Samɩyɛɛlɩ takayaɣ naalɛ ñɩŋga
8 Pɩlabɩ alɩwaatʋ natʋyʋ pʋwayɩ lɛ, Daviid wa Filistii mba+ nɛ eluzi-wɛ ɛ-tɛɛ,+ nɛ ɛmʋ Metɛɛg-Amaa Filistii mba nesi tɛɛ.
2 Ɛwabɩ Mowaabʋ mba+ nɛ eyele nɛ pahɩnɩ tataa nɛ ɛmaɣzɩ-wɛ nɛ nimaɣ. Ɛmaɣzɩ nimasɩ 2 nɛ pakʋ sɩ-taa ñɩma, nɛ ɛmaɣzɩ nimaɣ kʋɖʋmaɣ pilim nɛ eyele ka-taa ñɩma nɛ pɛwɛɛ wezuu.+ Nɛ Mowaabʋ mba pɩsɩ Daviid lɩmɖʋyaa nɛ pɛhɛyɩɣ lambuu.+
3 Daviid wabɩ Zobaa wiyaʋ+ Hadadezɛɛrɩ, Rehob pɩyalʋ, alɩwaatʋ ndʋ ɛlɛ ñaawɛ nʋmɔʋ taa nɛ ewoki se ɛɖaɣnɩ walɩsʋʋ e-kewiyaɣ tɛtʋ nɛ tɩtalɩ Efraatɩ Pɔɔ+ egeetiye taa yɔ. 4 Daviid kpa Hadadezɛɛrɩ kpaŋnaŋ yɔɔ caɣyaa 1 700, nɛ ɛ-sɔɔjanaa nɩŋgbanzɩ ɖɔnaa 20 000. Nɛ Daviid sɛtɩ kpaŋnaŋ weyi ɩhɔŋ kɛɛkɛɛnaa yɔ ɩ-tɩŋa ɩ-naakoɖiŋ, ɛlɛ ɛkazɩ kpaŋnaŋ 100 ɖeke.+
5 Siirii ñɩma mba pɛwɛ Damaasɩ+ yɔ pɔkɔm se pasɩɣnɩ Zobaa wiyaʋ Hadadezɛɛrɩ lɛ, Daviid kʋ Siirii ñɩma mba pa-taa ɛyaa 22 000.+ 6 Nɛ Daviid sɩɩ sɔɔjanaa tindima Damaasɩ ŋgʋ kɩwɛ Siirii yɔ kɩ-taa, nɛ Siirii mba pɩsɩ Daviid lɩmɖʋyaa nɛ pɛhɛyɩɣ lambuu. Yehowa yekaɣ nɛ Daviid wakɩ* ɖenɖe payɩ ewokaɣ yɔ.+ 7 Pɩtasɩ lɛ, Daviid mʋ sika kpayɩŋ weyi ɩwɛ kulukulu yɔ Hadadezɛɛrɩ lɩmɖʋyaa cɔlɔ nɛ ewoni-i Yeruzalɛm.+ 8 Wiyaʋ Daviid ku ñɩɣtʋ kɩsɛɛmtʋ sakɩyɛ Hadadezɛɛrɩ tɛ tɛtʋ Beta nɛ Berotayi pa-taa.
9 Nɛ Hamatɩ+ wiyaʋ Tɔyɩ nɩɩ se Daviid wabɩ Hadadezɛɛrɩ sɔɔjanaa kpeekpe.+ 10 Peeɖe Tɔyɩ tiyi ɛ-pɩyalʋ Yoram se ewolo Wiyaʋ Daviid cɔlɔ nɛ ɛpɔzɩ ɛ-alaafɩya yɔɔ nɛ ɛsamɩ-ɩ, mbʋ pʋyɔɔ yɔ eyoni Hadadezɛɛrɩ nɛ ɛwabɩ-ɩ (mbʋ pʋyɔɔ yɔ, Hadadezɛɛrɩ yowaɣni Tɔyɩ ɖoŋ ɖoŋ); nɛ Yoram woni Daviid liidiye ñɩɣtʋ wondu, sika wondu nɛ ñɩɣyʋʋ kɩsɛɛmʋʋ wondu. 11 Wiyaʋ Daviid pɩsɩ-tʋ Yehowa wondu kiɖeɖetu, ɛzɩ ɛɛpɩsʋʋ wondu kiɖeɖetu liidiye ñɩɣtʋ nɛ sika ŋga ɛɛmʋ ajɛɛ wena payɩ eluzi-yɛ ɛ-tɛɛ yɔ a-cɔlɔ yɔ:+ 12 Siirii nɛ Mowaabʋ+ pɔ-cɔlɔ, Amooni mba cɔlɔ, Filistii mba+ cɔlɔ, Amalɛɛkɩ mba+ cɔlɔ, nɛ mbʋ ɛɛmʋ Zobaa wiyaʋ Hadadezɛɛrɩ,+ Rehob pɩyalʋ cɔlɔ yɔ. 13 Pɩtasɩ lɛ, Daviid yeba nɛ ɛ-hɩɖɛ sɛɛ alɩwaatʋ ndʋ ewoba nɛ ɛkʋ Edom mba 18 000 Ðɔm Fɛɛʋ taa+ nɛ ɛpɩsɩ nɛ ɛkɔɔ yɔ. 14 Ɛsɩ sɔɔjanaa tindima Edom. Edom kpeekpe taa lɛ, ɛsɩ sɔɔjanaa tindima, nɛ Edom mba kpeekpe pɩsɩ Daviid lɩmɖʋyaa.+ Yehowa yekaɣ nɛ Daviid wakɩ* ɖenɖe payɩ ewokaɣ yɔ.+
15 Daviid wolo pɩ-yɔɔ nɛ ɛtɔkɩ kewiyitu Izrayɛɛlɩ kpeekpe yɔɔ.+ Nɛ Daviid hʋwaɣ ɛ-samaɣ kpeekpe+ tɔm siɣsiɣ nɛ eyeki nɛ pañaŋ paa weyi lɛ ɛ-waɖɛ.+ 16 Zeruyaa pɩyalʋ Yowaabʋ+ kaakɛnɩ sɔɔjanaa ñʋʋdʋ. Nɛ Ahiluudɩ pɩyalʋ Yozafaatɩ+ ñaakɛ tɔm ndʋ tɩlakɩ yɔ tɩ-mayʋ. 17 Ahitub pɩyalʋ Sadɔɔkɩ+ nɛ Abiyaataarɩ pɩyalʋ Ahimelɛɛkɩ paakɛ cɔjɔnaa, nɛ Seraya ñaakɛ takayaɣ taa mayʋ. 18 Yehoyiyada pɩyalʋ Benayaa+ kaakɛ Kereti mba nɛ Peleti mba+ pa-ñʋʋdʋ. Nɛ Daviid pɩyalaa pɩsɩ ñʋndɩnaa sɔsaa.*