Ɛsɩdrasɩ
5 Pʋwayɩ lɛ, nayaa Agee+ nɛ Ido+ sayɩ Zakarii+ posusi natʋ tɔm Yuuda ñɩma mba paawɛ Yuuda nɛ Yeruzalɛm yɔ, Izrayɛɛlɩ tɛ Ɛsɔ weyi ɛɛwɛ pa-ñʋʋ yɔɔ yɔ ɛ-hɩɖɛ taa. 2 Alɩwaatʋ ndʋ Seyalɩtɩyɛɛlɩ pɩyalʋ Zorobabɛɛlɩ+ nɛ Yehozadaakɩ pɩyalʋ Yesuwa+ paɖaɣnɩ paɣzʋʋ maʋ Ɛsɔ ɖɩɣa+ ŋga kaawɛ Yeruzalɛm yɔ; nɛ Ɛsɔ tɛ nayaa kaawɛ pɔ-cɔlɔ nɛ paɖʋʋ-wɛ nesi.+ 3 Alɩwaatʋ ndʋ egeetiye nɖɩ ɖɩwɛnɩ Pɔɔ nɛ Wayɩ* yɔ ɖɩ-ñʋʋdʋ Tatenaayɩ nɛ Seetaarɩ-Bozenaayɩ nɛ pa-taabalaa powobi pɔ-cɔlɔ nɛ pɔpɔzɩ-wɛ se: «Aha-mɩ nʋmɔʋ se ɩma ɖɩɣa kanɛ nɛ ɩtɛzɩ tʋmɩyɛ ɖɩnɛ?» 4 Nɛ patasɩ-wɛ pɔzʋʋ se: «Abalaa mba peɖiɣni ɖɩɣa kanɛ maʋ yɔ, suwe payaɣ-wɛ?» 5 Ɛlɛ Ɛsɔ cɔŋnaɣ* Yuuda mba ɛzʋtʋyaa yɔɔ,+ nɛ Tatenaayɩ nɛ lalaa patɩsɩnzɩ tʋmɩyɛ pɩkɔɔ pɩtalɩ alɩwaatʋ ndʋ petiyini takayaɣ Dariyusi nɛ ɛlɛ ma takayaɣ nɛ ecosi-wɛ tɔm ndʋ tɩ-yɔɔ yɔ.
6 Takayaɣ ŋga egeetiye nɖɩ ɖɩwɛ Pɔɔ nɛ Wayɩ yɔ ɖɩ-ñʋʋdʋ Tatenaayɩ, Seetaarɩ-Bozenaayɩ nɛ ɛ-taabalaa, nɛ egeetiye nɖɩ ɖɩwɛ Pɔɔ nɛ Wayɩ yɔ ɖɩ-ñʋndɩnaa cikpema tiyini Wiyaʋ Dariyusi yɔ, ka-taa tɔm yɔ; 7 petiyini-i takayaɣ ŋga, nɛ tɔm ndʋ pama ka-taa yɔ ndʋ yɔ:
«Wiyaʋ Dariyusi:
«Wɛɛ laŋhɛzɩyɛ taa! 8 Wiyaʋ ɛtɩlɩ se ɖiwobi Yuuda egeetiye taa, Ɛsɔ sɔsɔ ɖɩɣa taa, nɛ peɖiɣni-kɛ maʋ nɛ pɛɛ sɔsɔna wena pepilisi peeɖe yɔ, nɛ peɖiɣni ɖʋʋ kpoŋgbolonaa kolonzi taa. Ɛyaa ɖiɣni tʋmɩyɛ labʋ nɛ kpekpeka nɛ pa-pana ñaɣʋ yɔɔ lɛ, tʋmɩyɛ ɖiɣni ɖɛnʋʋ ɛsɩndaa. 9 Nɛ ɖɩpɔzɩ pɛ-ɛzʋtʋyaa tɔm, ɖɩpɔzɩ-wɛ se: “Aha-mɩ nʋmɔʋ se ɩma ɖɩɣa kanɛ nɛ ɩtɛzɩ tʋmɩyɛ ɖɩnɛ?”+ 10 Ðɩpɔzɩ-wɛ ɖɔɖɔ pa-hɩla, se pɩsa nɛ ɖɩma abalaa mba pɛɖɛɣ nɔɔ yɔ pa-hɩla nɛ ɖiyele nɛ ŋtɩlɩ-wɛ.
