Yereemii
25 Tɔm tʋnɛ tɩtalɩnɩ Yereemii, Yuuda samaɣ kpeekpe yɔɔ Yuuda wiyaʋ, Yoziyaasɩ pɩyalʋ Yehoyakim pɩnaɣ 4 ñɩŋga taa,+ ŋga kaakɛ Babilɔɔnɩ wiyaʋ Nabukodonozɔɔrɩ* pɩnaɣ kajalaɣ ñɩŋga yɔ. 2 Tɔm tʋnɛ nayʋ Yereemii yɔɔdɩ Yuuda samaɣ kpeekpe yɔɔ nɛ Yeruzalɛm taa mba kpeekpe yɔɔ:*
3 «Kpaɣnɩ Amɔɔnɩ pɩyalʋ Yoziyaasɩ,+ Yuuda wiyaʋ, pɩnaɣ 13 ñɩŋga nɛ pɩkɔɔ pɩtalɩ sɔnɔ, pɩnzɩ 23 yɔ, Yehowa tɔm talɩ-m; nɛ mɛwɛɛ nɛ mɔyɔɔdʋʋnɩ-mɩ nɛ mɛlɛlɩɣ tam sakɩyɛ,* ɛlɛ iiwelisiɣ.+ 4 Nɛ Yehowa tiyi ɛ-lɩmɖʋyaa mba payɩ pɛkɛ nayaa yɔ mɩ-cɔlɔ, etiyaɣ-wɛ nɛ ɛlɛlɩɣ tam sakɩyɛ,* ɛlɛ itiwelisi yaa ɩtɩkʋ nɩŋgbaŋʋʋ se ɩnɩɩ.+ 5 Pɔyɔɔdaɣ se: “Ðitendi-mɩ, mɩ-taa paa weyi lɛ eyele ɛ-nʋmɔŋ kɩdɛkɛdɩŋ nɛ ɛ-lakasɩ kɩdɛkɛdɩsɩ nɛ ɛpɩsɩ;+ ɖɩnɛ ɛlɛ ɩkaɣ wobu pɩ-yɔɔ nɛ ɩcaɣ alɩwaatʋ sakɩyɛ ɛjaɖɛ nɖɩ Yehowa kaaha mɩ nɛ mɩ-cɔzɔnaa ɖooo lɔndaa yɔ ɖɩ-taa. 6 Ɩtaatɩŋ ɛsɔnaa lalaa wayɩ se ɩsɛɛ-wɛ nɛ iluŋ pɛ-tɛɛ, nɛ ɩɖʋʋ-m ɖɩwɩzɩyɛ nɛ mi-nesi tɛɛ tʋma; pɩtɩkɛ mbʋ yɔ mankaɣ kɔnʋʋ asɛyʋʋ mɩ-yɔɔ.”
7 «“Ɛlɛ itiwelisini-m; ɩɖʋ-m ɖɩwɩzɩyɛ nɛ mi-nesi tɛɛ tʋma, nɛ ɩkɔnɩ asɛyʋʋ mɩ-maɣmaɣ mɩ-yɔɔ;”+ Yehowa yɔɔdʋʋna.
