Awiya takayaɣ kajalaɣ ñɩŋga
17 Nɛ Tisibii tʋ Eliya,*+ weyi ɛ-tɛ wɛ Galaadɩ+ yɔ, eheyi Ahaabɩ se: «Izrayɛɛlɩ tɛ Ɛsɔ Yehowa weyi mɛnsɛɣ-ɩ yɔ* ɛñɩtʋʋ nɛ ɛwɛɛ wezuu yɔ, pɩnzɩ sɩnɛ sɩ-taa ɖoluu ɛɛkaɣ kpaʋ nɛ tɛʋ ɛɛkaɣ nɩʋ nɛ pɩtɩtɩŋnɩ mɔn-tɔm yɔɔ!»+
2 Yehowa tɔm talɩ Eliya se: 3 «Kʋyɩ cɩnɛ, nɛ ŋwolo wɩsɩ ɖɩlɩyɛ hɔɔlʋʋ taa nɛ ŋmɛlɩ Keritɩ Fɛɛʋ* taa, Yɔɔrdaŋ wɩsɩ ɖɩlɩyɛ taa. 4 Ŋkaɣ ñɔʋ lemeɣa taa lɩm, nɛ mankaɣ kaŋgala ɖʋʋ paɣtʋ se akɔŋnɩ-ŋ tɔɔnaɣ peeɖe.»+ 5 Kpaagbaa mbʋ lɛ, ɛɖɛɛ nɛ ɛla ɛzɩ Yehowa yɔɔdʋʋ yɔ; ewolo nɛ ɛcaɣ Keritɩ Fɛɛʋ* taa, Yɔɔrdaŋ wɩsɩ ɖɩlɩyɛ taa. 6 Nɛ kaŋgala kɔŋnaɣ-ɩ kpɔnɔ nɛ nandʋ tanaŋ tɛɛ nɛ kpɔnɔ nɛ nandʋ ɖanaɣ yɔɔ, nɛ ɛñɔʋ lemeɣa taa lɩm.+ 7 Ɛlɛ kɩyakɩŋ nɩɩyɩ wayɩ lɛ, lemeɣa taa lɩm sɔɔ,+ mbʋ pʋyɔɔ yɔ tɛʋ tɩtasɩ nɩʋ ɛjaɖɛ taa.
8 Nɛ Yehowa tɔm talɩ-ɩ se: 9 «Kʋyɩ nɛ ŋwolo Sarfaatɩ, ŋgʋ kɩwɛ Siidɔɔ yɔ kɩ-taa, nɛ ŋcaɣ peeɖe. Na! Mankaɣ halʋ lelu nɔɔyʋ ɖʋʋ paɣtʋ peeɖe se ɛha-ŋ tɔɔnaɣ.»+ 10 Peeɖe Eliya kʋyaa nɛ ewolo Sarfaatɩ. Ɛtalɩ tɛtʋ nɔnɔɔ taa lɛ, halʋ lelu nɔɔyʋ kaawɛɛ nɛ ɛcaɣ ɖasɩ. Nɛ ɛyaa halʋ ɛnʋ nɛ ɛtɔ se: «Mentendi-ŋ, kɔnɩ-m lɩm pazɩ kɔpʋ taa nɛ mɔñɔɔ.»+ 11 Halʋ wokaɣ lɩm kɔnʋʋ lɛ, Eliya yaa-ɩ nɛ ɛtɔ se: «Mentendi-ŋ, kɔnɩ-m ɖɔɖɔ kpɔnɔ hɔɔlaɣ ñe-nesi taa.» 12 Nɛ ɛlɛ cosi-i se: «Ñɛ-Ɛsɔ Yehowa ñɩtʋʋ nɛ ɛwɛɛ wezuu yɔ, mɛnfɛyɩnɩ kpɔnɔ, mbʋ pi-ɖeke mɛwɛna yɔ lɛ mʋlʋm nikpiɖe peeɣa sɔsɔɔ taa nɛ num pazɩ peeɣa cikpelaɣ taa.+ Lɛɛlɛɛyɔ menɖiɣni ɖasɩ caʋ, mowoki se mala nabʋyʋ nɛ ma nɛ man-pɩyalʋ ɖɩtɔɔ. Ðɩtɛŋ tɔɔʋ lɛ, ɖɩkaɣ sɩbʋ.»
