Kroniiki takayaɣ naalɛ ñɩŋga
10 Nɛ Robowam wolo Sekɛɛm,+ mbʋ pʋyɔɔ yɔ Izrayɛɛlɩ kpeekpe kaawobi Sekɛɛm se pasɩɩ-ɩ wiyaʋ.+ 2 Nebatɩ pɩyalʋ Yerobowam+ tɩɩnɩ-tʋ lɛ, ɛlɩɩnɩ Ejipiti nɛ ɛpɩsɩ (ɛɛwɛ Ejipiti mbʋ, mbʋ pʋyɔɔ yɔ Wiyaʋ Salomɔɔ yɔɔ lɛ, eesewa).+ 3 Peeɖe petiyi ɛyaa nɛ powolo payaa-ɩ; nɛ Yerobowam nɛ Izrayɛɛlɩ kpeekpe powolo Robowam cɔlɔ nɛ peheyi-i se: 4 «Ña-caa yeba nɛ ɖa-sʋʋtʋ ɖaʋ nɩɩ-ɖʋ pɩdɩɩfɛyɩ.+ Ɛlɛ ye ŋyeba nɛ tʋmɩyɛ kaɖɛ ñɩnɖɛ nɖɩ ña-caa kaaɖʋ-ɖʋ yɔ ɖɩpasɩ nɛ ŋla nɛ sʋʋtʋ ɖaʋ yuŋ ñɩŋgʋ* ŋgʋ ɛsʋʋ-ɖʋ yɔ kɩwɛɛ hʋnjaŋ yɔ, ɖɩkaɣ-ŋ ɖʋʋ lɩm.»
5 Peeɖe eheyi-wɛ se: «Ɩpɩsɩ nɛ ɩkɔɔ mɔn-cɔlɔ kɩyakɩŋ 3 wayɩ.» Nɛ samaɣ ɖɛɛ.+ 6 Nɛ Wiyaʋ Robowam pɔzɩ lɔŋ tasʋʋ ɛyaa mba pasʋtʋyaa* nɛ pa nɛ ɛ-caa Salomɔɔ paalabɩ tʋmɩyɛ alɩwaatʋ ndʋ ɛlɛ kaawɛnɩ ɛ-ɛsa yɔ se: «Lɔŋ weyi ɩtasɩɣ-m pɩlɩɩnɩ ɛzɩma pɩwɛɛ se moncosi samaɣ kanɛ yɔ pɩ-yɔɔ?» 7 Pocosi-i se: «Ye ŋlabɩ samaɣ kanɛ kɩbandʋ nɛ ŋla mbʋ pɩkɛdɩɣnɩ-kɛ yɔ nɛ ŋcosi-kɛ camɩyɛ yɔ, kakaɣ-ŋ lɩm ɖʋʋ tam.»
8 Ɛlɛ ekizi nɛ ɛtɩɖɔ lɔŋ weyi ɛyaa mba pasʋtʋyaa yɔ* patasɩ-ɩ yɔ ɩ-yɔɔ, nɛ ɛpɔzɩ lɔŋ tasʋʋ evebiya mba pɛkɛ ɛ-ɖaɣʋnaa* nɛ pɛkɛ lɛɛlɛɛyɔ ɛ-lɩmɖʋyaa yɔ.+ 9 Ɛpɔzɩ-wɛ se: «Lɔŋ weyi ɩtasɩɣ-m pɩlɩɩnɩ ɛzɩma pɩwɛɛ se ɖicosi samaɣ kanɛ yɔ pɩ-yɔɔ? Keheyi-m se: “Yele nɛ sʋʋtʋ ɖaʋ ŋgʋ ña-caa sʋʋ-ɖʋ yɔ ki-yuŋ pasɩ.”» 10 Evebiya mba pɛkɛ ɛ-ɖaɣʋnaa yɔ,* pocosi-i se: «Tɔm tʋnɛ pɩwɛɛ se ŋcosi samaɣ ŋga keheyi-ŋ se: “Ña-caa yeba nɛ ɖa-sʋʋtʋ ɖaʋ wɛɛ yuŋ, ɛlɛ pɩwɛɛ se ŋyele nɛ ki-yuŋ pasɩ” yɔ; tɔm tʋnɛ pɩwɛɛ se ŋcosi-wɛ: “Me-niye cikpeɖe kaɣ kpeetuu nɛ pɩkpaɖɩ man-caa tɩnaɣ taa. 11 Man-caa kaatɩnɩ mɩ-yɔɔ sʋʋtʋ ɖaʋ yuŋ ñɩŋgʋ, ɛlɛ ma lɛ mankaɣ ki-yuŋ yɔɔ suyuu. Man-caa kaahɔm mɩ-nɩŋgbaaŋ nɛ agbazɛɛ yem, ɛlɛ ma lɛ mankaɣ mɩ-nɩŋgbaaŋ hɔm nɛ agbazɛɛ wena a-yɔɔ nɛ ñɩma yɔ.”»
