Ɛsɩdrasɩ
6 Ðɩnɛ ɛlɛ Wiyaʋ Dariyusi ɖʋ paɣtʋ, nɛ pañɩnɩ caanaʋ taa takayɩsɩ ɖɩzɩyɛ* taa ɖenɖe pasɩɣaɣ ñɩm wondu Babilɔɔnɩ yɔ. 2 Nɛ pana takayaɣ kikpiyaɣ nakɛyɛ Ɛkɩbataanɩ lone ɖoŋ ñɩnɖɛ taa, Medii egeetiye taa. Tɔm ndʋ paama ka-taa yɔ ndʋ yɔ:
3 «Wiyaʋ Siiruusi pɩnaɣ kajalaɣ ñɩŋga taa, Wiyaʋ Siiruusi ɖʋ paɣtʋ natʋyʋ Ɛsɔ ɖɩɣa ŋga kɛwɛ Yeruzalɛm yɔ kɔ-yɔɔ se:+ “Pɩwɛɛ se paɖaɣnɩ ɖɩɣa ŋga maʋ nɛ kɛkɛ lone nɖɩ ɖɩ-taa palaɣ kɩlaŋ yɔ, nɛ pɩwɛɛ se pasɩɩ ke-tigila; ka-kʋkʋyɩŋ ɛkɛ nuŋgolonzi 60,* ka-walanzɩ ɛkɛ nuŋgolonzi 60,+ 4 patɩnɩ pɛɛ sɔsɔna wena pepilisaa yɔ tam nabudozo taa nɛ ɖasɩ tam kʋɖʋm;+ nɛ palɩzɩ wiyaʋ ɖɩɣa taa liidiye nɛ pɛhɛyɩnɩ tʋmɩyɛ nɖɩ ɖɩ-yɔɔ.+ 5 Pɩtasɩ lɛ, Ɛsɔ ɖɩɣa sika ñanzɩ nɛ liidiye ñanzɩ nzɩ Nabukodonozɔɔrɩ kaakpaɣ templo ŋgʋ kɩɩwɛ Yeruzalɛm yɔ kɩ-taa nɛ ewoni Babilɔɔnɩ yɔ,+ pɩwɛɛ se pakpaɣ-sɩ nɛ papɩsɩna, se pɩsa nɛ papɩsɩnɩ-sɩ si-lone taa templo taa Yeruzalɛm nɛ pasɩɩ-sɩ Ɛsɔ ɖɩɣa taa.”+
6 «Pʋyɔɔ lɛ lɛɛlɛɛyɔ, ña Tatenaayɩ, egeetiye nɖɩ ɖɩwɛ Pɔɔ nɛ Wayɩ* yɔ ɖɩ-ñʋʋdʋ; ña Seetaarɩ-Bozenaayɩ nɛ mɩ-taabalaa nɛ mɩ egeetiye nɖɩ ɖɩwɛ Pɔɔ nɛ Wayɩ+ yɔ ɖɩ-ñʋndɩnaa cikpema, ɩtaañɔtɩnɩ lone nɖɩ. 7 Ɩtaakaɖɩnɩ Ɛsɔ ɖɩɣa ŋga ka-tʋmɩyɛ. Yuuda mba ñʋʋdʋ nɛ Yuuda mba ɛzʋtʋyaa pakaɣ ɖaɣnʋʋ maʋ Ɛsɔ ɖɩɣa ŋga ko-lone kɩbɩnɖɛ taa. 8 Pɩtasɩ lɛ, manɖʋʋ-mɩ paɣtʋ mbʋ pɩwɛɛ se ɩla Yuuda mba ɛzʋtʋyaa mba yɔ pɩ-yɔɔ, nɛ pɩsa nɛ paɖaɣnɩ maʋ Ɛsɔ ɖɩɣa ŋga: Ɩlɩzɩ liidiye wiyaʋ ñɩm ɖɩzɩyɛ taa,+ lambuu ŋgʋ pamʋ egeetiye nɖɩ ɖɩwɛ Pɔɔ nɛ Wayɩ yɔ ɖɩ-taa yɔ kɩ-taa nɛ ɩcɛlɩ abalaa mba lɛɛ lɛɛ nɛ powolo tʋmɩyɛ yɔɔ nɛ ɖɩtaasɩŋ.+ 9 Nɛ mbʋ payɩ pɩpɔzʋʋ-wɛ yɔ pɩwɛɛ se ɩcɛlɩ-wɛ pʋ paa evemiye nɖɩ, pitaacoɖi: Naŋ* abalɩñɩŋ,+ nɛ pɩkpɛndɩnɩ ɛyaŋ+ nɛ heɣsi+ se pɩsa nɛ palaanɩ kɩlaŋ kɩñaɣzɩŋ ɛsɔdaa Ɛsɔ; ɩcɛlɩ-wɛ ɖɔɖɔ blee,*+ ɖɔm,+ vɛɛ,+ nɛ num+ ɛzɩ cɔjɔnaa mba pɛwɛ Yeruzalɛm yɔ pɔpɔzʋʋ yɔ, 10 nɛ papɩzɩ palaa kɩlaŋ weyi ɩkɛdɩɣnɩ ɛsɔdaa Ɛsɔ yɔ tam, nɛ patɩmɩ wiyaʋ nɛ ɛ-pɩyalaa pe-wezuu yɔɔ.+ 11 Manɖʋ paɣtʋ ɖɔɖɔ se ye nɔɔyʋ ɛmanɩ paɣtʋ tʋnɛ tɩ-yɔɔ yɔ, palɩzɩ ɛ-ɖɩɣa taa ɖaʋ nakʋyʋ nɛ pakpazɩ-ɩ nɛ pɔhɔkɩ-ɩ* kɩ-yɔɔ, nɛ ɛ-ɖɩɣa kaɣ pɩsʋʋ samaɣ awayɩ ɖɩlɩyɛ* ɛ-kɩwɛɛkɩm mbʋ pɩ-yɔɔ. 12 Ɛsɔ weyi eyeba se ɛ-hɩɖɛ ɛwɛɛ peeɖe yɔ,+ etuzi paa wiyaʋ weyi nɛ paa samaɣ ŋga kakpazɩɣ nesi se kakaɖɩnɩ paɣtʋ tʋnɛ nɛ kɔyɔkɩ Ɛsɔ ɖɩɣa ŋga kɛwɛ Yeruzalɛm yɔ. Ma Dariyusi, maɖʋʋnɩ paɣtʋ tʋnɛ. Pɔɖɔ tɩ-yɔɔ kpɛdɛyɛ.»
