Galaatii mba
5 Tɩ-yɔɔ wɛʋ mbʋ, pɩ-yɔɔ Krɩstʋ holi-ɖʋ. Pʋyɔɔ lɛ, ɩɖɔkɩ mɩ-tɩ kpam,+ nɛ ɩtaatasɩ mɩ-tɩ sʋzʋʋ yomiye sʋʋtʋ ɖaʋ tɛɛ.+
2 Ɩna! Ma Pɔɔlɩ, meheyiɣ-mɩ se ye iyeba nɛ pɛpɛlɩ-mɩ yɔ, Krɩstʋ ɛɛtasɩɣ-mɩ wɛʋ wazaɣ nakɛyɛ.+ 3 Mantasɩɣ lɩzʋʋ aseɣɖe ɛyʋ weyi eyeki nɛ pɛpɛlɩ-ɩ yɔ se pɩkɛnɩ-ɩ kɩjɛyʋʋ se ɛɖɔ Paɣtʋ tɩŋa yɔɔ.+ 4 Mɩ mba ɩñɩnɩɣ se patɩŋnɩ paɣtʋ yɔɔ nɛ payaa-mɩ se siɣsiɣ tɩnaa yɔ, ɩyasɩ mɩ nɛ Krɩstʋ mɩ-hɛkʋ taa;+ ɩha siɣye e-lootiye. 5 Ða lɛ, fezuu yɔɔ ɖɩtɩŋɩɣna nɛ ɖɩɖaŋɩɣ kpam siɣsiɣ wɛtʋ ndʋ ɖɩwɛnɩ ti-lidaʋ yɔ, ndʋ tɩlɩɣnɩ tisuu taa yɔ. 6 Mbʋ pʋyɔɔ yɔ mba pa nɛ Krɩstʋ Yesu pɛwɛ nɔɔ kʋɖʋmaɣ taa yɔ pɛ-ɛsɩndaa lɛ, pɛlɩtʋ yaa kɩdɩbɛlɩtʋ fɛyɩnɩ wazaɣ nakɛyɛ;+ ɛlɛ tisuu mbʋ pɩtɩŋɩɣnɩ sɔɔlɩm yɔɔ nɛ pɩlakɩ tʋmɩyɛ yɔ, mbʋ wɛnɩnɩ wazaɣ.
7 Iseɣaɣ camɩyɛ.+ Aɖaŋ-mɩ se ɩtaatasɩ toovenim ñam? 8 Pɩtɩkɛ Weyi ɛyaɣ-mɩ yɔ ɛnʋ ɖaŋnɩ-mɩ se ɩtaatasɩ toovenim ñam. 9 Lɔlɔm pazɩ yem lakɩ nɛ mʋtʋ kpeekpe ñɩŋɩɣ.+ 10 Man-taa tɛma se mɩ mba mɩ nɛ Kɩbaɣlʋ ɩwɛ nɔɔ kʋɖʋmaɣ yɔ,+ ɩɩkaɣ wɛnʋʋ lɩmaɣza wena awɛ ndɩ nɛ ma-ñɩna yɔ; ɛlɛ weyi ɛcɛyɩɣ-mɩ yɔ,+ paa ɛtɩɩkɛ anɩ yɔ, tɔm hʋʋ mbʋ ɛmʋnaa yɔ, pɩkaɣ-ɩ talʋʋ. 11 Ma lɛ, koobiya, ye halɩ nɛ sɔnɔ menɖiɣni pɛlɩtʋ tɔm susuu, ɛbɛ yɔɔ peɖiɣni-m nazʋʋ halɩ nɛ sɔnɔ yɔ? Ðɩnɛ ɛlɛ nazɩm sizika*+ tɩtasɩ kɛʋ mbʋ pituuluu yɔ. 12 Ɛyaa mba pañɩnɩɣ se pesidi mɩ-lɩmaɣza yɔ, me-liu wɛɛ se peyele nɛ palɩzɩ pa-ladɩwee.*