12 Yerobowam nɛ samaɣ kpeekpe powolo Robowam cɔlɔ kɩyakʋ tozo ñɩŋgʋ wiye, ɛzɩ wiyaʋ kaaheyuu-wɛ se: «Ɩpɩsɩ nɛ ɩkɔɔ mɔn-cɔlɔ kɩyakʋ tozo ñɩŋgʋ wiye» yɔ.+ 13 Ɛlɛ wiyaʋ cosi-wɛ nɛ kañatʋ tɔm. Mbʋ Wiyaʋ Robowam kizi ɛyaa mba pasʋtʋyaa yɔ* pɔ-lɔŋ tasʋʋ. 14 Ecosi-wɛ ɛzɩ evebiya kaatasʋʋ-ɩ lɔŋ yɔ nɛ ɛyɔɔdɩ se: «Mankaɣ yebu nɛ mɩ-sʋʋtʋ ɖaʋ wɛɛ yuŋ nɛ pɩkɩlɩ, nɛ mankaɣ ki-yuŋ yɔɔ suyuu. Man-caa kaahɔm mɩ-nɩŋgbaaŋ nɛ agbazɛɛ yem, ɛlɛ ma lɛ mankaɣ mɩ-nɩŋgbaaŋ hɔm nɛ agbazɛɛ wena a-yɔɔ nɛ ñɩma yɔ.» 15 Nɛ wiyaʋ tiwelisini samaɣ, mbʋ pʋyɔɔ yɔ Ɛsɔ toovenim tʋ kaayebina se pɩla mbʋ,+ se pɩsa nɛ tɔm ndʋ Yehowa kaatɩŋnɩ Siiloo tʋ Ahiya+ yɔɔ nɛ eheyi Nebatɩ pɩyalʋ Yerobowam yɔ tɩla.
16 Piyele nɛ Izrayɛɛlɩ kpeekpe yɔ, ɛzɩma wiyaʋ kizaa se eewelisiɣni-wɛ yɔ pʋyɔɔ lɛ, samaɣ cosi wiyaʋ se: «Ða nɛ Daviid ɖɩka we? Ðɩfɛyɩnɩ ñɩm nabʋyʋ Yesee pɩyalʋ cɔlɔ. Pɩsɩ ñɛ-ɛsɔnaa cɔlɔ, Oo Izrayɛɛlɩ! Lɛɛlɛɛyɔ, cɔnɩ ña-maɣmaɣ ña-ɖɩɣa yɔɔ, Oo Daviid.»+ Peeɖe Izrayɛɛlɩ mba kpeekpe pɩsɩ pa-ɖɩsɩ taa.*+
17 Ɛlɛ Robowam wolo pɩ-yɔɔ nɛ ɛtɔkɩ kewiyitu Izrayɛɛlɩ ñɩma mba pɛwɛ Yuuda tɛtʋ ndɩ ndɩ taa yɔ pɔ-yɔɔ.+
18 Pʋwayɩ lɛ, Wiyaʋ Robowam tiyi Hadoram+ weyi ɛcɔŋnaɣ mba paɖʋ-wɛ kɩjɛyʋʋ tʋma yɔ pɔ-yɔɔ yɔ Izrayɛɛlɩ mba cɔlɔ, ɛlɛ payaɣ-ɩ pɛɛ nɛ ɛsɩ. Wiyaʋ Robowam ñaɣ pana nɛ ɛkpa ɛ-kɛɛkɛɛ taa nɛ ese nɛ ɛɖɛɛ Yeruzalɛm.+ 19 Nɛ Izrayɛɛlɩ mba wɛɛ nɛ pakaɖɩɣnɩ Daviid ɖɩɣa halɩ nɛ sɔnɔ.