Yozuwee
24 Nɛ Yozuwee kpeɣli Izrayɛɛlɩ cejewe kpeekpe Sekɛɛm nɛ ɛyaa Izrayɛɛlɩ taa ɛzʋtʋyaa, ñʋndɩnaa, tɔm hʋyaa nɛ kaɖɩsɩ,+ nɛ pasɩŋ Ɛsɔ toovenim tʋ ɛsɩndaa. 2 Nɛ Yozuwee heyi samaɣ kpeekpe se: «Tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ: “Mɩ-cɔzɔnaa+ kaawɛ Pɔɔ* hɔɔlʋʋ lɛɛkʋ yɔɔ pɩlakɩ alɩwaatʋ sakɩyɛ yɔ,+ pa-taa lɛlʋ yɔ Abraham nɛ Naahɔɔrɩ pa-caa Teera, nɛ pɛsɛɣaɣ ɛsɔnaa lalaa.+
3 «“Pʋwayɩ lɛ, mankpaɣ mɩ-cɔzɔ Abraham+ nɛ Pɔɔ* hɔɔlʋʋ lɛɛkʋ yɔɔ nɛ meyele nɛ ɛɖɔ Kanaŋ ɛjaɖɛ kpeekpe taa, nɛ meyele ɖɔɖɔ nɛ ɛ-lʋlʋʋ taa mba* ɖɔɔ.+ Maha-ɩ Izaakɩ;+ 4 piyele Izaakɩ ɛlɛ lɛ, maha-ɩ Yakɔɔb nɛ Ezaawuu.+ Pʋwayɩ lɛ, maha Ezaawuu Seyiri Pʋʋ se kɩkɛ ɛ-ñɩm;+ nɛ Yakɔɔb nɛ ɛ-pɩyalaa pɛɖɛɛ nɛ petii Ejipiti.+ 5 Pʋwayɩ lɛ, mentiyi Moyizi nɛ Aarɔɔnɩ,+ nɛ mantɩŋnɩ mbʋ malabɩ Ejipiti mba hɛkʋ taa yɔ pɩ-yɔɔ nɛ mɔnkɔnɩ asɛyɩŋ kɩ-yɔɔ,+ nɛ malɩzɩ-mɩ peeɖe. 6 Malɩzaɣ mɩ-caanaa Ejipiti+ nɛ pɔkɔɔ patalɩ teŋgu nɔɔ lɛ, Ejipiti mba ɖʋwaɣ mɩ-caanaa wayɩ, paakpaɣ you kɛɛkɛɛnaa nɛ kpaŋnaŋ yɔɔ caɣyaa nɛ paɖʋ mɩ-caanaa wayɩ nɛ patalɩ ɖooo Teŋgu Kɩsɛɛmʋʋ.+ 7 Nɛ papaɣzɩ kubusi mabʋ nɛ ma Yehowa+ mɔn-cɔlɔ kiŋ, ɖɩnɛ ɛlɛ manɖʋ cɩkpɛndʋʋ nakʋyʋ mɩ nɛ Ejipiti mba mɩ-hɛkʋ taa, nɛ mɔnkɔnɩ teŋgu pɔ-yɔɔ nɛ kihuuzi pɔ-yɔɔ,+ nɛ mɩ-maɣmaɣ mɩ-ɛsa na mbʋ malabɩ Ejipiti ɛjaɖɛ taa yɔ.+ Pʋwayɩ lɛ, ɩcaɣ kañɩmbusuu taa pɩnzɩ* sakɩyɛ.+
8 «“Nɛ mɔnkɔnɩ-mɩ Amoori ñɩma mba paawɛ Yɔɔrdaŋ hɔɔlʋʋ lɛɛkʋ* yɔɔ yɔ pɛ-ɛjaɖɛ taa, nɛ poyooni-mɩ.+ Ɛlɛ mankpaɣ-wɛ nɛ manɖʋzɩ mi-nesi tɛɛ se ɩpɩzɩ nɛ ɩmʋ pɛ-ɛjaɖɛ nɛ ɖɩpɩsɩ mɩ-ñɩnɖɛ, nɛ manɖɩzɩ-wɛ mɩ-ɛsɩndaa.+ 9 Peeɖe Zipɔɔrɩ pɩyalʋ Baalaakɩ, Mowaabʋ wiyaʋ, kʋyaa nɛ eyooni Izrayɛɛlɩ. Nɛ ɛyaa Beyɔɔrɩ pɩyalʋ Baalam se ɛlɔ mɩ-yɔɔ nɔɔ kɩdɛkɛdaɣ.+ 10 Ɛlɛ mantiwelisini Baalam.+ Pʋyɔɔ lɛ, ɛwazɩ-mɩ ɖama yɔɔ ɖama yɔɔ,+ nɛ moholi-mɩ e-nesi tɛɛ.+
