Kroniiki takayaɣ naalɛ ñɩŋga
7 Nɛ Salomɔɔ tɩɩtɛm tɩmʋʋ lɛ,+ miŋ lɩɩnɩ ɛsɔdaa nɛ itii+ nɛ ɩñaɣ kɩlaʋ kɩñaɣzʋʋ nɛ kɩlaŋ, nɛ Yehowa samtʋ yuŋ su ɖɩɣa taa.+ 2 Cɔjɔnaa taapɩzɩɣ se pasʋʋ Yehowa ɖɩɣa taa, mbʋ pʋyɔɔ yɔ Yehowa samtʋ yuŋ kaasu Yehowa ɖɩɣa taa ɖo.+ 3 Nɛ Izrayɛɛlɩ samaɣ kpeekpe kaawɛɛ nɛ kɔcɔŋna alɩwaatʋ ndʋ miŋ tiba nɛ Yehowa samtʋ yuŋ wɛɛ ɖɩɣa yɔɔ yɔ, nɛ koluŋ tataa ɖenɖe pɔpɔ pɛɛ yɔ nɛ kapa kɛ-ɛsa nɛ tɛtʋ nɛ kɛsɛɛ Yehowa se ɛlabaɣ lɛ, «mbʋ pʋyɔɔ yɔ ɛwɛ ɖeu; ɛ-sɔɔlɩm siɣsiɣ ñɩmbʋ wɛ tam.»
4 Nɛ wiyaʋ nɛ samaɣ kpeekpe palaa kɩlaŋ Yehowa ɛsɩndaa.+ 5 Wiyaʋ Salomɔɔ la naŋ 22 000 nɛ heŋ 120 000. Mbʋ wiyaʋ nɛ samaɣ kpeekpe patʋlɩ Ɛsɔ toovenim tʋ ɖɩɣa nɔnɔsɩ.+ 6 Cɔjɔnaa kaasɩŋ pa-tʋma ɖɩlaɖɛ, nɛ Leevi ñɩma ɖɔɖɔ kaasɩŋaa nɛ pɔɖɔkɩ wondu ndʋ palakɩnɩ tʋmɩyɛ alɩwaatʋ ndʋ peteɣ hendu Yehowa yɔ.+ (Wiyaʋ Daviid kaalabɩ wondu ndʋ se pɛsɛɣnɩ Yehowa se ɛlabaɣ lɛ—«mbʋ pʋyɔɔ yɔ ɛ-sɔɔlɩm siɣsiɣ ñɩmbʋ wɛ tam»—alɩwaatʋ ndʋ payɩ Daviid sɔɔlaa se ɛtɩŋnɩ tɩ-yɔɔ* nɛ ɛsa Ɛsɔ yɔ.) Nɛ cɔjɔnaa kaawɛɛ nɛ pahʋlʋʋ nɔndɔŋ ɖoŋ+ Leevi mba ɛsɩndaa; alɩwaatʋ ndʋ lɛ, Izrayɛɛlɩ mba kpeekpe kaasɩŋaa.
7 Nɛ Salomɔɔ la nɛ kadaɣ ŋga kaawɛ Yehowa ɖɩɣa ɛsɩndaa yɔ kɛ-hɛkʋ taa pɩsɩ lone kiɖeɖeye, mbʋ pʋyɔɔ yɔ, pɩɩpɔzaa se ɛlaa peeɖe kɩlaŋ kɩñaɣzɩŋ,+ nɛ laŋhɛzɩyɛ kɩlaŋ num, mbʋ pʋyɔɔ yɔ kɩlaŋ kɩñaɣzɩŋ, tɔɔnaɣ pee kɩlaŋ+ nɛ kɩlaŋ num+ pataapɩzɩɣ se pamaɣ ñɩɣyʋʋ kɩsɛɛmʋʋ altaaru+ ŋgʋ Salomɔɔ kaalaba yɔ kɩ-yɔɔ. 8 Alɩwaatʋ ndʋ, Salomɔɔ nɛ Izrayɛɛlɩ kpeekpe palabɩ kazandʋ kɩyakɩŋ 7,+ pɩɩkɛ ɛyaa samaɣ sɔsɔɔ* siŋŋ, kalɩnɩ ɖooo Lebo-Hamatɩ* nɛ pitii Ejipiti Lemeɣa.*+ 9 Ɛlɛ kɩyakʋ 8 ñɩŋgʋ wiye lɛ,* pala ŋgee kigbeɣluu nakʋyʋ,+ mbʋ pʋyɔɔ yɔ paakpaɣ kɩyakɩŋ 7 nɛ paɖʋzɩnɩ altaaru Ɛsɔ nesi taa nɛ pɔtɔɔ kazandʋ kɩyakɩŋ 7. 10 Nɛ fenaɣ 7 ñɩŋga tɛ kɩyakʋ 23 ñɩŋgʋ wiye lɛ, eyele ɛyaa nɛ pɛɖɛɛ pekpe pɛ-tɛ nɛ amɛya+ nɛ laŋhʋlʋmɩyɛ, kɩbandʋ ndʋ Yehowa labɩ Daviid nɛ Salomɔɔ nɛ ɛ-samaɣ Izrayɛɛlɩ yɔ tɩ-yɔɔ.+
