Efɛɛzɩ mba
3 Pʋyɔɔ lɛ, ma Pɔɔlɩ, Krɩstʋ Yesu tɛ salaka tʋ+ mɩ ajɛɛ taa mba mɩ-yɔɔ... 2 toovenim taa lɛ, ɩnɩ ɖɩɣa yɔɔ cɔnʋʋ tʋmɩyɛ+ nɖɩ paɖʋzɩ me-nesi tɛɛ se ɖɩsɩnɩ-mɩ nɛ Ɛsɔ lootiye wazɩ-mɩ yɔ ɖɩ-tɔm, 3 se natʋ natʋyʋ yɔɔ pɩtɩŋnaa nɛ peyele nɛ mantɩlɩ mɛsaɣ tɛɛ tɔm kiɖeɖetu ɛzɩ mamaʋ-mɩ tʋ tobi nɛ pɩɖɛɛ yɔ. 4 Pʋyɔɔ lɛ, alɩwaatʋ ndʋ ɩkalɩɣ tɔm tʋnɛ yɔ, ɩpɩzɩɣ nɛ iɖiɣzini ɛzɩma manɩ Krɩstʋ tɛ mɛsaɣ tɛɛ tɔm kiɖeɖetu taa yɔ.+ 5 Kpaɖɩŋ lɛɛŋ taa lɛ, patiyele nɛ ɛyaa pɩyalaa tɩlɩ mɛsaɣ tɛɛ tɔm tʋnɛ ɛzɩ pɩtɩŋnʋʋ fezuu yɔɔ nɛ pokuli tɩ-yɔɔ lɛɛlɛɛyɔ nɛ pawɩlɩ ɛ-tɛ apostoloowaa kiɖeɖema nɛ nayaa yɔ;+ 6 ndʋ lɛ se pɩwɛɛ se ajɛɛ taa mba, mba petisi tɔm kɩbandʋ yɔɔ nɛ pa nɛ Krɩstʋ Yesu pala nɔɔ kʋɖʋmaɣ yɔ, ɖa nɛ wɛ ɖɩkpɛndɩ nɛ ɖɩkaa ñɩm nɛ ɖɩkɛ tomnaɣ kʋɖʋmaɣ pilinzi+ nɛ ɖa nɛ wɛ ɖɩkaa tamaɣ ŋga Ɛsɔ laba yɔ. 7 Manpɩsɩ pɩ-lɩmɖʋyʋ nɛ pɩla nɔɔ kʋɖʋmaɣ nɛ Ɛsɔ lootiye kʋjɔʋ* ŋgʋ ɛtɩŋnɩ e-ɖoŋ tʋmɩyɛ labʋ yɔɔ nɛ ɛlabɩ-m yɔ.+
8 Ma weyi mantɩtalɩ ɛyaa kiɖeɖema tɩŋa taa cikpelu yɔ,+ ma palabɩ lootiye nɖɩ;+ se pɩsa nɛ monsusi ajɛɛ Krɩstʋ ñɩm mbʋ pɩ-wayɩ fɛyɩ yɔ, pɩ-tɔm kɩbandʋ 9 nɛ meyele nɛ paa anɩ lɛ ɛtɩlɩ mɛsaɣ tɛɛ tɔm kiɖeɖetu yɔɔ cɔnʋʋ ɖʋtʋ+ ndʋ pɛmɛsɩ pɩnzɩ nɛ pɩnzɩ Ɛsɔ taa yɔ, ɛnʋ weyi ɛlɩzɩ wondu tɩŋa yɔ. 10 Pɩlabɩ mbʋ se pɩsa nɛ lɛɛlɛɛyɔ lɛ, pɩtɩŋnɩ ɛgbɛyɛ yɔɔ+ nɛ peyele nɛ kominawaa nɛ ñʋndɩnaa mba pɛwɛ ɛsɔdaa yɔ, patɩlɩ Ɛsɔ lɔŋsɩnɖɛ hɔɔlɩŋ sakɩyɛ.+ 11 Pɩlabɩ nɔɔ kʋɖʋmaɣ nɛ tamtam tamaɣ ŋga ɛlabɩ ɖa-Kɩbaɣlʋ Krɩstʋ Yesu yɔɔ yɔ;+ 12 pɩtɩŋnɩ ɛ-yɔɔ lɛ, ɖɩyɔɔdʋʋ kaalɛyɩtʋ nɛ ɖɩñɔtʋʋnɩ Ɛsɔ faaa+ nɛ lidaʋ pɩtɩŋnɩ tisuu mbʋ ɖɩwɛnɩ Krɩstʋ yɔɔ yɔ pɩ-yɔɔ. 13 Pʋyɔɔ lɛ, meheyiɣ-mɩ se itaayele nɛ kʋñɔmɩŋ weyi mɔntɔkɩ mɩ-yɔɔ yɔ, ɩla nɛ pitibi-mɩ yɔɔɔ; mbʋ pʋyɔɔ yɔ ɩkɛnɩ-mɩ samtʋ.+
14 Lɩmaɣzɩyɛ nɖɩ ɖɩ-yɔɔ moluŋuu ma-nʋmbɔla yɔɔ Caa ɛsɩndaa, 15 ɛnʋ weyi ɛ-cɔlɔ paa hɔʋ ŋgʋ kɩwɛ ɛsɔdaa nɛ tataa yɔ, kɩ-hɩɖɛ lɩɣna yɔ. 16 Mantɩmɩɣ se ɛtɩŋnɩ ɛ-samtʋ sakɩyɛ yɔɔ nɛ ɛla nɛ ɛyʋ weyi ɩkɛnɩ pɩ-taa kiŋ yɔ ɛkpa ɖoŋ,+ pɩtɩŋnɩ ɖoŋ weyi e-fezuu haɣ yɔ ɩ-yɔɔ; 17 nɛ ɖɔɖɔ se pɩtɩŋnɩ mi-tisuu yɔɔ lɛ, ɩla nɛ Krɩstʋ wɛɛ mɩ-laŋa taa nɛ sɔɔlɩm.+ Tɛtɛ nɛ ɩka lila+ nɛ ɩcɛyɩsɩ camɩyɛ tigiɖe yɔɔ,+ 18 se pɩsa nɛ mɩ nɛ ɛyaa kiɖeɖema kpeekpe ɩpɩzɩ nɛ ɩnɩɩ mbʋ pɩkɛ walanzɩ nɛ ɖaɣlɩkɩŋ nɛ kʋkʋyɩŋ nɛ cukaŋ yɔ pɩ-taa camɩyɛ, 19 nɛ ɩtɩlɩ Krɩstʋ sɔɔlɩm+ mbʋ pɩkpaɖɩ sɩmtʋ yɔ, se pɩsa nɛ pilim wɛtʋ ndʋ Ɛsɔ haɣ yɔ tisu mɩ-taa ɖo.
20 Piyele nɛ weyi ɛpɩzɩɣ ɛla nɛ pɩɖɔɔ sakɩyɛ nɛ pɩkɩlɩ mbʋ payɩ ɖɩpɔzʋʋ yaa ɖɩmaɣzɩɣ yɔ,+ ɛzɩ e-ɖoŋ weyi ɛlakɩ tʋmɩyɛ ɖa-taa yɔ ɛpɔzʋʋ yɔ,+ 21 ɛnʋ pɩwɛɛ se patɩŋnɩ ɛgbɛyɛ nɛ Krɩstʋ Yesu pɔ-yɔɔ nɛ pasamɩ-ɩ kpaɖɩŋ tɩŋa taa tam. Amɛn.