Ɛsɩtɛɛrɩ

7 Nɛ wiyaʋ nɛ Hamaanɩ+ powolo Abiɖe Ɛsɩtɛɛrɩ kazandʋ taa. 2 Wiyaʋ ɖaɣnɩ pɔzʋʋ Ɛsɩtɛɛrɩ evemiye 2 ñɩnɖɛ wiye, alɩwaatʋ ndʋ pɔñɔwaɣ vɛɛ yɔ se: «Ɛbɛ ŋñɩnɩɣ pɔzʋʋ, Abiɖe Ɛsɩtɛɛrɩ? Mankaɣ-ŋ pʋ cɛlʋʋ! Nɛ ɛbɛ ŋsɔɔlaa? Paa men-kewiyaɣ hɔɔlʋʋ kʋɖʋmʋʋ yɔ, mankaɣ-ŋ kʋ cɛlʋʋ!»+ 3 Abiɖe Ɛsɩtɛɛrɩ cosi se: «Oo wiyaʋ, ye mɔn-tɔm ɛkɛdɩnɩ-ŋ nɛ ye pɩkɛdɩnɩ wiyaʋ yɔ, mbʋ mɔnpɔzʋʋ yɔ, mbʋ yɔ se ŋya me-wezuu* ñʋʋ, nɛ mbʋ mɔnsɔɔlaa yɔ mbʋ yɔ se ŋholi man-samaɣ.+ 4 Mbʋ pʋyɔɔ yɔ pɛpɛdɩ-ɖʋ,+ ma nɛ man-samaɣ, se pɔtɔyɩtɩ-ɖʋ, pakʋ-ɖʋ nɛ paɖɩzɩ-ɖʋ.+ Ye paapɛdɩ-ɖʋ kɩpɛdʋ yem se ɖɩkɛ yomaa abalɩñɩma nɛ halɩñɩma yɔ, maasum tamɩyɛ. Ɛlɛ asɛyʋʋ ŋgʋ kɩtɩmʋna, mbʋ pʋyɔɔ yɔ kɩkaɣ ɖʋzʋʋ wiyaʋ.»

5 Nɛ Wiyaʋ Asiyeruusi pɔzɩ Abiɖe Ɛsɩtɛɛrɩ se: «Akataa se ɛlakɩ lakasɩ nzɩ? Le ɛwɛɛ?» 6 Ɛsɩtɛɛrɩ cosi se: «Ða-paɖa nɛ ɖo-koyindu lɛ ɛyʋ kɩdɛkɛdʋ ɛnɛ, Hamaanɩ.»

Sɔɔndʋ kpa Hamaanɩ siŋŋ, wiyaʋ nɛ abiɖe pɔ-yɔɔ. 7 Wiyaʋ kʋyɩnɩ pana kazandʋ taa, alɩwaatʋ ndʋ pɔñɔwaɣ vɛɛ yɔ, nɛ ɛɖɛɛ ewolo ɛ-ɖɩɣa kaɖaɣ taa, ɛlɛ Hamaanɩ ñakʋyɩ ɛsɩŋ se etendi Abiɖe Ɛsɩtɛɛrɩ nɛ ɛya e-wezuu* ñʋʋ, mbʋ pʋyɔɔ yɔ ɛnawa se wiyaʋ tɛm ɛ-taa se ɛhɔŋ ɛ-nɩŋgbaŋʋʋ. 8 Wiyaʋ lɩnɩ ɛ-ɖɩɣa kaɖaɣ taa nɛ ɛpɩsɩ kuduyuu ŋgʋ kɩ-tɛɛ palakaɣ kazandʋ yɔ lɛ, ɛna Hamaanɩ lɔ ɛ-tɩ kaɖʋ ŋgʋ kɩ-yɔɔ Ɛsɩtɛɛrɩ wɛɛ yɔ. Nɛ wiyaʋ yɔɔdɩ se: «Ɛcaɣ ɖɔɖɔ se ɛcaa abiɖe nɛ ɖoŋ ma-maɣmaɣ man-ɖɩɣa taa?» Tɔm ndʋ tɩtɩɩlɩ wiyaʋ nɔɔ taa lɛ, pohuuzi Hamaanɩ ɛsa yɔɔ. 9 Nɛ Arɩbona,+ wiyaʋ ɖɩɣa taa kaɖɩsɩ taa lɛlʋ yɔɔdɩ se: «Hamaanɩ ñɔɔzɩ ɖɔɖɔ sizika nakɛyɛ se popuzi Mɔrɩdekayɩ kɔ-yɔɔ,+ weyi ekuli tɔm yɔɔ nɛ pɩya wiyaʋ ñʋʋ yɔ.+ Pesiɣ-kɛ Hamaanɩ ɖɩɣa taa, ka-kʋkʋyɩŋ kɛ nuŋgolonzi 50.»* Peeɖe wiyaʋ yɔɔdaa se: «Epuzi-i kɔ-yɔɔ.» 10 Nɛ popuzi Hamaanɩ sizika ŋga ɛɛñɔɔzaa se popuzi Mɔrɩdekayɩ kɔ-yɔɔ yɔ kɔ-yɔɔ, nɛ wiyaʋ pana hɛɛ.