Kroniiki takayaɣ kajalaɣ ñɩŋga

11 Pʋwayɩ lɛ, Izrayɛɛlɩ mba tɩŋa kpeɣli Daviid cɔlɔ Ebrɔŋ+ nɛ peheyi-i se: «Na! Ðɩkɛ ña-maɣmaɣ ñɔ-mɔɔyɛ nɛ ño-tomnaɣ.*+ 2 Sɔɔlɩ kaakɛ wiyaʋ alɩwaatʋ ndʋ tɩɖɛwa yɔ tɩ-taa lɛ, ñaakɛnɩ weyi eɖiyaɣ Izrayɛɛlɩ yoŋ yɔ.*+ Nɛ ñɛ-Ɛsɔ Yehowa heyi-ŋ se: “Ŋkaɣ ɖiyuu man-samaɣ Izrayɛɛlɩ, nɛ ŋkaɣ pɩsʋʋ man-samaɣ Izrayɛɛlɩ ñʋʋdʋ.”»+ 3 Nɛ Izrayɛɛlɩ ɛzʋtʋyaa kpeekpe wolo wiyaʋ cɔlɔ Ebrɔŋ, nɛ pa nɛ Daviid paɖʋ ɛgbɛyɛ Ebrɔŋ, Yehowa ɛsɩndaa. Pʋwayɩ lɛ, pataa Daviid num nɛ ɛpɩsɩ wiyaʋ Izrayɛɛlɩ yɔɔ,+ ɛzɩ Yehowa kaatɩŋnʋʋ Samɩyɛɛlɩ yɔɔ nɛ ɛyɔɔdɩ yɔ.+

4 Pʋwayɩ lɛ, Daviid nɛ Izrayɛɛlɩ kpeekpe palɩɩ se pɛɖɛɛ Yeruzalɛm, pʋ-tɔbʋʋ se Yebuusi,+ egeetiye nɖɩ ɖɩ-taa Yebuusi mba+ kaawɛɛ yɔ. 5 Yebuusi mba hoŋ Daviid nɛ peheyi-i se: «Ŋŋkaɣ sʋʋ cɩnɛ kpa!»+ Ɛlɛ Daviid mʋ Siyɔŋ+ tɛtʋ ɖoŋ ñɩndʋ, nɛ ndʋ payaɣ lɛɛlɛɛyɔ se Daviid Tɛtʋ.+ 6 Nɛ Daviid yɔɔdɩ se: «Weyi ɛcalɩɣ yonuu Yebuusi mba yɔ, ɛkaɣ pɩsʋʋ ñʋʋdʋ nɛ awumbu.» Nɛ Zeruyaa pɩyalʋ Yowaabʋ+ calɩ kpaʋ pa-wayɩ, nɛ ɛpɩsɩ ñʋʋdʋ. 7 Nɛ Daviid caɣ tɛtʋ ɖoŋ ñɩndʋ taa. Pʋyɔɔ paya-tʋ se Daviid Tɛtʋ. 8 Daviid paɣzɩ maʋ tɛtʋ pɩ-cɔlɔ kpɛɛɛ, kpaɣnɩ Suyuu* nɛ kɩ-cɔlɔ kpɛɛɛ, nɛ Yowaabʋ ɖaɣnɩ ñɔɔzʋʋ tɛtʋ hɔɔlɩŋ weyi ɩkazaa yɔ. 9 Nɛ Daviid wɛɛ nɛ ɛkpaɣ ɖoŋ pɩdɩɩfɛyɩ,+ nɛ yoyaa tɛ Yehowa kaawɛ ɛ-cɔlɔ.

10 Nɛ Daviid sɔdɩŋ ɖoŋ tɩnaa ñʋndɩnaa yɔ, mba pa nɛ Izrayɛɛlɩ kpeekpe paɖʋ nesi e-kewiyitu siŋŋ, se papɩsɩ-ɩ wiyaʋ ɛzɩ Yehowa kaaheyuu Izrayɛɛlɩ yɔ.+ 11 Daviid sɔdɩŋ ɖoŋ tɩnaa hɩla yɔ: Hakɩmonii tʋ nɔɔyʋ pɩyalʋ Yasobeyam;+ ɛkɛ sɔdɩŋ 3 ñʋʋdʋ.+ Kɩyakʋ nakʋyʋ ɛkpaɣ ɛ-kɩgbɛzɛŋ nɛ ɛkʋnɩ ɛyaa 300.+ 12 Ɛ-wayɩ lɛ, Ahohi tʋ+ Dodo pɩyalʋ Eleyaazaarɩ.+ Ɛɛwɛ sɔdɩŋ ɖoŋ tɩnaa 3 waa mba pa-taa. 13 Ɛɛwɛ Daviid cɔlɔ Pas-Damiim,+ ɖenɖe Filistii mba kaakpeɣlaa se pala you yɔ. Nɛ kotoŋa nakɛyɛ kaawɛ peeɖe, orjɩ* su ka-taa, nɛ Filistii mba yɔɔ lɛ, ɛyaa kaasewa. 14 Ɛlɛ ɛsɩŋ hayɩm mbʋ pɩ-hɛkʋ taa nɛ ɛlʋ pɩ-yɔɔ nɛ ɛwɛɛ Filistii mba kʋʋ yɔɔ, nɛ Yehowa kɔnɩ wabɩtʋ sɔsɔtʋ.*+

