɔɔ, ɛlɛ kɩdɛkɛdɩtʋ ɖeke”?»+
19 Nɛ Mikayiya yɔɔdɩ se: «Pʋyɔɔ lɛ, nɩɩ Yehowa tɔm: Mana Yehowa caɣ e-kewiyaɣ kpelaɣ yɔɔ+ nɛ ɛsɔdaa yoyaa kpeekpe sɩŋ ɛ-cɔlɔ, ɛ-nɩwaŋ yɔɔ nɛ ɛ-nɩmɩyɛ yɔɔ.+ 20 Nɛ Yehowa pɔzɩ se: “Akaɣ peɣzuu Ahaabɩ nɛ pɩsa nɛ ɛkpa nɛ ɛsɩ Ramɔɔtɩ-Galaadɩ?” Nɛ Ɛsɔ tiyiyu nɔɔyʋ yɔɔdʋʋ tʋnɛ lɛ, lɛlʋ ñɔyɔɔdʋʋ lɛɛtʋ. 21 Nɛ fezuu*+ nakʋyʋ lɩɩ nɛ kiwolo nɛ kɩsɩŋ Yehowa ɛsɩndaa nɛ kɩyɔɔdɩ se: “Mankaɣ-ɩ peɣzuu.” Yehowa pɔzɩ-kʋ se: “Ɛzɩma ŋkaɣ labʋ?” 22 Kicosi se: “Mankaɣ lɩʋ nɛ manpɩsɩ fezuu ŋgʋ kipeɣziɣ yɔ ɛ-nayaa tɩŋa nɔsɩ taa.”+ Peeɖe eheyi-kʋ se: “Ŋkaɣ-ɩ peɣzuu, nɛ halɩ ŋkaɣ wabʋ. Lɩɩ nɛ ŋla mbʋ.” 23 Nɛ lɛɛlɛɛyɔ lɛ, Yehowa ɖʋ fezuu ŋgʋ kipeɣziɣ yɔ ña-nayaa panɛ pa-tɩŋa pɔ-nɔsɩ taa,+ ɛlɛ Yehowa ɖʋwa se asɛyʋʋ kaɣ-ŋ talʋʋ.»+
24 Nɛ Kenaana pɩyalʋ Zedekiya ñɔtɩ ɛ-tɩ nɛ ɛcɛ Mikayiya kadaŋa nɛ ɛpɔzɩ-ɩ se: «Ye mbʋ, Yehowa fezuu kʋyɩ mɔ-yɔɔ nɛ kɩkɔɔ kɩyɔɔdɩnɩ-ŋ? Nʋmɔʋ ŋgʋ kɩtɩŋnaa?»+ 25 Mikayiya cosi-i se: «Ŋkaɣ naʋ nʋmɔʋ ŋgʋ kɩtɩŋnaa yɔ kɩyakʋ ŋgʋ ŋkaɣ sʋʋ ɖooo pɩ-taa kuduyuu taa se ŋmɛlɩ yɔ.» 26 Peeɖe Izrayɛɛlɩ wiyaʋ yɔɔdaa se: «Ɩkpaɣ Mikayiya nɛ ɩɖʋzɩ-ɩ tɛtʋ ñʋʋdʋ Amɔɔnɩ nɛ wiyaʋ pɩyalʋ Yowaasɩ pe-nesi tɛɛ. 27 Iheyi-wɛ se: “Tɔm tʋnɛ wiyaʋ yɔɔdʋʋ: ‘Ɩɖʋ ɛyʋ ɛnɛ salaka taa+ nɛ ɩpasɩ kpɔnɔ nɛ lɩm mbʋ pɩwɛɛ se paha-ɩ yɔ pɩ-yɔɔ nɛ pɩkɔɔ pɩsɩɩnɩ alɩwaatʋ ndʋ manpɩsɩɣ mɔnkɔmnɩ laŋhɛzɩyɛ yɔ.’”» 28 Ɛlɛ Mikayiya heyi-i se: «Ye ŋpɩsaa nɛ ŋkɔmnɩ laŋhɛzɩyɛ yɔ, pʋbʋ Yehowa tɩyɔɔdɩnɩ-m.»+ Nɛ ɛsɔzɩ se: «Ɩyʋsɩ-tʋ, mɩ ɛyaa samasɩ tɩŋa.»