11 «“Pʋwayɩ lɛ, ɩtɛzɩ Yɔɔrdaŋ+ nɛ ɩkɔɔ Yeriikoo.+ Nɛ Yeriikoo ɖiyiyaa,* Amoori mba, Perizi mba, Kanaŋ mba, Hɛɛtɩ mba, Girgasɩ mba, Hivi mba nɛ Yebuusi mba poyooni-mɩ, ɛlɛ manɖʋzɩ-wɛ mi-nesi tɛɛ.+ 12 Nɛ mɛnɖɛzɩ laŋwɛɛkɩyɛ* mɩ-nɔɔ nɛ ɖɩɖɔɔnɩ-wɛ mɩ-ɛsɩndaa+—Amoori mba awiya 2. Pɩtɩkɛ ña-laɣɖɛ nɛ ñɔ-tɔʋ ŋwabɩnɩ-wɛ.+ 13 Mbʋ mɛncɛlɩ-mɩ ɛjaɖɛ nɖɩ ɩtɩla ɖɩ-yɔɔ kʋñɔŋ nakʋyʋ yɔ nɛ tɛtʋ ndʋ ɩtɩma yɔ,+ nɛ ɩcaɣ tɩ-taa. Ɩtɔkɩ viiñi tɩŋ nɛ oliivi tɩŋ weyi ɩtɩsɔ yɔ i-pee.”+
14 «Pʋyɔɔ lɛ, ise Yehowa sɔɔndʋ nɛ ɩsɛɛ-ɩ nɛ cɩŋgɩlɩm wɛtʋ* nɛ siɣsiɣ wɛtʋ,*+ nɛ ɩlɔ ɛsɔnaa mba mɩ-cɔzɔnaa kaasɛ Pɔɔ* hɔɔlʋʋ lɛɛkʋ yɔɔ yɔ nɛ mba paasɛ Ejipiti ɛjaɖɛ taa yɔ,+ nɛ ɩsɛɛ Yehowa. 15 Ɛlɛ ye pɩfɛyɩ ɖeu mɩ-ɛsɩndaa se ɩsɛɛ Yehowa yɔ, ɩlɩzɩ sɔnɔ weyi ɩkaɣ sɛʋ yɔ,+ paa pɩtɩɩkɛ ɛsɔnaa mba mɩ-cɔzɔnaa kaasɛ Pɔɔ* hɔɔlʋʋ lɛɛkʋ yɔɔ yɔ+ yaa Amoori ñɩma mba ɩwɛ pɛ-ɛjaɖɛ taa yɔ pɛ-ɛsɔnaa yɔ.+ Piyele nɛ ma nɛ man-ɖɩɣa taa mba lɛ, Yehowa ɖɩkaɣ sɛʋ.»
16 Ðɩnɛ ɛlɛ samaɣ cosi se: «Ðɩɩpɩzɩɣ kpa nɛ ɖiyele Yehowa nɛ ɖɩsɛɛ ɛsɔnaa lalaa. 17 Ðɛ-Ɛsɔ Yehowa lɩzɩnɩ ɖa nɛ ɖa-caanaa Ejipiti ɛjaɖɛ taa,+ ɛnʋ lɩzɩnɩ-ɖʋ yomiye ɖɩɣa taa,+ nɛ ɛla yʋsasɩ sɔsɔsɩ ɖɛ-ɛsɩndaa,+ nɛ ɛnʋ kandɩyɩnɩ ɖɔ-yɔɔ nʋmɔʋ ŋgʋ payɩ ɖɩɖɔma yɔ kɩ-taa nɛ ajɛɛ wena payɩ a-taa ɖɩtɩŋnaa yɔ.+ 18 Yehowa ɖɔɔnɩ ajɛɛ taa ɛyaa kpeekpe, pɩkpɛndɩnɩ Amoori ñɩma mba paalɛyɩ-ɖʋ wɛʋ ɛjaɖɛ taa yɔ. Pʋyɔɔ lɛ, ɖa ɖɔɖɔ ɖɩkaɣ sɛʋ Yehowa, mbʋ pʋyɔɔ yɔ ɛnʋ kɛnɩ ɖɛ-Ɛsɔ.»
