Yɔɔb
27 Yɔɔb wolo ɛ-tɔm yɔɔdʋʋ* yɔɔ se:
2 «Ɛsɔ weyi etiɖezi mɔn-tɔm yɔ,+ ɛñɩtʋʋ nɛ ɛwɛɛ wezuu yɔ,
Ðoŋ Tɩŋa Tʋ weyi ɛlaba nɛ me-wezuu* kpa ñaŋ yɔ,+ ɛñɩtʋʋ nɛ ɛwɛɛ wezuu yɔ,
3 Mañɩtʋʋ nɛ menfeziɣ
Nɛ fezuu ŋgʋ kɩlɩnɩ Ɛsɔ cɔlɔ yɔ kɩñɩtʋʋ nɛ kɩwɛɛ mɔ-mɔɔŋ tɛɛ yɔ,+
4 Mo-ndomee ɩɩkaɣ yɔɔdʋʋ tɔm ndʋ tɩfɛyɩ siɣsiɣ yɔ;
Nɛ ma-nzʋlʋmɩyɛ ɛɛkaɣ miduu cɛtɩm tɔm!
5 Maapɩzɩɣ nɛ mɔyɔɔdɩ kpa se ɩkɛ ɛyaa mba pɛwɛ siɣsiɣ yɔ!
Maakaɣ yebu* man-cɩŋgɩlɩm wɛtʋ pɩkɔɔ nɛ pɩtalɩ alɩwaatʋ ndʋ mansɩba yɔ!+
6 Mankaɣ ɖɔkʋʋ men-siɣsiɣ wɛtʋ nɛ maakaɣ-tʋ yebu kpa;+
Ma-laŋɩyɛ ɛɛkaɣ kʋʋ mɔn-tɔm* me-wezuu caɣʋ kɩyakɩŋ kpeekpe.
7 Mon-koyindu ɛwɛɛ ɛzɩ kañatʋ tʋ yɔ,
Mba pɔkɔŋ ma-wayɩ yɔ, pɛwɛɛ ɛzɩ mba pɛfɛyɩ siɣsiɣ yɔ.
8 Mbʋ pʋyɔɔ yɔ ɛyʋ weyi ɛɛñaŋ Ɛsɔ yɔ,* lidaʋ ŋgʋ ɛwɛna alɩwaatʋ ndʋ paɖɩzɩɣ-ɩ yɔ,+
Alɩwaatʋ ndʋ Ɛsɔ lɩzɩɣ e-wezuu* yɔ?
9 Alɩwaatʋ ndʋ kʋñɔŋ talɩɣ-ɩ yɔ
Ɛsɔ kaɣ nɩʋ e-kubusi na?+
10 Yaa ɛkaɣ nɩʋ leleŋ Ðoŋ Tɩŋa Tʋ taa?
Ɛkaɣ yaʋ Ɛsɔ alɩwaatʋ tɩŋa na?
11 Mankaɣ-mɩ wɩlʋʋ Ɛsɔ ɖoŋ yɔɔ tɔm;*
Maakaɣ mɛsʋʋ Ðoŋ Tɩŋa Tʋ yɔɔ tɔm natʋyʋ.
12 Ɩna! Ye mɩ-tɩŋa payɩ ɩna natʋ yɔ,
Ɛbɛ yɔɔ mɩ-tɔm yɔɔdʋʋ kɛ falaa tɔm ɖeke?
13 Mbʋ Ɛsɔ ɖʋwa se ɛhaɣ kañatʋ tʋ lɛ yɔ,+
Ñɩm mbʋ nazɩyaa mʋʋ Ðoŋ Tɩŋa Tʋ cɔlɔ:
14 Ye ɛ-pɩyalaa ɩɖɔwa yɔ, laɣɖɛ kaɣnɩ-wɛ kʋʋ,+
Nɛ tɔɔnaɣ ɛɛkaɣ talʋʋ ɛ-lʋlʋʋ taa mba.
15 Mba pakazɩɣ ɛ-sɩm wayɩ yɔ, kʋdɔŋ kaɣnɩ-wɛ pim,
Nɛ pe-lelaa ɩɩkaɣ-wɛ wiu.
16 Paa ɛkpazɩ liidiye huuye ɛzɩ puuyuu
Nɛ ekpeɣli wondu kususutu kɩbandʋ nɛ ɛsɩɩ ɛzɩ cʋʋ yɔ,
17 Paa ekpeɣli-tʋ yɔ,
Ɛyʋ siɣsiɣ tʋ kaɣnɩ-tʋ suu,+
Nɛ ɛyaa mba patɩwɛɛkɩ nabʋyʋ yɔ, mba kaɣnɩ tayʋʋ e-liidiye.
18 Ðɩɣa ŋga ɛmaɣ yɔ kɛwɛ ɖaaa ɛzɩ fiidiviu huyuu yɔ,
Kɛwɛ ɛzɩ cokiye+ nɖɩ feŋiyu laba yɔ.
19 Ewoki se ɛhɩnɩɣ lɛ ɛkɛ ñɩm tʋ, ɛlɛ ɛɛkaɣ nabʋyʋ kpeɣluu;
Ekuluu ɛ-ɛsa lɛ, nabʋyʋ ɛɛkaɣ wɛʋ.
20 Sɔɔndʋ tuduu-i ɛzɩ lɩm wadʋʋ yɔ;
Tɛʋ ŋgʋ kɩnɩɣnɩ helim yɔ kɩkpakɩɣ-ɩ ɖoo taa nɛ kɩɖɛna.+
21 Wɩsɩ ɖɩlɩyɛ taa helim kaɣ-ɩ kpaɣʋ nɛ pɩɖɛna, nɛ ɛɛkaɣ tasʋʋ wɛʋ;
Pɩhazɩɣ-ɩ e-lone taa nɛ pɩɖɛna.+