Ruti
2 Nawomii walʋ hɔʋ taa tʋ nɔɔyʋ kaawɛɛ, ɛɛkɛ ñɩm tʋ kpem; payaɣaɣ-ɩ se Bowaazɩ,+ nɛ ɛɛkɛ Elimelɛɛkɩ hɔʋ taa tʋ.
2 Mowaabʋ tʋ Ruti heyi Nawomii se: «Mentendi-ŋ, yele nɛ mowolo hayɩm taa nɛ ye nɔɔyʋ ɛna man-pʋtɔdɩyɛ yɔ, mantɩŋ ɛ-wayɩ nɛ mancazɩ tɔɔnaɣ.»+ Peeɖe Nawomii heyi-i se: «Mɛn-pɛlɛ, wolo.» 3 Ðɩnɛ ɛlɛ ɛɖɛɛ nɛ ɛtɩŋɩɣ mba pakʋŋ tɔɔnaɣ hayɩm taa yɔ pa-wayɩ nɛ ɛpaɣzɩ cazʋʋ. Nɛ pɩkɔɔ nɛ pɩla se ɛtalɩ Bowaazɩ weyi ɛkɛ Elimelɛɛkɩ hɔʋ taa tʋ yɔ,+ ɛ-hayɩm taa.+ 4 Peeɖe peeɖe lɛ, Bowaazɩ lɩɩnɩ Bɛtɩlɛhɛm nɛ ɛtalɩ nɛ ɛsɛɛ tɔɔnaɣ kʋnɖaa se: «Yehowa ɛwɛɛ mɩ-cɔlɔ.» Nɛ pocosi-i se: «Yehowa ɛwazɩ-ŋ.»
5 Nɛ Bowaazɩ pɔzɩ evebu weyi ɛcɔŋnaɣ tɔɔnaɣ kʋnɖaa yɔɔ yɔ se: «A-pɛlɛ lɛ?» 6 Evebu weyi ɛcɔŋnaɣ tɔɔnaɣ kʋnɖaa yɔɔ yɔ ecosi-i se: «Pɛlɛ ɛnʋ ɛkɛ Mowaabʋ tʋ,+ ɛ nɛ Nawomii palɩnɩnɩ Mowaabʋ+ egeetiye taa nɛ pɔkɔɔ. 7 Ɛpɔzɩ-m se: “Mentendi-ŋ, manpɩzɩɣ nɛ mancazɩ+ lɔyɩŋ* weyi tɔɔnaɣ kʋnɖaa kʋma nɛ peyebini pa-wayɩ yɔ?” Nɛ ɖooo ɛzɩ ɛkɔm tanaŋ tɛɛ nɛ pɩkɔɔ nɛ pɩtalɩ lɛɛlɛɛyɔ yɔ, ɛtɩcaɣ; lɛɛlɛɛyɔ lɛɛlɛɛyɔ ɛcaɣ kuzotuu taa se ɛhɛzɩ pazɩ.»
8 Nɛ Bowaazɩ heyi Ruti se: «Mɛn-pɛlɛ, welisi. Taaɖɛɛ se ŋcazɩ hayɩm lɛɛbʋ taa, taawolo ɖoli nɛ pɩtasɩnɩ cɩnɛ; caɣ mɛn-pɛlaa cɔlɔ kpam.+ 9 Ñɛ-ɛsa ɩwɛɛ hayɩm mbʋ pɩ-taa pakʋŋ tɔɔnaɣ yɔ pɩ-yɔɔ nɛ ŋtɩŋɩɣ-wɛ. Manɖʋ evebiya paɣtʋ se pataatukuni-ŋ.* Lɔkɔtʋ ɛɖɛ-ŋ lɛ, ŋwolo nɛ ŋñɔɔ lɩm mbʋ evebiya luwa nɛ papɩyɩ ŋgbaŋ taa yɔ.»
10 Ðɩnɛ ɛlɛ Ruti luŋ nɛ ɛpa ɛ-ɛsa nɛ tɛtʋ nɛ ɛyɔɔdɩ se: «Pɩlabɩ ɛzɩma nɛ ŋna man-pʋtɔdɩyɛ, nɛ ɛbɛ yɔɔ ŋkemni-m, ŋgʋ mɛnkɛ ɛgɔm?»+ 11 Bowaazɩ cosi-i se: «Pɛkɛdɩ-m tete mbʋ payɩ ŋlabɩ ña-waŋ ña-walʋ sɩm wayɩ, nɛ ɛzɩma ŋyebi ña-caa nɛ ño-ɖoo nɛ ŋyele ɖɔɖɔ ñɔ-hɔʋ taa mba ɛjaɖɛ nɛ ŋwolo samaɣ ŋga ŋtaasɩm-kɛ yɔ kɔ-cɔlɔ yɔ.+ 12 Yehowa ɛhɛyɩ-ŋ mbʋ ŋlaba yɔ pɩ-yɔɔ,+ nɛ Izrayɛɛlɩ tɛ Ɛsɔ Yehowa ɛhɛyɩ-ŋ kɩhɛyʋʋ pilim, ɛnʋ weyi ŋkɔm se ŋcɔzɩ e-keŋ tɛɛ yɔ.»+ 13 Nɛ Ruti yɔɔdɩ se: «Man-kɩbaɣlʋ, na man-pʋtɔdɩyɛ, mbʋ pʋyɔɔ yɔ ŋhɛzɩ ña-lɩmɖʋyʋ laŋɩyɛ, nɛ ñɔ-tɔm tukuni ɛ-laŋɩyɛ,* ŋgʋ mantɩtɩɩkɛʋ ña-lɩmɖʋyaa taa nɔɔyʋ.»
