Ruti
1 Tɔm hʋyaa alɩwaatʋ taa,*+ ñɔɔsɩ nasɩyɩ kaalɩ ɛjaɖɛ taa; nɛ abalʋ nɔɔyʋ kʋyɩ Bɛtɩlɛhɛm,+ Yuuda egeetiye taa nɛ ewolo ɛcaɣ ɛgɔndʋ Mowaabʋ+ egeetiye* taa, ɛ nɛ ɛ-halʋ nɛ ɛ-pɩyalaa naalɛ. 2 Payaɣaɣ abalʋ ɛnʋ se Elimelɛɛkɩ,* ɛ-halʋ hɩɖɛ lɛ Nawomii,* nɛ payaɣaɣ ɛ-pɩyalaa mba pa-naalɛ se Maalɔɔnɩ* nɛ Kiliyooni.* Paakɛ Efrata mba, pʋ-tɔbʋʋ se Bɛtɩlɛhɛm mba, Yuuda egeetiye taa. Nɛ pɔkɔɔ Mowaabʋ egeetiye taa nɛ pacaɣ peeɖe.
3 Alɩwaatʋ natʋyʋ wayɩ lɛ, Nawomii walʋ Elimelɛɛkɩ sɩ, nɛ pɩkazɩ ɛ nɛ ɛ-pɩyalaa mba pa-naalɛ. 4 Pʋwayɩ lɛ, paba kpaɣ halaa mba pɛkɛ Mowaabʋ mba yɔ; payaɣaɣ kʋɖʋm se Orpa nɛ payaɣ lɛlʋ se Ruti.+ Paacaɣ peeɖe ɛzɩ pɩnzɩ 10 mbʋ yɔ. 5 Pʋwayɩ lɛ, halʋ ɛnʋ ɛ-pɩyalaa mba pa-naalɛ, Maalɔɔnɩ nɛ Kiliyooni pasɩ ɖɔɖɔ, nɛ pɩkazɩ e-ɖeke, ɛtɩtasɩ wɛnʋʋ pɩyalaa nɛ walʋ. 6 Pʋyɔɔ ɛkpaɣ lɩmaɣzɩyɛ se ɛkʋyʋʋ Mowaabʋ egeetiye taa nɛ ɛpɩsɩ ɛ-tɛ, mbʋ pʋyɔɔ yɔ ɛnɩwa se Yehowa kɛzɩ ɛ-lɩmaɣza nɛ ɛ-samaɣ yɔɔ nɛ ɛha-kɛ tɔɔnaɣ;* nɛ e-wolaa tɩŋɩ-ɩ.
7 Ɛkʋyɩ ɖenɖe ɛɛwɛɛ yɔ, ɛ nɛ e-wolaa mba pa-naalɛ. Paawɛ nʋmɔʋ taa nɛ papɩsɩɣ Yuuda egeetiye taa lɛ, 8 Nawomii heyi e-wolaa mba pa-naalɛ se: «Iwolo, paa weyi lɛ ɛpɩsɩ e-ɖoo ɖɩɣa taa. Tɛtɛ nɛ Yehowa wɩlɩ-mɩ sɔɔlɩm siɣsiɣ ñɩmbʋ,+ ɛzɩ ɩwɩlʋʋ-pʋ ma nɛ abalaa mba pasɩba yɔ. 9 Tɛtɛ nɛ Yehowa yele nɛ mɩ-taa paa weyi lɛ, ehiɣ pɛɛyɛ* ɛ-walʋ ɖɩɣa taa.»+ Pʋwayɩ lɛ, ɛmʋzɩ pa-lɩkpaɣzɩsɩ yɔɔ nɛ pewii ɖoŋ. 10 Nawomii wolaa heyaɣ-i se: «Aayɩ, ɛlɛ ɖa nɛ ŋ ɖɩkaɣnɩ wobu ña-samaɣ cɔlɔ.» 11 Ɛlɛ Nawomii cosi-wɛ se: «Ɩpɩsɩ, mɛn-pɛlaa. Ɛbɛ yɔɔ pɩwɛɛ se ɩtɩŋɩ-m? Manpɩzɩɣ nɛ mantasɩ lʋlʋʋ abalɩbiya nɛ sɩpɩsɩ mɩ-walaa yaa we?