19 Nɛ Yozuwee heyi samaɣ se: «Ɩɩpɩzɩɣ nɛ ɩsɛɛ Yehowa, mbʋ pʋyɔɔ yɔ ɛkɛ Ɛsɔ kiɖeɖeu;+ ɛkɛ Ɛsɔ weyi ɛñɩnɩɣ se pɔñɔɔnɩ e-ɖeke koŋ yɔ.+ Ɛɛkaɣ kpeɣu mɩ-kaañamtʋ lakasɩ* nɛ mɩ-kɩwɛɛkɩm.+ 20 Ye ɩlɔ Yehowa nɛ ɩsɛɣ agbaaɣdaa ɛsɔnaa yɔ, ɛnʋ ɖɔɖɔ ɛkaɣ-mɩ pam nɛ ɛsa nɛ ɛɖɩzɩ-mɩ, paa ɛtɛm-mɩ labʋ camɩyɛ lakasɩ yɔ.»+
21 Ɛlɛ samaɣ kitini Yozuwee se: «Aayɩ, ɛlɛ Yehowa ɖɩkaɣ sɛʋ!»+ 22 Ðɩnɛ ɛlɛ Yozuwee heyi samaɣ se: «Ɩkɛ aseɣɖe tɩnaa mba pakʋʋ mɩ-tɔm yɔ se mɩlɩzɩnɩ faaa se ɩsɛɣ Yehowa.»+ Nɛ pocosi-i se: «Ɛɛɛ, ɖɩkɛ aseɣɖe tɩnaa.»
23 «Ye mbʋ, ɩlɩzɩ agbaaɣdaa ɛsɔnaa mba pɛwɛ mɩ-hɛkʋ taa yɔ nɛ ɩlɔ, nɛ ɩcɛlɩ mɩ-laŋa Izrayɛɛlɩ tɛ Ɛsɔ Yehowa.» 24 Nɛ samaɣ heyi Yozuwee se: «Ðɛ-Ɛsɔ Yehowa ɖɩkaɣ sɛʋ, nɛ ɛ-nɔɔ taa tɔm ɖɩkaɣ welisuu!»
25 Nɛ evemiye nɖɩ lɛ, Yozuwee nɛ samaɣ paɖʋ ɛgbɛyɛ Sekɛɛm nɛ ɛɖʋ-kɛ ɖʋtʋ nɛ paɣtʋ ndʋ tɩ-yɔɔ pɩwɛɛ se kɔɖɔ yɔ. 26 Pʋwayɩ lɛ, Yozuwee ma tɔm ndʋ Ɛsɔ Paɣtʋ takayaɣ+ taa nɛ ɛkpaɣ pɩyɛ+ sɔsɔyɛ naɖɩyɛ nɛ esiɣ-ɖɩ tɩʋ sɔsɔʋ ŋgʋ kɩwɛ Yehowa kooka kiɖeɖeɣa cɔlɔ yɔ kɩ-tɛɛ.
27 Yozuwee tasɩ heyuu samaɣ kpeekpe se: «Ɩna! Pɩyɛ ɖɩnɛ ɖɩkaɣ lɩzʋʋ aseɣɖe ɖɔ-yɔɔ,+ mbʋ pʋyɔɔ yɔ pɩyɛ ɖɩnɛ ɖɩnɩ tɔm ndʋ payɩ Yehowa heyi-ɖʋ yɔ, nɛ ɖɩkaɣ lɩzʋʋ aseɣɖe mɩ-yɔɔ, se pɩsa nɛ itaakizi mɩ-Ɛsɔ.» 28 Ðɩnɛ ɛlɛ Yozuwee yele samaɣ nɛ kɛɖɛɛ, paa weyi lɛ ɛpɩsɩ ɛ-tɛtʋ taa.+
29 Pʋwayɩ lɛ, Nuuni pɩyalʋ Yozuwee, Yehowa lɩmɖʋyʋ sɩ, ɛɛwɛnɩ pɩnzɩ 110.+ 30 Nɛ pepimi-i Timina-Sera,+ tɛtʋ ndʋ tɩɩpɩsɩ ɛ-ñɩm yɔ tɩ-taa, tɩwɛ Efrayim pʋŋ egeetiye taa, Gaasɩ Pʋʋ hayo kiŋ. 31 Izrayɛɛlɩ mba kaasɛ Yehowa Yozuwee kɩyakɩŋ kpeekpe taa nɛ ɛzʋtʋyaa mba paacaɣ wezuu Yozuwee sɩm wayɩ nɛ paasɩm tʋma wena payɩ Yehowa kaalabɩ Izrayɛɛlɩ yɔ, pa-kɩyakɩŋ kpeekpe taa.+
32 Yosɛɛfʋ mɔɔ,+ wena Izrayɛɛlɩ mba kaakpaɣnɩ Ejipiti yɔ, pepim-yɛ Sekɛɛm, hayɩm mbʋ Yakɔɔb kaayabɩ Sekɛɛm caa Aamɔɔrɩ pɩyalaa cɔlɔ+ liidiye pɔɔyɩsɩ 100+ yɔ pɩ-taa; nɛ pɩpɩsɩ Yosɛɛfʋ pɩyalaa ñɩm.+
33 Aarɔɔnɩ pɩyalʋ Eleyaazaarɩ ɖɔɖɔ sɩ,+ nɛ pepimi-i ɛ-pɩyalʋ Fineyaasɩ+ Piyaɣ yɔɔ, ŋga paha-ɩ Efrayim pʋŋ egeetiye taa yɔ.