29 Nɛ Izrayɛɛlɩ wiyaʋ nɛ Yuuda wiyaʋ Yozafaatɩ pakpa Ramɔɔtɩ-Galaadɩ.+ 30 Nɛ Izrayɛɛlɩ wiyaʋ heyi Yozafaatɩ se: «Mankaɣ lɛɣzʋʋ mɛ-wɛtʋ se pataatɩlɩ-m nɛ mowolo you taa; ɛlɛ ña lɛ, pɩwɛɛ se ŋsuu ña-awiya wondu.» Mbʋ Izrayɛɛlɩ wiyaʋ lɛɣzɩ ɛ-wɛtʋ se pataatɩlɩ-ɩ+ nɛ ɛsʋʋ you taa. 31 Siirii wiyaʋ kaaɖʋ paɣtʋ ɛ-kɛɛkɛɛnaa ñʋndɩnaa 32+ se: «Itaayooni nɔɔyʋ, paa ɛtɩɩkɛ cikpelu yaa sɔsɔ yɔ, ɛlɛ iyooni Izrayɛɛlɩ wiyaʋ ɖeke.» 32 Nɛ kɛɛkɛɛnaa ñʋndɩnaa tɩɩna Yozafaatɩ lɛ, pamaɣzɩ se: «Pɩtʋʋ fɛyɩ se Izrayɛɛlɩ wiyaʋ lɛ.» Peeɖe papɩsɩnɩ ɛ-yɔɔ se poyooni-i; nɛ Yozafaatɩ paɣzɩ kubusi mabʋ se pasɩnɩ-ɩ. 33 Kɛɛkɛɛnaa ñʋndɩnaa nawa se pɩtɩkɛ Izrayɛɛlɩ wiyaʋ lɛ, pacaŋ peyele ɛ-wayɩ ɖʋʋ.
34 Ɛlɛ nɔɔyʋ tɔ ɛ-tɔʋ yem* nɛ pɩyaɣ Izrayɛɛlɩ wiyaʋ, ɛ-ñɩɣyʋʋ toko ɖɩdanɖɛ naɖɩyɛ taa. Nɛ wiyaʋ heyi ɛ-kɛɛkɛɛ sayʋ se: «Kɛzɩ ña-tɩ nɛ ŋlɩzɩ-m you* taa, mbʋ pʋyɔɔ yɔ paɖʋ-m heŋ siŋŋ.»+ 35 You kaasa miŋ siŋŋ evemiye nɖɩ ɖɩ-tɩŋa, nɛ pɩpɔzɩ se pɔɖɔkɩ wiyaʋ nɛ ɛsɩŋ kɛɛkɛɛ taa nɛ ɛpa ɛsa nɛ Siirii mba. E-heŋ taa calɩm kpeŋaɣ you kɛɛkɛɛ taa; nɛ ɛsɩ ɖanaɣ yɔɔ.+ 36 Wɩsɩ ɖʋwaɣ lɛ, pama kubuka ɖigbeɣliye* taa nɛ posusi se: «Paa weyi lɛ, ɛpɩsɩ ɛ-tɛtʋ taa! Paa weyi lɛ, ɛpɩsɩ ɛ-ɛjaɖɛ taa!»+ 37 Mbʋ wiyaʋ sɩba, nɛ powoni-i Samaarii; nɛ pepimi-i peeɖe. 38 Pañalɩ you kɛɛkɛɛ Samaarii lɩŋgamʋʋ cɔlɔ lɛ, hasɩ nezi ɛ-calɩm nɛ hayitu laɖaa sɔ lɩm peeɖe,* ɛzɩ Yehowa kaayɔɔdʋʋ yɔ.+
39 Piyele nɛ Ahaabɩ yɔɔ tɔm ndʋ pɩkazaa yɔ, mbʋ payɩ ɛlaba yɔ nɛ tukeɖe+ ɖɩɣa* ŋga ɛmawa yɔ nɛ tɛtʋ ndɩ ndɩ ndʋ ɛmawa yɔ, patɩma pɩ-tɔm mbʋ pɩlakaɣ Izrayɛɛlɩ awiya alɩwaatʋ taa yɔ pɩ-takayaɣ taa yaa we? 40 Pʋwayɩ lɛ, Ahaabɩ sɩ;*+ nɛ ɛ-pɩyalʋ Okoziyaasɩ+ pɩsɩ wiyaʋ e-lone taa.
