Keɣa

28 Hayɩ Yehowa, man-Kaaʋ,+ ña mɛwɛ yaʋ yɔɔ;

Taaɖɩɣ ña-nɩŋgbaŋʋʋ.

Ye ŋsum tamɩyɛ nɛ ŋŋcosuu-m yɔ,

Mankaɣ wɛʋ ɛzɩ mba petiki pɔʋ* taa yɔ.+

 2 Welisi ma-adɩma alɩwaatʋ ndʋ mamakɩ kubusi se ŋsɩnɩ-m yɔ,

Alɩwaatʋ ndʋ mankpazɩɣ me-nesi nɛ ɖooo pɩ-taa kuduyuu ŋgʋ kɩwɛ ño-kooka kiɖeɖeɣa taa yɔ, kɩ-cɔlɔ kiŋ yɔ.+

 3 Taahazɩ kañatʋ tɩnaa nɛ ŋkpɛndɩnɩ-m, taahazɩ mba palakɩ lalaa kɩdɛkɛdɩm yɔ nɛ ŋkpɛndɩnɩ-m,+

Mba peheyiɣ lalaa laŋhɛzɩyɛ tɔm ŋgʋ kɩdɛkɛdɩm wɛnɩ pa-laŋa taa yɔ.+

 4 Hɛyɩ-wɛ pa-lakasɩ yɔɔ,+

Nɛ pɩla nɔɔ kʋɖʋmaɣ nɛ pa-lakasɩ kɩdɛkɛdɩsɩ.

Hɛyɩ-wɛ pe-nesi tɛɛ tʋmɩyɛ yɔɔ,

Nɛ pɩla nɔɔ kʋɖʋmaɣ nɛ mbʋ palaba yɔ.+

 5 Mbʋ pʋyɔɔ yɔ paakeŋni Yehowa tʋma,+

Nɛ paakeŋni ɖɔɖɔ mbʋ e-nesi laba yɔ.+

 6 Pasa Yehowa,

Mbʋ pʋyɔɔ yɔ ɛnɩ adɩma wena malaba se ɛsɩnɩ-m yɔ.

 7 Yehowa kɛnɩ mon-ɖoŋ+ nɛ man-kpayʋʋ;+

Ɛnʋ ma-laŋɩyɛ taɣ liu.+

Ɛsɩnɩ-m, nɛ ma-laŋɩyɛ nɩɣ leleŋ,

Pʋyɔɔ lɛ, mankaɣ-ɩ sam nɛ me-hendu.

 8 Yehowa kɛnɩ ɛ-samaɣ ɖoŋ;

Ɛkɛ tilimiye ɖoŋ ñɩnɖɛ, ɛkɔŋnɩ ñʋʋ yabʋ sɔsɔm ɛ-tɛ patam num.+