14 Pɩtalɩ tɔɔnaɣ tɔɔʋ alɩwaatʋ lɛ, Bowaazɩ heyi Ruti se: «Kɔɔ cɩnɛ nɛ ŋtɔɔ kpɔnɔ nɛ ŋlii ñɔ-kpɔnɔ hɔɔlaɣ vɛɛ ŋgʋ kɩwɛ ñɩmɩŋ yɔ kɩ-taa.» Ðɩnɛ ɛlɛ, Ruti caɣ tɔɔnaɣ kʋnɖaa cɔlɔ. Nɛ Bowaazɩ cɛlɩ-ɩ tɔɔnaɣ pee wena poɖoŋaa yɔ nɛ ɛtɔɔ nɛ ɛhaɣ nɛ pɩkazɩ. 15 Ɛkʋyaa se ɛcazɩɣ lɛ,+ Bowaazɩ ɖʋ paɣtʋ e-evebiya se: «Iyebi-i nɛ ɛcazɩ halɩ pɩkpɛndɩnɩ lɔyɩŋ* weyi pakʋma yɔ ɩ-taa, nɛ ɩtaalabɩ-ɩ ñaŋ.+ 16 Pɩwɛɛ ɖɔɖɔ se ɩkpɛɛ-ɩ lɔyɩŋ nɩɩyɩ hɔɔ taa nɛ ɩsɩɩ mɩ-wayɩ nɛ ɛcazɩ, nɛ ɩtaayɔɔdɩ natʋyʋ se ɩɖaŋnɩ-ɩ.»
17 Nɛ ɛwɛɛ cazʋʋ yɔɔ hayɩm taa nɛ ɖanaɣ kɔɔ nɛ kaɖanɩ.+ Ɛmabɩ mbʋ ɛcazaa yɔ lɛ, pɩtalɩ orjɩ* efa kʋɖʋmʋʋ* mbʋ yɔ. 18 Pʋwayɩ lɛ, ɛkpaɣ-pʋ nɛ ewolo tɛtʋ taa, nɛ ɛ-waŋ na mbʋ ɛcazaa yɔ. Ruti kaatɔɔ tɔɔnaɣ nɛ ɛhaɣ nɛ pɩkazɩ ŋga yɔ, ɛlɩzɩ-kɛ ɖɔɖɔ nɛ ɛcɛlɩ ɛ-waŋ.+
19 Nɛ ɛ-waŋ pɔzɩ-ɩ se: «Le ŋcazɩ sɔnɔ? Le ŋlabɩ tʋmɩyɛ? Tɛtɛ nɛ pawazɩ weyi ekemni-ŋ yɔ.»+ Ðɩnɛ ɛlɛ Ruti kɛdɩ weyi ɛ-tɛ ɛlabɩ tʋmɩyɛ yɔ ɛ-tɔm ɛ-waŋ; ɛyɔɔdaa se: «Abalʋ weyi ɛ-tɛ malabɩ tʋmɩyɛ sɔnɔ yɔ, payaɣ-ɩ se Bowaazɩ.» 20 Peeɖe Nawomii heyi e-wolu se: «Yehowa, weyi etiyele wɩlʋʋ sɔɔlɩm siɣsiɣ ñɩmbʋ ɛsadɩnaa nɛ sɩɖaa yɔ ɛwazɩ-ɩ.»+ Nɛ Nawomii tasɩ yɔɔdʋʋ se: «Abalʋ ɛnʋ ɛkɛ ɖɔ-hɔʋ taa tʋ.+ Ɛkɛ mba papɩzɩɣ nɛ paɖaɣnɩ-ɖʋ yabʋ yɔ pa-taa nɔɔyʋ.»*+ 21 Nɛ Mowaabʋ tʋ Ruti yɔɔdɩ se: «Eheyi-m ɖɔɖɔ se: “Caɣ mɔn-tɔɔnaɣ kʋnɖaa cɔlɔ kpam nɛ pɩkɔɔ nɛ pɩsɩɩnɩ alɩwaatʋ ndʋ pɛtɛm mɔn-tɔɔnaɣ kpeekpe kʋm yɔ.”»+ 22 Nɛ Nawomii heyi e-wolu Ruti se: «Mɛn-pɛlɛ, ye ŋtɩŋ ɛ-pɛlaa yɔ, pɩwɛ weewee nɛ pɩkɩlɩ se palabɩ-ŋ ñaŋ hayɩm lɛɛbʋ taa.»
23 Mbʋ ɛcaɣ Bowaazɩ pɛlaa cɔlɔ kpam nɛ ɛcazɩ tɔɔnaɣ nɛ pɩkɔɔ nɛ pɩsɩɩnɩ alɩwaatʋ ndʋ orjɩ kʋmtʋ+ nɛ blee* kʋmtʋ tɛma yɔ. Nɛ ɛcaɣ ɛ-waŋ cɔlɔ mbʋ.+