Izaayii
8 Yehowa heyi-m se: «Kpaɣ pɩtaahalaŋa*+ sɔsɔɔ nɛ ŋma kɔ-yɔɔ nɛ kɩmamanaʋ ŋgʋ paa weyi ɛmaɣna yɔ* se: “Maahɛrɩ-Salaalɩ-Hazɩ-Bazɩ.”* 2 Nɛ mɔnsɔɔlaa se aseɣɖe tɩnaa siɣsiɣ tɩnaa, cɔjɔ Uriya+ nɛ Yeberekiya pɩyalʋ Zakarii pama nɛ palɩzɩ aseɣɖe se pananɩ pɛ-ɛsa alɩwaatʋ ndʋ ŋma-tʋ yɔ.»
3 Nɛ mansʋʋnɩ* nayʋ halɩñɩnʋ,* nɛ ɛhaɣ hoɣa nɛ pʋwayɩ lɛ ɛlʋlɩ abalɩbɩɣa.+ Nɛ Yehowa heyi-m se: «Yaa-kɛ se Maahɛrɩ-Salaalɩ-Hazɩ-Bazɩ, 4 mbʋ pʋyɔɔ yɔ pʋcɔ nɛ abalɩbɩɣa ŋga katɩlɩ yaʋ se: “Paaba!” nɛ “Daada!”* lɛ, pakaɣ kpaɣʋ Damaasɩ ñɩm nɛ mbʋ palazɩ Samaarii taa yɔ nɛ powoni Asiirii wiyaʋ ɛsɩndaa.»+
5 Yehowa tasɩ-m yɔɔdɩnʋʋ se:
6 «Samaɣ kanɛ kekizi Silowa* lɩm mbʋ pikpeŋ camɩyɛ yɔ+
Nɛ ka-taa la leleŋ nɛ Reziini nɛ Remaliya pɩyalʋ,+
7 Pʋyɔɔ lɛ na! Yehowa kaɣ kɔnʋʋ pɔ-yɔɔ
Pɔɔ* taa lɩm mbʋ pɩwɛ hoɖe nɛ pɩɖɔɔ sakɩyɛ yɔ,
Asiirii wiyaʋ+ nɛ ɛ-samtʋ kpeekpe.
Ɛkaɣ suu e-lemisi tɩŋa taa
Nɛ ɛwadɩ e-kidiilimiŋ tɩŋa yɔɔ
8 Nɛ ɛwadɩ Yuuda yɔɔ.
Ɛkaɣ suu nɛ ɛwadɩ, nɛ ɛkpa ɛtalɩ liu tɛɛ;+
E-keŋ weyi eposaa yɔ ɩkaɣ huuzuu ñɛ-ɛjaɖɛ walanzɩ yɔɔ,
9 Ɩla kɩdɛkɛdɩm, mɩ samasɩ, ɛlɛ pakaɣ-mɩ yɔkʋʋ hɔɔlasɩ hɔɔlasɩ.
Iwelisi, mɩ mba payɩ ɩlɩnɩ tɛtʋ yɔɔ poliŋ ageeta taa yɔ!
Ɩñɔɔzɩ mɩ-tɩ nɛ ɩla you,* ɛlɛ pakaɣ-mɩ yɔkʋʋ hɔɔlasɩ hɔɔlasɩ.+
Ɩñɔɔzɩ mɩ-tɩ nɛ ɩla you, ɛlɛ pakaɣ-mɩ yɔkʋʋ hɔɔlasɩ hɔɔlasɩ.
10 Ɩla ɖʋtʋ, ɛlɛ pakaɣ-tʋ wɛɛkʋʋ!
11 Yehowa nesi ɖoŋ ñɩnzɩ wɛ mɔ-yɔɔ, pʋyɔɔ lɛ tɔm tʋnɛ eheyi-m se ɛpaɣ-m nɛ mantaatɩŋ samaɣ kanɛ ka-nʋmɔʋ:
12 «Mbʋ samaɣ kanɛ kayaɣ se tɔm kpɛyʋʋ yɔ, pɩtɩpɔzɩ se ɩyaa-pʋ se tɔm kpɛyʋʋ!
Itaase sɔɔndʋ mbʋ peseɣ sɔɔndʋ yɔ;
Pitaayele nɛ iseli.