11 Mbʋ Salomɔɔ tɛm maʋ Yehowa ɖɩɣa nɛ wiyaʋ ɖɩɣa;+ nɛ mbʋ payɩ pɩkpa Salomɔɔ laŋɩyɛ taa se ɛla pɩlɩɩnɩ Yehowa ɖɩɣa nɛ ɛ-maɣmaɣ ɛ-ɖɩɣa yɔɔ yɔ ɛpɩzaa nɛ ɛlabɩ-pʋ camɩyɛ.+ 12 Nɛ Yehowa lɩɩ Salomɔɔ yɔɔ+ ɖoo taa nɛ eheyi-i se: «Manɩ ña-adɩma, nɛ malɩzɩ man-tɩ lone ɖɩnɛ se ɖɩkɛ kɩlaʋ ɖɩɣa.+ 13 Ye manɖɩɣ ɛsɔdaa nɛ tɛʋ ɛɛnɩɣ, nɛ ye manɖʋ nakaŋ paɣtʋ se ɩtɔɔ mbʋ pɩwɛ ɛjaɖɛ taa yɔ, nɛ ye mentiyini kɩzɩkʋ man-samaɣ taa yɔ, 14 ye man-samaɣ ŋga paya-kɛ nɛ ma-hɩɖɛ yɔ+ koluzi ka-tɩ+ nɛ katɩmɩ nɛ kañɩnɩ-m* nɛ keyele ka-nʋmɔŋ kɩdɛkɛdɩŋ yɔ,+ ɖɩnɛ ɛlɛ mankaɣ-kɛ welisinuu nɛ ɖooo ɛsɔdaa nɛ menkpeɣ-kɛ ka-kɩwɛɛkɩm nɛ mawaa kɛ-ɛjaɖɛ.+ 15 Lɛɛlɛɛyɔ mɛ-ɛsa kaɣ kuluu nɛ mankʋ ma-nɩŋgbaaŋ nɛ mewelisi adɩma wena palakɩ lone ɖɩnɛ ɖɩ-taa yɔ.+ 16 Nɛ lɛɛlɛɛyɔ lɛ, malɩzɩ ɖɩɣa kanɛ nɛ manpɩsɩ-kɛ kiɖeɖeɣa se pɩsa nɛ ma-hɩɖɛ wɛɛ peeɖe tam,+ nɛ mɛ-ɛsa nɛ ma-laŋɩyɛ pakaɣ wɛʋ peeɖe paa ɛzɩmtaa.+
17 «Nɛ ña yɔ, ye ŋɖɔŋ mɛ-ɛsɩndaa ɛzɩ ña-caa Daviid kaaɖɔm yɔ nɛ ŋlakɩ mbʋ payɩ mɔnpɔzɩ-ŋ yɔ, nɛ ŋñaŋ man-paɣtʋ nɛ mɔn-tɔm hʋʋ yɔ,+ 18 pʋbʋ lɛ, mankaɣ kam ñe-kewiyaɣ kpelaɣ camɩyɛ,+ ɛzɩ manɖʋʋ ɛgbɛyɛ nɛ ña-caa Daviid+ nɛ mɔyɔɔdɩ se: “Paa pɩɩla ɛzɩma yɔ, ña-lʋlʋʋ taa tʋ nɔɔyʋ kaɣ wɛʋ se ɛtɔɔ kewiyitu Izrayɛɛlɩ yɔɔ” yɔ.+ 19 Ɛlɛ ye ɩha siɣye nɛ iyele man-kpalɩtʋ nɛ man-paɣtʋ ndʋ mansɩ mɩ-ɛsɩndaa yɔ nɛ iwolo nɛ ɩsɛɣ ɛsɔnaa lalaa nɛ iluŋuu pɛ-tɛɛ yɔ,+ 20 mankaɣ Izrayɛɛlɩ kpɛzʋʋ mɛ-ɛjaɖɛ nɖɩ maha-wɛ yɔ ɖɩ-taa;+ nɛ ɖɩɣa kanɛ, ŋga manpɩsɩ-kɛ kiɖeɖeɣa ma-hɩɖɛ yɔɔ yɔ, mankaɣ-kɛ kʋsʋʋ mɛ-ɛsɩndaa, nɛ mankaɣ-kɛ pɩsʋʋ mbʋ peniŋ yɔ* nɛ woŋa pʋyʋ samasɩ kpeekpe hɛkʋ taa.+ 21 Nɛ ɖɩɣa kanɛ kakaɣ pɩsʋʋ njɛyɛ tambaɣ huuye. Paa weyi ɛtɩŋnɩ kɔ-cɔlɔ yɔ, ɛkaɣ cɔnʋʋ nɛ pɩɖɩɣzɩ-ɩ+ nɛ ɛkaɣ yɔɔdʋʋ se: “Ɛbɛ yɔɔ Yehowa labɩ ɛjaɖɛ ɖɩnɛ nɛ ɖɩɣa kanɛ mbʋ?”+ 22 Nɛ pakaɣ yɔɔdʋʋ se: “Mbʋ pʋyɔɔ yɔ, peyebi pɔ-cɔzɔnaa tɛ Ɛsɔ Yehowa,+ weyi ɛlɩzɩ-wɛ Ejipiti ɛjaɖɛ taa yɔ,+ nɛ pɔñɔɔnɩ ɛsɔnaa lalaa nɛ poluŋ pɛ-tɛɛ nɛ pɛsɛɛ-wɛ.+ Pʋyɔɔ ɛkɔnɩ asɛyʋʋ kʋnɛ kɩ-tɩŋa pɔ-yɔɔ.”»+