13 Nɛ Eliya heyi-i se: «Sɔɔndʋ ɛtaakpa-ŋ. Wolo nɛ ŋla ɛzɩ ŋyɔɔdʋʋ yɔ. Ɛlɛ kajalaɣ lɛ, kpaɣ mbʋ pɩwɛɛ yɔ nɛ ŋlabɩ-m kpɔnɔ cikpeluu kulukulu ñɩŋgʋ nakʋyʋ nɛ ŋkɔnɩ-m. Pʋwayɩ lɛ, ŋpɩzɩɣ nɛ ŋla nabʋyʋ nɛ ña nɛ ña-pɩyalʋ ɩtɔɔ. 14 Mbʋ pʋyɔɔ yɔ tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ: “Mʋlʋm ɛɛkaɣ tɛm peeɣa sɔsɔɔ taa, nɛ num ɛɛkaɣ tɛm peeɣa cikpelaɣ taa nɛ pɩkɔɔ pɩtalɩ kɩyakʋ ŋgʋ Yehowa yeki nɛ tɛʋ nɩɩ tɛtʋ yɔɔ yɔ.”»+ 15 Peeɖe halʋ ɛnʋ ewoba nɛ ɛla ɛzɩ Eliya yɔɔdʋʋ yɔ, nɛ ɛ nɛ ɛ-ɖɩɣa taa mba nɛ Eliya pɔtɔɔ tɔɔnaɣ kɩyakɩŋ sakɩyɛ.+ 16 Mʋlʋm tɩtɛ peeɣa sɔsɔɔ taa, nɛ num tɩtɛ peeɣa cikpelaɣ taa, ɛzɩ Yehowa kaatɩŋnʋʋ Eliya yɔɔ nɛ ɛyɔɔdɩ yɔ.
17 Pʋwayɩ lɛ, halʋ weyi ɛtɩnɩ ɖɩɣa yɔ ɛ-pɩyalʋ hɩnɩ kʋdɔŋ, nɛ ɛ-kʋdɔŋ ŋgʋ kɩkpa ɖoŋ siŋŋ nɛ ɛsɩ.*+ 18 Peeɖe halʋ ɛnʋ eheyi Eliya se: «Hayɩ Ɛsɔ toovenim tʋ tɛ ɛyʋ, ma nɛ ŋ suwe? Ŋkɔm se ŋtɔzɩ-m man-kɩwɛɛkɩm yɔɔ nɛ ŋkʋ man-pɩyalʋ?»+ 19 Ɛlɛ Eliya heyi-i se: «Cɛlɩ-m ña-pɩyalʋ.» Nɛ ɛmʋ-ɩ halʋ ɛnʋ ɛ-nɔkɔyʋʋ taa nɛ ɛkpanɩ-ɩ ɛsɔdaa kuduyuu taa, ɖenɖe ɛɛwɛɛ yɔ, nɛ ɛhɩzɩ-ɩ ɛ-maɣmaɣ ɛ-kaɖʋ yɔɔ.+ 20 Ɛma kubuka nɛ ɛyaa Yehowa nɛ ɛyɔɔdɩ se: «Hayɩ mɛ-Ɛsɔ Yehowa,+ ŋkɔŋnɩ kaɖɛ halʋ lelu weyi ɛ-tɛ mɛwɛɛ yɔ ɛ-yɔɔ, nɛ ŋyele nɛ ɛ-pɩyalʋ sɩ na?» 21 Nɛ elosi ɛ-tɩ pɩɣa ŋga kɔ-yɔɔ tam nabudozo nɛ ɛma kubuka nɛ ɛyaa Yehowa nɛ ɛyɔɔdɩ se: «Hayɩ mɛ-Ɛsɔ Yehowa, mentendi-ŋ, yele nɛ pɩɣa kanɛ ke-wezuu* pɩsɩ ka-taa.» 22 Yehowa welisi Eliya adɩma,+ nɛ pɩɣa ŋga ke-wezuu* pɩsɩ ka-taa, nɛ kaɖaɣnɩ wɛʋ wezuu.*+ 23 Eliya kpaɣ pɩɣa nɛ ɛsɔdaa kuduyuu tɛɛ nɛ etini-kɛ ɖɩɣa taa nɛ ɛcɛlɩ-kɛ ko-ɖoo; nɛ Eliya yɔɔdɩ se: «Na, ña-pɩyalʋ wɛ wezuu.»+ 24 Peeɖe halʋ heyi Eliya se: «Lɛɛlɛɛyɔ lɛ, manawa se ŋkɛ Ɛsɔ tɛ ɛyʋ toovenim taa,+ nɛ Yehowa tɔm ndʋ tɩwɛ ñɔ-nɔɔ taa yɔ tɩkɛ toovenim.»