8 «Pʋyɔɔ lɛ, tɔm tʋnɛ yoyaa tɛ Yehowa yɔɔdʋʋ: “‘Ɩtɩña mɔn-tɔm; pʋyɔɔ lɛ, 9 mentiyiɣ nɛ payaa hayo kiŋ hɔŋ kpeekpe;+ mentiyiɣ nɛ payaa ma-lɩmɖʋyʋ Babilɔɔnɩ wiyaʋ Nabukodonozɔɔrɩ,*+ nɛ mankaɣ-wɛ kɔnʋʋ ɛjaɖɛ ɖɩnɛ ɖɩ-wayɩ+ nɛ ɖɩ-taa mba wayɩ nɛ ajɛɛ anɛ, wena awɛ pɩ-cɔlɔ kpɛɛɛ yɔ a-tɩŋa a-wayɩ.+ Mankaɣ-wɛ ɖɩzʋʋ nɛ meyele nɛ papɩsɩ sɔɔndʋ pʋyʋ nɛ mbʋ panaɣ-pʋ nɛ pahʋlʋʋ kancʋʋlaɣ yɔ nɛ tamtam njɛyɛ, Yehowa yɔɔdʋʋna. 10 Mankaɣ yebu nɛ amɛya taŋ nɛ taa leleŋ taŋ sɩɩ tɩnaɣ,+ mankaɣ yebu nɛ walʋ nɔɔ nɛ asɛyʋ kɩfalʋ nɔɔ,+ namɩyɛ taŋ nɛ kanɖʋ ñalɩmɩyɛ pɩsɩɩ tɩnaɣ. 11 Nɛ ɛjaɖɛ ɖɩnɛ ɖi-kpeekpe ɖɩkaɣ pɩsʋʋ njɛyɛ nɛ sɔɔndʋ pʋyʋ, nɛ pɩkaɣ pɔzʋʋ se ajɛɛ anɛ aɖʋ Babilɔɔnɩ wiyaʋ lɩm pɩnzɩ 70.’”+
12 «“Ɛlɛ pɩnzɩ 70 tɛŋ lɛ,+ mankaɣ pɔzʋʋ akɔnta Babilɔɔnɩ wiyaʋ nɛ ɛjaɖɛ nɖɩ,* pa-kɩdɛkɛdɩm yɔɔ,+ nɛ mankaɣ yebu nɛ Kalɩdee mba ɛjaɖɛ pɩsɩ ɛjaɖɛ nɖɩ peyebi-ɖɩ nɛ ɖɩpɩsɩ njɛyɛ yɔ tam,+ Yehowa yɔɔdʋʋna. 13 Mankaɣ yebu nɛ tɔm ndʋ payɩ mɔyɔɔdɩ ɛjaɖɛ ɖɩnɛ ɖɩ-yɔɔ yɔ tɩla, tɔm ndʋ payɩ pama takayaɣ kanɛ ka-taa yɔ, ndʋ Yereemii kaayɔɔdɩ ajɛɛ kpeekpe yɔɔ se tɩkaɣ labʋ yɔ. 14 Mbʋ pʋyɔɔ yɔ ajɛɛ sakɩyɛ nɛ awiya sɔsɔna+ kaɣ-wɛ pɩsʋʋ yomaa,+ nɛ mankaɣ-wɛ hɛyʋʋ pa-lakasɩ yɔɔ nɛ pa-maɣmaɣ pe-nesi tɛɛ tʋma yɔɔ.”»+
15 Mbʋ pʋyɔɔ yɔ tɔm tʋnɛ Izrayɛɛlɩ tɛ Ɛsɔ Yehowa heyi-m: «Mʋ pana tɛ vɛɛ kɔpʋ kʋnɛ me-nesi tɛɛ, nɛ ŋñɔzɩ-kʋ ajɛɛ wena a-cɔlɔ payɩ mentiyiɣ-ŋ yɔ. 16 Nɛ akaɣ ñɔʋ nɛ pɩcɛŋɛsɩ-yɛ nɛ alakɩ ɛzɩ kpanzɩyaa yɔ, laɣɖɛ nɖɩ mentiyiɣni a-hɛkʋ taa yɔ ɖɩ-yɔɔ.»+
