Roma mba
16 Mancaɣ se ɩtɩlɩ ɖo-koobu halɩñɩnʋ Feebee, weyi ɛkɛ lɩmɖʋyʋ ɛgbɛyɛ nɖɩ ɖɩwɛ Sankree+ yɔ ɖɩ-taa yɔ, 2 se pɩsa nɛ ɩmʋ-ɩ camɩyɛ Kɩbaɣlʋ taa ɛzɩ pɩmʋnaʋ se pamʋ ɛyaa kiɖeɖema yɔ, nɛ ɩsɩnɩ-ɩ hɔɔlɩŋ weyi ɩ-taa payɩ pɩpɔzʋʋ se pasɩnɩ-ɩ yɔ,+ mbʋ pʋyɔɔ yɔ ɛ-maɣmaɣ ɖɔɖɔ ɛlʋbɩ ɛyaa sakɩyɛ yɔɔ, nɛ pɩkpɛndɩnɩ mɔ-yɔɔ.
3 Ɩsɛ-m Prisɩka nɛ Akiila,+ mba ma nɛ wɛ ɖɩkpɛndɩɣ nɛ ɖɩlakɩ tʋmɩyɛ Krɩstʋ Yesu taa yɔ, 4 mba paɖʋ pe-weziŋ kaɖɛ taa mɔ-yɔɔ* yɔ,+ nɛ pɩtɩkɛ men-ɖeke mɛnsɛɣnɩ-wɛ se palabaɣ lɛ, ɛlɛ ajɛɛ taa agbaa tɩŋa sɛɣ-wɛ ɖɔɖɔ. 5 Ɩsɛɛ ɖɔɖɔ ɛgbɛyɛ nɖɩ ɖɩwɛ pa-ɖɩɣa taa yɔ.+ Ɩsɛɛ man-kʋsɔɔlʋ Epenɛɛtɩ, ɛwɛ kajalaɣ ñɩma* mba papɩsɩ Krɩstʋ tɔmkpɛlɩkɩyaa Aazii taa yɔ pa-taa. 6 Ɩsɛɛ Maarɩɩ, weyi ɛlabɩ tʋmɩyɛ nɛ kpekpeka mɩ-yɔɔ yɔ. 7 Ɩsɛɛ Andronikuusi nɛ Yuniyaasɩ, mba pɛkɛ mɔ-hɔʋ taa ñɩma+ nɛ man-taabalaa salaka taa yɔ, mba apostoloowaa sɩm-wɛ camɩyɛ, nɛ pa nɛ Krɩstʋ pɛwɛ nɔɔ kʋɖʋmaɣ alɩwaatʋ sakɩyɛ nɛ pɩkɩlɩ-m yɔ.
8 Ɩsɛ-m Ampliyaatuusi, man-kʋsɔɔlʋ Kɩbaɣlʋ taa. 9 Ɩsɛɛ Urbɛɛ, weyi ɖa nɛ ɩ ɖɩlakɩ tʋmɩyɛ Krɩstʋ taa yɔ, nɛ man-kʋsɔɔlʋ Stakiisi. 10 Ɩsɛɛ Apelɛɛsɩ, weyi ɛ-tɔm kɛdɩnɩ Krɩstʋ yɔ. Ɩsɛɛ Aristoobuuli ɖɩɣa taa mba. 11 Ɩsɛɛ mɔ-hɔʋ taa tʋ Eroodiyɔɔnɩ. Ɩsɛɛ Narsiisi ɖɩɣa taa ñɩma mba pɛwɛ Kɩbaɣlʋ taa yɔ. 12 Ɩsɛɛ Trifɛɛnɩ nɛ Trifoozi, halaa mba palakɩ tʋmɩyɛ nɛ kpekpeka Kɩbaɣlʋ taa yɔ. Ɩsɛɛ ɖa-kʋsɔɔlʋ Pɛrsiisi, mbʋ pʋyɔɔ yɔ ɛlabɩ tʋmɩyɛ nɛ kpekpeka Kɩbaɣlʋ taa. 13 Ɩsɛɛ Rufuusi, weyi palɩzɩ-ɩ nɛ ɛwɛɛ Kɩbaɣlʋ taa yɔ, nɛ e-ɖoo weyi ɛkɛ ɖɔɖɔ mon-ɖoo yɔ. 14 Ɩsɛɛ Asɛnkriiti, Fileegɔɔnɩ, Ɛrmɛɛsɩ, Patrobaasɩ, Ɛrmaasɩ, nɛ koobiya mba pɛwɛ pɔ-cɔlɔ yɔ. 15 Ɩsɛɛ Filolɔɔgɩ nɛ Yuuli, Neeree nɛ e-neu halɩñɩnʋ,* nɛ Olimpaasɩ, nɛ ɛyaa kiɖeɖema mba payɩ pɛwɛ pɔ-cɔlɔ yɔ. 16 Ɩsɛɛ ɖama nɛ sɔɔlɩm.* Krɩstʋ agbaa tɩŋa sɛɣ-mɩ.