15 Ñʋndɩnaa 30 taa ɛyaa 3 tii kaaʋ cɔlɔ, Daviid cɔlɔ Adulam ɛwaɣ pɔʋ+ cɔlɔ, alɩwaatʋ ndʋ tɩ-taa lɛ, Filistii mba sɔɔjanaa nabɛyɛ kaakpeɣli Refayim Fɛɛʋ* taa.+ 16 Alɩwaatʋ ndʋ lɛ, Daviid kaawɛ ɖɩjɔzɩyɛ taa, nɛ Filistii mba sɔɔjanaa tikaɣ nakɛyɛ ñaawɛ Bɛtɩlɛhɛm. 17 Nɛ Daviid yɔɔdɩ se: «Ye maapɩzaɣ se mehiɣ Bɛtɩlɛhɛm+ nɔnɔɔ cɔlɔ lɔkɔ* taa lɩm nɛ mɔñɔɔ yɔ, pɩɩkɛdɩnɩ-m!» 18 Peeɖe ɛyaa ɖoŋ tɩnaa 3 mba, pasʋnɩ ɖoŋ Filistii mba sɔɔjanaa ɖigbeɣliye* taa nɛ polu lɩm Bɛtɩlɛhɛm nɔnɔɔ cɔlɔ lɔkɔ* taa nɛ pɔkɔnɩ-pʋ Daviid; ɛlɛ Daviid kizi se ɛɛñɔʋ-pʋ nɛ ɛpɩyɩ-pʋ tataa Yehowa ɛsɩndaa. 19 Nɛ ɛyɔɔdɩ se: «Pɩɩwɛɣ ɖeu kpa mɛ-Ɛsɔ ɛsɩndaa se mala mbʋ! Ɛzɩ pɩpɔzʋʋ se mɔñɔɔ ɛyaa panɛ, mba paɖʋ pe-weziŋ* kaɖɛ taa yɔ, pa-calɩm na?+ Mbʋ pʋyɔɔ yɔ, pe-weziŋ* paɖʋ kaɖɛ taa nɛ pɔkɔnɩ-pʋ.» Nɛ ekizi se ɛɛñɔʋ-pʋ. Mbʋ mbʋ ɛ-sɔdɩŋ ɖoŋ tɩnaa 3 waa mba palaba yɔ, mbʋ lɛ.

20 Yowaabʋ+ ɖalʋ* Abisayii+ kaakɛ 3 waa lalaa ñʋʋdʋ; ɛkpaɣ ɛ-kɩgbɛzɛŋ nɛ ɛkʋ ɛyaa 300, nɛ ɛ-hɩɖɛ kaasɛwa ɖɔɖɔ ɛzɩ sɔdɩŋ 3 waa mba yɔ.+ 21 Naadozo waa lalaa taa lɛ, ɛ-hɩɖɛ kaasɛ siŋŋ nɛ pɩkɩlɩ pa-taa 2, nɛ ɛkɛ pa-ñʋʋdʋ; paa mbʋ yɔ, ɛ-hɩɖɛ tɩsɛɛ nɛ pɩtalɩ 3 waa kajalaɣ ñɩma.