13 Yoyaa tɛ Yehowa—ɛnʋ pɩwɛɛ se ɩcɔna se ɛkɛ kiɖeɖeu,+
Ɛnʋ pɩwɛɛ se ise sɔɔndʋ,
Nɛ ɛnʋ pɩwɛɛ se ɛla nɛ iseli.»+
14 Ɛkaɣ pɩsʋʋ ɛzɩ kooka kiɖeɖeɣa yɔ,
Ɛlɛ ɛkaɣ pɩsʋʋ ɛzɩ pɩyɛ nɖɩ pɔmɔtʋʋna yɔ
Nɛ kaaʋ ŋgʋ kɩlakɩ nɛ pituuluu yɔ+
Izrayɛɛlɩ ɖɩsɩ nzɩ sɩ-naalɛ,
Ɛkaɣ pɩsʋʋ ɛzɩ kaamʋʋ nɛ kpaca yɔ
Yeruzalɛm taa mba.
15 Pɩkaɣ tuuluu pa-taa sakɩyɛ nɛ pɔtɔlɩ nɛ pɩpɛlɩ-wɛ;
Pakaɣ-wɛ ñɩbʋ kpaca nɛ pakpa-wɛ.
17 Mankaɣ wobu pɩ-yɔɔ nɛ manɖaŋɩɣ Yehowa,*+ weyi ɛmɛsɩɣ ɛ-ɛsɩndaa se Yakɔɔb ɖɩɣa ɛtaana-ɩ yɔ,+ nɛ ɛ-yɔɔ me-lidaʋ kaɣ wɛʋ.
18 Na! Ma nɛ piya nzɩ Yehowa ha-m yɔ+ ɖɩwɛ ɛzɩ yʋsasɩ+ nɛ maamaaci lakasɩ nzɩ sɩlɩnɩ yoyaa tɛ Yehowa cɔlɔ yɔ Izrayɛɛlɩ taa, ɛnʋ weyi ɛwɛ Siyɔŋ Pʋʋ yɔɔ yɔ.
19 Nɛ ye peheyi-mɩ se: «Ɩpɔzɩ mba pasʋzʋʋ nɛ pɔyɔɔdʋʋnɩ sɩɖaa yɔ yaa tɩyaa mba pɔyɔɔdʋʋ cee wayɩ tɔm yɔ, mba pɛwɛɛtɩɣ nɛ pemidiɣ yɔ,» ɛzɩ pɩtɩkɛ kɛ-Ɛsɔ pɩwɛɛ se samaɣ ɛpɔzɩ tɔm na? Sɩɖaa pɩwɛɛ se kɔpɔzɩ tɔm ɛsadɩnaa yɔɔ?+ 20 Ɛlɛ paɣtʋ nɛ aseɣɖe tɔm ndʋ pamawa yɔ* pɩwɛɛ se kɔpɔzɩ!
Alɩwaatʋ ndʋ pɔyɔɔdʋʋ tɔm nɛ tɩɩlakɩ nɔɔ kʋɖʋmaɣ nɛ tɔm ndʋ yɔ, pɛfɛyɩnɩ ñalɩmɩyɛ.*+ 21 Nɛ paa weyi ɛkaɣ wɛʋ kʋñɔŋ taa nɛ ñɔɔsɩ taa nɛ ɛcɔʋ ɛjaɖɛ taa;+ nɛ ɛzɩma ñɔɔsɩ wɩɣ-ɩ nɛ ɛ-taa nɛ pana yɔ pʋyɔɔ lɛ, ɛkaɣ lɔʋ nɔɔ kɩdɛkɛdaɣ e-wiyaʋ nɛ ɛ-Ɛsɔ pɔ-yɔɔ alɩwaatʋ ndʋ ɛkpazɩɣ ɛ-ɛsa nɛ ɛsɔdaa kiŋ yɔ. 22 Nɛ ɛcɔŋnɩ tɛtʋ yɔɔ lɛ, pʋnɛ pi-ɖeke ɛkaɣ naʋ: Siziŋ nɩʋ nɛ cɩkpɛndʋʋ, lidaʋ lɔʋ nɛ kaɖɛ alɩwaatʋ, cɩkpɛndʋʋ kpimm wɛɣna nɛ ñalɩmɩyɛ naɖɩyɛ ɛɛkaɣ wɛʋ.