17 Koobiya, lɛɛlɛɛyɔ lɛ, menseɣtiɣ-mɩ se mɩ-ɛsa ɩwɛɛ mba pɔkɔŋnɩ tayʋʋ nɛ palakɩ nɛ pituuluu ɛyaa yɔ pɔ-yɔɔ nɛ ise-wɛ;+ lakasɩ nzɩ, sɩɩlakɩ nɔɔ kʋɖʋmaɣ nɛ tɔm ndʋ ɩkpɛlɩkaa yɔ. 18 Mbʋ pʋyɔɔ yɔ ɛyaa mba, patɩkɛ ɖa-Kɩbaɣlʋ Krɩstʋ yomaa; ɛlɛ pɛkɛ pa-maɣmaɣ pe-hiluu* yomaa, nɛ patɩŋɩɣnɩ leleŋ tɔm nɛ cɛtɩm tɔm yɔɔ nɛ pepeɣziɣ mba paakeŋ natʋyʋ yɔ pa-laŋa. 19 Ɛyaa tɩŋa na mɩ-ñamtʋ, nɛ pʋyɔɔ lɛ man-taa lakɩ-mɩ nɛ leleŋ. Ɛlɛ mɔnsɔɔlaa se ɩkɛ lɔŋsɩnɖaa mbʋ pɩwɛ ɖeu yɔ pɩ-hɔɔlʋʋ taa, ɛlɛ pataana kɩwɛɛkɩtʋ natʋyʋ mɩ-yɔɔ mbʋ pɩkɛ kɩdɛkɛdɩm yɔ pɩ-hɔɔlʋʋ taa.+ 20 Nɛ pɩkazɩ pazɩ lɛ, Ɛsɔ weyi ɛhaɣ laŋhɛzɩyɛ yɔ, ɛkaɣ tɔyɩtʋʋ Sataŋ+ mɩ-nɩŋgbanzɩ tɛɛ. Tɛtɛ nɛ ɖa-Kɩbaɣlʋ Yesu labɩ-mɩ lootiye.
21 Timootee, weyi ma nɛ ɩ ɖɩlakɩ tʋmɩyɛ yɔ, ɛsɛɣ-mɩ; nɛ mɔ-hɔʋ taa ñɩma+ Lusiyuusi, Yaasɔɔ, nɛ Sosipatɛɛrɩ pɛsɛɣ-mɩ ɖɔɖɔ.
22 Ma Tɛrtiyuusi, weyi ɛma takayaɣ kanɛ yɔ, mɛnsɛɣ-mɩ Kɩbaɣlʋ taa.
23 Gayuusi,+ weyi ɛmʋ ma nɛ ɛgbɛyɛ tɩŋa ɛ-tɛ yɔ, ɛsɛɣ-mɩ. Eraasɩtɩ, weyi ɛkɛ tɛtʋ ñɩm yɔɔ cɔnɩyʋ yɔ, ɛsɛɣ-mɩ, nɛ e-neu* Kaartuusi sɛɣ-mɩ ɖɔɖɔ. 24 *——
25 Ɛsɔ pɩzɩɣ nɛ ɛtɩŋnɩ tɔm kɩbandʋ ndʋ monsusuu yɔ tɩ-yɔɔ nɛ Yesu Krɩstʋ tɔm susuu yɔɔ nɛ ɛsɩnɩ-mɩ nɛ ɩka camɩyɛ. Tɔm kɩbandʋ ndʋ, tɩlabɩ nɔɔ kʋɖʋmaɣ nɛ mɛsaɣ tɛɛ tɔm kiɖeɖetu+ ndʋ tɩ-yɔɔ Ɛsɔ kulaa yɔ, ndʋ paamɛsɩ-tʋ ɖooo lɔŋ yɔ. 26 Ɛlɛ patɩŋnɩ Masɩ nzɩ sɩyɔɔdʋʋ natʋ tɔm yɔ sɩ-yɔɔ nɛ palɩzɩ-tʋ nɛ pawɩlɩ* lɛɛlɛɛyɔ, nɛ peyele nɛ patɩlɩ-tʋ ajɛɛ tɩŋa hɛkʋ taa ɛzɩ tamtam Ɛsɔ ɖʋʋ paɣtʋ yɔ, se pɩsa nɛ ɛyaa wɛɛnɩ tisuu nɛ paña; 27 Ɛsɔ weyi e-ɖeke ɛkɛ lɔŋsɩnɖʋ yɔ,+ pasamɩ-ɩ tam tam pɩtɩŋnɩ Yesu Krɩstʋ yɔɔ. Amɛn.