22 Yehoyiyada pɩyalʋ Benayaa+ kaakɛ abalʋ weyi ɛwɛ abalɩtʋ yɔ,* nɛ ɛlabɩ abalɩtʋ tʋma sakɩyɛ Kabɩzeyɛɛlɩ+ tɛtʋ taa. Ɛkʋ Mowaabʋ tʋ Ariyɛɛlɩ pɩyalaa 2 mba ɛlɛ kaawɛna yɔ, nɛ etii pɔʋ nakʋyʋ taa ɖɔmbɛɛ alɩwaatʋ taa nɛ ɛkʋ mʋʋzʋʋ.+ 23 Ɛkʋ ɖɔɖɔ Ejipiti abalʋ nɔɔyʋ, weyi ɛ-paɣlɩka kaawɛ ŋgee kpem yɔ—ɛ-ɖaɣlɩkɩŋ kaakɛ nuŋgolonzi 5.*+ Paa Ejipiti tʋ ɛnʋ ɛɛɖɔkɩ kɩgbɛzɛŋ ŋgʋ kɩwɛ ɛzɩ pɩsaŋ lʋyaa ɖaʋ yɔ e-nesi tɛɛ yɔ,+ Benayaa wobi ɛ-wayɩ nɛ ɖaʋ nɛ ɛmʋ kɩgbɛzɛŋ Ejipiti tʋ nesi tɛɛ nɛ ɛkʋ-ɩ nɛ kɩgbɛzɛŋ ŋgʋ.+ 24 Abalɩtʋ tʋma ana Yehoyiyada pɩyalʋ Benayaa laba, nɛ ɛ-hɩɖɛ kaasɛwa ɛzɩ sɔdɩŋ 3 waa lalaa yɔ. 25 Paa ɛ-hɩɖɛ kaasɛwa nɛ pɩkɩlɩ 30 waa yɔ, ɛ-hɩɖɛ tɩsɛɛ nɛ pɩtalɩ 3 waa mba.+ Paa mbʋ yɔ Daviid lɩzɩ-ɩ nɛ ɛkɛ sɔɔjanaa mba pakandɩyɩɣ ɛ-yɔɔ yɔ pa-ñʋʋdʋ.

26 Sɔɔjanaa taa sɔdɩŋ ɖoŋ tɩnaa yɔ: Yowaabʋ neu* Asayɛlɩ,+ Bɛtɩlɛhɛm tʋ+ Dodo pɩyalʋ Elanaanɩ, 27 Harɔɔrɩ tʋ Samɔɔtɩ, Peloni tʋ Helɛɛzɩ, 28 Tekowa tʋ Ikɛɛsɩ pɩyalʋ Ira,+ Anatɔɔtɩ tʋ Abi-Ezɛɛrɩ,+ 29 Husa tʋ Sibekaayɩ,+ Ahohi tʋ Ilayii, 30 Netofa tʋ Maharaayɩ,+ Netofa tʋ Baanaa pɩyalʋ Helɛɛdɩ,+ 31 Bɛnjamɛɛ mba+ tɛ Gibeyaa tʋ Ribaayɩ pɩyalʋ Itayii, Piratɔɔnɩ tʋ Benayaa, 32 Gaasɩ+ lemisi* taa tʋ Hurayii, Araba tʋ Abɩyɛɛlɩ, 33 Baharumi tʋ Azɩmavɛɛtɩ, Saalibim tʋ Eliyaba, 34 Gizonɩ tʋ Asɛɛm pɩyalaa, Araari tʋ Sagee pɩyalʋ Yonataanɩ, 35 Araari tʋ Sakaarɩ pɩyalʋ Ahiyam, Uuri pɩyalʋ Elifaalɩ, 36 Mekeratɩ tʋ Hefɛɛrɩ, Peloni tʋ Ahiya, 37 Karmɛɛlɩ tʋ Ɛzɩroo, Ɛzɩbaayɩ pɩyalʋ Naaraayɩ, 38 Naataanɩ neu Yowɛɛlɩ, Agɩrii pɩyalʋ Mibaarɩ, 39 Amooni tʋ Zelɛɛkɩ, Berɔɔtɩ tʋ Naharayɩ, weyi ɛɖɔkaɣ Zeruyaa pɩyalʋ Yowaabʋ you wondu yɔ; 40 Itri tʋ Ira, Itri tʋ Garɛɛbɩ, 41 Hɛɛtɩ tʋ Uriya,+ Alayɩ pɩyalʋ Zabaadɩ, 42 Rubɛɛnɩ tʋ Siza pɩyalʋ Adina, ɛkɛ Rubɛɛnɩ mba ñʋʋdʋ, nɛ ɛyaa 30 kaawɛ ɛ-cɔlɔ; 43 Maaka pɩyalʋ Hanaanɩ, Mitnii tʋ Yosafaatɩ, 44 Astarɔtɩ tʋ Uuziya, Arowɛɛrɩ tʋ Hotam pɩyalaa Sama nɛ Yeyiyɛɛlɩ; 45 Simirii pɩyalʋ Yediyayɛɛlɩ, nɛ e-neu Tizii tʋ Yoha; 46 Mahavi tʋ Eliyɛɛlɩ, Ɛlɩnaam pɩyalaa Yeribaayɩ nɛ Yosaviya, nɛ Mowaabʋ tʋ Itimaa; 47 Eliyɛɛlɩ, Obɛɛdɩ, nɛ Mezoba tʋ Yaasiyɛɛlɩ.