13 Ðɩnɛ ɛlɛ egeetiye nɖɩ ɖɩwɛ Pɔɔ nɛ Wayɩ yɔ ɖɩ-ñʋʋdʋ Tatenaayɩ, Seetaarɩ-Bozenaayɩ+ nɛ pa-taabalaa pɔɖɔ tɔm ndʋ payɩ Wiyaʋ Dariyusi yɔɔdaa yɔ tɩ-yɔɔ kpɛdɛyɛ. 14 Nɛ Yuuda mba ɛzʋtʋyaa wɛɛ ɖɩɣa ŋga ka-maʋ yɔɔ nɛ pɛɖɛɣnɩ ɛsɩndaa,+ nɛ nayʋ Agee+ nɛ Ido sayɩ Zakarii+ pa-natʋ tɔm wɛɛ nɛ tɩkpazɩɣ-wɛ ɖoŋ. Pɛtɛzɩ ɖɩɣa ŋga maʋ ɛzɩ Izrayɛɛlɩ tɛ Ɛsɔ ɖʋʋ paɣtʋ yɔ,+ nɛ ɛzɩ Siiruusi+ nɛ Dariyusi+ nɛ Pɛrɩsɩ wiyaʋ Artaazɛɛrɩzɛɛsɩ+ paɖʋʋ paɣtʋ yɔ. 15 Pɛtɛm ɖɩɣa ŋga maʋ Adaarɩ* fenaɣ kɩyakʋ 3 ñɩŋgʋ wiye, Wiyaʋ Dariyusi kewiyitu tɔɔʋ pɩnaɣ 6 ñɩŋga taa.
16 Pʋwayɩ lɛ, Izrayɛɛlɩ mba, cɔjɔnaa, Leevi mba,+ nɛ mba paalɩnɩ yomiye taa yɔ pa-taa mba pɩkazaa yɔ, pɔtɔɔ Ɛsɔ ɖɩɣa ŋga kɔ-nɔnɔsɩ tʋlʋʋ kazandʋ nɛ taa leleŋ. 17 Nɛ Ɛsɔ ɖɩɣa ŋga kɔ-nɔnɔsɩ tʋlʋʋ wiye, pala naŋ abalɩñɩŋ 100, ɛyaŋ 200 nɛ heɣsi 400. Pala ɖɔɖɔ Izrayɛɛlɩ kpeekpe kɩwɛɛkɩm yɔɔ tuliŋ 12 Izrayɛɛlɩ cejewe ñʋŋ taa.+ 18 Nɛ pasɩɩ cɔjɔnaa pe-tindima taa, nɛ Leevi mba pe-tindima taa se pɩsa nɛ pala Ɛsɔ tʋmɩyɛ Yeruzalɛm,+ ɛzɩ paamaɣʋ Moyizi takayaɣ taa yɔ.+
19 Nɛ fenaɣ kajalaɣ ñɩŋga kɩyakʋ 14 ñɩŋgʋ wiye lɛ, mba paalɩnɩ yomiye taa yɔ pɔtɔɔ Paska.+ 20 Cɔjɔnaa nɛ Leevi mba tɩŋa payɩ papɩsɩ pa-tɩ kele kele,+ nɛ pa-tɩŋa pɛwɛɛ kele kele; pakʋ Paska kɩlaʋ kpɩna mba payɩ paalɩnɩ yomiye taa yɔ, cɔjɔnaa lalaa nɛ pa-maɣmaɣ. 21 Nɛ Izrayɛɛlɩ ñɩma mba paalɩnɩ yomiye taa nɛ pɔkɔɔ yɔ pɔtɔɔ a-nandʋ, pa nɛ mba payɩ paakpɛndɩ pɔ-yɔɔ nɛ paaposi pa-tɩ nɛ ajɛɛ azuluma lakasɩ se pɛsɛɛ* Izrayɛɛlɩ tɛ Ɛsɔ Yehowa yɔ.+ 22 Pɔtɔɔ ɖɔɖɔ Kpɔnɔ ŋgʋ kɩ-taa patɩɖʋ lɔlɔm yɔ kɩ-kazandʋ+ kɩyakɩŋ 7 nɛ amɛya, mbʋ pʋyɔɔ yɔ Yehowa yeba nɛ pɛwɛɛ laŋhʋlʋmɩyɛ taa nɛ eyeba nɛ pɔ-tɔm kɛdɩnɩ Asiirii wiyaʋ+ nɛ ɛlɛ sɩnɩ-wɛ* Ɛsɔ toovenim tʋ, Izrayɛɛlɩ tɛ Ɛsɔ ɖɩɣa tʋmɩyɛ taa.