+ 12 Ɩpɩsɩ, mɛn-pɛlaa. Iwolo, mbʋ pʋyɔɔ yɔ mankɩlɩ kpadɩyʋʋ, maapɩzɩɣ nɛ mantasɩ walʋʋ. Paa maawɛnɩ lidaʋ se mehikiɣ walʋ ɖoo anɛ nɛ malʋlɩ ɖɔɖɔ abalɩbiya yɔ, 13 ɩkaɣ caɣʋ nɛ ɩɖaŋ-sɩ nɛ sɩkɔɔ sɩpaɣlɩ? Sɩ-yɔɔ lɛ, ɩkaɣ mɩ-tɩ ɖɔkʋʋ nɛ ɩɩtasɩɣ walʋʋ na? Aayɩ, mɛn-pɛlaa, manɩɣ mi-siziŋ siŋŋ, mbʋ pʋyɔɔ yɔ Yehowa nesi kpa mɔ-yɔɔ.»+
14 Patasɩ wiu ɖoŋ, pʋwayɩ lɛ Orpa mʋzɩ ɛ-waŋ lɩkpaɣzaɣ yɔɔ nɛ ɛcaŋ ɛɖɛɛ. Ɛlɛ Ruti ñɔñɔnɩ ɛ-waŋ kpam. 15 Ðɩnɛ ɛlɛ Nawomii heyi-i se: «Na! Ño-woluɖa pɩsɩ ɛ-samaɣ nɛ ɛ-ɛsɔnaa cɔlɔ. Tɩŋ ño-woluɖa wayɩ.»
16 Ɛlɛ Ruti cosi-i se: «Taañɩɣ mɔ-yɔɔ se mɛnɖɛɛ nɛ meyebi-ŋ, taañɩɣ mɔ-yɔɔ se meyele ña-wayɩ tɩŋʋʋ; mbʋ pʋyɔɔ yɔ ɖenɖe ŋwoki yɔ peeɖe mankaɣ wobu, nɛ ɖenɖe ŋsʋʋ ɖoo taa yɔ, peeɖe mankaɣ sʋʋ. Ña-samaɣ kaɣ kɛʋ man-samaɣ nɛ ñɛ-Ɛsɔ kaɣ kɛʋ mɛ-Ɛsɔ.+ 17 Ðenɖe ŋsɩkɩ yɔ, peeɖe mankaɣ sɩbʋ, nɛ peeɖe pakaɣ-m pim. Yehowa ɛhɔ ma-nɩŋgbaŋʋʋ siŋŋ ye nabʋyʋ ɛyasɩ ma nɛ ŋ ɖɛ-hɛkʋ taa nɛ pɩtasɩnɩ sɩm yɔ.»
18 Nawomii nawa se Ruti tɛm ɛ-taa se ɛtɩŋɩɣ-ɩ lɛ, ɛtɛzɩ-ɩ yebu. 19 Nɛ pa-naalɛ powolo pa-nʋmɔʋ ɖɔm yɔɔ nɛ patalɩ Bɛtɩlɛhɛm.+ Patalɩ Bɛtɩlɛhɛm kpaagbaa lɛ, pɔ-yɔɔ lɛ, pɩcʋʋdɩ tɛtʋ kpeekpe taa, nɛ halaa wɛɛ nɛ pɔtɔŋ se: «Pɩtɩkɛ Nawomii lɛ?» 20 Ɛlɛ eheyaɣ halaa mba se: «Ɩtaaya-m se Nawomii.* Ɩya-m se Mara,* mbʋ pʋyɔɔ yɔ Ðoŋ Tɩŋa Tʋ laba nɛ manɩɩ siziŋ siŋŋ me-wezuu caɣʋ taa.+ 21 Mɛnɖɛɣaɣ lɛ, maawɛnɩ pɩtɩŋa; ɛlɛ Yehowa laba nɛ manpɩsɩ nesi kpɛɖɛ. Ɛbɛ yɔɔ ɩyaɣ-m se Nawomii, ŋgʋ Yehowa kaɖɩnɩnɩ-m, nɛ Ðoŋ Tɩŋa Tʋ kɔnɩnɩ asɛyʋʋ mɔ-yɔɔ?»+
22 Mbʋ Nawomii kʋyɩ Mowaabʋ+ egeetiye taa nɛ ɛpɩsɩ ɛ-tɛ, ɛ nɛ e-wolu Mowaabʋ tʋ Ruti. Patalɩ Bɛtɩlɛhɛm alɩwaatʋ ndʋ papaɣzɩ kʋm orjɩ* yɔ.+