41 Aazaa pɩyalʋ Yozafaatɩ+ pɩsɩ Yuuda wiyaʋ, Izrayɛɛlɩ wiyaʋ Ahaabɩ kewiyitu tɔɔʋ pɩnaɣ 4 ñɩŋga taa. 42 Yozafaatɩ kaawɛnɩ pɩnzɩ 35 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 25 Yeruzalɛm. Payaɣaɣ e-ɖoo se Azuba, Silii pɛlɛ. 43 Ewobi pɩ-yɔɔ nɛ ɛɖɔŋ ɛ-caa Aazaa+ nʋmɔŋ kpeekpe taa. Etiyebi-i nɛ ɛkɛɛnɩ hɔɔlʋʋ, nɛ ɛlabɩ mbʋ pɩtʋʋzɩ Yehowa ɛsɩndaa yɔ.+ Paa mbʋ yɔ, patɩyɔkɩ lona kʋkʋya, nɛ samaɣ kaawɛɛ nɛ kalaɣ kɩlaŋ nɛ kalakɩ nɛ lona kʋkʋya yɔɔ kɩlaŋ ñɔsɩ kpaɣ mbʋ.+ 44 Yozafaatɩ kaayeba nɛ laŋhɛzɩyɛ wɛɛ ɛ nɛ Izrayɛɛlɩ wiyaʋ pɛ-hɛkʋ taa.+ 45 Piyele nɛ Yozafaatɩ yɔɔ tɔm ndʋ pɩkazaa yɔ, ɛ-abalɩtʋ tʋma sɔsɔna nɛ ɛzɩma ɛlabɩ you yɔ, patɩma pɩ-tɔm mbʋ pɩlakaɣ Yuuda awiya alɩwaatʋ taa yɔ pɩ-takayaɣ taa yaa we? 46 Ɛɖɔɔnɩ ɖɔɖɔ templo taa abalaa hayitu laɖaa,+ mba pɩɩkazɩ ɛ-caa Aazaa alɩwaatʋ taa yɔ ɛjaɖɛ taa.+
47 Nɛ wiyaʋ nɔɔyʋ taawɛɛ Edom;+ kaɖɩka nakɛyɛ lakaɣnɩ tʋmɩyɛ wiyaʋ lone taa.+
48 Yozafaatɩ labɩ ɖɔɖɔ Tarɩsiisi mɛlɛnaa* se powolo Ofiiri nɛ pakpaɣ sika nɛ pɔkɔna,+ ɛlɛ patɩpɩzɩ nɛ powolo mbʋ pʋyɔɔ yɔ mɛlɛnaa mba pɔyɔkɩ Eziyɔnɩ-Gebɛɛrɩ+ taa. 49 Peeɖe Ahaabɩ pɩyalʋ Okoziyaasɩ heyi Yozafaatɩ se: «Yele nɛ ma-lɩmɖʋyaa nɛ ña-lɩmɖʋyaa pacaɣ mɛlɛnaa taa nɛ powolo,» ɛlɛ Yozafaatɩ titisi.
50 Pʋwayɩ lɛ, Yozafaatɩ sɩ*+ nɛ pepimi-i ɛ-cɔzɔnaa cɔlɔ, ɛ-cɔzɔ Daviid Tɛtʋ taa; nɛ ɛ-pɩyalʋ Yehoram+ pɩsɩ wiyaʋ e-lone taa.
51 Ahaabɩ pɩyalʋ Okoziyaasɩ+ pɩsɩ Izrayɛɛlɩ wiyaʋ Samaarii taa, Yuuda wiyaʋ Yozafaatɩ pɩnaɣ 17 ñɩŋga taa, nɛ ɛtɔɔ kewiyitu pɩnzɩ 2 Izrayɛɛlɩ taa. 52 Nɛ ewolo pɩ-yɔɔ nɛ ɛlakɩ mbʋ pɩfɛyɩ ɖeu Yehowa ɛsɩndaa yɔ nɛ ɛɖɔŋ ɛ-caa+ nɛ e-ɖoo+ pa-nʋmɔʋ taa, nɛ Nebatɩ pɩyalʋ Yerobowam weyi eeyeba nɛ Izrayɛɛlɩ la kɩwɛɛkɩm yɔ+ ɛ-nʋmɔʋ taa. 53 Ewobi pɩ-yɔɔ nɛ ɛsɛɣ Baalɩ+ nɛ eluŋuu ɛ-tɛɛ nɛ ɛwɛɛ nɛ ɛɖʋʋ Izrayɛɛlɩ tɛ Ɛsɔ Yehowa ɖɩwɩzɩyɛ,+ ɛzɩ ɛ-caa kaalabʋ yɔ.