13 Koobiya, paya-mɩ se ɩwɛɛ mɩ-tɩ yɔɔ; ɛlɛ ɩtaakpaɣ tɩ-yɔɔ wɛʋ mbʋ ɛzɩ waɖɛ naɖɩyɛ yɔ nɛ ɩkʋʋ mi-tomnaɣ kɔɖɛyɩ;+ ɛlɛ ɩtɩŋnɩ sɔɔlɩm yɔɔ nɛ ɩɖʋ ɖama lɩm ɛzɩ yomaa yɔ.+ 14 Mbʋ pʋyɔɔ yɔ pekpeɣli Paɣtʋ tɩŋa paɣtʋ kʋɖʋmtʋ taa, ndʋ yɔ: «Sɔɔlɩ ɛyʋ lɛlʋ* ɛzɩ ña-maɣmaɣ yɔ.»+ 15 Ɛlɛ ye ɩwɛɛ nɛ ɩñasɩɣ ɖama nɛ ɩcɩyɩɣ ɖama yɔ,+ ɩkpa mɩ-tɩ nɛ pɩtaakɛdɩ nɛ ɩɖɩzɩ ɖama.+
16 Ɛlɛ meheyiɣ-mɩ se: Itaayele ɖɔm fezuu taa,+ ɖɩnɛ ɛlɛ ɩɩkaɣ labʋ tomnaɣ sɔɔlɩm* nabʋyʋ kaaʋ.+ 17 Mbʋ pʋyɔɔ yɔ tomnaɣ sɔɔlɩm yɔɔ lɛ, kakaɖɩɣnɩ fezuu nɛ fezuu ñakaɖɩɣnɩ tomnaɣ; pakaɖɩɣnɩ ɖama, pʋyɔɔ ɩɩlakɩ mbʋ ɖeyi ɖeyi ɩsɔɔlaa se ɩla yɔ.+ 18 Pɩtasɩ lɛ, ye fezuu eɖiyiɣni-mɩ yɔ, ɩfɛyɩ paɣtʋ tɛɛ.
19 Piyele nɛ pɩnaɣ tomnaɣ lakasɩ kaɣlaa, nɛ nzɩ yɔ kʋzʋʋ kɩdɛkɛdʋʋ,*+ azuluma, lakasɩ nzɩ sɩwɛ fɛyɛ yɔ,*+ 20 sɩɩnaa latʋ, feziŋ kɩdɛkɛdɩŋ yaʋ,*+ koyindiye, you, sʋsɩ, pana kadadayaɣ, paɖɩyɛ, tayʋʋ, kɩjaʋ yɔɔ agbaa, 21 ɛsɩsɛmɩyɛ, sʋlʋm kpaŋʋʋ,+ kazandʋ ndʋ tɩ-taa pɛɖɛlɛsɩɣ niye yɔ, nɛ lakasɩ sɩnɛ sɩ-ɖɔndɩnaa.+ Manpakɩ-mɩ lakasɩ nzɩ sɩ-yɔɔ, ɛzɩ maatɛm-mɩ paɣʋ yɔ, se mba palakɩ lakasɩ nzɩ yɔ, paakaɣ hiɣu Ɛsɔ Kewiyaɣ.+
22 Piyele nɛ piye nɖɩ fezuu lʋlʋʋ yɔ nɖɩ yɔ sɔɔlɩm, taa leleŋ, laŋhɛzɩyɛ, suuɖu, camɩyɛ lakasɩ, kɩbandʋ labʋ,+ tisuu, 23 hɛɛɛ wɛtʋ, tɩ ɖɔkʋʋ.+ Paɣtʋ natʋyʋ ɛɛkaɖɩɣnɩ wɛtʋ tʋnɛ. 24 Pɩtasɩ lɛ, mba pɛkɛ Krɩstʋ Yesu pʋyʋ yɔ, pakam tomnaɣ nɛ kɔ-kɔɖɛyɩ nɛ kɔ-sɔɔlɩm sizika yɔɔ.+
25 Ye ɖiyeki nɛ fezuu ɖiyiɣ ɖe-wezuu caɣʋ yɔ, ɖiwoki pɩ-yɔɔ ɖɔɖɔ nɛ ɖɩɖɔŋ ɖɔnɛ nɖɩ ɖɩtʋʋzaa yɔ fezuu taa.+ 26 Ðɩtaapɩsɩ tɩ kpazɩyaa,+ ɖɩtaalʋkɩnɩ ɖama,+ ɖɩtaalakɩ ɛsɩsɛmɩyɛ.