17 Peeɖe mamʋ kɔpʋ ŋgʋ Yehowa nesi tɛɛ, nɛ mɔñɔzɩ-kʋ ajɛɛ wena a-cɔlɔ payɩ Yehowa tiyi-m yɔ:+ 18 manpaɣzɩnɩ Yeruzalɛm nɛ Yuuda tɛtʋ ndɩ ndɩ,+ kɩ-awiya nɛ kɩ-awumbiya, se pɩsa nɛ papɩsɩ njɛyɛ, sɔɔndʋ pʋyʋ, mbʋ panaɣ-pʋ nɛ pahʋlʋʋ kancʋʋlaɣ yɔ nɛ pɔlɔ pɩ-yɔɔ nɔɔ kɩdɛkɛdaɣ yɔ,+ ɛzɩ pɩwɛʋ sɔnɔ yɔ; 19 pʋwayɩ lɛ, Ejipiti wiyaʋ Farawɔɔ nɛ ɛ-lɩmɖʋyaa, ɛ-awumbiya, nɛ ɛ-samaɣ tɩŋa,+ 20 nɛ ajɛɛ ndɩ ndɩ taa ñɩma mba pesidi pɛ-hɛkʋ taa yɔ; Uzi ɛjaɖɛ taa awiya kpeekpe; Filistii mba+ ɛjaɖɛ taa awiya kpeekpe, Askelɔɔnɩ,+ Gaazaa, Ekrɔɔnɩ, nɛ mba pakazɩ Asɩdoodi taa yɔ; 21 Edom,+ Mowaabʋ,+ nɛ Amooni mba;+ 22 Tiirɩ awiya kpeekpe, Siidɔɔ+ awiya kpeekpe, nɛ lɩm hɛkʋ taa tɛtʋ ndʋ tɩwɛ teŋgu taa yɔ tɩ-awiya; 23 Dedaanɩ,+ Teema, Buuzi, nɛ mba payɩ pahʋm pa-nakpaaŋ yɔɔ ñɔsɩ yɔ;+ 24 Arabii ñɩma awiya+ kpeekpe nɛ ajɛɛ ndɩ ndɩ taa ñɩma mba pesidi pɛ-hɛkʋ taa nɛ pɛwɛɛ kañɩmbusuu taa yɔ pa-awiya kpeekpe; 25 Zimirii awiya kpeekpe, Elam+ awiya kpeekpe, nɛ Medii mba awiya+ kpeekpe; 26 nɛ hayo kiŋ awiya wena awɛ pɩ-cɔlɔ nɛ poliŋ taa yɔ a-kpeekpe, lɛlʋ ñɔʋ nɛ pɩtɛ lɛ lɛlʋ ñɔɔ, nɛ ɛjaɖɛ yɔɔ kewiyisi lɛɛsɩ kpeekpe nzɩ sɩwɛ tɛtʋ yɔɔ yɔ; nɛ pa-wayɩ lɛ, Seesaakɩ*+ wiyaʋ kaɣ ñɔʋ.
27 «Nɛ pɩwɛɛ se ŋheyi-wɛ se: “Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: ‘Ɩñɔɔ nɛ pɩkʋ-mɩ nɛ ihoo nɛ ɩtɔ nɛ ɩtɔlɩ nɛ ɩtaapɩzɩ nɛ ɩkʋyɩ,+ laɣɖɛ nɖɩ menɖiɣni tiyinuu mɩ-hɛkʋ taa yɔ ɖɩ-yɔɔ.’” 28 Nɛ ye pekizaa se paamʋʋ kɔpʋ ñe-nesi tɛɛ nɛ pɔñɔɔ yɔ, ŋheyi-wɛ se: “Tɔm tʋnɛ yoyaa tɛ Yehowa yɔɔdʋʋ: ‘Paa ɩɩlabɩ ɛzɩma, ɩñɔʋ! 29 Mbʋ pʋyɔɔ yɔ ɩna! Ye mɔnkɔŋnɩ asɛyʋʋ tɛtʋ ndʋ ma-hɩɖɛ wɛ tɩ-yɔɔ yɔ tɩ-yɔɔ kajalaɣ taa yɔ,+ mɩ yɔ, maakaɣ mɩ-nɩŋgbaŋʋʋ hɔm na?’”+
«“Mankaɣ mɩ-nɩŋgbaŋʋʋ hɔm, mbʋ pʋyɔɔ yɔ mɛwɛɛ nɛ mayaɣ laɣɖɛ se ɖiwolo tɛtʋ yɔɔ mba tɩŋa wayɩ,” yoyaa tɛ Yehowa yɔɔdʋʋna.