11 «Tɔm ndʋ pocosi-ɖʋ yɔ ndʋ yɔ: “Ðɩkɛ ɛsɔdaa nɛ tataa Ɛsɔ lɩmɖʋyaa, nɛ ɖiɖiɣni ɖaɣnʋʋ maʋ ɖɩɣa ŋga paama-kɛ pɩlakɩ pɩnzɩ sakɩyɛ yɔ, ŋga Izrayɛɛlɩ wiyaʋ sɔsɔ nɔɔyʋ kaamawa nɛ ɛtɛm-kɛ yɔ.+ 12 Ɛlɛ ɖa-caanaa kaaɖʋ ɛsɔdaa Ɛsɔ ɖɩwɩzɩyɛ,+ pʋyɔɔ ɛɖʋzɩ-wɛ Kalɩdee tʋ, Babilɔɔnɩ wiyaʋ Nabukodonozɔɔrɩ+ nesi tɛɛ, nɛ ɛlɛ yɔkɩ ɖɩɣa kanɛ+ nɛ ɛkpaɣ ɛyaa nɛ ewoni yomiye taa Babilɔɔnɩ.+ 13 Paa mbʋ yɔ, pɩtalɩ Babilɔɔnɩ wiyaʋ Siiruusi pɩnaɣ kajalaɣ ñɩŋga taa lɛ, Wiyaʋ Siiruusi ɖʋ paɣtʋ se paɖaɣnɩ maʋ Ɛsɔ ɖɩɣa kanɛ.+ 14 Pɩtasɩ lɛ, Wiyaʋ Siiruusi lɩzɩ Babilɔɔnɩ templo taa Ɛsɔ ɖɩɣa sika ñanzɩ nɛ liidiye ñanzɩ nzɩ Nabukodonozɔɔrɩ kaakpaɣ templo taa Yeruzalɛm nɛ ewona nɛ ɛsɩɩ Babilɔɔnɩ templo taa yɔ.+ Ɛcɛlɩ-sɩ abalʋ weyi payaɣ se Sɛsɩbazaarɩ*+ yɔ, weyi Siiruusi lɩzaa se ɛkɛ ñʋʋdʋ yɔ.+ 15 Siiruusi heyi-i se: ‘Kpaɣ ñanzɩ sɩnɛ. Wolo nɛ ŋsɩɩ-sɩ templo ŋgʋ kɩwɛ Yeruzalɛm yɔ kɩ-taa, nɛ ŋyele nɛ paɖaɣnɩ Ɛsɔ ɖɩɣa maʋ ko-lone kɩbɩnɖɛ taa.’+ 16 Ðɩnɛ ɛlɛ Sɛsɩbazaarɩ ɛnʋ ɛkɔma, nɛ ɛsɩɩ Ɛsɔ ɖɩɣa ŋga kɛwɛ Yeruzalɛm yɔ ke-tigila;+ nɛ pɛwɛɛ ka-maʋ yɔɔ kpaɣnɩ alɩwaatʋ ndʋ nɛ pɩtalɩ lɛɛlɛɛyɔ, ɛlɛ patɩtɩɩtɛmtɩ-kɛ.”+
17 «Lɛɛlɛɛyɔ lɛ, ye wiyaʋ ɛsɔɔlaa yɔ, pañɩnɩ wiyaʋ wondu ɖɩzɩyɛ taa Babilɔɔnɩ peeɖe, nɛ pana se wiɖiyi Wiyaʋ Siiruusi kaaɖʋ paɣtʋ se paɖaɣnɩ Ɛsɔ ɖɩɣa ŋga maʋ Yeruzalɛm yaa ɛtɩɖʋ;+ nɛ petiyini-ɖʋ ndʋ wiyaʋ maɣzɩɣ tɔm ndʋ tɩ-yɔɔ yɔ.»