30 «Nɛ pɩwɛɛ se ŋsusi-wɛ natʋ tɔm tʋnɛ tɩ-tɩŋa nɛ ŋheyi-wɛ se:
“Yehowa kaɣ mʋdʋʋ nɛ ɛsɔdaa kiŋ,
Nɛ ɛkaɣ yebu nɛ panɩɩ ɛ-nɔɔ taŋ nɛ ɛ-ɖɩjaɣyɛ kiɖeɖeye taa.
Ɛkaɣ mʋdʋʋ ɖoŋ ɛ-ɖɩjaɣyɛ taa mba yɔɔ.
Ɛkaɣ kou ɛzɩ mba peɖiɣni viiñi pee fɛyʋʋ viiñi ɖɩfɛyɩyɛ taa yɔ,
Ɛkaɣ teu wabɩtʋ hendu tɛtʋ yɔɔ mba tɩŋa yɔɔ.”
31 “Kɔkɔɖɛ naɖɩyɛ kaɣ talʋʋ ɖooo tɛtʋ kamasɩ yɔɔ,
Mbʋ pʋyɔɔ yɔ tɔm natʋyʋ wɛ Yehowa nɛ ajɛɛ pɛ-hɛkʋ taa.
Ɛ-maɣmaɣ ɛkaɣ tɔm hʋnʋʋ ɛyaa kpeekpe.*+
Nɛ ɛkaɣ cɛlʋʋ kañatʋ tɩnaa se pakʋ-wɛ nɛ laɣɖɛ,” Yehowa yɔɔdʋʋna.
32 Tɔm tʋnɛ yoyaa tɛ Yehowa yɔɔdʋʋ:
“Ɩna! Asɛyʋʋ nakʋyʋ ɖiɣni yɛlʋʋ kpaɣ ɛjaɖɛ lɛɛɖɛ nɛ ŋwolo lɛɛɖɛ taa,+
Nɛ tɛʋ sɔsɔʋ ŋgʋ kɩnɩɣnɩ helim yɔ kɩkaɣ lɩnʋʋ tɛtʋ hɔɔlɩŋ weyi ɩkɩlɩ posuu yɔ ɩ-taa.+
33 «“Nɛ mba Yehowa kʋʋ evemiye nɖɩ ɖi-wiye yɔ, pakaɣ wɛʋ kpaɣnɩ tɛtʋ kamaɣ kʋɖʋmaɣ yɔɔ nɛ piwolo tɛtʋ kamaɣ lɛɛka yɔɔ. Paakaɣ caɣʋ kʋñɔwiye pɔ-yɔɔ, paakaɣ-wɛ kpeɣluu nɛ paakaɣ-wɛ pim. Pakaɣ pɩsʋʋ ɛzɩ huɖe yɔ tɛtʋ yɔɔ.”
34 Iwii, mɩ ninɖiɣyaa, nɛ ɩma kubusi!
Ipilimi, mɩ mba ɩkɛ ewiɖe taa ɛyaa sɔsaa yɔ,
Mbʋ pʋyɔɔ yɔ alɩwaatʋ talaa se pakʋ-mɩ nɛ pamɩzɩ-mɩ,
Nɛ ɩkaɣ tɔlʋʋ ɛzɩ ñanaɣ ŋga kamʋ ñɩm yɔ!
35 Ninɖiɣyaa fɛyɩnɩ lone nɖɩ ɖɩ-taa pese nɛ powolo yɔ,
Nɛ mba pɛkɛ ewiɖe taa ɛyaa sɔsaa yɔ, paapɩzɩɣ pese nɛ patʋlɩ.
36 Iwelisi! Ninɖiɣyaa makɩ kubusi
Nɛ mba pɛkɛ ewiɖe taa ɛyaa sɔsaa yɔ pɛwɛɛ nɛ pewiɣ,
Mbʋ pʋyɔɔ yɔ Yehowa ɖiɣni wɛɛkʋʋ pa-kpɩna ñɩtʋ ɖɩdɔɔyɛ.
37 Nɛ Yehowa pana sɔsɔna yɔɔ lɛ,
Ðɩjaɣyɛ lona wena aakɛ laŋhɛzɩyɛ lona yɔ, wezuu tɩtasɩ wɛʋ a-taa.